大頭妹 37個月

眨下眼大頭妹就 3歲 1個月啦﹗依家坐地鐡要買飛啦﹗食BUFFET都要比錢啦﹗入迪士尼都要買飛啦﹗今年 9月就升 K1啦﹗真係大個囡啦﹗不過仲係成日傻傻下﹗

講開升 K1，幫大頭妹轉到國際班 (同一間幼稚園，不過依家大頭妹讀本地班)，其實上次去完觀課都幫佢申請咗，不過要交新一期書簿費，所以又問一問老師，好在轉得成﹗因為最近幫佢睇暑期班，發現學英文係 "勁貴" 架﹗﹗﹗$3XXX一個月，等於一個月幼稚園學費？﹗有冇媽咪嘅小朋友上梗？﹗有冇人話我知係唔係真係咁有用？﹗我真係唔捨得﹗﹗﹗轉國際班就全英普上堂 (雙班主任)，都係多大約 $1200學費，好似成本效益高啲﹗﹗﹗又唔洗額外花時間補英文/ 普通話 (理想咁諗)﹗而且我地都唔識教佢普通話﹗

又 講開暑期班，有冇媽咪有好介紹？﹗其實我睇咗少少，不過因為要工人姐姐帶，其實唔多選擇 (即係都係要係康怡學林上，咁起碼唔洗過馬路)，我見好多都話就FULL，我都仲未有時候去報，上次公眾假期上去，好多間都無開，我都仲諗梗上英文/ 跳舞/ 畫畫好？﹗又諗緊過最化算可以買 2張KIDDY VILLAGE的月票，叫工人姐姐日日同大頭妹同小丸子去玩 1-2個鐘，因為我又唔係想佢學咩，我怕佢悶之嘛﹗

最近無意中比我發現，大頭妹比我想像中認得多野，上次小丸子上完 PLAYGROUP，老師比咗 3張字卡我地返去溫書，估唔到大頭妹竟然識 KISS同LOVE字，平時我地啲字卡都有圖，所以我成日覺得識都唔出奇，真係要比多啲心機教大頭妹，唔好成日覺得佢都唔識/ 唔洗識，就咩都留返比老師教﹗

上次去做MODEL的相: