帶大頭妹做義工 - 探訪深水埗套房家庭

2014年 9月6日 (星期六)

今日帶大頭妹做義工，探訪深水埗的套房家庭，送上中秋節禮物。

今次的主辦機構 - 青少年勉勵基金的創辦人就是阿旺的好朋友，佢問阿旺有冇興趣帶大頭妹參加，因為佢覺得依家呢代的小朋友物質豐富，好多時候都唔識得 "珍惜"，帶佢地去認識社會需要幫助的一群，令小朋友明白自己的幸福，學懂珍惜﹗說來慚愧，有時我的確覺得家中 2位小姐的物資太豐富，不懂得珍惜，但...是小朋友的錯嗎？﹗我家大頭妹甚少扭計買玩具，衫褲鞋襪就更加少，但佢有個 "愛敗家媽媽"，由之前戒食手指，到最近想佢自己自動做功課，其他媽媽問我有沒有東西是大頭妹好想要？﹗我的答案是 "無"，從來佢想要的只有多無少﹗要學懂 "節制" 的好似是我﹗

講返今次的主辦機構，佢地現時大約服務 300多個家庭，最初是以青少年為目標，後來發現佢地大多來自套房家庭，所以就擴大服務的對象至小朋友。今次探訪大約 30-40個深水埗的套房家庭，只是佔大約 10%。

 起初佢叫我地要有心理準備，去探訪的家庭生活環境比較差，不過其實佢地的義工已經 "篩選" 過，環境都是比較好少少的，怕我地第一次探訪就嚇親我地。另一方面，其實我同阿旺都是屋村大，我自己細個都是住太子的唐樓 (其實好近今次我地探訪的家庭，不過太細個已經唔記得了) ﹗當然對大頭妹會是另一個體會﹗後來大頭妹有問我點解佢地間屋咁細，又無廚房，問我佢地有冇野食，我話當然有啦，其實佢地都有廚房，不過細啲。

因為今次機構想我地 "感受" 一下平時基層家庭每日可能為慳幾蚊而行幾十分鐘返放學，所以我地全部義工都要先到李鄭屋村的青年中心集合，再步行去深水埗﹗大頭妹的表現十分好，出發前已經同佢講好，今次是去探訪有需要幫助的小朋友家庭，佢地每日都要行好遠返放學，又因為住的地方沒有電梯，每日都要自己行﹗剛巧探訪的兩個家庭都是住唐8樓，大頭妹全程自己行無扭抱！無叫辛苦！

早上同爺爺嫲嫲飲茶，中午就出發啦﹗

其實阿旺最近都忙死死下，一星期返 2日學，星期六間中要返工，但 weekday好多時又太忙，請唔到 rest day，佢蓄埋蓄埋應該有勁多假期﹗我成日都話佢 "燃燒" 生命﹗

由於是初成立，義工人手至到物資都不太足夠﹗今次的物資，大部份都是阿旺的朋友自己買的﹗而義工就是自己的朋友﹗

出發前講下活動的細節﹗佢提我地不要拍照，唔想受訪家庭覺得自己 "收人恩惠"，就要 "被拍照" 留念﹗亦唔好問人地 "點解"？點解住套房呀？﹗點解唔開冷氣呀？﹗

起初沒有派貼紙比大頭妹，佢不停嘮嘮叨叨，最後阿旺都幫佢攞咗一張，佢問我貼係邊，我叫佢貼係當眼的地方，一不留神...佢自己貼係自己額頭，搣出來的時候...有好好的脫毛效果﹗

出發啦﹗要自己睇地圖行，所以原本 20分鐘的路程，加上帶著大頭妹，變成 30分鐘有多﹗

行到一半已經出晒汗﹗

問佢辛唔辛苦，佢話唔辛苦，因為哥哥姐姐每日都係咁行返學放學，估唔到同佢講過一次佢就記得﹗

 今次探訪的第一個家庭大約 100呎，有自己的廚房﹑廁所，全屋得 2張床同 2張摺枱，有冷氣，沒有電視 (後來聽義工講，住得越高的，地方相對會大少少)。我地上去的時候佢地有開冷氣，但明顯地是因為佢地知道有人探訪，所以開定冷氣等我地﹗同佢地傾計的時 候，明顯覺得個小朋友好無自信心，唔多言，媽媽話佢成績普通，不過自己都唔識教，所以都無辦法，好彩學校都有功課班。另外又好少參加課外活動，主要當然都是錢的問題。其次是佢地住 8樓，其實返到屋企，真是連街都好少去﹗

拿著地址的時候見到 8樓，一心仲希望會唔會有機會有電梯呢？﹗答案是無嘅﹗﹗﹗

其實本來這類唐樓大多是 1梯 2伙，依家就間成 1梯 6伙 (可能更多)﹗

第 2個家庭是一個 8樓天台屋單位，地方相對較大。探訪的是 2姊妹，大的小五﹑細的小一，可能本身都有 2個小朋友，爸爸媽媽都有返工，相對經濟好少少，較活潑，我同媽媽傾計的時候，大頭妹同爸爸就同 2姊妹玩，最後玩到唔捨得走﹗

我又滿懷希望會有電梯，結果都是沒有的﹗

不得不再次讚大頭妹，全程自己行，又無叫辛苦，仲叫我行快啲﹗我每次行到 6樓都要停一停﹗

其實我自己都是第一次到訪天台屋﹗原來個單位，如果由大廈正門上，要 "跨欄" 先過到去﹗雖然無危險性，不過我最後都選擇行去後門，行一個大圈先去到﹗我地去一次，可能唔覺得辛苦，但如果你每日返學放學，去街都要行 8層樓梯，仲要跨過欄河先返到屋企，真是好辛苦﹗當對我地以前住公屋叫基層，明顯依家的居住環境是下降梗﹗

我地最後一組返到中心，交完問卷就走得啦﹗

大頭妹今日真是累透了﹗

我自己好希望透過不同的義工的活動 (上次去麥當勞賣獎劵都未寫 blog)，自小培養大頭妹樂於幫人的性格，明白施比受更有福﹗不過大頭妹仲細，要佢明白可能都仲需要時間，好似呢頭同佢講有啲小朋友無佢咁幸運，有咁多玩具，轉個頭就已經因為唔比佢睇 ipad/ 去游水無帶佢用開的水泡...等等...小事而喊咗 15分鐘﹗我真是要慢慢再同佢 "輔導" 一下﹗

最後，我地聖誕節都可能會做多一次探訪，如果大家睇完，有意參加做義工，可以去我地的 facebook page inbox 我，我會同返機構個邊夾返，睇下人手同物資的安排﹗

http://www.theyouth.org.hk/about.php

大家 like咗我地個 facebook page未呀？未就快啲 like啦﹗