打邊爐【海港薈】@20160227

天氣凍凍地的時間，就會想打邊爐，而且唔知我係唔係因為『血虛』，每個月總有啲時間想食牛牛，所以打邊爐就最岩啦﹗不過其實係太古區，打邊爐唔多選擇，我上過 open rice 睇，就只有【海港薈】同【牛陣】。牛陣食過一次，普普通通，食物唔多選擇，價錢亦唔平，大約 $200/位食普通牛，如果食貴牛就要成 $300-400/位。今日見好齊人，有大頭婆婆﹑大頭姨姨同男朋友仔，加埋我同阿旺....5個大人，可以去試下海港薈。

um...因為我...訓晏覺訓晏咗...所以有得試下個宵夜時段，即是 9:00後，原來抵食好多呀﹗

本地手切肥牛 $98 (正價 $168)﹗真是抵到無朋友，阿旺話 $98，自己去街市都未必買到﹗

蠔又是 $98 (正價 $138)，都是個句...呢個價同超市差唔多﹗

都好大隻下架﹗

呢碟係正價 $58...唔抵...不過我地全家都鍾意食菇就無辦法啦﹗

蔬菜藍好抵 $28﹗仲要下面全部都是豆苗，不過我估日日唔同既，唔會日日都豆苗呱，可以我個日賣唔晒先有豆苗，真是好抵...又是個句...街市買都唔得啦﹗

蝦滑 $38，都ok。

烏東 $18，我覺得算平啦﹗

湯底是姬松茸雞湯 $88﹗我覺得都幾好味，阿旺就話...都是味精湯啦﹗不過我見都有元貝仔﹑蝦米，都幾多姬松茸同雞...我信...唔係太多味精...

5個大人吃飽飽都是 $900，我地叫咗 3碟牛，所以叫做幾抵，下次會再幫襯﹗

大家 like 咗我地個 facebook page 未呀？﹗未就快啲 like啦﹗