日本東京超開心﹑超疲倦之旅 Day 1

今年的第一次旅行...目的地係日本東京。上一次去日本已經７ 年前，係跟旅行團，同媽咪&細妹去的。今次係同男朋友去&自由行，感覺好唔同。
出發前已經比男朋友問個行程會唔會太緊迫﹒﹒﹒結果大家而家可以睇睇。

在此要特別要多謝大少奶＆Vanlily﹗因為大少奶介紹咗本好好的東京自由行的旅遊書比我，而Vanlily好比心機咁寫Blog，介紹咗好多旅遊書唔會詳細寫的資料，兩樣嘢對我今次的行程好有用。

好﹗出發啦﹗２００７年１月７日
Day 1:  香港 -> 日本東京成田機場 -> 新宿Keio Plaza Hotel -> 新宿Shopping -> 六歌仙(晚餐)
我地坐９:５５機出發，去到日本成田機場已經３點。過海關&將之前在香港預先買咗的機場巴士coupon換成ticket，到上車已經４點...比噃半日我呀

機埸巴士- 單程３０００yen (around$２００)，車程大約９０分鐘。坐完就知點解咁貴...去新宿都分開幾班巴士，每班車只停兩個站(唔知係唔係班班都係咁，最少我坐嗰班係)。一個站都有兩個服務員，簡直就係創造就業，亦唔怪得會咁塞車。

其實上年都冇去過旅行，所以今次就揀咗間五星酒店，唔好刻薄自己。嘩﹗點知都係好細吓。今次住新宿的Keio Plaza Hotel，揀新宿貪佢交通方便，Keio Plaza都算ok方便。 不過，其實留在酒店的時間真係好少，值唔值真係見仁見智。如果唔係，可以揀啲近車站的酒店，咁行完一日返酒店，就可以舒服啲。

到達酒店，用最快的速度攪掂，都已經１８:００，太陽伯伯都落咗山﹗因為男朋友想買agnesｂ袋，所以第一站就去０１０１City，點知間agnesｂ冇佢想要的款。基本上０１０１City，已經有晒日本時裝雜誌常見的大牌子﹒﹒﹒不過我竟然咩都買唔到。

日本的百貨公司超早關，想行耐啲都唔得。一路由最早關的行 (２０：００），行到２２：００，就開始出發去食晚餐啦。今日的晚餐係六歌仙黑毛和牛﹑長腳蟹網燒放題。 真係超正﹗佢地的放題都分好多級，最高級的要成ＨＫ＄１０００位，可以點伊勢海老，牛都有７款。我地只係要最普通的（即係最平的），都要ＨＫ＄４００位， 有４款牛，同長腳蟹。全部都可以任點任食。個ｒｉｂ同個ｓｔｅａｋ都超正。最估唔到係個餐後甜品都好好味，係柚子雪芭，好清﹒﹒﹒可以去咗啲油膩的感覺， 亦令我感覺到餐廳對食客的體貼。