大頭小丸家長日@20190105

2018年1月5日 （星期六）

今年大頭小丸一齊讀小學，說真的，今年自己跟得不太足，10月中轉工，9月時舊公司要做交接，10月去到新公司又啲時間要適應，而且新工都幾忙，放工返到屋企，有時都想休息下，所以懶咗。

好彩今年大頭妹都算自己照顧到自己，起碼可以自己做功課，默書都唔洗我太粗心。小丸子就是我粗心不來，成日自己橫衝直撞，教又唔聽，鬧都唔做，搞到我都有點半放棄狀態。本來以為小丸子幼稚園已經開始有補中文、英文，應該唔洗我太粗心，結果是我想像得太美好了。

今日首先見小丸子班主任，老師見我第一句已經話完全唔擔心小丸子社交，當然唔係讚啦﹗話佢上堂唔係同同學傾計就係玩文具，專心同唔專心時，表現相差好遠（阿媽當然知佢唔專心的時間遠比專心長），老師話覺得佢可以做好啲，當然啦⋯⋯以這個成績，明顯有非常多的進步空間😅。看來媽媽下學期都要跟足啲啦！

之後見大頭妹班主任，大頭妹行為上都唔會有咩問題，呢點媽咪我好放心。成績上，今次數學失手，差少少唔合格，班主任又是數學老師，所以老師都花咗少少時間同我傾，因為平時大頭妹堂測成績都不錯，但我自己明白，大頭妹做野就是慢，所以佢快唔到，數學永遠係一個難題，因為唔係唔明白唔識做，係做唔晒份卷。

見完家長，仲有好多活動可以參加！

我地去咗學包糭！

考試後的 Happy Friday

考完試既星期五，要出去輕鬆下，本身亦好有信心當「慶功」，點知派咗第一科成績就衰咗，不過都是同自己講，人生有好多考試，一個考試失敗，唔代表永遠失敗，最重要是過得開心健康！時刻提醒自己！😆😆😆

阿旺買了飛睇黑豹，阿妹要跟住我，所以又去睇，家姐唔想自己一個係屋企，所以都一齊去。睇之前本來想去 Spaghetti House食芝士火鍋，點知原來冬天先有，我地仲要等到枱個刻先發現，好彩未坐低。之後去咗 Pizza Hut。

第一次去 Pizza Hut食芝士火鍋，點了 Deluxe 芝士火鍋套餐，我覺得個套餐無Spaghetti House 咁吸引🤔，肉太明顯是現成，蝦就同menu入面既size好有距離...麵包、薯條，炸雞都ok！不過算啦，小朋友要食都冇辦法！

個芝士都好大分別，唔知係咪重Mozzarella，點完一絲絲，好難斷開，食完之後對手仲好攰！😅😅 但大頭妹話佢鍾意呢款多啲。


另外加$15加配長通粉，一陣就比小丸子同大頭妹食晒。


另外加多個麵包比大頭妹，其實佢想食芝士火鍋，就是想食個包！

食食下既時候諗，其實香港依家真是好高消費，一家四口出街食個晚飯，再睇場戲，都要花成千蚊，仲要講梗只是食 Pizza Hut！

考完試了(下) 【和小朋友做小手工】

上次其實唔止買咗一盒玩具既，仲買咗一盒係做『玻璃畫』小手工，都唔係咩新野，我記得我細個都有玩過類似，可以夠我玩一個下午，不過依家當然再靚咗，做到是鎖匙扣咁，我覺得小朋友開 PARTY 時，同其他小朋友玩下都幾好﹗家長同小朋友做下小手工，其實是一個好好的親子時間﹗

一盒 $48，有6支顏色，同 6塊牌仔，有幾個唔同主題，我買咗恐龍同機械人﹗


大頭妹好叻女，可以自己完成，仲整得都幾靚﹗唔記得影小丸子隻恐龍，佢同爸爸一齊整，整到好恐怖，不過都成功咗﹗

整完之後要乾 8小時，所以晚上做完功課做就最好，訓醒第 2日就完成啦﹗乾咗就會半透明咁，大頭妹見到都好開心﹗

考完試了(上)【IQ XOXO遊戲】

放完新年假一個星期就考試，加上新年前又忽然停課，所以今次考試都溫得好急，有啲範圍其實都未教晒，要靠自己，所以新年假期都無得盡情玩下﹗不過唔緊要啦，考試後慢慢玩，大頭妹都知規矩，我次次都好有『信用』，考試後我會盡量滿足佢玩既願望，所以佢都會乖乖溫書 (希望小丸子都會...我知有啲難度)﹗

買咗款小遊戲同佢地玩【IQ XOXO遊戲】，是智力遊戲，訓練小朋友思考，仲可以提升專注力，HAHAHAH...個盒野咁講我咁聽...不過最少可以令佢地忘記 ipad 一陣﹗


買得一盒，兩個又爭，之後比我諗到個好方法，一個『出題』，一個『解題』，成功解決佢地的紛爭﹗忽然明白小朋友乖唔乖，真是睇父母識唔識教，好多事情其實有好多辨法可以解決，湊小朋友真是轉數慢少少都唔得，仍然努力學做一個好媽媽﹗


個遊戲有好多 LEVEL，細既小朋友可以由STARTER開始﹗


大朋友都可以玩架﹗如果比我玩，應該都可以玩好耐﹗

佢最好既地方係細細盒，好岩出街/ 旅行有時坐長途車，比小朋友玩下，好過玩手機吖﹗


大家 LIKE 咗我地 FACEBOOK PAGE 未呀？未就快啲 LIKE 啦﹗

大頭妹小二家長日@20180113

2018年 1月 13日 (星期六)

眨下眼大頭妹就小二，11月考完第一次試，1月中先派成績表，真是等到我頸都長，可能學校就是想我地家長唔好咁緊張成績😂，考完隔咁耐先派成績表，的確是無咁緊張，咩都消化晒，而且考完一星期都講晒分數，其實未派成績表前都心中有數！

今年大頭妹的總成績比小一差咗少少，不竟小二是應該比小一難嘛，我明白既，不過當然都希望下學期會進步啦😆！班成績無變，學校話唔想比太大壓力小朋友，今年唔出級成績，但其實班成績都是出個range😅，所以只有估估下。

老師今次的評語都好正面，話唔擔心大頭妹的成績，話佢係對自己有要求既人（點解我唔覺😂），話見佢依家同開學比進步咗好多，開學時仲好蕃薯，好多時要一件事要講幾次先開始做，依家開始知上堂要做啲咩，執書包都快咗，另外班主任話最開心係見到大頭妹鍾意返學，有好多朋友，返學開心好重要。

不過班主任都有提到，小三﹑四啲野會開始多同深，到時就真是要再快啲，考試的時間都係得咁多，但要思考同寫的一定多咗，到時就可能會唔夠時間做﹗另外，老師都叫我比佢參加多啲『說話』的課外活動，話佢講野唔係差，不過唔洗佢講的話，佢就盡量唔想講，所以要訓練多啲﹗

我最開心係見到大頭妹係學校好多野都願意去試，佢以前一向好細膽，又怕失敗，估唔到佢自己主動話要玩﹗

下次考試係 3月，又要開始加油啦﹗

大頭妹小一第一張成績表

剛剛的星期六是大頭妹小一第一次家長日，收到大頭妹小一第一張成績表﹗其實沒有意外，亦沒有驚喜，因為考試之後一星期，已經知道分數了，今次只是去拿成績表，班主任講下大頭妹在學校的表現﹗

先講成績，英數2科 9字頭，中常 8字頭，我地學校成績表會出中位數，但唔會出名次，英文科就是 4科之中最好，中文科在中位數以下，老師叫要多花時間在中文，多看中文故事書﹗其實我自己對佢中文科成績已經滿意，自己知自己個女的中文水平，唯有再比心機啦﹗平均分力保 9字頭，老師話考得不錯，但同時都話小一其實好多人都 90分以上﹗對吖﹗小一應該是 4科都 9字嘛？﹗我自己細個是囉﹗哈哈﹗即是要繼續努力啦﹗不過都唔抱太大希望﹗而且漫漫長路，前面仲有好多考試，不需要急在一時。對對對，我同自己講，洗自己腦﹗

老師對大頭妹的評語一如以往，都是上堂好乖 (操行有 A-)，不過希望她可以多回答問題﹑多舉手 (學習態度 B+)。老師同大頭妹講希望佢可以多舉手，下次以學習態度 A- 為目標﹗唉﹗由 K2 聽到依家，每個老師的評語都一樣。老師話大頭妹假期後好似比較 "遊雲"，其實我自己都發現到，可能聖誕節玩得太多，又夜訓，都是時間收拾心情了，最近叫她做功課，好似好難專心，上堂抄手冊又抄唔足，明明開學的時候就做得好好，最近仲欠了 2次功課，明明已經做好帶了回校，完全唔明白點解會欠交。最慘大頭妹自己亦唔覺得是一回事，我估老師都好仁慈﹗我細個帶漏剪刀都喊，走去廁所祈禱，希望老師今日上堂不要用剪刀，如果欠帶功課，直頭想 SICK LEAVE 返屋企﹗

上了小學，不方便 post 學校相，post 返預備新年的靚衫衫﹗

小丸子千辛萬苦...去櫃桶找 "皇冠"，以為是什麼皇冠...呵呵呵﹗