傻夫婦一家四口生活日誌: 大頭妹日誌5-6歲

顯示具有 大頭妹日誌5-6歲 標籤的文章。顯示所有文章

2016年11月9日星期三

大頭妹升小大作戰-第三回

2016年 10月17日 (星期六)

哈哈﹗寫返成年前的 blog，上年無寫，因為影得一張相，影到個學校名，當時驚敏感，所以無寫到。依家一年過去，大頭妹都上埋小學，就唔洗驚啦﹗

驚啲咩？﹗驚講錯野，驚學校覺得我地唔係放佢第一位，總之...萬事小心，依家 facebook 咁流行，大家有咩都係 facebook 講，世界咁細，有時可能學校老師都會睇到你個 facebook，你考完話學校安排差﹑其實自己心儀另一間﹑考嚟當水泡...如果老師睇到...你估仲有冇行？﹗呵呵﹗我依家寫就梗係輕鬆啦﹗﹗﹗

我當初都是報咗 5間學校，說實話當中 4間都咁鍾意，各有各好，是但一間收咗我個囡，我都好開心，哈哈，最後 2間 waiting，2間 rejected，唯一九龍區的一間最終無去見，我以為自己幼稚園的小學會終於收到 offer letter，但原來自行得咗，私小就唔會再比 offer，都好公平，所以最後大頭妹考 4間 4間都失敗﹗

結論係？﹗如果真是有心讀私/直小學，一是就要操到個小朋友好 fit (我知好多家長唔讚成)，一是就報多幾間 (好是好多人話報得多就是怪獸家長)？﹗再唔係就...考間有小學的幼稚園囉 (好似最實際)﹗

大家 Like咗我地的 Facebook page未呀？﹗未就快啲 like啦﹗

2016年4月30日星期六

大頭妹開始上【公文中】(5歲10個月)

最近幫大頭妹報咗上『公文中』，即是 KUMON，不過通常人去 KUMON 上數學，我地就去上中文，眼見大頭妹的中文程度上小學會有一定問題，所以襯 K3下學期，想幫佢打定底，問過身邊的朋友邊度上中文好，教小學中文的朋友推薦公文中，所以我就去了解下啦﹗

其實之前成日聽公文好多功課，所以有少少擔心，見朋友的小朋友上數學，真是不停做不停做，依家已經多功課，我唔想再加重大頭妹的 WORKLOAD，去了解過，中文個模式又唔同，都是每日有功課架啦 (公文的特色嘛)，不過中文一開始是『聽』同『讀』，唔洗寫字，5A 係學讀音先 (最低班)，之後 4A 就開始學『拼音』，即是 BO PO MO FO 個啲，其實大頭妹學校的有教過，佢之前讀國際班嘛，依家幼稚園都有普通話堂，不過大頭妹的小學是普教中，所以普通話老師都有講過幼稚園一星期一堂的普通話字必足夠。

報名之前其實家長要聽講座，小朋友要再做一個評估，睇下由邊個 LEVEL 開始學，大頭妹做完都是要由最低 LEVEL 開始學，我覺得都可以，當打好個底，雖然依家要由: 手﹑口﹑腳個啲讀起，令我想比埋小丸子一齊上...不過做評估之後好意外，老師話大頭妹有時唔太理解問題，所以有啲問題唔識答，但是拼音方面就幾好，問咗我幾次佢真是無出去學過普通話？﹗佢話好少年紀咁細就識咁多拼音，聲母識晒，係韻母差少少，呵呵呵...即是學校教得好囉...所以老師話就算由最低學起，應該都可以好快升班。

暫時都是聽 CD ，所以都算輕鬆﹗一邊聽一邊睇，都希望可以認多啲生字啦﹗

小丸子有時都會聽埋一份﹗

為咗增加動力，每次大頭妹聽 CD，我都會幫佢按摩架，佢最鍾意按摩腳。

大家 like 咗我地個 faceboook page未呀？﹗未就快啲 like啦﹗

2016年4月25日星期一

大頭小丸揀鞋記「Shoe Box」@20160403

2016年 4月3日 (星期日)

今日出銅鑼灣食晚飯，順便帶埋 2個女去 SHOE BOX揀鞋﹗我發現小丸子真是好貪靚，一見靚鞋就 2眼發光，之後仲即刻拎住對粉紅色花花鞋唔放，好有自己的主見，有時都唔知佢似邊個，明明我同阿旺都唔係咁既？﹗大頭妹就完全唔同，佢會自己望下，再問下我覺得邊對好﹗

小丸子表情實在太浮誇啦﹗佢話佢淨係鍾意粉紅色喎，不過其實粉紅色都好多選擇，佢獨愛呢對 "粉紅色" + "花花" + "珠片"﹗佢最鍾意啲好 girly 既野，但自己又粗粗魯魯﹗

其實我自己好鍾意呢 3對，不過無大頭妹的 size，但小丸子又好堅持自己揀個對粉紅 + 花花 + 珠片。咁我就唯有尊重佢的選擇啦﹗如果唔係，就唔洗帶佢地自已揀啦﹗

大頭妹話鍾意呢對有齊佢鍾意既顏色﹗粉綠 + 粉紅 + 黃﹗

最後都是揀咗對粉紅閃閃石﹗佢既原因係因為 "易著" 一穿入去就著到，同埋佢未試過著無搭帶既鞋﹗就快升小學啦，成日覺得自己大個囡，是大姐姐，但一上小學，又要由小妹妹開始過﹗

小丸子成日一同家姐影相就 "吉" 高腳...出貓﹗

Bibi係巴西牌子，所有鞋都採用「Fisioflex 激活機能鞋墊」，能刺激小朋友嘅腳板神經線，佢哋行路嘅時候可以同時活化身體機能，所以對小朋友係非常好架﹗目前Bibi係香港只有SHOEBOX做獨家代理。

大頭妹揀既通花心心，加閃石！

小丸子揀既 "粉紅色" + "花花" + "珠片"！

橙色既就是「Fisioflex 激活機能鞋墊」。

SHOE BOX

地址: 銅鑼灣皇室堡 2樓 216C 舖
電話: (852) 2940 3617

營業時間：星期一至五：11:45 - 20:45 星期六、日及公眾假期：11: 00 - 22:00
網址: http://www.shoebox.com.hk/
Facebook: https://www.facebook.com/shoeboxhk/?fref=ts

2016年3月21日星期一

大頭小丸 fashion show

最近都去到大減價的尾聲，我通常都會係呢個時間出動，買大少少買定出年的衫，大頭妹大得唔快，通常都無失手，小丸子...就...有時下年拎出嚟，已經唔岩著﹗佢地依家已經一齊著 110-120碼，著 110碼就好 fit 身好靚，120碼就大少少。

heheh...小丸子下個月生日啦﹗襯呢個時間買靚裙仔，原價 $1090，依家 $300咋﹗
老實講...$1090...一定唔會買﹗
最開心係我買的時候係自己去，我估小丸子會鍾意呢條裙，因為係粉紅色，又幾層咁﹗
到我去攞衫時，佢自己行去睇的時候，都是第一時間睇中呢條，攬住話好鍾意﹗
然後大頭妹問佢: 你諗下你自己係 "想要" 定 "需要" 先？﹗
連個店員都忍唔住笑...佢可能心諗...妹妹，你倒米咩？﹗但其實媽媽我已經買咗囉﹗

仲買咗件粉紅色花花外套﹗$150...抵到無朋友...其實我寫既呢刻...都懷疑自己有冇記錯？﹗

另外買咗幾件 causal 少少既比大頭妹，呢件 $180。

呢條都好抵 $130咋﹗是 tunic來的，不是裙。

呢件就留返出年著，但依家都有少少覺得細細地 (好彩話 3月都會凍多次)... $1550 減到 $400，真是好抵囉﹗我成日都話做家姐有著數...當年得一個...我買 Nicholas & Bear 比大頭妹架，折完都 $1600，所以...$400就算啦﹗同自己講...出年一定岩著既﹗

仲有夾綿背心，其實係我自己好鍾意呢個款，同埋呢個桃紅﹗$200...我諗唔到唔買的理由﹗

奶奶話不如買件背心羽絨比家姐，我見之前大頭妹個件都快唔岩著 (又是 Nicholas & Bear)，今次呢件買 130碼﹗$280 背心羽絨真是抵啦 (90-120碼只是 $250)﹗小朋友成日跑跑跳跳，鍾意著背心多啲﹗

報告完畢﹗不過真是尾聲啦﹗我出 blog 之時，減價都可能完咗了﹗

大家 like 咗我地個 faceboook page未呀？﹗未就快啲 like啦﹗

2016年3月18日星期五

善良的大頭妹

呀﹗有一件事要記低佢﹗話說某一個星期六，阿旺要返工，我要帶 2個囡上 4個興趣班，同參加學校運動會﹗全日由 9:30出門口，到最後一堂興趣班落堂是 6:30，返到屋企是 7:30，同我返工差唔多，仲要拖住 2個走來走去﹗中間發生咗一件事﹗

我帶大頭妹上其中一個興趣班的時候，waiting area 有少少玩具比小朋友玩，有個大過大頭妹1-2 年的男仔，先霸住玩具，之後又不停搶大頭妹手的玩具，明明有好多一樣 (飛行機之嘛)，佢係要大頭妹手個隻，其實我一向都唔理等佢地自己解決，之後見大頭妹點都唔放，個男仔又點都要搶，我就行過去話: 小朋友，唔可以搶玩具喎...都未講完個小朋友一權打向我塊面，老實講...我真是未遇過呢啲情況，我嘗試搵返佢家長，問咗又無人理，我就叫 centre 的姨姨啦﹗原來帶佢嘅係個菲律賓工人，係度玩電話，加可能唔想幫佢負責任道歉，所以無理會我，之後個男仔爆喊，呢時我發現個男仔應該是有問題，可能是過度活躍/ 智力問題？﹗我出門口之後，centre 既姨姨都有同我道歉同埋話個男仔係有問題，佢係同妹妹嚟上堂。其實我都無野，係有少少驚，做咗咁多年媽媽，我仍然唔識處理小朋友之間的衝突﹗

我估大頭妹都有嚇親，因為佢過咗好幾個鐘之後先問我: 媽咪，你有冇事呀？﹗頭先個男仔有冇打親你，痛唔痛呀？﹗我話: 我無事。之後佢再話: 好彩佢無打死到 "陳泳三" 咋﹗(原本我自己打到呢度都眼紅紅...但一打 "陳泳三"，我自己都忍唔住笑出嚟...我成日諗我到底好唔好同佢講...其實...我冇陳泳三呢？﹗)

講到呢度，大頭妹自己爆喊，但仲識係褸袋攞手巾仔抹眼淚﹗

連小丸子都比家姐搞到眼紅紅﹗

之後晚飯的時候，大頭妹再問，

大：個男仔打人，係唔係要釘十字架？﹗
我：吓？﹗咁小事就釘十字架？﹗
大：唔係真係釘，即是要佢改過啫﹗
我：咁啦﹗我地不如學寛恕人啦﹗我地幫個男仔祈禱好唔好，希望佢腦仔好返﹑學識控制自己情緒﹑大人會好好照顧佢。
大：好啦﹗我地幫佢祈禱。

後來我先知，原來因為就快復活節，所以學校有講 "釘十字架"，嚇得我吖，以為佢幾時咁小氣。

大家 like 咗我地個 faceboook page未呀？﹗未就快啲 like啦﹗

2016年3月17日星期四

大頭妹幼稚園K3觀課日

2016年3月10日（星期四）

今年轉咗幼稚園，之前的幼稚園沒有觀課，所以今次是我第一次觀課，大頭妹都好期待，我自己都一樣！

其實觀課真是可以好好了解小朋友係學校的表現，就算家長日，都是老師講小朋友的表現，唔夠觀課來得真實。

先講講流程，首先是早會，會唱歌、祈禱、叫口號，我經過其他級的時候（其他樓層），見到小丸子個一級練習運動會的打氣表演。

之後就入班房，30人一班會分2組，一組上英文，一組上普通話，每組有2個老師，即是大約1對7。今期教錢的概念，英文堂都同錢有關，例如估下豬仔錢箱入面有幾多錢。全程大頭妹都坐定定，唔會舉手答問題，直到老師問一題：一個細個一的數？即是「零」，大頭妹就有舉手，我估佢係極度怕錯。

然後上普通話課，都是以遊戲形式上，今期教文具，仲有量詞，好似是一把剪刀、二枝鉛筆、三塊橡皮。好欣賞所有小朋友都好積極答問題同參與...老師都會要求所有小朋友回答，大頭妹唯一舉過一次手，就是老師問：頭先邊個未答過問題呀？我有少少想暈低的感覺！真是咁怕答問題？見佢出去又做到，老師話要三塊橡皮，佢要係枱面拎返岩的數量同物件。但有一樣野要讚，落堂時佢是第一個主動幫老師收地墊的﹗

上完語文就是班主任的堂，見有教讀字，有睇片，有討論，課堂好充實！之前老師都講過幾次，大頭妹上堂好乖，但好少參與，今日親眼所見，我囡真是完全木頭人一樣，就算佢無舉手，老師都專登問佢問題，佢都是答得半句。

呢個時候是茶點，我地家長就聽升小適應講座，原來6月份就會是小一適應月，會模擬小一上課的模式，課程會跟返小學部、要抄手冊、班房的坐位會好似小學一人一枱、有小息可自由活動，要自己帶茶點同水、重點是會試默書啦！老師都比咗啲課程內容我地睇，都還可以啦，當然深過依家啦！

最後睇佢地上自選學習，延續學錢的概念，探索區玩打工遊戲，叫佢地做會計，要不停計數（偷笑），然後計完一張去老闆度出糧，玩具錢 $5。然後有銀行，個職員又是坐係度計數,同埋啲同學出完量又去佢度入錢。其他仲有宗教區、語文區、英文區、幻想區。

唉...到底點樣先可以鼓勵佢主動舉手答問題呢？﹗我要再慢慢同佢傾下﹗

去觀課，老師千叮萬囑唔好影相，我好乖啦﹗真是無影﹗放返張佢地去運動會的相﹗

2016年3月8日星期二

大頭妹【幼稚園K3功課】

以前我聽到人地話 K3的小朋友要做『剪報』﹑『週記』，我覺得好不可思議？﹗K3的小朋友就有能力做到？﹗K1下學期/ K2上學期先開始學寫字，K3就要自己作文啦？﹗到大頭妹升上 K3，我終於見證呢件神奇的事情啦﹗

通常我會叫大頭妹自己諗 "題材"，咁佢依家都可以自己作到 2-3句，通常都是以『我覺得很開心』做結尾﹗咁我就再幫佢改到通順啲，但唔改佢原意，又盡量要佢自己寫，即是好似讀默咁，我讀佢寫，真是提完都寫唔出，先寫比佢睇，最初是我同佢一齊構思之後，我成篇寫出嚟比佢照抄，不過唔比佢抄呢，時間上用耐咗，依家都要 30分鐘先做完一份週記。

K3下學期，學習記錄就由畫圖，變成用文字表達，變相是做日記。其實我覺得佢地要做學習記錄係幾好，因為我地家長每日都要問下佢地個日係學校發生過咩事，佢地係學校每日有 20分鐘自己分組學習，之後要記錄返，有語文﹑英文﹑幻想 (類似常識，但有時係做運動/ 玩遊戲)﹑宗教 4個 AREA。大頭妹最鐘意英文區啦﹗今期佢地幻想區好得意，玩打工遊戲，要打工然後有錢，仲有本存摺，之後仲有一張買野的紙，可以用 "錢"，係張紙圈自己買既野。

下學期開始要做閱讀理解，其實我都覺得幾深下，睇下第 2條的答案 D "是以上皆是"，小朋友見到 A/ B/ C 岩就圈架啦，仲點會見到 "以上皆是"。

我叫大頭妹讀一次比我聽，字上有點點的都唔識讀，不過已經比 K3上學期開學時好好多，我之前試過買一本升小一習作，一篇閱讀理解，所有 "關鍵字" 都唔識。今次大頭妹除咗錯咗第 2題，其他都識自己做，不過前題係我教佢讀咗一次。

由重英文的幼稚園轉到去重中文的幼稚園，一定會辛苦啲啦﹗不過都當係早少少預備升小一，為升小一做好預備﹗聽聞小一的中文好鬼深，仲要普教中，依家要比心機，努力加油啦﹗

大家 like咗我地的 facebook page未呀？﹗未就快啲 like啦﹗

2016年3月4日星期五

大頭妹學琴 10個月進度

唉﹗最近唔知是因為轉校的衝擊/ 工人姐姐的離開，大頭妹好似難教咗？﹗又可能是自己一直以來 "忽略" 咗佢，因為佢性格乖巧易教，有時同妹妹有衝突時，我地都會叫大頭妹 "就" 下小丸子就算，長期積積埋埋令佢覺得唔公平。又或者之前太乖，依家只是正常返，佢以前真是一叫就聽，依家真是成日對抗，成日問點解佢要練寫字阿妹唔洗，點解佢要做練習阿妹唔洗，點解點解點解...唉...真是頭都大埋...又加上無咗工人姐姐，花係佢地身上的時間，可能真是少咗，有時自己會心急咗，希望呢個係原因啦，咁希望新工人姐姐到咗會有改善﹗

比我講到好遠，其實想記錄下大頭妹學琴的進度﹗

自九月開始，大頭妹就叫我唔洗陪堂，原本都打算一個月陪1堂，當了解一下進度，點知因為工人姐姐走咗，我又唔可以帶埋小丸子入去上堂，變咗陪唔到，一直由 10月到依家都未睇過佢上堂，唔知佢進度。我都明有時要比小朋友自己學下獨立，不過覺得自從冇陪之後，佢就開始唔鍾意練琴，有時真是明白點解啲人話唔好比小朋友咁易得到，以前去琴房練，一星期練 3次，每次都好開心好期待，依家屋企有琴，叫佢練琴次次都要三催四請，我叫佢每日早上 10:00練 15分鐘，我放工返屋企再陪佢練多 15分鐘，加埋就半個鐘，但每日問佢 10:00有冇練呢？﹗係保姆姨姨湊個日都還好，有時有練，如果係嫲嫲/ 爸爸湊，就 9成都無練，尤其係爸爸湊個日﹗

岩岩之前的琴書都教完，要買過新既，老師問我想唔想大頭妹考 1級，問我要唔要考學校，其實 1級...對考學校來講...根本無用，依家啲小朋友唔知點解，5-6歲就話 3-4級 (我聽過 5級都有)，所以我話都可以考，當睇下進度，老師話可以 1-3-5/ 2-4-6咁考，唔洗級級都考既，但佢話如果我想家姐再學多一樣樂器呢 (上次我問過佢學長笛，其實幫人問)，就可以用個 1級試來做 "界線"，考到 1級之後，先開始學另一樣樂器，我覺得都係一個好提議。點知...原來 1級...已經比大頭妹依家學的難好多﹗搞到佢次次練琴都喊，佢係對自己要求好高的人，做唔到就好緊張，其實我知道難都無特別迫佢，見佢咁大壓力，上咗 2-3堂之後，我都叫老師停一停，一陣怕咗學琴/ 練琴就仲麻煩。

um...咁睇返...又真是比幾個月前彈的難好多。

依家學梗呢本，彈歌仔。

仲有呢本﹗

呢本係我買比佢練下拍子，不過老師見我買咗，有時都會教下。

呢幾本就學完啦﹗

總之要學學器，練習的時間真是好長，所以依家有人問我關於小朋友學學器，我都叫人諗清諗楚，尤其是買樂器，好似大頭妹咁，其實隔幾個月就會扭一次話唔學，所以好彩我當初買部 2手琴，依家後悔買咗貴個部添呀﹗

大家 like 咗我地 Facebook page未呀？未就快啲 like啦﹗

2016年2月24日星期三

大頭妹【我的志願】

最近同大頭妹傾計，問下佢大個想做咩？﹗小朋友真是好得意，答案好出人意表。

我: 你大個想做咩？﹗做警察？﹗
大: 我唔敢捉壞人呀...

我: 做消防員？﹗
大: 我驚燒親自己喎...

我: (救命...你份人咁船頭驚鬼，船尾驚賊？﹗) 做醫生？
大: 我唔敢伸隻手入個人度呀﹗(佢意思是做手術)

我: 咁護士啦？﹗
大: 一樣要伸手入人度啦？﹗
我: 點會呀？﹗
大: 要呀﹗生bb要拎個bb出嚟。

我: (唉...無言...)
大: 媽咪，做老師係唔係寫黑板啲字全部都唔可以錯架？﹗
我: (完全無言...)

大: 我想做環保工作，教人 recycle，同埋唔好亂丟垃圾個啲﹗
我: 哦﹗好好喎﹗ (心諗...搵唔到食喎女...不過起碼諗到一樣好過無啦...)

大家 like 咗我地 facebook page未呀？﹗未就快啲 like啦﹗

2016年2月11日星期四

大頭小丸第一次商場表演@20160131

2016年1月31日 (星期日)

今日大頭妹小丸子的芭蕾舞學校有表演，地點是馬鞍山廣場。哈哈，我地之前未試過商場表演，所以老師問我有冇興趣比大頭妹小丸子參加的時候，我都話參加。 1月開始，就要每星期再上多一堂表演練習班，連埋恆常班，星期六由 3:00 跳到 7:00，中間有一個小時的 break，可以食個下午茶補充體力﹗其實今次佢地返屋企無跳比我睇，我事前都唔知佢地表演什麼，所以特別期待。

我真是唔識幫小丸子紮 "計"，要勞煩老師幫手啦﹗我就企旁邊偷下師，希望下次紮到啦﹗

唉...阿旺都未試過幫我落妝呀？﹗我個時睇 "我可能不會愛你"，問佢點解唔會好似 "李大仁" 咁幫我落妝，佢反問我男人點解會識落妝？﹗係囉？﹗咁點解對住個囡又識既？﹗

完成啦﹗

哈哈﹗睇小丸子幾得戚？﹗

11:00集合，大約 12:30上台 rehearsal ，1:30再集合，2:30正式表演﹗

佢地 rehearsal，我地就四圍睇下有咩食，因為一陣只有 1小時食飯，要先搵定餐廳啦﹗馬鞍山廣場都幾多野食喎，我地見凍凍地，揀咗間有烏東食既，等佢地暖下﹗

大阪王將

我覺得食物都ok喎，價錢唔算貴，都多選擇﹗

阿旺點了咖哩豬扒飯，個麵豉湯好香，阿旺就話覺得豬扒太瘦，哈哈，豬扒唔係即係肥咩？﹗個白飯都好好味﹗