傻夫婦一家四口生活日誌: 傻夫婦遊記2016@福岡豪斯登堡熊本

顯示具有 傻夫婦遊記2016@福岡豪斯登堡熊本 標籤的文章。顯示所有文章

2016年9月13日星期二

傻夫婦九州親子之旅 DAY 5 【海之中道海濱公園】

2016年 7月14日 (星期四)

去到福岡又點可以唔食一蘭呢？﹗一早打算唔洗趕火車的早上去食當早餐，但原來唔係間間都開24小時，多得酒店附近的一蘭 10:00 先開門，所以我地可以訓晏啲，食拉麵當 brunch，再出發去海之中道海濱公園﹗

依家都好多餐廳用買票機，不過好多都有圖，所以自己落單都無難度。

尋日食個拉麵覺得好好味，今日食一蘭又覺得唔同風味，不過都一樣好好味﹗

好似無論去邊都是由博多出發方便啲，其實我地酒店樓下就有巴士去海之中道海濱公園，不過因為不是假期，車程要 1小時，我驚我暈車浪，所以最後都是坐地鐵，再轉西鐵，再轉 JR﹗不過其實站同站之間好近，所以都唔係太唔方便。今次呢個 TRIP，我發現日本人的英文真是進步咗好多，我地沿途問路，次次都問到，大家都明大家講咩﹗

【海之中道海濱公園】真是超級大﹗﹗﹗我地租了單車，最後玩了 5小時，都未玩完個公園，最最最搞笑是...我返香港見到海之中道海濱公園 FACEBOOK 的宣傳 VIDEO，先發現...我地未去過公。園。正。門。呀﹗因為我地一入公園，租完單車就轉右踩，之後踩返出公園中間的 FOOD COURT 加小朋友公園以為係正門，原來是『西口』﹗玩咗 5個鐘，連正門都未去過，CLASSIC﹗

呢度租單車好平 (大人 400YEN 4小時/ 小朋友 250YEN 4小時)，不過就無好似豪斯登堡個款家庭單車 (佢有 2人車，可以載小朋友)，所以我上次去『沙田海悅酒店』就同大頭妹小丸子預習一次，大頭妹基本上無問題，有輔助轆的可以自己踩，小丸子就踩得慢啲囉，不過都踩足全程，要比個叻叻佢地兩個﹗

仲有頭盔借﹗

有好多唔同款式的單車可以揀﹗

由於我地行錯路，所以第一站就去咗動物園，睇小動物﹗

餵羊都玩咗好耐，有隻山羊好為食，有隻黑羊又好醒，所以綿羊仔基本上無得食﹗

之後去抱『兔仔』，不過後來...大頭小丸都有問，點解兔耳咁短？﹗其實係咪兔仔？﹗UM...其實我都唔知...有冇人知道？﹗

黑豬 VS 黑豬仔...其實平時我係屋企叫小丸子係黑豬/ 黑熊﹗

袋鼠 (點解小丸子擺 POST 咁得戚？﹗)

呢隻水豚好得意﹗

佢地摸得隻水豚好舒服，摸摸下訓咗﹗

大頭妹問點解呢隻草泥馬是微笑既？佢唔講我都唔為意，所以咁多人鍾意佢？！

玩到超晒時，原本預計3:00pm走，依家3:00pm先食tea，又要 cut我啲 shopping time。

呢度個food court都有幾多選擇，咖哩飯﹑拉麵﹑烏東都有齊，仲有八爪魚丸之類的小食。

阿旺竟然揀咁熱氣的薯條﹗

我真是熱到食唔落，同小丸子去買雪糕，最後...我地一人一粒...但小丸子食 3粒﹗呢款雪糕都幾好味﹗

大把飲品比你揀﹗

日本的公園真是好好玩，有沙有水玩。

今過今日堅曬！

阿旺同小丸子玩咗，完全是燒pat pat！

完全放電...見佢地玩呢個我已經好驚，因為小丸子真是會玩到無晒電先停，大頭妹個人就好節制，一陣玩晒啲電，佢一離開公園就會叫抱。

200YEN 玩一分鐘到...唔抵玩﹗

有咁多免費野玩，坐一次車就夠了﹗

專登帶多一套衫嚟玩水，不過2個囡已經無電﹗其實我地未係日本暑假嚟，如果唔係有個 SUNSHINE POOL，係非常大型的玩水設施，我地去的時便差2日先開...嗚嗚嗚﹗如果夏天帶小朋友嚟，真是要預足一日先會玩得晒﹗

日本的天真是特別藍﹗今次算好好彩，其實我地嚟 6日，差不多日日落雨，今日全戶外玩公園就好好天﹗

日本公園的設施真是好完善，我成日都唔明，鰂魚涌公園咁大，點解可以一個洗手間都無﹗

之後本身想坐船去【Marizon】，即是福岡塔旁的 outlet，諗住晚上可以順便去埋福岡塔，但是我之前一直搵唔到【詳細交通】，原來網站係有架囉﹗﹗﹗我估唔到公園收 5:00，尾班船竟然是 4:40﹗我依家搵到啦﹗http://www.uminaka.go.jp/img_institution/Access.pdf，click 入去有齊全部來回海之中道海濱公園的交通時刻表，包括 JR﹑西鐵﹑巴士﹑船﹗囉﹗囉﹗囉﹗條氣仲係唔順﹗點解當時見唔到﹗

呢個係平日的時刻表，原來星期六日會有多啲船，去 Marizon 只是 20分鐘船程咋。

我地 miss 咗尾班船，基本上就去唔到，因為坐 JR出返博多都 1小時，由博多再去 Marizon 又要30分鐘，因為佢地的地理上是一個 c字，Marizon 同海之中道海濱公園是對面岸，博多是 c字的中間位。

*碼頭位置是公園的西口，海洋劇場旁邊，我地今日去海洋劇場無開，如果開咗就可能坐到尾班船啦﹗

JR的時刻表。

坐唔到船，又行咗好多路，之前玩公園大頭妹小丸子又放晒電，唔想自己發脾氣，一人買一杯雪糕，點知我買食的咖啡味又賣晒，我係唔係真是咁黑呀﹗﹗﹗

佢表情根本就是問...又影...比我食啦﹗

之後我地坐返 JR，再轉西鐵走，係月台見到班車好似岩又未買飛，個站長好好比咗張咁既野我，再示意我地可以上車，太好啦﹗唔洗等多班車，我驚郊外地方班次唔太密﹗

終於又成 6點幾先返到天神，阿旺唔想我失望話可以照去MARIZON，不過其實酒店樓下已經有 7-8個大商場都唔止，所以我話佢地返酒店休息一陣，我落樓下SHOPPING就可以，最多夜少少食飯，最後小丸子訓到9:00先起身，我地就去食福岡的最後晚餐啦﹗

海之中道海濱公園: http://www.uminaka.go.jp/

傻夫婦九州親子之旅行程一覽:

傻夫婦九州親子之旅 DAY 1 【HK EXPRESS 初體驗/ SOLARIA NISHITETSU HOTEL/ ひょうたんの回転寿司】

傻夫婦九州親子之旅 DAY 2 【JR KYUSHU RAIL PASS/ 新幹線初體驗/ 熊本/ KUMAMON SQUARE 】

傻夫婦九州親子之旅 DAY 2 【熊本/ 熊本城/ 櫻之小路】
傻夫婦九州親子之旅 DAY 2 【晚餐: 華味鳥】

傻夫婦九州親子之旅 DAY 3 【豪斯登堡/ WATERMARK HOTEL/ 花之家】

傻夫婦九州親子之旅 DAY 3 【豪斯登堡 WATERMARK HOTEL/ 花之家(午 + 晚餐)】

傻夫婦九州親子之旅 DAY 4 【豪斯登堡/博多車站拉麵街/天神】
傻夫婦九州親子之旅 DAY 4 【晚餐: 大東園】

傻夫婦九州親子之旅 DAY 5 【海之中道海濱公園】

傻夫婦九州親子之旅 DAY 5 【晚餐: 博多名產牛雜鍋笑樂/ 宵夜: 屋台初體驗】
傻夫婦九州親子之旅 DAY 6 【星乃咖啡店/ 福岡機場】

大家 LIKE 咗我地個 FACEBOOK PAGE未呀？﹗未就快啲 LIKE 啦﹗

2016年9月3日星期六

傻夫婦九州親子之旅 DAY 3 【豪斯登堡/ WATERMARK HOTEL/ 花之家】

2016年 7月 12日(星期二)

今日的行程是【豪斯登堡】﹗買了【JR北九州鐵路 3日 PASS】，要連續 3日使用，第一日去熊本即日來回，第 2日去豪斯登堡，第3日就回程由豪斯登堡返博多，剛剛好 3日﹗樂園是 9:00開門，想玩盡少少，坐一早 8:34AM 的火車， 6:30AM就要起身，一班車是一小時，錯過了坐下一班就要等一小時啦﹗車程大約是 1.5小時多少少，去到已經 10:30啦﹗

我搵過下香港的旅行社網站，唔覺有得預先係香港買飛，去到就明白，其實都唔多旅客，根本就無這個需要。我地帶住小朋友，所以選擇住一晚，場內有 3間酒店: 歐洲大飯店﹑阿姆斯特丹大飯店﹑森林小別墅，我地就住 WATERMARK HOTEL，係園的最入，但唔算園內酒店，不過一樣有得入園前放低咗行李先，到 check in 時，行李已經送到酒店。我其實有個好奇？﹗如果住園內酒店，係唔係第 2日 check out 之後都仍然可以係園內行下呢？﹗有冇朋友知道？﹗

其實我覺得【豪斯登堡】入場費都幾貴，仲貴過東京迪士尼，大人要 6200YEN，小朋友就 4300 YEN，剛剛 7月1日加了價，不過同時做 JR PASS 8折，所以坐鐵路的朋友，買飛就平了，為起大約是 $380/大人，265/小朋友 (我是 77時換 YEN，又提起自己的傷心事)。

http://www.huistenbosch.co.jp/

又講多一次，如果坐鐵路，都是博多方便，尤其是坐 8:30的火車﹗呵呵呵﹗預早少少去 MISTER DONUT 食早餐﹗九州好似有好多 MISTER DONUT，去到邊都經常見到﹗

【豪斯登堡】火車的車箱就好似無新幹線咁靚。

今次個 TRIP 我先發現，其實我 2個女都好乖，坐飛機﹑火車都唔會扭計，大頭妹就唔洗講，通常佢一上交通工具叫佢訓佢就訓，仲要一到站叫佢起身，佢就即刻起，仲自己行，所以帶佢去旅行是零難度﹗小丸子有得玩就會乖，所以帶佢出街佢都還可以，同佢講叫佢訓，訓醒去到有力玩，叫佢幾次佢都會聽，不過佢有時醒咗唔肯自己行囉﹗

一上車就訓，去到目的地就訓飽飽，精精神神咁玩﹗

小丸子要睇 ipad一陣，不過最後都訓咗﹗

呵呵...我就煲韓劇，車程岩岩好睇一集。

去到【豪斯登堡】火車站，超級大風﹗

我地買一日任玩 PASS，2大2小就是 HK$1300，入場之後都明白，地方好大，維修各方面都應該幾貴﹗我地最後玩了 9個遊戲/ 館，另外租了家庭單車，但其實 1日真是玩唔晒成個樂園﹗

第一站是泰迪熊王國﹗

2個囡另外一個最乖的地方是唔會扭計買玩具，小丸子有時都會話想買，大頭妹會問可唔可以買，但我話唔買，2個都唔會扭，所以有時我自己要嘆氣高叫『點解我 2個囡都唔扭買玩具，但我好想買呀﹗呀﹗呀﹗』，阿旺仲對住我偷笑﹗

我好想買呢個 TEDDY BEAR，問完 2個囡，佢地都話唔要，大頭妹仲答我『唔洗啦﹗唔該﹗屋企已經有好多玩具啦﹗』。唉...我想借你過橋啫，點解唔比我借？﹗

第一次踩家庭單車，原來都幾好玩﹗好似是 4500 YEN，由入園到 6:00 還車，樂園太大，其實踩埋單車都行唔晒個樂園﹗

最後唔夠時間坐麼天輪。

MIFFY SHOP，MIFFY 迷一定唔可以錯過啦﹗

小丸子係呢度都玩唔到捨得走﹗

鏇轉木馬基本上無人玩，所以可以一家包場，好唔習慣。

之前諗住去海賊王餐廳，原來已經CLOSED咗﹗問阿旺午晚餐試 2間唔同的餐廳，定去一間我睇 BLOG 人地話過好味的，結果...我地穩陣派，當然午晚餐食同一間啦﹗

去了小齊媽媽之前介紹過的【花之家】，都真是唔錯呀﹗我身邊幾個朋友去過，都話豪斯登堡的餐廳麻麻地，我覺得呢間都 OK﹗(上年去迪士尼...啲餐廳都好正﹗) 阿旺話佢個滑蛋豬排飯好好味﹗ 我同大頭妹小丸子，3個人點咗 2個壽司SET，一冷一熱鳥東都好味，壽司普通，不過啲女食晒啲飯，個熱鳥東味道唔錯，連天婦羅都幾好味﹗價錢唔貴，阿旺個飯 980YEN，我地壽司SET 就 1450YEN。