迪士尼購物 6折優惠又嚟啦！

呵呵呵！又到放毒時間！唔好話我有優惠唔早啲通知大家！由4月29日至5月9日，奇妙處處通會員購物有6折優惠！不過依家銀卡冇得weekend入，入去掃貨既人唔知會唔會少咗！我上星期已經叫 VIP朋友幫我買咗！一早花蛋節入去已經睇定，一6折就買，唔係有啲靚款可能會斷碼架﹗

呢條 Shelliemay 紗紗裙，原價 $295，依家 $177，佢係2件可以分開著！

後面都好靚！

仲有呢件大頭 Shelliemay 衫好cute! 原價$218，依家$131。

條紗紗裙是小丸子自己襯。

仲買咗少少tsum tsum頭飾！原價 $138，依家 $82.8，都ok抵啦，未開嚟用，唔知襟唔襟。

仲有小朋友最愛既Mickey Minnie頭碗！無工人時，阿旺洗碗打爛咗一隻，要補返比大頭妹，呢隻深少少的粉紅色是新既，小丸子有一隻淺粉紅。

家姐次次都讓妹妹，自己揀咗 Duffy，我話唔洗讓妹妹，2件買晒 Shelliemay 都可以，佢話覺得Duffy顏色出啲！

小丸子就一定要粉紅色！

大家 like 咗我地 Facebook page 未呀？﹗未就快啲 like啦﹗

迪士尼 Halloween @20151021

2015年 10月 21日 (星期三)

今日是重陽節，見今日雖然是公眾假期，但銀卡都入得，所以就約下朋友一齊入迪士尼玩返轉，兼影下 Halloween 的 佈置啦﹗﹗﹗不過我地好水皮，一隻 Halloween 打扮的迪士尼朋友都影唔到﹗﹗﹗只是見到 Mickey 同 Minnie 咋﹗連 Goofy﹑Donald 同 Daisy 都見唔到﹗

其實...本來小丸子都著咗 Elsa 公主衫，可惜...太窄...
之後佢自己揀咗呢條紫色裙，佢話係佢嘅公主裙喎﹗

一入園首先食個 brunch 先﹗第一次去飲茶，同埋國皇一家飲﹗麻煩國皇一家排隊等位啦﹗

見到好朋友就好開心﹗

食物質素都ok，都叫美心集團，不過當然價錢比平常貴，間唔中一次都ok啦﹗其實唔多點心有米奇圖案，我估要酒店個邊個間 (價錢再貴啲)，先有多啲米奇點心﹗

 點比小朋友的蝦腸﹗

仲有叉燒包，都幾大個﹗

呢個就真是唔抵食...基本上係得呢塊牛仔骨見得人，下面是牛仔肉碎...同洋蔥﹗

呢個鳳爪反而有驚喜，因為墊底嘅係 "柚皮"﹗

又是點比小朋友的炒飯﹗


我話可唔可以點啲有米奇的點心？﹗起碼我影完相都有分別吖﹗
所以點咗以下呢 2樣﹗

奶黃包﹗

芒果布丁，好奇怪...我 2個囡...係唔食迪士尼入面的芒果布丁﹗
我食咗 1粒...好甜，無咩芒果味﹗

食個米奇包...洗唔洗咁開心呀﹗

之後我地就去買 "機動" 啦﹗ Mancent 提議玩 "跳傘"，大頭妹即刻話 "我唔玩個啲game架"﹗哈哈...結果...大頭妹同 Marcus 玩彈弓狗﹗小丸子同 Mancent 就玩跳傘﹗

仲未識死的小丸子﹗

爸爸個樣做咩事呢？﹗

玩到 3:00，國皇一家就走啦﹗我地又匯合大頭妹的舊同學一齊玩﹗雖然轉咗校，不過我都想比佢知道，想見朋友的時候，都仲是可以見嘅﹗

哈哈...難得 2人世界﹗

大家LIKE咗我地個 FACEBOOK PAGE 未呀？未就快啲 LIKE 啦﹗

一拖二迪士尼一日遊@20150407

2015年4月7日 (星期二)

話說成個復活節紅日假期，只得 4月7日是銀卡都入得場，一早就打算帶 2個囡入迪士尼，點知爸爸又一早約咗朋友行山，已經改咗幾次期，無得再改﹗咁我打算帶妹妹去迪士尼，佢就同大頭妹行山，又點知大頭妹同學仔忽然係 whatsapp group 約去迪士尼，就諗住交換啦﹗爸爸已經話唔知搞唔搞得掂小丸子，又又點知最後...小丸子睇完新聞，見有山火，死都話唔行山，話行山好危險﹗佢話佢要去海洋公園 (佢仲未識分海洋公園同迪士尼)﹗喊咗 15分鐘。咁好啦，最後決定帶埋小丸子去啦﹗最終造就我一拖二入迪士尼﹗我覺得自己真是挑戰自己的體能 + eq 的極限﹗哈哈﹗好彩最後順利過關﹗

2隻小鬼知有得入迪士尼，一早就叫我起身 (如果返學都有咁合作就好)，我地早咗入場，就行下 SHOPS 先啦﹗

FROZEN...真係紅足一年有多﹗今次入場仲見到有新的夏季裙，真是不得了﹗又要跌銀包了﹗

抵大頭姨姨咁惜你，見到 DONALD DUCK 電話套話要買比姨姨﹗

之後見到有樂隊，佢地會表演 "LET IT GO" 架﹗

今日約咗同學仔，我地早咗入場，就排隊玩機動先﹗

天文台本身話打風，又話會落雨，點知曬到暈，即時買 2頂帽比 2個囡，不過本身都想買 DISNEYLAND 個頂 UV 太陽帽，$148 好抵，平過 SUNNA﹗

即是大頭妹呢頂，不過今日得紅色，無粉紅色﹗

有公主病的小丸子就揀咗 SOFIA THE FIRST﹗

百厭丸...排隊都爬來爬去﹗

HEHEHE...玩第一個 GAME啦﹗

幾開心﹗

之後匯合同學仔去玩小小世界﹗

係火箭餐廳門口玩水﹗

食 LUNCH 的時候發生一段小插曲一定要記低佢，話說我地一齊入餐廳等位，小丸子行埋去一個哥哥的身邊...二話不說就伸手去攞人地的...薯條食﹗﹗﹗我大叫一聲 "妹妹，NO"，其他人又一齊笑......最後面皮薄的小丸子就喊啦﹗不過佢真是好可愛，最後哥哥見佢喊都請佢食薯條，不過佢就唔睬人...HEHEHEH...所以阿旺成日話，小丸子大個一定要比多啲零用錢佢...唔係佢去執人薯條食...點知唔洗大個...3歲未夠就去執薯條﹗﹗﹗

食食下見到巴斯光年，即刻衝出去影相﹗﹗﹗

之後時間差不多就去等睇巡遊﹗

唉...真是衰女包...成日都搶家姐啲野﹗

巡遊開始啦﹗

睇完巡遊再玩咖啡杯﹗

依家同 FROZEN 的 ANNA 同 ELSA 影相要一早攞飛架﹗好似 10:30就差不多派晒架啦﹗我地無影啦﹗

CINIDERELLA 的玻璃鞋﹗

依家有 FROZEN TEA SET，$898/ 一大一小，仲有得整相架，不過唔知包唔包埋隻公仔呢？﹗

之後去睇 4D電影，本來睇完就走，不過唔記得同小丸子講，佢唔肯走，唯有玩多一個GAME﹗

去咗坐船，我都係第一次玩﹗

走啦﹗大頭妹話個車站好靚，要影下﹗

一上車小丸子就瞓咗啦﹗

最後非常順利，由早上 10:00出門，玩到 7:30 返到屋企，玩咗足足 9個半鐘﹗真是自己都要讚下自己，不過都要多得同行同學仔的爸爸媽媽照顧﹗同埋有個咁乖的大頭妹，全程都無扭計﹗之前阿旺話想試下一個帶兩個囡入迪士尼，我講笑話一個帶 4個大頭妹入迪士尼都唔會有問題，但佢一個帶一個小丸子入場都未必搞得掂 (講笑啫...一個帶一個無可能唔得)，hehehe...今日証明咗一拖二去迪士尼是 ok 嘅﹗

大家 like咗我地的 facebook page 未呀？未就快啲 like 啦﹗