小學同學聚會

2016年10月7日 (星期五)

多得 Facebook，幾年前同小學同學相認返，其實中學有一段長時間都無聯絡，我一直都好宅，好多時有聚會，我都唔出席，依家可能人大咗，又可能真是寫 BLOG 之後社交好咗，通常我都是逢約必出的﹗

上次聚會都好似已經一年前，不過我記得我有事出席唔到，今次只是大人食飯，就容易好多，地點是上環的『公館』，是一間私房菜，10個人有間房，大家可以坐得舒服啲，傾得開心啲﹗食物方面都好有質素，而且份量好足，可能因為我地女仔多﹗阿旺睇返啲相都問點解10個得 2個男仔，我話可能是因為我小學讀『精英班』嘛，小學時都是女仔叻啲。

講返今餐都真是好豐富，頭盤有公館特色六小碟，湯是花菇濃湯，主菜就有薏米帶子﹑紅梅元肉﹑毛豆素卷﹑糟香一品雞﹑白玉娃娃﹑金花魚片，另外仲有公館炒飯，同埋唔少得的甜品﹗

公館特色六小碟，第一碟就已經忘記了是什麼...

矮瓜，上面是肉鬆，味道十分不錯，我食咗好多呢﹗

青瓜

薯仔絲，好味到停唔到口﹗

鴨胸

海蜤頭配木瓜絲

 湯: 花菇濃湯，個湯真是好正呀﹗我依家都回味中﹗

薏米帶子，入面有鮮百合﹑馬蹄，加埋帶子都幾特別，而且帶子大大粒好彈牙﹗

紅梅元肉，聽講好多人客指定要食，我自己就...麻麻地...太肥，我估阿旺會好鍾意﹗

毛豆素卷，食完豬蹄食返個素菜平衡一下，唔錯﹗

白玉娃娃，睇個汁就知道正啦﹗

糟香一品雞，雞肉好滑，點埋個汁食就仲正﹗

金花魚片，魚肉真是好滑，而且完全唔腥，平時我麻麻地魚，不過呢碟都真是正﹗

公館炒飯，連炒飯都好好味﹗

最得我歡心的永遠是甜品，呢杯是士多啤梨果蓉，上面好似是蛋卷碎，平時係屋企簡簡單單用來招呼朋友都唔錯，又好味又健康﹗

公館
網址: http://s.openrice.com/QrbS0J4q000
地址: 上環德輔道中279號豐和大厦12樓
電話: 2577 9789

大頭妹上烹飪班【Candace媽媽親子烹飪班】

2016年 10月 22日 (星期六)

今日帶大頭妹上 Candace媽媽係煤氣中心的親子烹飪班，其實未有小朋友之前，我定期都有上烹飪班架，除咗可以增進廚藝，其實我覺得對我自己改善偏食都有幫助，我以前真是好多野都唔食，自己要開始煮之後，先有改善，自己煮完唔係唔食嘛？﹗見大頭妹同我一樣，都是一個偏食的小朋友，所以就帶佢上下烹飪班囉﹗

我事前其實唔知道，原來烹飪班是親子形式，但是以小朋友為主，即是小朋友先係煮個個，大人只是負責佢地煮食過程中的安全，例如要炸野就大人炸，其他步驟都是要小朋友自己完全，大頭妹聽完之後，即刻話覺得好擔心，佢平時最多都是整啫哩﹑煎下雞蛋﹗

今日要煮 3樣野，第一樣竟然是 "炸蛋" ，平時我都唔會整，太多步驟，哈哈哈，今日有機會試下﹗

有得攪豬肉，小朋友就最開心啦﹗

用豬肉包蛋的步驟是大人做的，之後小朋友只是將佢地沾上麵粉，再沾雞蛋，最後沾上麵包糠就可以了﹗完全是 messy play﹗出街外玩就好了﹗

一個營養均衡的餐盒，有肉就一定有菜啦﹗

炒菜都要小朋友自己做架﹗

好快就煮完 2樣啦﹗

今次的主角...當然就是細菌小子壽司啦﹗

壽司都是平時的方法做。

做完就裝飾啦﹗小朋友就最開心啦﹗

學識咗啲步驟，就唔係好難﹗

登登，大部份都是大頭妹整架﹗其實剪紫菜時，第一條是我自己剪，剪完即時就響起幼稚園班主任把聲，佢話見大頭妹剪紙比較差，我同佢講我唔比佢用剪刀，佢叫我要多啲比大頭妹剪下野，其實小朋友好叻，唔會咁易剪到自己，所以第 2條開始，我就比佢自己剪，其實佢係做到，只不過我成日無放手﹗(我個飯盒太細，所以排得唔夠靚﹗)

 

 

以下都是 Candace媽媽的 facebook的相，是 9-10月的班，原本想上多拉a夢，不過好早就 full 咗﹗

今次發現親子烹飪班真是一個好好的親子時間，無壓力輕輕鬆鬆，今個星期六大頭妹學校旅行，佢已經話要整細菌小子壽司帶去旅行啦﹗哈哈...希望我朝早起到身啦﹗

大家 like咗我地的 Facebook page未呀？﹗未就快啲 like啦﹗

放學鬆一鬆

大頭妹上小學之後，我成日驚佢辛苦，所以每日放學都會同佢 tea一tea，然後先做功課，當是苦中一點甜，如果要一放學返到屋企，放低書包就即刻做功課，又真是好似好慘，亦都順便幫佢增肥。大頭妹下午茶最常食的是蛋糕類，因為大頭妹鍾意食甜食，間中有時會坐低食壽司，有時如果之後接住上興趣班，就會食少少小食 e.g. 百力滋。

自太古城間 twelve cupcake 執咗之後，放學無得食 cupcake，專登去中環的 sift 買比佢地食﹗

有時會食 Mrs. Field's Cookies 的 muffin﹗

呢個小朋友可以食到大半份兒童麥樂雞餐，再食杯軟雪糕，我諗我都唔好成日接佢放學，唔係好快變大肥妹﹗(小丸子鍾意食咸食)

表情多多﹗

是日跌倒，所以有 HD 雪糕食，都食到想喊咁樣﹗

沉迷中

話說最近真是煲劇煲到無心機寫 blog，所以決定一於寫返個『步步驚心:麗』 blog啦，哈哈...我一直都是李準基的超級 fans嘛，打從『一枝梅』開始﹗

今次有少少傷心，一直好期待『步步驚心:麗』，話說李準基服兵役後，大部分的作品，收視都是一般，如果同一枝梅結局過 30%比，諗住有『步步驚心:麗』的劇本，加李準基的演技，仲有王子們，應該無得輸啦﹗點知...收視包尾，雖然 fans 們話收視沒有所謂，即是求學不是求分數，我唔受呢套囉，點都想有好收視嘛﹗

我都明白點解收視低，老實講拍得麻麻地，畫面是好靚，但由中國版 30幾集，cut 到韓國版 20集的內容，真是有少少支離破碎，好似一開始講『八樹』戀，我明明記得當年都好多人是八樹黨，否則鄭嘉穎都唔會紅啦，今次睇韓版，完全抓頭，又話個男人對老婆好好，無啦啦又會鍾意咗自己老婆個堂妹？﹗同每個王子之間都是用一幕就交代完佢地的感情，感覺好兒戲。我地海外觀眾可能有中國版，自動 "彌補" 空缺的戲情，所以唔覺得有問題，但韓國的觀眾如果之前未睇過，就可能好難明白。

我依家只是希望，韓國版會有自己的結局，因為人物性格的設定都有唔同，希望會有 happy ending啦﹗

大家 like 咗我地個 facebook page未呀？﹗未就快啲 like啦﹗

大頭小丸暑期班

 

眨下眼就放完暑假，係時候幫暑假做個總結﹗今年暑假一開始就去旅行，之後無再報幼稚園的暑期班，亦無幫大頭妹報升小預備班，本來想報啲『非學術的』比佢地 2個輕鬆下，洗甩我 "怪獸家長" 之名﹗呵呵呵...點知...重手咗...報下報下報多咗﹗然後好似仲忙過上幼稚園的暑期班﹗

首先講下大頭妹啦﹗佢學術班就上開 Jolly Kingdom 的 Reading and Comprehension 班﹑Kumon 中文﹑非學術就有鋼琴﹑芭蕾舞﹑畫畫。暑假畫畫班就暫停，我就幫佢報咗非洲鼓﹑紙黏土﹑小司儀，之前無工人姐姐時停咗既數學，今個暑假都開始返數學。

屋企樓下小童群益會的非洲鼓班﹗好似 $600/6堂，每堂 1小時，都幾抵玩。我唔知點解近年非洲鼓成為 "怪獸指標"，可能是多得之前一個家長 (個仔入喇沙好開心接受訪問個個呢，依家可能多得埋我)，其實我覺得非洲鼓都幾岩小朋友玩，一班小朋友一齊上，再一齊合奏，學下拍子。講怪獸遠遠及唔上鋼琴，返屋企又唔洗練習，完全無壓力﹗

最後一堂有得觀課﹗

紙黏土班都是小童群益會，$350/5堂，超級抵玩，其實都是平時畫畫班的老師教， 不過佢係成個星期直落咁上，一次過上星期一至五。

我覺得大頭妹都整得唔錯，起碼樣樣野都認得出係咩﹗

今次新嘗試『小司儀』班，其實主要是想大頭妹上，因為佢一向表達能力都一般，要做 presentation 就更難，加上怕羞，所以 presentation skill 成為今個暑假的重點訓練項目﹗大家真是唔好睇小依家小學，幼稚園老師話上小學就會有好多 group project﹗

數學之前上 Math Concept，以為 eye level都是同類，點知原來 eye level 多好多功課，我起初轉去 eye level，只是因為同時間，阿妹可以一齊上英文，好彩上咗幾多星期之後，都叫適應咗，我打算睇下小學的進度，再決定繼唔繼續，其實都唔係一定要上。

原來...依家小學一年級已經計啲咁難的數？﹗

暑假唔少得有平時都有上的芭蕾舞，今個暑假參加咗一個比賽，加一次芭蕾舞學校的匯演。

至於小丸子，佢平時就只有芭蕾舞﹑畫畫，佢本身無上開學術班，所以大頭妹成日問點解妹妹咁得閒，依家比佢開始上 Eye Level 英文，另外都報咗小司儀﹑非洲鼓﹑鋼琴﹗ 

觀課當日見佢都打得唔錯﹗

 

係大頭妹幫我影的，我話影得好過爸爸﹗

 

其實基本上小丸子口才唔錯，所以好多人錯覺以為佢好醒 (佢其實仲係文盲)，佢應該唔洗上小司儀，不過阿旺話還掂家姐上開又比佢一齊上，我無接過佢地放學，所以唔係好知佢地上堂係點，聽工人姐姐講，老師落堂其實會講下小朋友上堂的表現。