行學校年宵市場@20140124

上星期三就家長日，星期五就學校年宵，搞到我要請 2日假﹗因為成績表印錯咗班別，所以我地仲未收到，跳過唔講住，講咗學校年宵市場先﹗

上年我地都有參加，其實都知道無咩特別，不過都當帶大頭妹去玩下啦﹗本身想唔帶小丸子，不過次次佢見我換衫，佢又會走去攞鞋，又會 "纏" 住我，見佢好可憐，好想出街咁﹗都是唔捨得留佢係屋企，就叫工人姐姐一齊去啦﹗

我成日都唔睇清楚通告，原來今日嘅活動分 2節，第 1節係 9:00 - 11:00，第 2節係 11:30 - 1:00，我地 10:00先出門口，10:30先去到太子分校，哈哈哈，玩得半個鐘﹗

一齊坐地鐡﹗

家姐影佢嘅時候特別多表情﹗呀﹗可能要大頭妹帶佢去 interview，表現會最好﹗wahhahaha...都仲未有學校收，我仲識講笑，出年可能無書讀啦﹗

學校年宵都有安排啲活動比小朋友玩﹗

可能係學校環境，我見大頭妹都好認真﹗

忽然見到班主任 Ms. Bobbi﹗好靚女架﹗大頭妹好鍾意佢架﹗

(不過好明顯，大頭妹係學校嘅環境下，好緊張﹗)

氹咗佢好耐，先笑少少﹗

上年 pn 嘅班主任董老師係小食部，我地都買咗一份一齊食﹗

原來小丸子好鍾意食魚蛋，佢食咗 3粒呀﹗

仲飲埋個杯好甜嘅雪梨水﹗

最後玩多個垃圾分類遊戲，我地就走啦﹗之後去探大頭姑婆﹗

產品試用: Sofina Alblanc 正離子美白精華

多謝 she.com邀請試用 Sofina Alblanc 正離子美白精華和美白按摩面膜﹗

我之前都講過我是 Sofina 長期 fans，自中一就開始用 Sofina 嘅 UV Milk，一用就用了 20幾年 (頭先數手指都覺得自己厲害，可以咁長情﹗我本身想打 10幾年...原來唔只...中一得 12-3歲之嘛﹗)﹗佢地嘅美白我都一直有用，不過就唔係 Alblanc 呢條 line﹗ 今次可以試下啦﹗

首先試用 Sofina Alblanc 美白按摩面膜，我起初以為會同以前嘅 MASSAGE GEL有啲似，原來又唔係喎，可能因為可以做埋面膜，感覺都幾潤，有少少香味，用落都幾舒服﹗我見佢話按摩 1分鐘，再敷 3分鐘，沖涼時用效果最好，所以我都是沖涼前落妝後用﹗我覺得好方便喎，沖涼嘅時候，一次過洗埋面，尤其依家天氣凍，沖涼敷 mask 一 take過搞掂，連咁懶嘅我都搵唔到藉口唔敷 mask啦﹗

Sofina Alblanc美白按摩面膜 $420/ 125g。

試用了一星期，我用了 3次，不是每天都有用啦﹗今次影相就當然唔係沖涼時用啦﹗

大約用一粒車厘子的份量﹗

記得是先按 1分鐘，再敷 3分鐘﹗之後就可以洗啦﹗

佢有保濕同促進血液循環的功效，所以都可以見到我按完之後，塊面有少少紅紅地，好似做完運動，就是血液循環啦﹗

呢幾粒瘡瘡是戰績來的﹗我相信是用了之後將我皮膚底層嘅污垢 "清" 出來啦﹗都是近淋巴的位置﹗大家如果好在意會出豆豆，開始用嘅時候，可能先按 30秒，慢慢再加上去，應該會ok的﹗不過其實應該係我...又唔做運動，又唔做 facial，否則應該都唔會好似我咁出豆豆嘅，不過如果底層真係污穢，其實始終都要面對﹗我覺得用完之後，整體皮膚係有光澤咗，所以出幾粒豆豆都可以接受，用多幾次，等底層嘅污垢清晒就應該無事架啦﹗

之後用完爽膚水，就可以再用美白精華啦﹗

影影下相，小丸子放學返屋企，見我拍面，佢又拍﹗

Sofina Alblanc 正離子美白精華  $720/ 40g。

用後感覺比 Sofina Whitening 潤同厚身，用完之後用有一層白色，之後會慢慢比皮膚吸收﹗

對於一直有用開 Sofina Whitening嘅我，最想知嘅當然係佢地有咩分別啦 (除咗價錢)﹗原來呢支 Sofina Alblanc 正離子美白精華係用咗 SOFINA 獨家專利正離子導入技術，配合帶有正離子的乳化技術，美容成分好似磁石咁帶有引力，直迫入帶有負離子的肌膚，就好似用咗「美肌導入儀」，有效美白成份能夠更迅速、更多咁導入至肌膚底層。

Sofina Alblanc 正離子美白精華成分: 

○ 桔梗美白精華: SOFINA獨家研發的成分，極致從黑色素細胞控制色素蔓延。
○ 洋甘菊ET: 抑制黑色素訊息「內皮素」傳遞, 防止黑色素形成，保持白皙素肌。
○ 潤白活性成份（尤加利精華、白樺精華、柚子精華）
○ 羅漢柏精華: 減少泛紅, 使膚色剔透均勻。
○ 微香性．無色素．無油配方

想知道更多資料，就要 click入去 Sofina 嘅 website 睇下啦﹗

http://web.sofina.com/hk/alblanc/

最後送多張小丸子 "按摩" 面珠相﹗佢係度學我按面呢﹗

新年新衣服

其實我係一個好重視傳統節目嘅人，

新年都希望2個囡著得有新年氣氛，

但是又一定唔可以娘！

今年就係 Cotton Candy Kids，買咗條中國裙比大頭妹同小丸子！
平時我好少買一式一樣嘅衫裙比大頭妹同小丸子，
因為佢地年紀差2年，但已經著同一個碼，成日覺得好唔抵！
不過今次都買咗2條，等佢地有得一人一條！
一條 size 100，一條 size 110，
好彩有 2個色，都可以一人一隻色﹗

另外好開心，
因為 Maggie姨姨送咗 2件新年大紅花花 jacket比大頭妹同小丸子﹗

其實大頭妹細個嘅時候我地買過比佢，
當年我一早就打電話去銅鑼灣分店留，之後叫阿旺去買﹗
以前有藍﹑綠﹑紅，依家得返紅色，
heheheh...不過當年我都係揀紅色﹗

之前著咗去自拍 studio影新年相，預備做賀年卡﹗

去到邊都比人問我係邊度買﹗人人都話靚﹗

呢條打算年初一著﹗好似話今年唔會太凍，係就好啦，呢條裙有少少夾綿，唔太凍嘅話，應該可以單著出街﹗

其實我仲想講 CCK嘅 SERVICE好好，我地上次去 megabox 分店，職員姐姐主動幫大頭妹試衫呢﹗)
 

哈哈...買完野仲有獎抽，抽完一次，大頭妹又話要再抽過...要買滿 $500先有得抽架阿囡﹗




大頭妹嘅係粉紅色 110碼﹗heheh...出年小丸子應該仲岩著﹗

仲有幾日就過年啦﹗要買就要快啦﹗

http://shop.cottoncandykids.net/collections/girls

另外仲要多謝 Maggie姨姨送嘅靚靚 CCK利是封呢﹗

依家去 CCK買滿指定金額都有得送架﹗

摘士多啤梨@20140119

HAHAHA...2014唔做宅媽宣言一出，真是連續 2個星期都有街街去﹗上星期日約咗國皇之家同80後媽咪一家，一行8大6小 (仲有大頭婆婆同大頭姨姨) 去錦田鄉村俱樂部嘅士多啤梨園摘士多啤梨﹗

今年真是人山人海，眼見起碼有 3間學校旅行，另外仲有旅行社，排隊比錢磅士多啤梨嘅人龍起碼有 50人﹗BBQ個邊坐滿晒人，阿旺去問咗 2次都無位﹗本身都想 BBQ，但真是太多人，我地又多小朋友，最後我地摘完士多啤梨，去睇小動物，再玩埋電動車，就出去元朗飲茶﹗

上年嚟我地 BBQ完先玩，好多野都 CLOSED咗﹗今次發覺真是好多野玩，加上可能約埋 6個差唔多年紀嘅小朋友，見佢地真是玩得好開心﹗尤其見到 MANCENT 同大頭妹，唔知點解佢地唔係成日見，不過就好好朋友，去到邊都拖住一齊行﹗

一去到影返由小朋友大合照先﹗我地好厲害，有齊 SUPER GIRL﹑WONDER GIRL同 BATBOY﹗

落田之前又影一幅大合照﹗

上年嚟嘅時候，小丸子仲未識行，今年有得一齊摘士多啤梨啦﹗

大頭妹同爸爸


我地發現...全部細B，全程一邊摘一邊想食士多啤梨﹗


佢地真係好好朋友﹗


今年士多啤梨貴咗少少，韓國種 $100/ 磅，法國種 $70/磅，上年分別是 $90 同 $60，不過佢地無入場費，其實我覺得好抵，我地 4大 2小入去，玩咗差不多一小時，摘咗一籃士多啤梨都是 $110﹗

摘完士多啤梨，我地就去公園草地玩一陣，比啲小B差下電，飲下奶食下粥粥﹗

之後去餵羊同兔仔﹗爸爸去買咗椰菜，不過後來我地發現佢地鍾意食樹葉多啲﹗

估唔到小丸子真是好鍾意小動物，我之前仲有少少擔心佢會唔會比上次布吉隻巨咀鳥嚇親﹗
 

最後去玩埋電動車﹗原來 "女人" 唔識揸車，真是由 3歲開始都睇得出﹗

小丸子勁開心﹗


2個男仔嘅駕駛技術都好好，得大頭妹一個完完全全無方向感，好似舞龍咁行晒 2條線，又摌上膀﹗真是辛苦爸爸啦﹗之後我講返起，原來大頭妹唔開心，我話佢唔識揸車﹗我唯有話可能因為佢載住妹妹，所以影響表現啦﹗

不過...大家自己睇片啦﹗

上年: http://athenajoe.mysinablog.com/index.php?op=ViewArticle&articleId=4538836

錦田鄉村俱樂部: http://www.yl.com.hk/ktcc/price_new.htm

雞酒（附食譜)

上星期阿旺無啦啦話想飲雞酒﹗我坐月嘅時候，成日煲完都係我飲一兩碗，佢同我清晒成煲架﹗﹗﹗不過生大頭妹坐月時，是姑媽煲比我飲，真是好好味﹗之後生小丸子，請咗個鐘點姨姨，都煮得唔錯﹗反而...我自己係未煲過﹗今次係第一次煲﹗

 煲起未落酒之前，留起一湯碗比大頭妹同小丸子﹗

落完酒之後，顏色都深色咗﹗

雞酒

材料: 新鮮雞 1隻/ 薑 手掌大小 (再多啲都可以)/ 木耳 適量/ 杞子 2湯匙 (或去核紅棗 8粒)/ 糯米酒/ 視乎自己酒量 (我落咗一碗)/ 水
調味: 麻油/ 鹽

做法:

1. 雞洗乾淨之後切件，用鹽略醃備用 (大約醃 30分鐘)。(其實睇下大家怕唔怕油，否則可以去皮/ 飛水﹗我地...好明顯唔怕油...我通常係煲完先用湯匙慢慢去油...唔係阿旺會話唔夠香﹗)

2. 燒熱麻油,，爆香薑件 (拍完再切件)，再落雞件炒至金黃色 (我係呢時有用 kitchen paper吸油)，加入木耳炒勻。

3. 加熱水至蓋過材料 (如用杞子就係依家加入，如用紅棗就之前同木耳一齊加)，大火煲 15分鐘，再下酒煲 5 - 10分鐘，下鹽調味﹗用糯米酒因為本身已有甜味，就唔洗加糖啦﹗


註:
1. 如果是坐月時食，最好用麻油，因麻油有消炎功效，有助子宮復完。
2. 坐月時可用紅棗，一般人用杞子都可以，好似我熱底，就麻麻地食得紅棗啦﹗
3. 個人認為...坐月媽咪最好等清晒惡露先飲，醫院書仔都咁教架﹗但有啲老人家話木耳清惡露，應該生完即飲，我生大頭妹嘅時候試過，明明係醫院都清得 7788，返屋企一食木耳，真係返轉頭，本人膽小...覺得都係清晒先飲安心啲﹗所以女士事月事期間係唔應該飲架﹗


麻油: 本品性味甘、涼，具有潤腸通便、解毒生肌之功效。據《本草綱目》上記載：「有潤燥、解毒、止痛、消腫之功。」《別錄》說：「利大腸，胞衣不落。生者摩疙腫，生禿髮。」(原文: http://cht.a-hospital.com/w/%E9%BA%BB%E6%B2%B9)

黑木耳:含有人體必須的8種胺基酸，含維生素B2是米的10倍；還含有豐富的膠質，對人體消化系統有良好的清潤作用、補氣益智、潤肺補腦，有止血作用，主治咯血、吐血、血痢、崩漏、痔瘡出血、便秘帶血等，對肺虛咳嗽、久病體虛，肢體麻木的有效。具有清毛、洗腸、潤肺、減少血液凝塊、緩和冠狀動脈粥狀硬化、降低血栓的作用，黑木耳中的多醣具有抗腫瘤活性，對腫瘤有一定預防效果。新鮮的黑木耳每100克含鐵98毫克，含量是肉類的100倍以上，鈣質為肉類的30倍。 （原文: http://zh.wikipedia.org/zh-hk/%E9%BB%91%E6%9C%A8%E8%80%B3)