靚太聚餐【Pasta Inn】@20161111

2016年 11月 11日 (星期五)

其實真是好慶幸自己寫 blog，識到一班媽媽朋友，我同 80後媽媽 GILL，國皇之家 MANDY，都是有個小一同 K2的小朋友，所以成日有講唔完的話題，由之前升小一，到依家讀小一的辛酸，通通都可以講一餐，大家的小朋友又岩玩﹗

開學 2個月，我地 3個靚太又要鬆一鬆，約埋一齊去食個晚餐，地點是 Pasta Inn，我上 openrice 搵，見是日本人開的小店，地點價錢都唔錯，就去試下啦﹗整體地方整潔﹑食物質素中上，價錢都好抵，我地 3個人點了 3個餐 share，最後埋單都是 $150/ 人，意粉/ pizza/ 牛扒餐都是 around $100-160，包餐湯﹑餐飲，甜品另加 $10-20不等，牛扒餐就包柚子雪芭，味道清新﹗ 唯一是...真是小店，around 20-25個位，但得 3個人，1個煮﹑1個水吧﹑1個樓面，經常都要等好耐﹗


蘑菇湯就一般般，好難有自己煲的咁濃﹗

日本人開的小店，意粉的水準果然不錯，意粉煮得剛剛好，亦十分足料﹗

Pizza 芝士分量十足，薄批底十分香脆﹗

忽然好想食牛扒，點了一個牛扒set，只是 $138，有湯﹑沙律﹑白飯 (沒有入鏡)﹑仲有一杯柚子雪芭﹗

呢間小店我應該會再幫襯，大頭妹最近星期六都嚟呢邊跳中國舞，跳完可以去食晚餐﹗

大家 Like咗我地的 Facebook page未呀？﹗未就快啲 like啦﹗

靚媽好物推介: BIO ESSENCE DEEP EXFOLIATING GEL

其實我呢幾年的皮膚都麻麻地，之前有睇過皮膚科醫生，佢話我可能是賀爾蒙問題，所以角質層好厚，油脂分泌旺盛。做 facial 時，美容師簡單講就是如果正常人有 5-6層死皮，我就可能有 15-20層，所以之後我就好努力去死皮，除咗定時上美容院做 peeling ，自己係屋企都動手去死皮，發現暗瘡的問題，真是有改善，依家雖然講唔上白滑，暗粒都仍然有，但都叫做見得人囉﹗

最近比我試到一隻幾好用又唔貴的，係度介紹一下﹗BIO ESSENCE 的 DEEP EXFOLIATING GEL，我覺得效果都幾好，用完有肉眼見到的分別，我個次用完問阿旺，點呀？﹗用完有冇似『鍾嘉欣』呀 (代言人)？﹗阿旺好衰咁話，一定似啦﹗咁佢用完咪似『吳尊』？﹗哈哈，一個代言人，兩個效果，又幾好喎﹗

我之前用開呢款是化妝老師幫我買，但要等佢開 "團購"，所以我一直好珍而重之咁用，尤其依家用淨少少，其實佢同 BIO ESSENCE 有啲似，我覺得佢無 BIO ESSENCE 咁刺激皮膚。


呢隻 INNISFREE wine peeling jelly softener 就好方便，好似爽膚水咁用，倒落綿花再直接抹。

隔日早上就用 Clarins Gentle Exfoliating Cleaner。

大家 Like咗我地的 Facebook page未呀？﹗未就快啲 like啦﹗

大頭小丸【皮紋分析】

 

2016年 11月 13日 (星期日) 

上星期日帶大頭妹同小丸子去做皮紋分析，從而睇下佢地的長/ 短處，唔知大家有冇聽過/ 做過，其實做人阿媽，應該是最了解自己個女，做咩要去做埋咩皮紋呢？﹗原因是...平﹗出面好多 $1000 - 幾千都有，朋友介紹有間 $180/位，所以全家都去做，都只是 $720﹗哈哈哈﹗當是平平地滿足一下我的好奇心﹗

咁到底準唔準呢？﹗嗱﹗我絕對唔係專家，對皮紋完全唔認識，我覺得因人而異啦，我同阿旺就好似都幾準？﹗大頭妹同小丸子呢，覺得講得岩的，就參考一下都無壞，因為皮紋是講學習功力/ 模式，只要係個 average 入面，越高分又唔代表越叻/ IQ 高啲。Average 是 100 - 168，我是 236，阿旺是 158，大頭妹是 143，小丸子是 124，所以我收到份報告時，都唔知應該開心，定唔開心，自己最高分，我係所謂最 "谷" 得個個。

我地一家都精彩，4種人格特性入面有 3種，好彩唔係 4種都有齊，我是貓頭鷹﹑阿旺同大頭妹都是樹熊，小丸子是變色龍，所以阿旺同大頭妹天生就好夾﹗OK...咁我唔洗再埋怨點解我做咁多野，大頭妹都是鍾意爸爸多啲，因為爸爸同佢的相處模式係會令佢覺得最舒服。

先講下我自己，我份報告呢，應該港媽見到會好開心的，如果我 2個女份報告是咁，我都會好開心， 哈哈，思考力高﹑藝術好﹑記憶力好，只有閱讀，同圖像比教低分，所以我從來都覺得好奇怪，點解我記性好，但認唔到人？﹗依家明白啦﹗另外好不幸，樣樣都幾好，所以我個人都真是『周身刀無張利』，令我明白自小陪養小朋友，真是好重要。

阿旺就第一句已經被皮紋分析師話佢個人唔識合香港的教育制度，細個讀書應該好辛苦﹗全中啦﹗佢有 5個 X，X代表潛能，如果有被開發就會叻過人，如果無開發到就會比人差﹗

大頭妹數理邏輯同圖像能力都是 X，所以皮紋分析師第一句已經問我佢數學得唔得，認中文字有冇困難？﹗數學我就覺得大頭妹無問題，不過佢一直好得意，狀態好就計好快，佢依家 eye level 學到 4位加數，但有時佢計雙位數會喊住話唔想計，anyway，即是要繼續 train 佢數學。而另一樣圖像能力就出事啦，大頭妹咪就係認唔到中文字囉﹗我一直又係覺得奇怪，點解大頭妹認英文咁快，但認唔到中文，原來學英文同中文的模式係唔同，英文是靠『聽』，中文係靠『睇』，大頭妹語文﹑記憶是最高分，所以佢學英文就好易掌握，當年見佢學 phonics blending，真是一學就識﹗

小丸子雖然係 4個之中最低分，不過佢就勝在平均，而且左右腦都好平均。佢思考同溝通都是 X，不過我見佢平時溝通同思考都唔大問題，佢係歪理比較多，唔知係唔係有影響？﹗皮紋分析師建議我地比佢參加多啲團隊活動 e.g. 童軍。

大家 Like咗我地的 Facebook page未呀？﹗未就快啲 like啦﹗

MAY'S COOKIES「天使曲奇禮盒」

早前收到 MAY'S COOKIES 送來的，與【香港天使綜合症基金會 (HKSAF)】 合作推出的「天使曲奇禮盒」慈善曲奇，入面有 3款唔同口味，包括獨立包裝的碎朱古力曲奇、杏仁曲奇及紅莓曲奇！

其實我都是第一次聽天使綜合症，專登上網睇過資料，原來天使綜合症的小孩的病徵包括: 僵硬及不穩的步態、不能言語、過度歡笑﹑患有癲癇發作和嚴重的發育遲緩。而這全部均是因為第15號染色體的基因受到破壞而引起。


「天使曲奇禮盒」每盒售價為$228，其中的$80會撥捐【香港天使綜合症基金會】幫助患病的小朋友及家庭，可以吃到美味曲奇，同時又可幫助到有需要既小天使！

紅莓曲奇 - 牛油曲奇入面有紅梅乾，酸酸甜甜好好味﹗

碎朱古力曲奇 -比平時的曲奇脆身，入面有少少朱古力粒粒，真是食到停唔到口﹗

杏仁曲奇 - 我本身都好喜歡杏仁味，所以岩晒我口味﹗

May's Cookies
網址：http://www.mayscookies.com.hk/
查詢電話: 5114 2590

不經不覺長大了【大頭妹 6歲半】

大頭妹升上小學之後，好似忽然間大個咗好多﹗其實一直好多人都話大頭妹諗野好成熟，我又唔係特別覺得，作為媽媽，自己的小朋友，永遠都是小朋友，何況大頭妹其實都是得 6歲半，是真正的小朋友。

最近同佢傾計，覺得佢啲諗法好得意，所以又想寫低佢，大個比佢自己睇返﹗

事件 1: 100分先有獎勵
話說我個人就好鍾意買野，但其實大頭妹反而好少叫我買野，有日 AEON 森林家族做 85折，我就幫佢添置下家私啦﹗一次過買了廚房﹑廁所﹑小朋友床﹗

我 (同大頭姨姨講): 唉吔，蠢咗，唔應該一次過送比佢地，應該等默書100分先送，等佢有啲動力溫習。
大 (坐我前面做梗功課): 你咁樣係唔岩架﹗唔通我攞 80分，你就唔惜我，要攞 100分先惜我咩？﹗
我: ... (腦海中響起 K.O. YOU WIN﹗)

事件 2: 求學不是求分數
上小學同幼稚園時最大分別，就是要面對分數，大頭妹學校功課唔算多，不過小測﹑默書﹑評估/ 堂課都唔少，所以成日都要面對分數，每次派卷之後我就會問下佢幾分？﹗
我: 今日默書幾多分呀？
大: 你唔好成日問我幾多分啦﹗老師話求學不是求分數﹗
我: 下，咁我都要知架...我都要簽名架嘛...﹗(哼)
其實我都好欣賞佢求學不是求分數的態度，起碼唔好比太大壓力自己先啦﹗


第一次自己參加學校的旅行，無爸爸媽媽的陪伴。佢仲唔比我參加家長義工，佢話家長義工是要照顧全部小朋友，唔可以只是睇住佢一個﹗

發現自己前面的門牙開始鬆，要開始換牙了﹗

參加學校的中國舞班，有同學一齊上堂，玩得特別開心﹗

其實大頭妹一向都好有自己思想，好多事都非黑即白，唔係咁容易改變佢想法，幸好是佢是一個心地善良﹑有正義感﹑講求公平的小朋友﹗有時我都覺得佢的諗法好得意，好似佢床有好多公仔陪佢訓覺，佢會每日轉下佢地的位置，佢話咁先係公平，佢話妹妹長期都是攬一隻 TEDDY 的做法是唔公平，因為每一隻公仔都要愛。平時好怕羞的佢，遇到唔岩的事都會出聲，好似試過去公園，有小朋友用飲水機的水洗玩具，佢就行去同小朋友的媽媽講唔可以咁做，又試過有小朋友話自己拎咗地鐵張單程飛，佢又走埋去叫人要還返比地鐵，所以我同佢去公園，成日都驚會比人打﹗哈哈哈﹗但另一方面又好奇怪，人地蝦佢，佢又永遠都唔敢出聲？﹗我都唔明白點解﹗ 希望佢面對自己的不公平都可以勇敢啲啦！

大家 Like咗我地的 Facebook page未呀？﹗未就快啲 like啦﹗