大頭妹【Jolly Kingdom】 升班啦！

大頭妹由K1下學期開始係Jolly Kingdom上phonics，讀了2年3個月，終於「畢業」啦！我地一星期上一堂，老師話大頭妹進度良好，比預期早了畢業，我到畢業前先知，原來佢地有升班試？！只是大頭妹每次都一次就合格升班，所以我完全唔知道有升班試這回事，我呢個媽媽有時真是身在福中不知福啦﹗

大頭妹都跟咗 jolly phonics的老師 Ms. Lena 2年，原本都掙扎好唔好繼續上，唔係因為老師/ 教學內容問題，主要是因為要星期六早上出北角上，話近唔近話遠唔遠，有時都想將佢地的興趣班搬返近屋企，唔係有時上堂 1個鐘，來回車程又 1個鐘，上堂時間又要呆等 ，不過考慮完一輪，覺得既然搵到一個夾既老師，都係唔轉來轉去了。好怕啲興趣班成日轉老師，Ms. Lena 教咗大頭妹 2年，知佢程度同進度，都是好大好處既。

上完 phonics，老師建議我地比大頭妹上 reading and comprehension， 預備升小一的課程，會有較多 reading，要寫下句子，上咗 2堂，原來仲有默書，呵呵呵...正合我心意﹗

課程主要用呢本 reading lamp，分 1-3，1本大約是 4個月，所以應該 1年上完﹗

每星期有 2版功課，大頭妹都識自己做，串字就要提下，不過有時佢都識自己望下上下左右，睇下有冇得抄。

另外，仲有一本 sight words 同一本grammar，不過好似未開始教，我見 2本都未用。

sight words 即是常用字啦﹗學過 phonics 都知，其實有時要教 phonics 的發音，學的生字反而未必是常用字，依家上 reading，就當然是學返小朋友的常用字。

都有少少習作，我估係堂課呱？﹗

呢本是 grammar，我覺得都唔錯，不過唔知個進度會係點？﹗

呢張就是默書紙 (我估)，我上次無幫大頭妹溫，我見佢就係默呢張工作紙，不過呢張唔知點解有啲字好深。

上次默既簡單啲，無溫過，10個岩6個，都合格啦﹗大頭妹話有限時，所以唔記得唔可以諗太耐。依家幼稚園冇默書，我成日驚佢上小學唔習慣，依家上英文有得默，唔洗我做衰人。

依家大頭妹會繼續上 jolly kingdom，又到要考慮小丸子啦﹗如果家姐都要出北角，帶 1個同 2個就無分別，如果同一時間有 phonics上，可以一齊上，但 phonics 一上就 2-3年，我真是要好好考慮清楚﹗

後記：

剛剛發生一件事，令我覺得我比大頭妹繼續跟 Ms. Lena 上堂真是無錯。

話說大頭妹升班之後，要開始默書，一星期大約 10個生字，第一次我唔知無同大頭妹溫，大頭妹得 6/10分。第2次即是上星期六，前一晚我唔舒服，一早訓咗，訓之前明明聽到大頭妹叫爸爸同佢做 phonics 的功課，結果做漏默書的功課，即是連 寫 2次都冇，第 2日就返去默書，結果得 2/10分。

大頭妹返到屋企紅著眼同我講 "我得 2分，不過 Ms. Lena 話就算我得 2分，佢都唔會鬧我。"，之後再話 "我下次會攞返 10分比 Ms. Lena。"，之後自己坐埋枱做功課，自己一邊串一邊默，最後我叫佢串一次比我聽，全部岩晒﹗

我開心唔係因為佢串岩晒，係覺得佢對自己有要求，會負責任﹗當然好老師都好重要﹗