傻夫婦京都大阪奈良7天親子之旅【行程篇】

去完旅行一個星期，要開始寫遊記，唔係好快唔記得啲細節﹗今次第一次同大頭妹小丸子去大阪﹑京都﹑奈良，係我同阿旺去HONEYMOON 的地方，不過好可惜，我睇返之前的 BLOG，可能係YAHOO 搬過嚟時搬得唔好，依家 HONEYMOON 的BLOG，只有文字，無晒相了﹗

先睇下我今次的行程：

Day 1: Yodobashi/ 西松屋/ 錦市場/ 京都塔/ Daiwa Roynet Hotel Kyoto Ekimae

Day 2: 夢館和服外拍/ 奈良東大寺餵鹿/ 志津香

Day 3: Legoland/ 聖瑪麗亞號/ 海遊館/ 天保山麼天輪/ 溫野菜

Day 4: 宮崎和牛鐵板燒/ Spa World 溫泉/  御宿野乃酒店

Day 5: 黑門市場/ 難波shopping/ 大阪城公園/ 國產牛燒肉放題

Day 6: 枚方公園/ 釣船茶屋

Day 7: Kids Plaza Osaka/ 蟹道樂/ 難波shopping 


DAY 1: 關西機場>京都>YODOBASHI>錦市場>京都塔

京都站前的 YODOBASHI 真是超級大，剛好就係我地入住的酒店旁邊，所以未有得 CHECK IN 之前就去逛逛﹗3/F 半層都是賣玩具，樣樣都睇下的話3小時都行唔返出嚟﹗

4/F 有間西松屋不過就唔係好大，我都買咗睡衣比大頭小丸﹗另外都有幾間賣衫，不過我就無行﹗


中午就出發去錦市場﹗


我個人喜歡錦市場多過黑門市場，黑門市場實在太多人﹗


食完午餐就差不多時間可以返酒店 CHECK IN休息一陣，再出去【京都塔】上壽司WORKSHOP，其實有好多唔同類型的WORKSHOP，好似和菓子﹑手工藝之類﹗
https://www.kyoto-tower-sando.jp/tw/


DAY 2: 夢館和服外拍> 奈良東大寺餵鹿> 志津香

今日BOOK咗【夢館】和服外拍，本身驚打風落雨，點知不知幾好天，仲曬到暈，所以一影完相，我地都即刻返去夢館換衫，無再去其他地方影下相，如果唔係可以去清水寺﹑八板神社行下﹗


換完衫返酒店食啲野，就出發去奈良啦﹗去奈良就當然係去餵鹿啦﹗

東大寺


晚餐去咗【志津香】食釜飯﹗


Day 3: Legoland>聖瑪麗亞號>海遊館>天保山麼天輪>溫野菜

第3日本身的行程是去嵐山﹑清水寺，不過朋友前2日去完，話天氣太熱，連小火車都停駛，所以我都轉玩室內場，將原本DAY 5的行程轉上嚟﹗

今日其實仲係住京都，要坐JR出返大阪，之後買咗大阪周遊卡，因為今日的行程，用周遊卡都係免費/ 有入場優惠﹗

首先係LEGOLAND，憑周遊卡免費入場，所以小朋友都要買啊，不過大阪的LEGOLAND比東京的還要細。


之後再坐聖瑪麗亞號...都係免費...不過我坐完覺得免費都唔好浪費時間...


之後爸爸帶埋2個去海遊館，不過我地買飛時唔記得SHOW周遊卡...好似都有 200YEN DISCOUNT﹗




佢地去海遊館時，我就自己行下天保山個商場，不過無咩野行，最吸引已經係SERIA，另外仲有間藥房。等佢地行完海遊館，我地就一齊坐天保山麼天輪﹗


之後出返梅田食【溫野菜】，不過我地成 9:00先到，9:30先有位，11:00 就收，所以食唔足2小時，而且第一ROUND侍應係會拎晒全部肉類每人每樣一碟，結果係好多好多豬肉...我唔好豬...所以覺得呢餐麻麻地﹗

Day 4: 宮崎和牛鐵板燒>Spa World 溫泉大世界>御宿野乃酒店

今次旅行只是book咗 2間餐廳，呢間係其中一間，不過我原先book lunch time，就係諗住 lunch set平啲，結果我無睇清楚星期，原來今日是星期六...weekend無lunch set，咁早知book dinner time，會有多啲唔同的 set 揀，呢餐係我食過最貴的lunch，哈哈哈，不過真是超好味。

食飽飽岩岩到酒店 check in 的時間，返酒店換好泳衣就出發去【Spa World 溫泉大世界】玩水﹗
http://www.spaworld.co.jp/china/ 
 

其實小朋友玩的地方唔算大，夏天好多公園都會有玩水的地方，都好似比呢度大，不過呢度就可以浸埋溫泉。
 

Day 5: 黑門市場>難波shopping>大阪城公園>國產牛燒肉放題

今次阿旺問可唔可以比個訓到自然醒的旅行比佢，以往多數我地的行程都是 8:00 - 11:00，佢話辛苦過返工﹗今次 plan 行程時，真是『輕手』好多，佢今次終於有得自然醒，再去黑門食個 brunch!




黑門多生冷野，唔太岩小朋友食，之後同佢地去 【GRAM】，果然係食唔到梳乎厘pancake，應該要一早去排，不過普通 pancake的味道都唔錯﹗

食完就去行難波0101，比少少時間我 SHOPPING，嚟到DAY 5，先有少少時間比我去睇下野﹗

之後就出發去大阪城，本來都想同大頭小丸去睇下大阪城，不過一比佢地見到個公園...仲點會行15分鐘去睇個城﹗


玩咗一陣，雖然都已經4:00幾，都仲係太晒，我地就去旁邊個 playhouse，1700yen可以玩全日，我地5:00入去，7:00關門，有少少尷尬，玩1個鐘又一定唔夠，就比1700yen，比佢地玩到關門啦﹗ 




玩到 7:00天未黑，再去出面免費個公園玩一陣，9:00返到難波，忽然諗下有冇機會 walk in 食到【國產牛】，9:00 walk in，要等到 9:40 先有位，又係 11:00收，不過最後都食咗，真是好好味，以呢個價位嚟講任食真是好抵食﹗﹗﹗

Day 6: 枚方公園>釣船茶屋

今日約埋『國皇之家』一齊去枚方公園。

全部遊戲都唔洗排隊，真是玩得好爽﹗ 上次去長隆時 MANCENT 已經話想玩，今次終於玩到﹗2個爸爸仲一齊上去玩，玩完落嚟話想嘔﹗

之後一齊去釣船茶屋，一早就EMAIL訂了枱，見都幾FULL，不過都真係好多香港人﹗


刺身都真是幾正﹗


食飽再去行下心齋橋﹗

Day 7: Kids Plaza Osaka>蟹道樂>難波shopping>關西機場

最後一日啦﹗真係唔捨得起走﹗今日都是小朋友行程，去 Kids Plaza Osaka﹗


都有好多唔同的遊戲玩﹗


仲有『兒童村』玩職業遊戲，當然就無 KIDZANIA 咁專業啦﹗




最後一餐去食蟹道樂﹗




最後坐南海電鐵去機場﹗




7日的行程完結啦﹗我會再分日子寫詳情的BLOG，大家等我呀﹗