大頭妹便當：照燒雞扒 玉子燒 飯團

學校上星期三出忽然出通告，今日開始返全日，11月再根據打第3針的人數，再睇下可唔可以繼續返全日，時隔差不多3年，終於可以返全日！希望生活真的慢慢回復正常！

上星期一收到通知返全日，就問大頭妹，午餐點算？佢話唔係你煮咩？！吓⋯⋯而家返中學，6:55上校車喎！咁我咪要6:00起身？！仲要30分鐘內煮好？！咁我又唔驚，而家中學有小賣部，如果⋯⋯如果真係起唔到身，個日咪食小賣部囉，一定唔會餓死嘅😆。

是日午餐：照燒雞扒、玉子燒、飯團、車厘茄、青提、藍莓。今日先試日式便當，我相信大頭妹都唔會食得晒。

份量其實是大約半碗飯、1塊雞扒、1隻雞蛋、3粒車厘茄、3粒青提、3粒藍莓。

最後工人姐姐回報，食淨3粒雞肉、2粒藍莓、1粒車厘茄。