今日的行程是【豪斯登堡】﹗買了 【JR北九州鐵路 3日 PASS】，要連續 3日使用，第一日去熊本即日來回，第 2日去豪斯登堡，第3日就回程由豪斯登堡返博多，剛剛好 3日﹗樂園是 9:00開門，想玩盡少少，坐一早 8:34AM 的火車， 6:30AM就要起身，一班車是一小時，錯過了坐下一班就要等一小時啦﹗車程大約是 1.5小時多少少，去到已經 10:30啦﹗
我搵過下香港的旅行社網站，唔覺有得預先係香港買飛，去到就明白，其實都唔多旅客，根本就無這個需要。我地帶住小朋友，所以選擇住一晚，場內有 3間酒店: 歐洲大飯店﹑阿姆斯特丹大飯店﹑森林小別墅，我地就住 WATERMARK HOTEL，係園的最入，但唔算園內酒店，不過一樣有得入園前放低咗行李先，到 check in 時，行李已經送到酒店。我其實有個好奇？﹗如果住園內酒店，係唔係第 2日 check out 之後都仍然可以係園內行下呢？﹗有冇朋友知道？﹗
其實我覺得【豪斯登堡】入場費都幾貴，仲貴過東京迪士尼，大人要 6200YEN，小朋友就 4300 YEN，剛剛 7月1日加了價，不過同時做 JR PASS 8折，所以坐鐵路的朋友，買飛就平了，為起大約是 $380/大人，265/小朋友 (我是 77時換 YEN，又提起自己的傷心事)。
http://www.huistenbosch.co.jp/
又講多一次，如果坐鐵路，都是博多方便，尤其是坐 8:30的火車﹗呵呵呵﹗預早少少去 MISTER DONUT 食早餐﹗九州好似有好多 MISTER DONUT，去到邊都經常見到﹗
【豪斯登堡】火車的車箱就好似無新幹線咁靚。
今次個 TRIP 我先發現，其實我 2個女都好乖，坐飛機﹑火車都唔會扭計，大頭妹就唔洗講，通常佢一上交通工具叫佢訓佢就訓，仲要一到站叫佢起身，佢就即刻起，仲自己行，所以帶佢去旅行是零難度﹗小丸子有得玩就會乖，所以帶佢出街佢都還可以，同佢講叫佢訓，訓醒去到有力玩，叫佢幾次佢都會聽，不過佢有時醒咗唔肯自己行囉﹗
一上車就訓，去到目的地就訓飽飽，精精神神咁玩﹗
小丸子要睇 ipad一陣，不過最後都訓咗﹗
呵呵...我就煲韓劇，車程岩岩好睇一集。
去到【豪斯登堡】火車站，超級大風﹗
我地買一日任玩 PASS，2大2小就是 HK$1300，入場之後都明白，地方好大，維修各方面都應該幾貴﹗我地最後玩了 9個遊戲/ 館，另外租了家庭單車，但其實 1日真是玩唔晒成個樂園﹗
第一站是 泰迪熊王國﹗
2個囡另外一個最乖的地方是唔會扭計買玩具，小丸子有時都會話想買，大頭妹會問可唔可以買，但我話唔買，2個都唔會扭，所以有時我自己要嘆氣高叫『點解我 2個囡都唔扭買玩具，但我好想買呀﹗呀﹗呀﹗』，阿旺仲對住我偷笑﹗
我好想買呢個 TEDDY BEAR，問完 2個囡，佢地都話唔要，大頭妹仲答我 『唔洗啦﹗唔該﹗屋企已經有好多玩具啦﹗』。唉...我想借你過橋啫，點解唔比我借？﹗
第一次踩家庭單車，原來都幾好玩﹗好似是 4500 YEN，由入園到 6:00 還車，樂園太大，其實踩埋單車都行唔晒個樂園﹗
最後唔夠時間坐麼天輪。
MIFFY SHOP，MIFFY 迷一定唔可以錯過啦﹗
小丸子係呢度都玩唔到捨得走﹗
鏇轉木馬基本上無人玩，所以可以一家包場，好唔習慣。
之前諗住去海賊王餐廳，原來已經CLOSED咗﹗問阿旺午晚餐試 2間唔同的餐廳，定去一間我睇 BLOG 人地話過好味的，結果...我地穩陣派，當然午晚餐食同一間啦﹗
去了小齊媽媽之前介紹過的 【花之家】，都真是唔錯呀﹗我身邊幾個朋友去過，都話豪斯登堡的餐廳麻麻地，我覺得呢間都 OK﹗(上年去迪士尼...啲餐廳都好正﹗) 阿旺話佢個滑蛋豬排飯好好味﹗ 我同大頭妹小丸子，3個人點咗 2個壽司SET，一冷一熱鳥東都好味，壽司普通，不過啲女食晒啲飯，個熱鳥東味道唔錯，連天婦羅都幾好味﹗價錢唔貴，阿旺個飯 980YEN，我地壽司SET 就 1450YEN。
食完 LUNCH，阿旺去玩射擊遊戲，我同小丸子去 GAME CENTRE 涼冷氣，大頭妹堅持坐係單車。
踩單車四圍睇下﹗園內的森林酒店﹗
3:00PM 可以 CHECK IN，2:30去踫下運氣，都真是可以，行李都到咗，上房就換衫去玩水﹗
夏天特別有得玩水，1日PASS包埋，佢仲有條 180M長滑梯，不過我地都無玩﹗我踩完單車，已經得返半條人命，連水都無落。
明明中午好好天，玩水時忽然落好大雨，大頭妹怕凍話要上水，小丸子就繼續玩，玩到 5:00。
玩完水返酒店沖完涼，又再出發﹗
ONE PIECE 巡航 ～FOR THE NEW WORLD～
今次去豪斯登堡，本身就是為了 ONE PIECE，點知原來架船已經開走咗，得返一個館，同賣精品的地方 (不過得返好少)，連餐廳都 CLOSED。
個館又是好似迪士尼巴斯光年個 GAME ，坐架車射下野，入面好靚，不過佢唔比影相？﹗
魔幻鏡迷宮 ，呢個幾得意，是鏡的迷宮，不過唔好同前面行太近，我跟住阿旺行，唔洗自己搵路﹗
超級魔法藝術館 ，呢個影下相玩下。
玩到好攰好攰，去食晚餐差個電﹗又是【花之家】，之前已經 PLAN好要食 SUKIYAKI﹗價錢唔算貴，而且好好味﹗﹗﹗阿旺的是長崎和牛 3700YEN，我的是伊萬里牛 3200YEN，我是想試下分別，試完就後悔啦﹗一分錢一分貨，就算只是 500YEN﹗
食完晚飯，繼續欣賞一下『光之王國』啦﹗如果唔住酒店，就欣賞唔到啦﹗
晚上的運河真是好靚﹗
連豪斯登堡入面都有『藥房』，就是我地酒店旁邊，行返去時行個圈。
夜晚酒店個邊無咩光，我話當玩埋 SILENT HILL﹗
整體來講，我覺得未去過，當有得玩，又有靚景睇，都還可以，地點上鐵路遊算是方便，火車站一出就見到，行 5分鐘就到，所以之前有考慮過去大分 HARMONYLAND (HELLO KITTY LAND)，最終都揀豪斯登堡。
傻夫婦九州親子之旅行程一覽:
大家 LIKE 咗我地個 FACEBOOK PAGE 未呀？﹗未就快啲 LIKE啦﹗
沒有留言:
張貼留言