是日晚餐：洋蔥牛仔骨、南乳炆齋、南瓜露 （附食譜）

最近工人姐姐成日令我好勞氣﹗唉﹗但諗深一層，自己的確無努力 train過佢﹗係自己縱容佢 "得過且過" 嘅﹗就好似煮餸咁﹗佢無咩心機學，之前工人姐姐見我煮佢未煮過嘅，會不停問我落咗咩醃，會主動叫我比佢煮，我企旁邊講比佢知就ok﹗依家個工人姐姐見我落場就即閃，叫佢企定睇，但佢下次見我煮，佢又繼續閃﹗放手比佢煮，通常要失敗好多次先成功，中間要忍受一段時間﹗最好笑的是...成日問我夜晚想食咩，我叫佢諗，佢就會諗埋啲自己唔識煮，我煮開嘅餸？﹗係唔係玩野？﹗

講返今晚餐飯，除咗個洋蔥牛仔骨，另外 2樣都係工人姐姐煮﹗南瓜露是以前的工人姐姐秋天成日會煲的﹗忽然好想食，就問依家個工人姐姐識唔識煮，佢話佢應該都識喎，咁 ok啦，等佢試下啦﹗係我監督下，都成功咗﹗好野﹗以後有得食啦﹗原來佢話佢地印尼係用蕃薯煲，但煲法係一樣﹗

係街市買 4條牛仔骨都是 $38，ok啦，平過超市好多﹗忽然好想食個薄黑椒洋蔥汁，所以煮咗好多，用來撈飯，真係好正﹗

南乳炆齋食譜: http://athena-joe.blogspot.hk/2014/03/blog-post_17.html

小丸子: 都唔知食野有咩好影﹗成日偷影我﹗食奶又影﹑食飯又影﹑依家食糖水都影﹗

小丸子: 都係唔好理咁多﹗食得快好世界，食得麼無鼻哥﹗

秋天南瓜當造，真是唔好錯過﹗非常好味﹗

南瓜露
材料:
日本南瓜 1/4個 (其他南瓜都ok架﹗)
西米 半包 (大約半碗) (我用印尼西米，大粒少少，同埋 "煙 un" 啲﹗)
冰糖 適量
水 適量
椰漿 1少盒 (應該係 100ml)

做法:
1. 南瓜去籽﹑去皮﹑切粒
2.  南瓜放入熱水煲至腍身 (我用 20cm LC，連南瓜，大約是 2/3煲水)
3.  將一半南瓜壓蓉，加入冰糖﹑椰漿一齊煲至冰糖溶化就 OK啦﹗

南乳炆齋 (附食譜)

每年新年去阿旺姑媽家都會吃南乳炆齋，而且阿旺姑媽煮得非常非常好吃﹗齋是一早炆的，我沒有機會跟姑媽學一次，不過我都有返屋企試煮，如是者煮了幾次，覺得味道合格，才出食譜的﹗當然同姑媽煮的，仍有一段距離，下次有機會一定要請教姑媽﹗

其實南乳炆齋不難煮，最難是要預備好多不同的材料﹗我通常都是星期六煮，平時好難要工人姐姐一邊看大頭妹小丸子，一邊預備太多功夫的餸菜，雖然最後都是我炒，但事前功夫是工人姐姐預備的嘛﹗

材料方面都好隨意，除咗津菜是必要的，其他菇類﹑豆品類都是可加可減，買到什麼就加什麼啦﹗不過其實我覺得...最畫龍點睛的是髮菜，我煮幾次都沒有加，我見姑媽是有加髮菜的，的確是有特別的風味﹗另外就是山根，上次加了山根，大家一齊 "尋寶"﹗

南乳炆齋

材料：
菜類: 津菜 1棵 (洗凈，切段)
菇類: 冬菇﹑木耳﹑金針(浸軟)/ 秀珍菇/
豆品類:炸枝竹 (枝竹亦可) 1包/ 山根 1包/ 炸豆腐卜
其他: 粉絲 (用熱水浸軟)

*其實材料都好隨意，可因個人喜好加減，不過最好都要有 5款以上，咁先有唔同口感﹗另可加: 紅蘿蔔/ 栗米芯/ 草菇/ 髮菜/ 荷蘭豆

調味料：
南乳 1磚/ 酒 少少/ 老抽 少少/ 片糖 少少 (可用黃糖代替)/ 麻油/

做法：
1. 先把冬菇/ 木耳 (浸軟)/ 秀珍菇/ 草菇飛水，可除菇的草味，到煮的時候出少啲水。
2. 再把炸枝竹/ 山根/ 炸豆腐卜出水，這個步驟一定不能 SKIP﹗我上次忘了影一影出水後個一煲水...見過大家就明...飲咗個煲水...一定身體健康﹗﹗﹗ 
3. 先炒津菜，盛起備用。
4. 用麻油起鑊，加入南乳﹑紹酒煮開 (有需要可加入煮津菜剩下的水)。
5. 加入全部材料略炒 (令所有材料都佔上南乳醬)，再加入老抽﹑片糖，煮先全部材料軟身即可。