大戶屋@20180325

2018年 3月 25日 (星期日)

又時光倒流到復活節前，今日阿旺要出TRIP，工人姐姐前一日亦都返咗菲律賓放假，得我自己一個一湊二。中午唔想煮，又想同兩個女去行下街，落咗 AEON 玩一陣，再食 LUNCH，點知今日大頭妹竟然話唔食烏東，想食其他野，問佢食拉麵好唔好，話咗好...去到門口又話唔好，行來行去間間都話唔好，終於去到大戶屋，佢話好啦...但條人龍長到...唔想再行，結果等咗成個鐘枱，我又順便教下大頭妹，有時食野要睇情況，做人唔好太麻煩...其實去到間間門口，小丸子都話OK...結果小丸子好無奈﹗

有時寫下 BLOG真係好，等我記得 2個女的優點，大頭妹個人係煩，但佢做事小心，對自己有要求，所以讀書又唔洗我太粗心，小丸子個人比較隨和無所謂，所以做功課都是是但但，其實佢對任何事都無咩要求 (係貪靚同貪吃)﹗

平時好少去大戶屋，因為長期都等位，入到去都要等一陣先落到單，之後等食物上枱又要等一陣，所以等位相對比較耐，如果去上海鋪，呢頭點完，呢頭就上枱，一食完就收走你隻碟﹗

喉嚨唔係太舒服，所以今日食魚，都幾好味既﹗但我覺得同對面差不多，對面個間就平好多。
 

大戶屋的兒童餐好吸引﹗大頭妹自己一個食得晒，咁等耐啲枱都抵，最緊要個女鍾意食﹗


點咗個炸薯仔烏東餐比小丸子，點知薯仔有黑椒，小丸子唔食﹗

20180328@【Pizza Express】

2018年 3月 29日 (星期四)

時光倒流到復活節假期前，阿旺出咗 TRIP，工人姐姐又放假回鄉，過了非常艱辛的一星期，其中一日大頭妹小丸子就去咗嫲嫲屋企一日渡假，個日我就爽，一個人訓晒成張床﹗第 2日嫲嫲帶佢地返嚟，近近地係屋企樓下食 PIZZA EXPRESS，其實我地咁耐都未試過入去坐低食，次次都係買外賣﹗今次點了一個 2人套餐，再加 2個兒童餐，個兒童餐都OK抵食﹗不過食完之後，我奶奶又痾又嘔，我就肚痾...好彩大頭妹小丸子又無事...所以短期內都唔會再去食﹗

我估原凶應該是沙律，因為大頭小丸都無食沙律﹗

意大利肉丸拼麵包球﹗

是日 PIZZA﹗

小丸子的兒童餐，佢自己睇餐牌，唔識的字又問我，最後揀咗呢款，白汁火腿蝴蝶粉﹗

大頭妹的蕃茄芝士PIZZA，真是岩晒佢，完全無肉，即刻食得好快﹗

兒童餐仲有棋子包加朱古力醬做甜品﹗


HAHAHAH...好鍾意食小丸子食野...呢個完全係『等個女嫁唔出』系列﹗


大頭妹就幾時都斯斯文文﹗

太古Mr Steak Seafood Steak@20170512

2017年 5月 12日 (星期五)

今日我地兵分 2路，我同咗大頭妹幼稚園同學媽媽出去晚餐食蒸海鮮，阿旺大頭小丸就同工人姐姐慶祝生日﹗之前大頭妹生日想去食 MR STEAK，但大頭妹一定要食和民，堅持唔試新野，阿旺話講好大頭妹生日比佢揀，一定要守信用，結果我地當然去了和民，等了 30分鐘，等到小丸子都睡了﹗要讚一下呢方面爸爸是做得非常好﹗﹗好堅持﹗﹗比我一定唔會囉...

太古的 MR STEAK，點了主菜就有自助沙律﹑甜品吧，仲有飲品，算是半自助餐，價錢都唔係太貴，都是百幾至二百幾，視乎揀咩主菜啦﹗小朋友就是 SALAD BAR 包意粉，其實價錢都幾抵，不過預著我 2個唔多食野既女，就幾抵都無用﹗

兒童餐的蕃茄醬意大利麵﹗

這個是阿旺的﹗

這個是工人姐姐的﹗

Mr Steak Seafood Steak
地址: 太古康山道1-2號康怡廣場北座地下G9-10號舖
電話: 2895 1100
https://www.openrice.com/zh/hongkong/r-%E7%89%9B%E6%89%92%E5%85%88%E7%94%9F-%E5%A4%AA%E5%8F%A4-%E7%BE%8E%E5%9C%8B%E8%8F%9C-r478507