小丸子K1大作戰 - 第3回

同一日要見 2間幼稚園，上午見完中西區的，下午就見返一間東區的，中埸爸爸去咗飲，我地就返屋企食個quick lunch，快快休息一陣﹗

誰不知...傻媽我今次真是代表作，我竟然記錯面試時間，應該係 4:00，我記咗 4:30，約咗爸爸是北角地鐵站匯合，4:20去到...點解...一個人都無，見好多老師係走廊搬枱櫈...已經知自己 "出事"，之後...望一望封 email，4:00pm？﹗硬住頭皮問老師仲有冇得 in，岩岩仲有一個小朋友 interview中，老師 (好似是主任) 好好人話叫面試的老師等一等見埋我地啦。阿旺又唔知係唔係去飲食得太多，忽然肚痛要去洗手間，入房之前就衝咗去洗手間，老師問佢點解唔入去...hahahahah...今次真是多 NG野...其實都是預無行架啦﹗老師仲比我地見，我地已經覺得老師好好﹗

之後我地入課室填 form，老師就同小丸子傾下計，又係問叫咩名，幾多歲。之後問小丸子邊個帶佢嚟 interview，小丸子唔識答，老師就指住我問我係邊個，小丸子答媽媽，老師問仲有邊個帶佢嚟，小丸子無答，之後老師問爸爸係邊，佢答 "去洗手間"。

之後老師問小丸子是男孩子定女孩子，小丸子答女孩子，老師再拎一條裙同褲的圖出嚟，問小丸子鍾意邊樣多啲，小丸子指褲，老師問小丸子係唔係自己著褲/ 爸爸媽媽幫佢著，佢答爸爸媽媽，老師再問今日條褲係佢自己著/爸爸媽媽著，佢答爸爸媽媽，老師就叫佢以後要自己著啦﹗

之後就問小丸子鍾唔鍾意食野，就攞本書出嚟問小丸子生果，問咗香蕉﹑蘋果，小丸子用英文答 banana﹑apple，之後老師問小丸子橙係邊度，小丸子都指到。再問動物，第一樣問長頸鹿，小丸子唔識，之後問老虎﹑大象，小丸子都識，最後問黑熊，小丸子竟然唔答...

之後就問家長問題，問我地平時屋企用咩語言，邊個照顧小朋友。之後就問

1. 我地對小朋友幼稚園學習的期望。

2. 如果小朋友係學校同人打交，老師打電話比我地，我地會點處理。

3. 學校有家長義工，我地有咩睇法。

都幾多問題...哈哈...真是好多謝老師，最少沒有因為我地遲到而趕收工，比我地的感覺都好好，唔會令我地覺得佢地見完都唔會收小丸子。  結果...都心中有數架啦...龍b咁多 choice...點解要揀個 interview都遲到？﹗不過今日小丸子都表現媽媽真是好滿意﹗

是日心情好靚，所以我覺得佢今日INTERVIEW的表現都好好﹗

大家 like咗我地個 page未呀？﹗未就快啲 like 啦﹗

小丸子K1大作戰 - 第2回

2014年11月22日 (星期二)

今次幫小丸子報考東區以外的 K1，今日面試的一間，是我報 4間學校最遠的一間，是中西區好受女孩子家長歡迎的學校，都是我最心儀的學校之一。面試前都有問下之前的面試模式，不過今年又唔同晒啦﹗

10:30面試，我地 9:00出門口以為有好多時間，結果我地只是 10:15 去到學校，時間岩岩好，一去到見到門口排晒長龍，真是好誇張﹗首先就去交 form，要對出世紙正副本﹑地址証明正副本﹑領洗紙正副本 (如有)﹑銀行入數紙正本...我覺得完全是考家長有冇交帶...哈哈哈﹗之後就由一位家長帶小朋友入學校面試，本來想叫爸爸帶，可惜因為我在場，小丸子攬住我唔放，咁唯有我入去啦﹗其實因為我個人好緊張，所以諗住爸爸負責 interview﹗

入到去都要等好耐，先排隊等了大約 30分鐘，之後去到另一層有得坐低等，又等了 30分鐘，其間我唯有不停同小丸子玩，等佢唔好覺得悶，學校又好靚，又有好多設施，小丸子不停想出去 playground 玩。最後差不多 12:00先入課室 interview﹗真是完全考小朋友的耐性﹗

第 1 part 是 group in，一組 3個小朋友，考做動作，老師播音樂，叫小朋友做動作，包括: 拍手﹑舉高手再收返埋﹑踏步﹑音樂停的時候要停止動作，小丸子全部做晒﹗之後老師同小朋友玩傳 ball，問小朋友知唔知 ball 係咩 (小丸子有答)，之後就開始傳球，小丸子都有做，跟住就埋枱 interview啦﹗

第 2 part是一開始是基本問題，問叫咩名，幾多歲，小丸子都有答，不過唔係好大聲，好彩老師都有聽到。之後就開始問問題啦﹗第一條是打開一本書的一頁，問小丸子書入面的公仔做咩 (玩玩具)，小丸子答唔到，本書爛咗少少，佢不停指住爛個一忽話爛咗呀﹗之後老師轉問圖中一樣物件係咩，今次小丸子有答啦 (波波)，老師再問小丸子鍾意咩玩具，小丸子話鍾意 "bear bear熊"，老師問我係唔係，我話佢係有一隻 bear bear熊攬住瞓，之後小丸子話佢有 2隻。第 2條問題是拼圖，拼返 1個圓形，4個方形，小丸子好快就拼好啦﹗最後就問顏色...oh...又問顏色...第一次問綠色，小丸子話藍色，第 2次問藍色，最後問紅色，之後 2次小丸子就答岩啦﹗

最後老師問我小丸子的優點...我唔預老師會問我問題...忽然啞咗...我話佢活潑好動，仲有好開心﹗hahahhaah...老公話...咁你係唔係即係同老師講...佢 "百厭" (=活潑好動)...oh...一時真是唔識答，而且我一停，老師已經同我講 bye bye。最後叫小丸子拍好張櫈就完啦﹗

12月22日就有結果啦﹗希望會有好消息啦﹗

出發時好活潑精靈架﹗

返屋企都好開心﹗

大家 like咗我地個 page未呀？﹗未就快啲 like 啦﹗

小丸子K1大作戰 - 第1回

其實我自己本身好滿意小丸子依家 PN 的幼稚園，之前都 1516 唔知同唔同佢報其他 K1好，但隨著大頭妹升 K2，開始要睇小學，我就開始後悔當年唔同大頭妹考下有小學 BACK UP的幼稚園，當然...考咗都唔一定收，不過我當年完全無幫大頭妹報 K1呢，所以今次都幫小丸子報返 3間有小學 BACK UP 的幼稚園﹗唔好到時派位派得唔好先後悔﹗試咗唔得，都叫試咗吖﹗唉...如果小丸子遲多 2年出世，大頭妹已經派咗小學，幼稚園階段就輕鬆得多啦﹗依家諗下小學派位，都已經心跳加速﹗

上個星期六，就有第一個 K1 interview 啦﹗呢間係我之前好想大頭妹考到的，當年有學劵 (明年就無啦)，英普語境，校舍大，有小學，近屋企 (雖然唔同區，但都是東區，我當年只報東區的幼稚園)﹗不過大頭妹當年 PN interview 時，一坐底就起身話走啦﹗上年小丸子考 PN 的時候，我覺得佢都做咗 8-9成，都係唔收，都知唔係咁易考，之後聽返其他家長講，一班 4-5個有哥哥姐姐讀緊嘅都唔收，龍B真係競爭好大﹗

哈哈﹗由於我唔想我自己太緊張，小丸子的 K1 interview會是由阿旺負責﹗呵呵呵﹗不過因為咁，有好多笑料，我估個老師可能以為 in 咗個傻佬，今次 interview 都是凍過水﹗好啦﹗我轉述返阿旺講的 interview流程同問題啦﹗今次 interview 用普通話的﹗

 首先老師問家長住係邊，平時小朋友由邊個湊，報上午定下午，平時屋企用咩語言。住邊就無得錯架啦﹗估唔到另外 3題都可以出事﹗阿旺話平時爸爸媽媽湊 (我地唔洗返工咩？)，報上午 (我其實報下午，因為明年大頭妹要返下午，我想佢地一齊下午，之前同佢傾過，大家 agreed 架喎﹗)，至於咩語言，佢竟然答人地廣東話﹑英文﹑普通話都會...um...我地點算有用普通話呀？﹗佢話佢叫佢 『妹妹』，佢識應佢...咁都得？﹗但一陣老師用普通話問，小丸子一定唔識答呢﹗

之後老師開始問小丸子，問叫咩名啦﹗最 basic架啦﹗小丸子以廣東話完整句子答 (我叫陳xx)。之後攞本公仔型的書出嚟問眼﹑耳﹑口﹑鼻，小丸子用英文答晒﹗最後就問顏色﹗噢...問咗小丸子最弱的一項...先問紅﹑黃，再問藍﹑綠。紅 ok，黃第一次答 blue，老師再攞藍﹑綠出嚟，問佢藍，佢識答 blue，綠色識答 green，再問返佢黃色，佢識答返 yellow。

阿旺話之後係吹水時間，不過我覺得係老師睇下家長有幾了解小朋友，老師問小丸子有冇返 PN，返邊度，返學開唔開心，有冇英文堂，每日上幾耐，一班幾多人...除咗學校名，其他有關學校的...阿旺係答錯晒﹗佢話日日有英文﹑一星期一日普通話，一班10幾20人...係大頭妹學校囉...小丸子學校 PN 無英文﹑無普通話﹑一班 60人﹗﹗﹗

結論係...好彩我其實都 1516 係唔係要轉 K1，考到就當然開心，考唔到升返依家 PN 幼稚園的 K1，我都一樣開心﹗

大家 like咗我地個 page未呀？﹗未就快啲 like 啦﹗

小丸子第5次interview@明我幼兒園

上星期日去最後一場 interview啦﹗因為星期五情人節當日收到之前 interview 幼稚園 offer letter，所以今次 interview嘅心情就當對輕鬆啦﹗唔知係唔係小丸子自己都知道已經有學校收佢，今日...佢好唔合作﹗阿旺話小丸子只是想証明佢係清白，唔係我帶佢去 interview，佢就一定乖乖地嘅﹗hehehe...佢仲對我係 blog (同次次見親朋友講考幼稚園時) 話佢帶小丸子去 interview，小丸子咩都唔做而耿耿於懷﹗

都講下 interview流程啦﹗我覺得相當好，全程都唔洗點等，一入門口拎籌就上 1/F課室等，只准一個家長帶 interview，但有另一間房比另一個家長坐住等。等候期間有佢地畢業典禮嘅 video睇，唔錯唔錯，可以多啲了解學校。

之後就開始 interview，interview 分 3 part，第 1 part 係玩玩具，老師睇小朋友玩玩具，無問問題﹗

第 2 part係 sit down interview (小丸子弱項)，一開始老師同小丸子打招呼，小丸子有同老師打招呼，老師同小丸子握手，佢就唔係太願意。之後老師問小丸子我係邊個，小丸子好細聲咁叫咗一聲媽咪，不過老師應該聽唔到 (因為個班房同時有 around 8組 interview，都幾嘈下)，之後拎咗個 ball 同杯出嚟，問小丸子係咩，叫小丸子講出物件名稱先比個 ball ball佢，老師都好有耐心，小丸子隔咗好耐之後先好細聲講 ball。之後老師問佢個杯用嚟做咩，小丸子又無反應。最後老師同小丸子媽媽眼﹑鼻﹑口係邊，佢都無反應，老師都比咗幾多時間佢，佢都無反應，我都無辦法﹗ 

最後一 part應該都係 interview一部份，見校長﹗等見校長期間佢見到學校嘅 decoration又話 "好靚呀﹗"，之後唔知係唔係見到小朋友生日表嘅月份又係度自己數 one - ten，等我諗住佢都會有啲反應比校長呱，結果都係無反應﹗校長叫小丸子自己揀一架玩具車，小丸子無反應，校長比佢都唔收，之後我自己揀一架比佢，佢先要。但之後校長再比糖佢，佢就 9秒9拎咗，好彩叫佢講 thank you，佢都有講﹗

食糖食得你咁開心﹗

見老師校長時又無反應﹗

其實帶住 2個囡去見過幾間幼稚園都明白，學校 interview嘅模式就係佢地上堂嘅模式，有時小朋友 interview表現好，有時差，可能都同佢地適合什麼教學模式有關，希望大家都幫自己嘅小朋友揀到合適嘅幼稚園啦﹗


大家 like 咗我地 facebook page未呀？﹗未 like就快啲 like啦﹗

小丸子第4個interview@北角衛理堂

上星期六又去 interview啦﹗心情都有少少緊張，因為之前 2間都無交留位費，之後家姐間學校唔收，完全打亂晒陣腳，小丸子仲未有 offer﹗上次一月份考嘅一間，要 3月先知結果，反而今次呢間，一星期就有結果 (應該情人節就有結果啦)﹗另外仲有最後一間就今個星期日去考﹗最後考嘅 3間都係區內名校，其實話唔擔心就假，小丸子好大機會會無書讀﹗因為就算 interview表現幾好都好，永遠都唔會知收生準則，而且龍B競爭大，你以為自己表演好，可能其他小朋友表現更加好﹗

講返今次 interview，學校限一個大人帶小朋友 interview，今次當然係我帶小丸子啦﹗8:45 interview，一開始要係學校嘅禮堂等，我覺得都幾 challenging，要小朋友乖乖地坐定定，真是有啲難度，呢part我唔知係唔係 interview嘅一部份，不過就算唔係 interview一部份，我都見有小朋友等得耐開始扭計，唔知會唔會影響小朋友之後嘅表現﹗

之後就排隊入課室，3-4個小朋友一張枱玩玩具，之後老師會逐個小朋友問問題。首先老師同小丸子講早晨，小丸子有回應老師 "早晨"，仲點埋頭。之後老師送貼紙比小丸子，小丸子即刻伸手拎，我叫佢要講 thank you，佢都有講。之後老師拎一盤玩具食物同小丸子玩，小丸子接完老師嘅食物就比我，老師叫佢食，佢拎咗香蕉扮搣皮然後食，但老師叫佢比香蕉老師，第一次佢就唔做，佢放返香蕉入藍，我叫佢比雞肶老師，佢就比咗﹗

之後老師同小丸子玩老師未行埋嚟時，小丸子玩緊嘅飛機，老師推架飛機，叫小丸子推返比老師，又叫小丸子推比媽咪，我推返比小丸子叫佢比返老師，佢再推比老師。之後老師拎走個機司，叫小丸子放返入去，小丸子想放入客人坐位，我提佢頭先老師係邊度拎架，佢都即時識得放返原位，老師叫佢要令返好個方向，佢就無做啦﹗第一部份 interview就完啦﹗

第 2部份是做運動，小朋友圍圈坐前排，家長坐後排。起初小丸子唔係好肯坐底，之後老師拎咗隻跳跳虎出嚟成功吸引咗小丸子嘅注意力，同跳跳虎打完招呼佢就坐低啦﹗之後老師就叫佢地起身做運動，要轉轉膀頭﹑扭扭腰﹑轉轉頭﹑拍手﹑踎低﹑起身再跳高，第一 round小丸子全部做齊，第 2 round就無踎低，其餘全部做整，之後老師叫佢地行返埋位，小丸子都第一時間返埋位坐低。其實我覺得小丸子做得非常好，唯一係...佢唔係企係自己個位前面做，佢行出去老師前面做。

學校入面唔比影相，出咗去就影返張相啦﹗希望有機會返呢間幼稚園啦﹗

之後爸爸話要食早餐﹗

心情唔錯﹗

老實講我好滿意小丸子嘅表現，不過我都唔敢太大期望，如果最後學校唔收，我都覺得小丸子已經盡咗力﹗

小丸子@Jolly Kingdom - KinderGenius 2

其實真係好覺得自己對小丸子唔住，之前一早幫小丸子報 playgroup嘅其中一個原因係因為覺得小丸子做細，未試過得到父母完完全全嘅愛，唯一上 playgroup嘅時間，可以完完全全比晒啲時間佢，不過成個 12月，我不停病又忙新屋裝修，都好似無同佢上 playgroup，轉咗去 Jolly Kingdom之後爸爸更加係未同小丸子上過堂 (太過份啦，而佢自己覺得無問題，係我覺得最過份嘅地方)﹗大部份時間都係工人姐姐同小丸子上，小丸子真係對唔住啦﹗

12月嘅我帶小丸子上嘅唯一一堂﹗一小時嘅課堂，頭 10- 15分鐘比小朋友自己玩下， warm up先﹗通常小丸子都會去玩滑梯/ 彈彈波﹗今日竟然玩數字，我發現佢識由 1數到 10，不過又好似認唔晒啲字﹗

最近我用咗 JOLLY KINGDOM老師教英文嘅方法教小丸子中文，起初只是貪得意，如是者幾日之後，小丸子真係認得啲字﹗依家已經識: 大﹑小﹑多﹑少﹑下﹑左﹑木﹑石﹑水﹑火﹑耳，上次叫佢讀比婆婆聽，婆婆叫我唔好順序問，話佢可能只係諗口王，HHEHE...都OK啦﹗我又唔係要 TRAIN佢啲咩，佢自己晚晚叫我陪佢讀，我就同佢讀一次之嘛﹗


呢個大滑梯係小丸子嘅最愛﹗佢今日仲睇完一個大少少嘅哥哥做完之後，自己爬上個圓形最高個度﹗完全唔知危險嘅小朋友﹗


玩完之後就要認真上堂架啦﹗

一開始會唱下歌先﹗之後就會逐個小朋友介紹一次，當然是由媽媽代答啦 (不過都有大少少嘅同學仔講到自己個名)﹗然後就學天氣，會講下今日係咩天氣，再問下小朋友唔同天氣，好似 sunny, cloudy, rainy...我見大少少嘅，大約 2歲幾嘅小朋友已經識答﹗之後就學 colour，每次學 colour，小朋友就最開心，因為老師會倒晒啲波波出嚟，叫小朋友去執返﹗

之後就係學生字啦﹗通常每次學 5-6個啦﹗最後就係學英文字母，老師會用 "棋字" 教小朋友寫英文字母，唔知點解平時坐唔定嘅小丸子，好鍾意呢個環節﹗

其實點解成日帶唔到佢上堂呢？﹗因為佢真係成日走來走去，同佢上一堂，真係好過去 physical﹗佢一有機會就會走開...然後就會 9秒9跑去玩滑梯，之後...老師就會叫我去捉佢返嚟...heheheh...唔知點解...班入面有 6-8個小朋友...得小丸子有呢個問題...連男仔都可以坐定定，得小丸子好似 pat pat有針咁...真係頭痛...

提外話: 今日有樣野好開心，我同妹妹出門口嘅時候，大頭妹問我地去邊，我話同小丸子去上堂，佢問我地去邊度上，我同佢講我地去佢上 phonics個度上堂，佢問我可唔可以一齊去，佢都想上﹗有時我都驚我安排得太多興趣班比兩個囡，聽到佢自己話想上，真係放心晒﹗

小丸子第3個interview@蘇浙幼兒園

2013年1月3日 (星期五)

今日請咗假帶小丸子去幼稚園面試，睇張新生約見證，一共有 4日 interview，可想以知有幾多人報名，有幾多人去面試﹗﹗﹗想當年大頭妹去面試，好似話有 2-3千人報名，今年龍b，可能仲多，不過佢地今年開始無學劵，唔知會唔會令去考嘅人少咗呢？﹗heheheh...我相信都唔會﹗﹗﹗

出門口時心情好靚﹗

希望一陣會有好表現啦﹗雖然要考入蘇浙，都唔係單單表現好就有機會﹗

4:00 interview，我地3:45就去到啦﹗唔知由幾時開始，小丸子唔比爸爸抱，我要由北角地鐡站抱佢到學校，真是命都無，但又唔想 interview前整喊佢，唯有頂硬上啦﹗去到爸爸一支箭就去登記，其實我想比小丸子 warm up一陣先囉﹗好快就叫名去課室門口等啦﹗流程同大頭妹個次都一樣﹗大約都等咗 5-10分鐘先有得入去見老師，一間房同時見 4個小朋友，不過係分開見，大家唔影響大家﹗連考試內容都同大頭妹當年差唔多﹗

 一坐低老師問我小丸子識唔識講自己個名，我答老師佢識就識講，不過問佢就唔會答囉 (我估大部份小朋友都係咁架啦﹗識答個啲就超咗班架啦﹗)﹗如我所料，小丸子無比驚喜我，佢無答老師，佢有時會答我 "yi yee" (泳而) 架 (如果我有芝士係手嘅時候)﹗不過就有同老師 say hello﹗

第 1 part，老師拎咗一set蛋糕茶杯玩具出嚟，叫小丸子食蛋糕，我叫小丸子講謝謝，佢就 9秒9攞玩具，之後就係度扮食，老師叫佢比媽媽﹑比爸爸﹑比老師，佢都做齊，老師有讚佢乖。之後老師比茶壺同茶杯叫佢倒水飲，佢都有做，仲飲咗 3次，唔肯比返老師...到飲完第 3次，老師問佢係唔係好鍾意飲，飲埋呢次要放返好啦﹗佢終於肯收手啦﹗

第 2 part係考生果，老師拎個蘋果出嚟問小丸子知唔知係咩，小丸子無答，之後老師拎個橙出嚟，佢答蘋果...最後老師拎香蕉出嚟，佢終於有答香蕉啦﹗之後老師叫佢比香蕉老師，做岩咗。再叫佢比蘋果老師，第一次比咗橙，要提多佢一次先比返岩嘅蘋果老師。最後再比埋個橙老師﹗

第 3 part 係放積木，比 4個由大至小水桶形嘅東東叫小丸子叠高，佢一手就打開咗個水桶，老師話個水桶係可以打開，不過我地今日係叫叠高高，叫小丸子再做，小丸子好快就完成咗，老師有讚佢叻叻﹗之後叫佢放返啲水桶入籃，佢都有做，仲用雙手比返個籃老師。

第 4 part係用蠟筆油顏色，老師比咗 2次筆小丸子，2次小丸子都有畫，仲反轉張紙畫埋後面。

最後 1 part，我覺得好高難度﹗係睇書問野﹗首先係叫小丸子揭書，但竟然唔係用硬書/ soft book，係真係平時小朋友嘅 story book﹗小丸子都揭到，點知之後忽然播 good bye song，小丸子就不停揮手 bye bye，老師問佢圖入面邊個睇緊書，邊個游水，佢都只係揮手 bye bye...老師問我佢平時係唔係好鍾意聽歌...其實睇書個個佢都未必識，但游水個個佢應該識，不過算啦﹗我覺得佢今日表現好好架啦﹗

最後老師比個貼紙小丸子，叫小丸子貼係自己度，今次我叫小丸子一定要講謝謝，小丸子都有講，講完就貼係自己心口，我地就起身走啦﹗走嘅時候我提佢要推返櫈，佢都有做，仲幫埋我同爸爸推櫈﹗最後老師叫小丸子 bye kiss，小丸子都有做﹗

老實講...我自己就好滿意小丸子今日嘅表現，當然可以再好啲，平時點會唔識蘋果架？﹗不過都明白考學校，以為自己小朋友叻叻，大把叻叻嘅小朋友，名校有大把選擇﹗2個月後先有結果﹗上次大頭妹無被取錄，係 reject letter都唔會有嘅...

走之前玩多一陣﹗雖然覺得小丸子表現唔錯，不過都明白要入蘇浙，唔錯係唔夠，信心唔大，所以比佢玩多一陣啦﹗

heheh...上次大頭妹嘅面試情況:
http://athenajoe.mysinablog.com/index.php?op=ViewArticle&articleId=4539286

小丸子@Jolly Kingdom - KinderGenius

其實想當年幫小丸子報 playgroup嘅時候，就已經想報 Jolly Kingdom，不過我又懶得打電話去問上堂時間同學費幾多，就不了了之咗﹗直至上次去聽佢地個講座，岩岩小丸子之前個 playgroup又完咗一個session，我又決定試下﹗

聽講座嘅時間，Dr. Jeff 問我地想小朋友上 playgroup學到咩﹗我答佢想小丸子學 "認字"，因為我發覺小丸子識講好多野，但認字能力明顯比大頭妹當年差﹗後來 Dr. Jeff 都有講返，佢話呢個係一個 "做細" 嘅正常現象﹗因為佢嘅學習好主要係透過 "模仿” 大嘅，行為/ 動作係最易模仿，其次就係說話，至於 "認字"，佢唔會知家姐睇嘅係咩字，而我地個例子係差 2年，家姐又未識教佢 (差 5-6年又唔同講法)，父母花係第 2個子女身上嘅時間又往往少過第一個，所以妹妹 "認字" 差，原來係情有可原架﹗﹗﹗

其實諗返轉頭都係，我真係好少同小丸子認字，因為要就埋大頭妹，我地通常一齊睇故事書，加上小丸子坐唔定，真是好難一個一個字教佢，我見佢已經識唱 abc song (岩次序架，係 mnlop 個段唱唔到)，不過又唔識得晒 a-z喎﹗數字就好似完全唔識咁...佢見 123都讀 abc...所以真是要認認真真教下佢認字啦﹗

岩岩上咗 1個月，發覺真係間間 playgroup 嘅教法都好唔同，就好似處理 "小朋友" 坐唔定問題 (小丸子呢個問題好嚴重...)，Jolly Kingdom 嘅外籍老師主張當小朋友坐唔定嘅時候就比佢出去 play zone 走一走， 再返埋位，不過當然都唔係無限次咁走去玩啦﹗中間 "認字" 時間呢，又係出去老師度攞字卡，都叫可以行個圈。

第一次上堂，課室比較大，有比小朋友玩嘅空間﹗

上堂唔比影相，我落堂等其他小朋友走咗之後影咗幾張﹗

數字呀﹗小丸子...你要快啲學識呀﹗其實都有諗返...係唔係真係冇時間到咁呢？123都未教小丸子...

Jolly Kingdom: http://jollykingdom.com/chi

小丸子第2次面試@北角明慧國際幼稚園

上星期六去家姐幼稚園面試，本來心情都幾輕鬆，因為講明 "優先收生" 嘛﹗點知今年 interview轉咗少少模式，一個家長陪小朋友入一個班房 "玩" 10分鐘，另一個家長就見校長，要 "寫野"﹗最後再去第 3個班房匯合 interview﹗

阿旺一聽到要 "寫野"，就同老師講媽媽見校長，其實小丸子一向都唔多跟佢，我覺得佢好不負責任﹗﹗﹗行到去班房門口，佢都係話我見校長，佢陪小丸子入房玩，我唔覺得真係入房玩囉，一入房 interview就開始架啦﹗不過我對小丸子都好有信心嘅﹗

 

我入去見校長，其實都係問下我地家長對學校有咩期望，之後答返 2條問題，問題 1: 點解揀明慧？問題 2: 會幫小朋友揀咩課外活動？都係普通問題，唔難答吖，唔知計唔計分呢？校長話唔計﹗

我地出返嚟去班房嘅時候，佢地個邊嘅 interview都開始咗﹗今次都有 sit down interview，一枱有 4個小朋友﹗我去到時，老師比 2塊積木叫佢地疊高，同埋放返積木入籃，老師有叫佢地等，小丸子...當然無等啦﹗要填另一張 form，阿旺又即刻比我填，佢仲要連小丸子嘅生日都無填 (我估佢唔記得)？﹗之後我問返阿旺小丸子 interview表現，佢話都幾好﹗一開始唱 5首歌，老師同小朋友一齊跳舞，佢話都見老師有留意小朋友有冇一齊跳﹗咁小丸子一向都 active，都有跟老師一齊跳﹗

之後入班房，老師打招呼，小丸子有 say hello﹗之後問叫咩名，唔識答﹗老師拎個公仔出嚟問口﹑鼻，小丸子掛住睇公仔無答問題﹗我未到之前就係問咗呢啲，阿旺話覺得小丸子表現唔錯，連口﹑鼻都無答都叫唔錯？﹗我真係唔知爸爸 set 咩 standard﹗希望老師同阿旺嘅 standard一樣啦﹗

要一個月先有結果，不過我記得上次家姐都係等咗一個星期到，希望真係 "優先收生" 啦﹗上次 interview 杏花村啟思收咗小丸子，我地...無比留位(好大膽) ﹗如果今次唔收小丸子...就真係自己玩自己啦﹗

上次大頭妹 interview嘅情況:

http://athenajoe.mysinablog.com/index.php?op=ViewArticle&articleId=4539295

出發去 interview啦﹗佢好搞笑，
一去到學校門口就叫 "家姐"，家姐今日都無返學﹗

依家睇返佢個動作...佢係唔係想打我呢？

一 interview完就瞓咗﹗

之後我地去和民食 lunch。

依家有拉麵餐，加 $5有一隻半熟蛋。

加 $10有紫菜同明太子﹗

和民拉麵 $55

我嘅天婦羅冷蒿麥麵 $55

都幾大份﹗

阿旺加咗麵 $10咋﹗
佢話加個份好食啲...因為之前個碗唔夠湯，唔夠熱﹗

大家 like咗我地嘅 facebook page未呀﹗請多多支持﹗

小丸子第一次幼稚園面試 (啟思)

上星期六，小丸子剛完成了人生的第一個 interview﹗

其實由幾時開始，幼稚園就要開始 interview呢？我個年代 bb出生率都好高，讀幼稚園都好似唔洗 interview架？﹗1歲半人仔就要 interview，都唔知考佢地啲咩？﹗我地今次去面試嘅係啟思，不過不是九龍塘的一間，後來同 playgroup的老師講起，九龍塘的一間問多幾條問題架﹗

今次面試都好快，9:00開始，我地大約 8:40去到，係門口排隊，9:00就準時開門入去啦﹗比完報名費，就差不多已經可以入房，不過入到房都唔係即刻 interview，會比小朋友玩一陣玩具先﹗今次同大頭妹個次好似有少少唔同，形式唔同咗，上次係 group interview圍圈考，今次係 individual sit down interview﹗

之前見有家長話會問小朋友叫咩名，今次就無問，老師一坐低講完早晨，就指住我問小丸子 "呢個係邊個呀？"，小丸子望下我無答﹗

之後老師攞咗隻鴨仔出嚟，我估都會睇下小朋友識唔識講 "鴨/ duck"，小丸子都係無出聲。之後老師上鏈，同小丸子講叫佢一陣要捉住鴨仔，小丸子接咗鴨仔，老師攞返又再做多一次，小丸子再接，之後佢要小丸子上鏈，再比返隻鴨仔佢，小丸子上完鏈，唔識將鴨子放向老師的方向，老師叫佢比媽咪，小丸子比完隻鴨仔我，老師就叫我比返佢。

之後就玩 "形狀"，要放唔同形狀，是小丸子的強項，除咗梯形第一round放唔入，最後放晒全部形狀，老師再叫佢試多一次，都放得入，不過佢平時係屋企玩，會自己一邊玩一邊講 "star, square"，今日就無啦﹗

最後老師攞咗本書 (soft book)出嚟，叫小丸子打開，然後再問內容，叫佢指返出嚟，第一版係樹同葉，叫佢指樹，小丸子做到﹗之後叫小丸子 "揭" 書都揭到，但之後兩版，小丸子就無答老師問題啦﹗其中一條係草同梨，我問小丸子邊個係 pear，佢就指自己耳仔 (ear)，之後就係度自己玩 peekaboo﹗(老實講...我覺得呢PART好似幾 ADVANCE喎﹗以前大頭妹都係問下眼﹑耳﹑口﹑鼻，又或者是生果蘋果﹑橙，但今次竟然已經去到問物件？﹗定係歲幾的 BB其實已經好聰明，係我低估咗佢地？﹗)

Interview完啦﹗老師去到門口送貼紙比小丸子，我唔記有冇叫小丸子講多謝﹗好似無多謝老師添﹗佢貼完比小丸子，再比多一張小丸子，叫佢貼係媽媽度，小丸子貼再一陣先貼到，不過唔知呢 part係唔係都係 interview的一部份啦﹗但唔記得講多謝，就始終唔係咁岩啦﹗大家要留心啦﹗我當時太緊張小丸子貼唔貼到張貼紙，咩都唔記得晒﹗

哈哈﹗其實唔知係唔係因為唔係考九龍塘區名校，我地好似著得 "隆重" 咗﹗

出發的時候好似好醒目﹗

嘩﹗Monster搶電話，唔好比老師見到你呢個樣呀﹗

排隊啦﹗

interview完先 9:30，仲夠時間上 playgroup﹗

食得幾津津有味？﹗食香蕉片﹗

仲有手指餅﹗

11月1日就有結果啦﹗不過信心都唔大，因為上次大頭妹考完，老師會問下會唔會考慮下午班，我見有啲家長今次見到都話有問，但今次老師無問我呢﹗結果待續﹗

大家 like咗我地嘅 facebook page未呀﹗請多多支持﹗