最近開始有人問我，點解前一排成個星期無出 blog？﹗好開心，原來都仲有人會日日嚟望下我個 blog﹗無呀﹗其實因為真是好忙好忙，而且好緊張好緊張，由收到幼稚園 interview 電話，到知結果的 3日入面，我完全緊張到瞓唔到，我仲比阿旺笑我，連幼稚園都咁緊張，幾時先上到大學？﹗呀﹗因為事出突然，之前一直都無講，其實我地幫大頭妹同小丸子轉咗學校﹗
好啦﹗入正題﹗轉咗邊就唔講啦﹗大家見到校服知道係邊間就心照得啦﹗其實大頭妹快升小學，我都想比返少少privacy佢，雖然我個人一向都唔重視 privacy (笑)﹗hehehe...如果你個人真係好有好奇心，你pm我問我都一定答嘅﹗
長氣人，講咁耐仲未入到正題﹗
話說 8月份的時候，阿旺的朋友同我地講，話知道佢地學校有同學轉校，應該會有位收 K3插班生，K1都仲有位，叫我地試下寫信，我同阿旺就1516唔知點啦﹗最後竟然是阿旺決定寫信，不過信就當然係我寫啦﹗咁我就寫咗一封求位信，同一封插班信，寄比學校啦﹗如是者一等，成個暑假都無回音，到暑假尾我就叫阿旺打去學校問下啦﹗當時學校的回覆是要有小朋友退學先有位，到時就會call我地啦﹗
到 9月開學 2星期啦﹗我叫阿旺不如再打去問下，阿旺話如果有位，人地就打咗比我地啦﹗到第2日，阿旺朋友又叫佢打電話，阿旺都是覺得無希望，所以都冇打﹗點知就是同一日下午，我地終於收到學校的電話，阿妹可以 10月轉校入學，家姐就要 2日後 interview﹗
我真是覺得成件事好奇妙﹗interview 個日，因為要去 bossini x ocean park event，我同阿旺一早已經請咗假﹗ 岩岩個個星期收到小一自行分配張 form，以我咁心急的人，竟然真是先填份副本交返去幼稚園比老師對，所以仲未填份正本 (轉校會影響我小一揀邊間)﹗成件事好似早有預備﹗
interview當日，原來都有好幾位小朋友，大頭妹例牌唔會講返比我聽 interview咗啲咩，都見咗成 45分鐘，佢話有自我介紹﹑寫中英文名﹑仲有寫下字﹑唱歌﹑仲有玩遊戲﹗我見佢出嚟都好開心，佢問我佢係唔係之後返呢間學校，又話自己今日係嚟試堂？﹗我都唔知點解佢會咁諗﹗最後我地星期五收電話，學校收咗大頭妹，我地下星期一可以去註冊，星期二就可以返學啦﹗出 blog 之時，2 個都應該返咗新學校啦﹗
近況報告完畢﹗
