Home Sweet Home Project (11 Nov - 10 Dec 13)

嘩嘩嘩﹗本來想一個星期記錄一次，最後一個月先再寫進度。

因為中間主要都係鋪咗地磚，但鋪完又用膠蓋返，所以都無野影，就無特別寫﹗之後就係做廚櫃﹑浴室地櫃﹑衣櫃﹑組合櫃﹑細房床，岩岩都全部到齊，點知我地發現應該係溝通上嘅錯誤，我地想要方圓邊，師傅整咗圓邊，所以令到門同門之後好似好大條 "la" 咁﹗依家要改過啲櫃門，其實時間上就唔大影響，因為只是換門，不過就可能要洗多少少錢，所以都十五十六，其實只是 design上嘅問題，唔影響用，不過就係唔岩心水嘛﹗

其實之後檢討返，我地係唔應該唔同師傅出去睇下現成嘅 design，就係 what'sapp來來去去咁 confirm啲野，而且可以同傢俬鋪訂嘅都應該係傢俬鋪訂就算﹗又有得睇現貨，又平啲﹗

就是呢套廚櫃，阿旺要求師傅換過晒啲門﹗其實我都覺得可能依家有膠紙係面，影響咗外觀，叫師傅撕開一張睇下，其實都ok，不過阿旺話接受唔到個圓角，覺得好老土﹗

地櫃都係...睇相可能唔係好明顯，亦可能因為木色無咁礙眼﹗

浴室地櫃又是做錯咗，我地想要傳統個啲面盆，做完先發現，我地用 slide door，會唔夠位放面盆，點知佢地錯有錯著，佢地又做矮咗個櫃，所以可以放依家興個啲放上櫃面嘅湯碗面盆﹗

相對地...小朋友房嘅床已經比較滿意﹗

又係櫃門問題，個櫃門邊做咗圓角，但個櫃邊又做尖角，好似專登整嚟比大頭妹同小丸子撞頭咁...不過可以買現成 3M角邊遮返個角，問題都唔大嘅﹗

衣櫃...無咩野嘅﹗

浴室因為太細，改咗 slide door，如果唔係真係肥啲都入唔到洗手間...

又係櫃門問題囉...不過玻璃吊櫃我地都唔滿意，叫佢地再做﹗依家打算睇下廚房櫃門改成點，先決定廳嘅櫃門改唔改﹗師傅就叫我地用 2-3年先，錢又已經比咗，之後先再轉，其實我都覺得好唔環保，但又真係唔靚仔，真係好頭痛﹗(放係櫃上面嘅係浴室門)

唉...見到個分體機就明點解個窗要做咁高，其實都唔關師傅事﹗都想提提康山嘅朋友，如果你地裝修，個廳嘅分體用 1.5匹就ok架啦﹗

大門剛剛昨天才到，明天就有人裝門鎖啦﹗

依家 outstanding items仲有廚房浴室地櫃台面 (剛剛星期一先訂，要10日才到)，洗菜盆﹑面盆﹑廁所，燈 (星期四早上安裝)，大門門鎖 (星期四下午安裝)，好似都七七八八啦﹗呀﹗仲有煤氣公司，佢地話星期六嚟裝，之後唔見人，到星期二都未見人，都要 follow up﹗hehehe...好期待間屋快啲裝修好﹗希望聖誕節前有得搬啦﹗

大家 like咗我地嘅 facebook page未呀﹗請多多支持﹗

Home Sweet Home Project (2-10 Nov 13)

可能之前成日聽人講話啲裝修師傅成日拖，唔知點解我覺得我個師傅做野都幾快﹗隔幾日上去，又有新野睇﹗

今個星期已經換晒窗，不過...出咗少少問題 (唔關師傅事...我地自己問題)﹗我以前一直都覺得我地屋苑嘅大窗好靚，點知因為我地要轉 "分體式冷氣機"，師傅問我地改個窗個高度好唔好，我話唔好改。之後由阿旺同師傅跟，唔知佢地點溝通？﹗最下面嘅 "梗窗"竟然改到同上面開到個窗一樣大﹗﹗﹗我嘅大窗 "唔見咗"，阿旺話師傅話就分體機個位做個窗，可能要高 2-3寸，但就 2邊都開到窗 (唔改就可能一邊開唔到/ 開唔大)，問佢好唔好，佢話ok...佢估唔到個分體機咁高...well...咁我地自己話咗ok...就無得好講啦﹗

又同師傅夾咗一次廚櫃﹑浴室櫃﹑訂做傢俬嘅設計﹗會訂做 3組傢俬，包括: 大廳組合櫃﹑睡房大衣櫃﹑同小朋友房組合床﹗

我地都買咗廚房 3寶啦﹗原來同煤氣公司買，佢地做分期會係煤氣費單直接做，連 credit card都唔洗，真係好方便﹗

 星期初，走廊嘅假天花都未整好。

啲窗到咗﹗

前一日話個水制好似有問題，之後一日已經整好啦﹗

仲開始 "試水啦﹗
師傅話最後要 4個人抬，先放得入個浴缸，
因為個位真係太貼啦﹗

廚房開始鋪磚。

星期尾再上去，假天花已經整好啦﹗

廚房牆身磚已經鋪好﹗仲整好地台啦﹗

浴缸亦都用木板蓋好，防止整花﹗

睡房個邊做多個門口仔開假天花貯物櫃。
其實樓底唔高，整完都唔係多好多位，
不過地方細咗...真係少少位都要用盡佢﹗

 

樣樣都好滿意...唯獨係廳個窗...

第一次見到呢個窗嘅時候真是好 "震驚"﹗

比大家睇返...原先係咁架嘛...
其實我真係有諗過比錢再整過...鳴鳴鳴...

細房都換好窗啦﹗

大房都換好窗啦﹗

heheheh...影返個合照﹗

hehehe...好期待間屋快啲裝修好﹗

大家 like咗我地嘅 facebook page未呀﹗請多多支持﹗

Home Sweet Home Project (26 Oct - 8 Nov 13)

睫下眼又兩星期，上星期終於 confirm晒啲磚啦﹗

最後我都無揀到 "令身" 磚做廚廁嘅牆身磚，

怕有少少好似細屋 "扮" 豪宅。 

點知之後發生一件好恐怖嘅事﹗

店員同我地講，我地想要嘅地磚無貨﹗要等 2個月﹗﹗﹗

佢話我地上次問嘅時候仲有好多，

但前一日就有 3個客 confirm咗，忽然買起晒佢地嘅貨﹗

但其實我地行暈成個灣仔，

都真係得呢間有岩我地心水，又岩價錢嘅﹗

(唔洗睇價錢就大把心水啦﹗)

同埋我地都係貪方面先一次過買埋廚廁磚，

其實廚廁磚反而好普通，我去邊度買都一樣﹗

 正當我十五十六之際，

店員同我地講佢同行家 "班" 到貨比我地，

真係好彩啦﹗ 

最後買磚連浴缸用咗 $27800，

扣返浴缸 $4590 同上樓費 $600，

淨磚要 $22610。

其中廳房地磚就佔咗 $17010啦﹗

廚廁用大陸磚 (而且地方細) 加埋都係 $5600﹗

最後揀咗呢隻白色有少少紋做廁所牆身磚。

廚廁地板用返同牆身同款灰色。

星期日買星期三早上就送貨啦﹗(其實星期二就可以送)

廳房嘅地磚﹗ (點解好似得咁少？)

MADE IN ITALY﹗

如果用中國製就平一半架啦﹗

唔知鋪完出嚟會點樣架呢？

浴室嘅牆身同地磚。

廚房牆身磚。

廚房: 

我地搬咗個 "煤氣錶" 去浴室，

方便放返洗衣機同微波爐入去﹗

浴室:

原來剛剛好闊140CM，浴缸又是140CM (standard)，

師傅話好頭痛﹗

因為最後都係決定買 "靚仔煤氣焗" (薄身)，

所以要開多個 "loan"﹗

煤氣錶

廚房牆身磚，唔知點解要浸水？﹗

浴缸 (個去水制好似有少少問題，叫咗師傅跟進)

outstanding items: 

仲未買廚房三寶﹑廁所﹑洗手盤﹗

冷氣機師傅會幫我地買。

下星期就開始鋪地同換窗，

時間好似都幾好，

年尾入伙應該無問題呱﹗

 

Home Sweet Home Project (地磚/ 牆磚)

上星期六約了師傅去睇磚，師傅話下下星期先要磚，都仲有時間﹗

不過我地最後都係決定係灣仔買﹗

雖然好多人都話旺角嘅平啲，但阿旺睇完又話差唔多，

我最近公司又好忙，請唔到假，唯有信阿旺的匯報啦﹗

地磚反而容易揀，我地一早就有共識想要 "木紋磚"﹗

當然木紋磚都有好多款，不過我地又想要意大利磚，

計埋 budget，範圍就縮得好細﹗

 

有啲好靚嘅意大利木紋磚，我地屋企咁細，
都要 $30k以上 (仲未計地腳線)，真是太太太太太貴啦﹗

最後我地揀咗一款 "條狀" 嘅，大約係 7.5寸 * 3呎，

400呎地方大約 $18k (連地腳線)，都算係 within 我地 budget啦﹗

其實佢同款有 600mm * 600mm嘅 (大大塊方形個款)，

不過阿旺話如果要木紋，就梗係要條狀先似﹗

咁又多幾千蚊呢？﹗

我發覺原來裝修嘅時候，男人係闊綽過女人好多﹗

咩都話用 10年以上架喎﹗買靚少少啦﹗
上次去煤氣公司嘅時候又係咁﹗

我地揀嘅地磚就係呢款啦﹗
就咁睇好似好淺色，店員話大面積的時候就會深色啲﹗

$73@，有啲去到 $200@都有架﹗

即係由下數上第3款﹗有 2個小朋友，唔敢揀太淺色﹗

其實我比較鍾意由上數上第 1款架 (再深色少少同大塊少少)﹗
不過又貴幾千 (要過 $20k)﹗

之後係浴室牆身磚，我想要 "令面"，好似酒店 feel﹗
但唔知點解幾間鋪都話依家唔興？﹗

師傅話自己間屋自己鍾意就得，唔洗理興唔興架﹗

我就係鍾意呢款囉﹗大陸磚都要 $30@，都幾貴﹗

佢地其中兩幅 display，exactly就係我想要的浴室牆同地磚，都幾 match吖﹗

不過地磚最後揀咗差唔多色，有紋嘅，阿旺話覺得無咁跣。

浴室廚房地磚 $38@ (馬來西亞)。

呢款係廚房磚，有少少 "橫紋"，米米地色﹗

個店員話廚房見光的地方少，佢自己都覺得唔洗買貴嘅﹗
馬來西亞製 $18@，店員推介﹗

同師傅出去睇材料都掛住打機，我問佢係唔係想我做 "15巴港女" (再打多一巴)﹗
即刻尷尷尬尬比我影底佢嘅 "罪證"﹗

今日襯師傅係度仲睇咗浴室/ 廚房/ 大門，初步都有個概念﹗
我地以前住 2間屋都未試過裝修，
依家先知...裝修真係好似 "燒銀紙" 咁﹗

興發磁磚行: 駱克道241號

大家 like咗我地嘅 facebook page未呀﹗請多多支持﹗