傻夫婦一家四口生活日誌

2015年8月4日星期二

傻夫婦東京5天超級親子之旅 DAY 2上【東京迪士尼樂園】

今次東京之旅的主角當然就是【東京迪士尼樂園】啦﹗今次揀東京唔揀大阪，都是因為想帶 2個囡去東京迪士尼樂園﹗

首先先講下門票，我地係香港旅行社【東瀛遊】買的，買完 3個工作天就可以上去旅行社拎門票，又或者比多 $20 courier 去屋企/ office，都算好方便﹗咁去到迪士尼，就可以直接入，唔洗係門口排隊啦﹗

再講下交通﹗其實由新宿去迪士尼，主要有 2個途徑。
巴士: 坐 JR山手線/ 都營大江戶線到代代木站(東口)，轉巴士直達迪士尼。以我地酒店的位置，應該是可以行到去代代木站，我估10分鐘以內﹗
http://info.tokyodisneyresort.jp/access/bus/shinjuku.html

鐵路: 先坐JR中央線快速去東京站 (14分鐘)，轉JR京葉線去舞濱站 (11分鐘)，再轉迪士尼線﹗車程其實唔長，不過站與站之間，其實都有少少距離，所以前後都要成個鐘 (以我地帶住 2個小朋友計)
http://www.tokyodisneyresort.jp/access/train/index.html

最後我地選擇去程坐巴士，回程坐鐵路，其實 2樣都方便，時間好似差不多﹗坐鐵路就唔一定有位坐，中間轉車又要行﹗坐巴士應該會舒服啲，不過就要睇時間做人啦﹗不過要留意一點，早上坐山手線，絕對是超級特級多人﹗﹗﹗我地就試下﹗嚇到大頭妹目定口呆﹗阿旺話是好好的體驗﹗當感受下日本人返工﹗實情是我無睇清楚可以坐都營大江戶線，雖然唔知會唔會少啲人，應該都會，重點是個站就係我地酒店的旁邊﹗﹗﹗

等車的時間，大頭妹又來小孔雀﹗

都唔算多人，是雙層巴士，大約個零鐘車程就到﹗都幾方便，而且沿途可以睇下風景都唔錯﹗會經過東京鐵塔﹑台場之類﹗

係日本坐交通工貝，6歲以下 (不佔坐位) 是免費的﹗

阿旺上車前去車站附近買定三文治上車食﹗

唔知點解去到日本，真是連一份便利店的三文治都好食啲﹗睇下小丸子個咀仔就知﹗

去到落微微雨，其實出發的時候都知道，不過我地行程得 5日，第1﹑5日去唔到，第3﹑4日是星期六﹑日怕會太多人，所以只有今日可以去﹗

有小朋友的可以租BB車﹗700YEN﹗是租金，不是按金，無得退架﹗我地預咗玩成日，怕佢地會一齊瞓晏覺，所以都有租多一架 bb車，咁2個都有得坐，唔坐又可以放下袋/ 戰利品﹗

因為落雨，所以行下街先﹗

東京迪士尼樂園的精品店係一個好 "邪惡" 的地方﹗就連阿旺都第1個買咗件衫﹗﹗
我就最愛日式家品，同手巾仔，不過家品就無為搬返香港，所以我都只是買咗少少手巾仔﹗另外就買咗家庭裝 (不過好似香港都有，最近無入迪士尼，唔知行程)﹗

小丸子好鍾意玩車﹗

嘩﹗是食物盒﹗好彩 2個囡未升小學﹗唔係我一定買好多﹗依家買咗 1個﹗
大頭妹竟然要 Minnie，唔要 Frozen﹗都話其實係我先係 Frozen fans啦﹗

我有買呢set﹗好靚﹗

行咗一陣停咗雨﹗行出去廣場有 "夏祭巡遊"，又玩水﹗﹗﹗唔怪之得停雨都咁多人買雨褸啦﹗

今日真是算好好彩，11:00幾12:00時真是好大雨﹗我地入咗小小世界避雨﹗12:00之後就停雨，之後仲好好天﹗

東京迪士尼樂園的城堡可以入去參觀，有好多 Cinderella野睇﹗仲有 "皇冠" 賣﹗不過都幾貴下﹗我話可以入城堡，大頭妹仲問我係唔係講笑﹗(香港個城堡無得入去架嘛)

哈哈...其實我都好想買返個﹗

之後見到真的鴨媽媽帶住一班鴨仔，真是好可愛，小丸子即刻追上去睇﹗

之後就食 lunch，搵間平平地食快餐，又有冷氣的坐﹗
不過去到日本，真是好似食咩都好味啲﹗呢餐都好好味﹗

Mickey Mouse頭炸雞﹗大頭妹都食咗 2粒﹗

因為之前玩 "賽車" 時，小丸子話見到 "高飛" 間屋，我地走去睇下啦﹗原來是 "影相" area﹗佢地自己一人有一間屋架，如果唔係排好長，排到入屋會有冷氣，可以一邊排一邊嘆冷氣﹗

我地去搵 Mickey Mouse﹗
我地都有買到張相，佢會比返張飛你，可以去返大門個邊的 Kodak店買相﹗好似 around 1500yen張﹗

其實個 area長時間都會有其他迪士尼人物同遊客影相，唔洗排隊，得少少人係旁邊等﹗大家都會依返等候的次序行過去影相﹗

哈哈﹗我地之後玩咗 2個 games (小木偶同白雪公仔)...好搞笑...香港都無架...我地依家先知原來迪士尼都有 "鬼屋"，嚇到大頭妹同小丸子爬係我地大腿﹗

玩完係呢個樣﹗

今日都玩過好多個 games，可能始終地方大，其實好多 games 都唔洗排好耐，都是 around 10-15分鐘，有啲唔洗排，所以都有玩咗最少 7個 games﹗我地今日由 10:00玩到 10:00，影咗好多相，食埋晚飯先走﹗下半部分開第 2個 blog講啦﹗

大家 like 咗我地的 facebook page未呀？﹗未就快啲 like啦﹗

傻夫婦東京5天超級親子之旅 DAY 2下【東京迪士尼樂園】

http://athena-joe.blogspot.hk/2015/08/5-day-2.html

傻夫婦東京5天超級親子之旅 DAY 1下【燒肉放題風風亭】

http://athena-joe.blogspot.hk/2015/07/5-day-1.html

傻夫婦東京5天超級親子之旅 DAY 1中【高島屋/ 今半/ TOKYU HANDS】

http://athena-joe.blogspot.hk/2015/07/5-day-1-tokyu-hands.html

傻夫婦東京5天超級親子之旅 DAY 1上【VANILLA AIR廉航初體驗/ 成田TERMINAL 3/ HOTEL SUNROUTE PLAZA SHINJUKU】

http://athena-joe.blogspot.hk/2015/07/Tokyo-5days-vanilla-air-hotel-sunroute-plaza-shinjuku.html

2015年8月3日星期一

小丸子PN小總結（PN下學期評估)

做完大頭妹 K2 小總結都唔少得小丸子嘅﹗

今個學期都見小丸子有進步，日日比我問佢專唔專心，有冇聽老師話，問都問到佢煩﹗佢就話自己有專心囉﹗其實我以為咁細的小朋友唔會識，不過我見佢又答得我好認真，又話自己之前真是無專心，依家有專心，雖然有時都有唔專心，又話自己好乖無打人，無推人，會排隊，會食晒茶點﹗講到似層層﹗

其實依家係小丸子面前講野要好小心﹗個日收到成績表，我奶奶問我點呀？我答奶奶 "緊係唔高分啦﹗"，小丸子即刻好大反應，話自己好高分，話自己有乖﹗到過 2日收到大頭妹的成績表，因為大頭妹攞到操行獎，我讚大頭妹乖，佢即時又話自己都乖，然後即刻喊﹗我見到都心痛，不過佢的確唔夠家姐乖喎﹗係呀﹗小孩不比較﹗但我都是直話直說﹗唔通家姐乖都唔讚？﹗阿妹唔叻都要搵啲野讚下(其實我都有)？﹗總之做人阿媽講野真是要好小心﹗﹗﹗

今次大部份 2分，少少 3分，少少1分，無4分 (1分最高分)。其實都算唔錯﹗有進步﹗坐唔定的小朋友，一定唔會高分﹗

小丸子學校好好，有做一本 "成長集"﹗(其實大頭妹的一間都有)

不過佢地有一頁，全部是小朋友的手指畫﹗
要 60個小朋友一齊做手指畫相信唔容易﹗
指指畫上面再畫返小朋友的樣﹗﹗﹗
相信老師花咗好多心機做﹗真是好多謝老師﹗

食茶點時又真係好開心喎﹗

做手工時都幾認真 (睇落)﹗

9月k1，小丸子都會原校直升，不過因為學校重建，要暫時搬去炮台山新校舍，之後 K3前都應該都搬唔返去長康街的新校舍啦﹗真是有少少可惜﹗媽媽一定會記住每日帶你返學走過嘅呢段路﹗ K1開始就坐校車啦﹗之前帶你返學雖然覺得好辛苦，到下學期唔洗帶，又覺得好唔捨得，好唔捨得每日同你共處的時光，同你談天說地的 30多分鐘﹗