17週﹗開始感覺到媽媽的偉大﹗(附花膠煲鮮奶食譜)

今個星期就踏入第17週啦﹗而家胃口都無咩，好食得。不過瞓就唔係幾好﹗開始有少少抽筋﹗又成日發夢﹗我真係要再迫自己早啲瞓先得﹗我已經瞓足8個鐘架啦﹗瞓的時候成日覺得個肚好重﹗我老公瞓覺的時候又成日打我﹗上次又插我個口﹗仲要插中我粒飛滋 (佢話發夢打交喎)﹗第2日仲屈我隻手 (因為我地拖住手瞓，佢突然向上一拉)﹗
咁細個肚就開始覺得重，再大啲會點呢？開始感覺得到做媽媽真是好偉大﹗我成日覺得生仔好似玩過山車咁﹗一開車就要玩完成個圈先可以落車﹗嘩...我而家一半都未到﹗仲要等多半年呀﹗﹗﹗
不過有一樣野應該好快知﹗就係我寶寶的性別啦﹗之前都心大心細，唔知去唔去私家醫生度檢查好﹗不過如果等去瑪麗，就要等到出年 1月6日先做﹗中間想買下衫仔都唔方便 (聖誕節成日都會SHOPPING嘛)﹗而且一個月check一次都係合理嘅﹗應該會book今個星期六去check下﹗
人地話瞓得唔好，夜晚飲杯熱鮮奶﹗我就再補啲，飲花膠煲鮮奶﹗我無燉盅...我真是用煲的方法煮﹗都好好味喎﹗我同老公飲到 "LAM LAM" 脷﹗

花膠煲鮮奶
材料: 花膠 3片/ 水 1升/ 北海道3.6牛奶 1升/ 紅棗 10粒/ 冰糖 隨自己口味
做法:
1. 花膠洗淨，發好，出水備用。
2. 水煲滾後，加入花膠及紅棗以中大火煲滾後，以細火煲1小時
3. 下冰糖調味，因為會再加牛奶，所以可以甜少少
4. 加入牛奶，煲至再滾起即可

16週啦﹗我地摸到寶寶呀﹗

我地摸到寶寶郁呀﹗無錯﹗是我地﹗我地兩個都摸到呀﹗上星期六我瞓晏覺﹗瞓醒第一件事就叫阿JOE鍚啖我﹗點知佢咬我塊面話 食"BUFFET"喎﹗咁我就叫佢鍚下我個肚啦﹗一鍚落去，我就感覺到寶寶郁啦﹗佢咁岩浮咗上肚皮面﹗是肚臍的左下方﹗HEHEHE...今次無得話我心 理作用啦呱﹗我地摸到一個AROUND 2寸的硬硬地的"小人仔"﹗好開心呀﹗唔知佢係唔係想爸爸錫佢呢？爸爸一鍚就浮出嚟﹗爸爸就好啦﹗咁快錫到寶寶﹗
我幫我個肚肚影咗相﹗我叫阿JOE同我一齊影，咁睇下我個肚幾時先會大過佢﹗我話一個月影一次，咁就知我老公有咗幾多個月﹗我估起碼 5個月﹗佢今次好醒﹗驚我會 post﹗就咁著條"底褲"同我一齊影﹗﹗﹗呢招好絕﹗咁我就一定 post 唔到啦 ﹗﹗﹗幅相好得意架﹗不過佢唔想POST就算啦﹗佢話叫係我生之前修身喎﹗又聽住先啦﹗聽咗好多次啦﹗
HEHHE...我影的時候好自然就"拮"起咗個肚﹗未有咁大嘅﹗最搞笑係我之前買咗條中碼條褲﹗我著親果條褲啲人就話 "哦﹗見肚啦﹗"，其實大家見的只是...褲頭﹗HEHEHE...不過唔緊要啦﹗我繼續去呃下人﹗

我覺得我個肚大得比我想像中快﹗不過我又覺得知道的人就會看得分別 (因為知道嘛)﹗不知道的人就一定看不出﹗起碼我上到地鐡都未有人會讓坐﹗我而家最鍾意放對手在肚上，eheheh...原來有個地方 "涼" 手，都幾舒服﹗

第14週﹗第2次贊育CHECK UP加做OSCAR

2009年11月10日
今日去贊育見醫生﹗不過都係比醫生問兩句同聽一聽BB的心跳，然後再BOOK時間去健康院同醫院做CHECK UP!
不過今次等咗勁耐﹗2:50去到，5:10先走得﹗搞咗成2個幾鐘﹗見醫生的時間其實得 15分鐘﹗等預約都等咗 45分鐘﹗因為唔知點解見完醫生啲FILE 唔PASS返出嚟﹗要一LOG一LOG咁搞﹗而家 BOOK咗 12月22去健康院，1月6日去瑪麗醫院做18-22 WEEK 的結構性檢查﹗到時就會知寶寶是男仔/ 女仔 (如果中間無去私家再 CHECK的話)﹗
等的時候要做一份問卷調查，老公又發揮佢阿旺本色，係咁話幫我做份問卷﹗佢睇睇下突然大笑，笑到面都紅晒﹗附近的人都望過嚟﹗我問佢做咩，佢話份問 卷好好笑喎﹗之後仲要攞部手機影底佢﹗唉﹗我都係自己做返份問卷啦﹗不過佢仲係一邊嘮嘮叨叨，又係度笑，啲大肚婆可能以為自己去錯咗"青山"而唔係贊育﹗
咁究竟佢笑咩呢？大家又可以睇下啦﹗

佢話點解孕婦同BB爸爸的關係有咁多可以揀，仲有 "沒有關係" 同 "不知道" 揀...其實都有可能嘅﹗有咩好笑啫﹗
去CHECK UP之前一日，阿JOE整親隻腳，要包到成隻裹蒸糭咁﹗HEHEHE..我地坐巴士的時候，我叫佢坐，佢坐咗落去又叫我坐，我坐完見佢企唔穩，又叫佢坐...最後...我地隔離位的乘客走咗﹗唔知係唔係怕咗我地﹗﹗﹗
                       
2009年11月11日
今日終於約咗做 OSCAR啦﹗要去另一個醫生度 CHECK，因為要用先進啲的儀器﹗今日又要抽血﹗其實 OSCAR 係 CHECK 唐氏綜合症的﹗個醫生好好好詳細咁講一次咩係唐氏綜合症，成因是咩LALALA...我而家30歲，每900個BB就會有1個有唐氏﹗
我老公之後話，唔知個醫生係唔係好鍾意講野同畫畫﹗我地同佢講咗我地聽講座的時候聽咗...佢仲係咁講係咁畫﹗不過佢收我成大拿拿 $1800! 佢係應該要講多啲野的﹗
度咗頸皮是 0.22-0.25mm ，即是正常﹗真是鬆一口氣﹗而 家先知道做人父母的原來咁多野要擔心的﹗因為寶寶個位置一直都唔岩﹗搞咗成20分鐘有多﹗HEHEH...寶寶有好多動作﹗佢而家唔只伸手伸腳﹗佢仲會摸 下自已個頭﹗摸鼻﹗睇睇下...佢仲食手指﹗醫生話佢唔係因為肚餓而食手指﹗全部都係無意識的動作﹗HHEHEH...好得意咁﹗成日都覺得佢似爸爸好為 食﹗
之後就抽血啦﹗好彩個護士好好手勢，真是少少少少痛﹗老公話點解政府唔一次過驗埋呢﹗咁就唔洗抽多一次血嘛﹗不過政府無收過我地錢喎...次次都係拍下屁股走人﹗驗血報告第2日就有啦﹗都係正常﹗YEAH!

第3次照聲波@DR. LUK

20091107   第3次照聲波
其實...本身我係BOOK咗做OSCAR的(CHECK唐氏)﹗但是原來DR. LUK的診所都無OSCAR做﹗我都唔知點解我BOOK的時候，個護士又無同我講架喎﹗
我: 我想BOOK "度頸皮" 架﹗
護士: 是
我: 我想問係唔係要11-14週做架？
護士: 是
我: 咁我想book今個星期六
護士: 是
我: 我想問幾錢架？
護士: 等等
另一個護士: $1900﹗
老公聽完之後都話唔明點解會有個咁嘅誤會﹗heheh...佢仲好衰咁話是唔是個護士以為你自己想度頸皮...唔係BB度頸皮﹗真係比我老公激死﹗
算啦﹗上次醫生問我想唔想知男定女...我都未知﹗當去CHECK男定女都好...點知今次老公問醫生的時候...醫生竟然話咁快應該CHECK 唔到喎﹗咁...咁...咁...佢上次問我做咩呢﹗？
HEHHE...都是睇返寶寶算啦﹗而家12週5日啦﹗長65MM﹗又長咗啦﹗而家個頭仲是好大﹗個肚又是好大...對腳就唔係好識睇﹗點解好似腳趾指向頭嘅﹗？

醫生開咗REFERAL LETTER比我去另一個醫生度做OSCAR...而家搞到我啲時間好TIGHT，睇下BOOK唔BOOK到下星期二啦﹗星期二都已經請咗假去贊育，一次過 check 晒就最好啦﹗

"宮心計" 之補身篇 (附桑寄生蓮子蛋茶食譜)

最近好多人都會同我講大肚應該食咩﹗唔應該食咩﹗其實我都只是無食海鮮﹗其他都有照食﹗但講起補品，其實我毫無頭緒﹗我話我有煲雞湯飲﹗但是姑媽又 話多激素﹗燕窩又話唔好﹗最後的結論是飲牛奶﹗不過其實我有濕疹，根本唔應該飲牛奶﹗而家一日飲一盒﹗我家姐叫我早﹑午﹑晚都飲...OH...生BB之 前唔通要做返BB﹗
不過好彩有 "宮心計"﹗先幾集講到 "麗妃" 有喜，太后成日話賞賜呢樣個樣比佢食﹗嘩﹗皇妃都是食呢啲﹗我照跟都一定無問題啦﹗無線個編劇唔會跣我呱﹗？其中一個好正...仲岩我岩岩整親腳的老公飲﹗另外仲有一個是湯...唔知咩煲鵪鶉﹗要睇返個集先得﹗
就是呢個﹗桑寄生蓮子蛋茶﹗

都幾易煲喎﹗味道就唔係好味的一類...不過都唔難飲﹗

老公係屋企的髮型...氹咗佢好耐先比我影﹗

今晚的晚餐...有SOGO的美國牛牛，價值 $120! 再9折...老公話超好味﹗不過佢話覺得關個 LE CREUSET 事﹗睇嚟...佢先係真正的 LE CREUSET FANS!

打格仔﹗兒童不宜？

桑寄生蓮子蛋茶
材料: 桑寄生 1兩/ 蓮子 2湯匙/ 蛋 2隻/ 片糖 少於一片 (自行調味)
做法:
1. 1公升水冷水加入蛋 (記得之前洗淨)，煲滾後加入桑寄生及蓮子
2. 水滾10分鐘後取出蛋，出殼放回一起煲
3. 以中小火煲45分鐘加片糖調味
桑寄生是中藥常用的藥材，有強壯筋骨、補肝壯腎、養血祛風及安胎催乳的作用，適合長者及孕婦。常用作治療腰膝神經痛、足痠背痛、四肢麻木、血虛風濕等病症，對治療高血壓及動脈硬化功效顯著。(來源: http://the-sun.on.cc/channels/news/20051225/20051225021547_0000_1.html)