傻夫婦一家四口生活日誌

2016年9月12日星期一

大頭妹上小學了

呢度有幾多人係由大頭妹出世睇到依家架？﹗真是好感激大家陪住大頭妹成長﹗今年終於入小學，算是人生另一個階段﹗

開咗學都一星期有多，暫時都適應得唔錯，大頭妹學校是半日制 (都是個句，大家心知邊間 ok，唔洗幫我開名)，所以適應上其實唔難，開學頭 3日先返得 2個鐘，返而小丸子得一日適應，返得仲長時間過家姐﹗

開學第一日，大頭妹已經同我講，小學老師同幼稚園老師好唔同，佢話小學老師好惡，哈哈哈，我同佢講，因為小學老師一個人要照顧 30個小朋友，幼稚園老師照顧 15個，所以佢一定要嚴格一啲，唔係好難睇實啲學生，而且老師惡，就好似媽媽咁，媽媽都惡，但唔代表媽媽唔惜你，老師都一樣﹗佢好滿意我個答案，之後無再話老師惡啦﹗

我大約睇晒佢小一啲課本，中文比我想像中好少少，起初都唔算難，學校是普教中，有晒音標，大頭妹反而會識讀，以前幼稚園是國際班，之後幼稚園亦都有教，知道學校係普教中，亦提早報咗公文中，學普通話拼音，不過默書就難講啦。英文我就唔擔心，可能是默書要串下字，平時認字應該無問題，小一唔知會唔會教 grammar，今個學期會留意一下，自己得閒陪佢睇故事書時教下佢簡單的 grammar。數學就比我想像中深少少，而且聽講除咗跟書教，額外的工作紙才是重點，不過我估大頭妹應該都應付到，平時教佢數學，佢都算易明，有日仲自己問我乖除數，話做加減數做到好悶。睇晒全部反而覺得常識最有挑戰性，同佢預習時，都幾多字都唔識讀，畢竟中文認字是大頭妹的弱項，睇嚟重點始終都是中文。

大頭妹: 我是小一生啦﹗大家多多指教﹗

大家 like 咗我地個 facebook page未呀？﹗未就快啲 like啦﹗

2016年9月9日星期五

海洋公園全新推出【海洋快證】試玩報告﹗﹗

2016年 8月 27日 (星期六)

首先要多謝海洋公園的公關，邀請我地一家優先試用海洋公園新出的『海洋快證』，到底『海洋快證』是咩東東？﹗等我話比你知啦﹗依家只需要 $150買張「海洋快證」(大小同價)，大家就可以自選 7次特快通行服務，咁當然就應該揀平時排隊排最耐的遊戲/ 設施啦﹗可以慳返唔少排隊時間，有多啲時間玩，尤其帶住老人家同小朋友，真是玩得舒服好多﹗

「海洋快證」適用於下列設有特快通行服務之機動遊戲及設施:

海濱樂園登山纜車站 (單程)
高峰樂園登山纜車站 (單程)
海洋列車海濱站 (單程)
海洋列車高峰站 (單程)
水戰大激鬥(新）
海洋奇觀
南極奇觀
極地時速
動感快車
摩天巨輪
熱帶激流
瘋狂過山車
越礦飛車
尋鯊探秘
滑浪飛船
極速之旅

今日襯暑假的尾聲，我就約埋爺爺嫲嫲同大頭妹小丸子一齊去海洋公園玩﹗第一站大頭妹竟然話想 shopping﹗不過大頭妹只是 window shopping，佢好乖從來都唔會扭計買野 (#曲線讚自己教得好)。

古古惑惑拎住個筆盒，不過其實小丸子都好乖，我話唔買，佢通常都會自己放底，係有時扭買食既野，就會唔放手...

第一站是『夏水禮』，出 blog 之時，已經完咗，明年請早啦﹗真是好好玩﹗

中間發生咗一件事我覺得小丸子大個咗乖咗，話說玩的時候，小丸子同一個小朋友相撞，小朋友跌低咗，我過去睇下大家都無事，小朋友都起身自己玩，小丸子竟然喊，比著佢以前，完全唔會理人，我覺得佢依家起碼會知自己跑撞到人係唔岩。

玩泡泡...完全是小朋友的最愛﹗

其實我覺得大頭妹大個咗都大膽咗，以前好多野都唔會試。

之後去睇天上皇者 show，好好睇，講環保，好岩帶小朋友睇，佢地會睇到好肉緊。

之後食個 lunch 差差電。

去兒童皇國玩啦﹗

玩完就梗係要用下我地張『海洋快證』，呵呵呵，第一次坐纜車完全唔洗排﹗

再用『海洋快證』去摩天巨輪﹑再睇尋鯊探秘﹑南極奇觀，完全唔洗排隊，真是慳返好多時間﹗

一早 book 咗冰極餐廳，因為阿旺過幾日就生日，當慶祝生日啦﹗

原來冰極餐廳又同海龍王餐廳唔同，上次去海龍王餐廳，真是樣樣都小巧精緻，我記得意粉類，真是得一注仔，今次冰極餐廳價錢差不多，但原來樣樣大大份﹗

點了一個煙三文魚火腿雞肉什菜沙律，都幾好味，都算足料，而且什菜唔止有沙律菜，仲有蘑菇﹑三色椒﹑青瓜﹑蕃茄﹗

點了 2個意粉都是要 family size...結果真是勁大碟，好彩個 staff 提我地，唔係我仲想繼續點﹗

肉醬意粉麻麻地，我記得海龍王餐廳個肉醬意粉幾好味，呢度可能是雞肉，好似差咁少少。

反而個帶子carbonara 就好好味﹗小丸子極速食咗 2碗﹗

叫一個 main course/ 意粉，可加 $28 要一杯橙汁﹗

唔記得叫咩名，有菠蘿汁檸檬汁咁，酸酸甜甜幾好味﹗

爸爸生日快樂呀﹗

一邊食一邊睇企鵝，不過唔知係唔係夜啦，啲企鵝唔係好郁，所以如果真是以 view 計，又真是海龍王餐廳略勝一籌，不過記得早啲訂枱﹗

哈哈哈...岩岩好遮晒啲企鵝﹗

最後當然唔少得去海洋奇觀﹗

今日仲睇埋個表演先走，原來好精彩﹗

「海洋快證」
http://www.oceanpark.com.hk/tc/park-information/news/new-ocean-fastrack-less-queues-more-fun?ref=hp-promo
價錢 : HK$150 (成人與小童同價)
購買地點：公園入口處票務部、歷奇百貨、北極購物村、熱帶雨林禮品店、海洋金銀島

網上購買：https://ticketing.oceanpark.com.hk/oceanpark/b2c/index.cfm/fastrack

2016年9月7日星期三

老公生日飯【北京樓】@20160821

2016年8月21日（星期日）

同家人一齊慶祝阿旺的生日，我忽然好想食北京填鴨，所以就揀咗北京樓啦﹗以為唔係咩節日唔洗訂枱，原來唔係囉，我最後當日唔放心打落去訂，已經得返 8:30，仲要話 6:30 WALK IN 都唔會有位，因為已經 FULLY BOOK，無留枱比 WALK IN客，除非有客人訂咗無到，但我地成 10個人，都係訂 8:30算啦﹗最來去到見到，原來對面美心 CLOSED咗，唔知係唔係因為咁所以咁多人？﹗

太古城北京樓食物的質素都唔錯，不過服務就一般，以呢個價位，我覺得服務應該要再好少少。今次都是點平時食開的北京填鴨﹑沙鍋雲吞雞﹑小籠包﹑上海粗炒，以前成日會食佢地的套餐，後來發現單點都唔係貴好多，又唔係一定要食套餐包的 "翅"，感覺更加好。

前菜 $20碟，10人就是2碟，都可以選擇唔要，不過北京樓的前菜都幾好味！

醉雞，普普通通，我吃的其中一件，皮和肉中間的脂肪形固咗⋯⋯

小籠包，大頭妹小丸子都有食，大頭妹話好開心試了新的食物。

生煎包

銀絲卷是大頭小丸的最愛！

砂鍋雲吞雞

炒鱔糊，阿旺好鐘意食，佢生日就特別點比佢食啦。

去北京樓就當然要食北京填鴨啦！

上海粗炒

最後有大合照！

北京樓
太古太古城道18號太古城中心二期2樓201號舖
2884 4131
http://www.openrice.com/zh/hongkong/r-%E5%8C%97%E4%BA%AC%E6%A8%93-%E5%A4%AA%E5%8F%A4-%E4%BA%AC%E8%8F%9C-%E5%AE%98%E5%BA%9C%E8%8F%9C-%E9%BB%9E%E5%BF%83-r14076

大家 like 咗我地個 facebook page未呀？﹗未就快啲 like啦﹗

2016年9月6日星期二

護足童鞋新體驗【Motion Picture】

早前帶大頭妹同小丸子去 Motion Picture 係太古城 Apita 的 counter 做足部測試，其實我自己就第一次接觸 Motion Picture 這個品牌，原來 Motion Picture 一向都做開童裝，已經有成 30幾年歷史，係永安百貨/ Mothercare 都有銷售點，最近就同國際級的脊醫共同研制時尚的護腳童鞋 ，Motion Picture護腳童鞋的特點是內層同鞋墊都是真皮製造，鞋墊足弓的設計，好似枕頭咁柔軟舒適咁承托對腳，而且仲得到「中港澳脊醫學會」認證，確保足部和脊椎的健康安全發展，甚至患有輕度扁平足的兒童均適用。