24週﹗終於剪短了頭髮﹗

今個星期我寶寶可以叫做 6個月啦 (24週除4)﹗寶寶超級活躍﹗後來我發現好多BLOG友的寶寶都係咁，可能虎年寶寶真係活躍啲﹗我地而家習慣臨瞓前會同佢玩一陣﹗拍下佢叫下佢，我試過 摸到佢條腿﹗無錯﹗有半條小腿﹗佢一腳踢出我的肚面，我咁岩放岩位﹗感覺好得意﹗不過有啲痛﹗之後叫阿旺摸，佢都摸到腳板底。
噚日(2010年1月28日)去母嬰健康院覆診﹗而家......我有成 54KG﹗一睇張紙都知出事，入去見護士的時候，就比人問啦﹗
護士: 點解你重咗咁多？﹗5個星期 5kg﹗唔係，係4.5KG先岩﹗都係太多吖﹗你BB最多佔1.5KG，其餘的 3KG都去咗你度架喎﹗你係唔係生完想變肥師奶呀﹗你食好多小食？
我: 冇呀﹗
護士: 你好鍾意撈飯架？定食好多甜野？
我: 唔係呀﹗我食的份量同之前差唔多之嘛﹗都係早午晚3餐，中間都冇食小食，甜野都比之前食少咗﹗
護士: 咁唔通你水腫...(摸下我小腿)...又冇吖﹗咁你咁講都冇辦法啦﹗太甜的生果都唔好食咁多喎﹗你唔好見我咁講，走去減肥喎﹗
我: 哦...
護士: 你出得去等叫名架啦﹗
我: 哦...(咁...我即係應該點呀？又唔好減...又唔好食咁多??? 大概係咁呱﹗)
之後去比醫生摸下個肚，同聽心跳就走得啦﹗都搞咗成個半鐘﹗仲要返OFFICE...好攰呀﹗離開診所之後打比阿旺﹗"你呀...應承咗我買磅幾耐呀？我而家變咗肥妹仔啦﹗"。阿旺 "哦﹗我放工去買啦﹗" 。放學返到屋企打開門就有啦﹗

而家 118.4 lbs﹗肚圍 33吋﹗
之前好多朋友都問我，大肚會唔會剪短把頭髮？﹗我都答 "唔會"﹗因為我諗住咁可以係生完之後最快回復 "原狀"﹗不過隨住個肚越來越大，我又越來越懶，我發現我把長頭髮似掃把多﹗最後...都係剪咗﹗

右面

左面
剪短咗又OK喎﹗初時怕好難打理，又怕向外繞出嚟﹗好彩而家瞓醒起身都係向入繞。用風筒吹 2下就OK﹗仲多咗時間化返個妝先出門口返工﹗個人望落仲精神咗﹗不過就成個肥妹仔咁﹗
仲有...我終於都買咗肚紋膏﹗之前唔諗住買﹗因為睇資料話肚紋係天生的，有就有﹑冇就冇﹗我見我媽咪咁後生生我都有肚紋﹗我而家大佢當年10年先 生，又點會冇呢？不過太多人叫我搽，話好有用﹗我就諗...如果最後我唔搽，得我一個有﹗咁...咁...咁...咪好傻﹗美容科技日新月異，話唔埋而家 的肚紋膏真係有用呢﹗我就用咗 $420買一個希望﹗

冇上網睇COMMENTS，買咗先算啦﹗我買的時候BA話懷孕2個月就應該開始搽...吓...咁我未遲咗4個月先開始﹗佢另外仲有一隻油，一樣價錢，BA話仲好﹗不過我見好香花香(應該係精華油)，我見之前JURLIQUE個BA話精華油唔好搽近肚，所以冇買﹗

之前入咗WYETH BB會﹗送咗個媽媽走佬袋比我﹗仲要係COURIER去我屋企﹗我咩都冇同佢地買過喎﹗真係有少少唔好意思﹗
時間過得好快﹗仲有4個月寶寶就出世啦﹗好緊張...好緊張﹗