Haagen Dazs雪糕火鍋@20181202

2018年 12月 2日 (星期日)

今日約咗大頭小丸的同學仔一齊去睇戲 The Nutcraker and the Four Realms，之後再去食雪糕火鍋，講起呢個同學仔，其實好好笑，唔知有冇係BLOG講過，呢個係佢 2年級的同班同學，有一次佢返嚟同我講，佢同學約佢去佢屋企SLEEPOVER，我心諗人地同學媽咪比咩？之後同大頭妹講，人地媽咪比就OK啦﹗結果佢地講講下，越講越認真，其實2個媽咪都可能係心諗人地比咩？結果...我地係大家其實未見過大家的情況下，我就比咗大頭小丸去同學屋企訓一晚，人地媽咪又未見過我，就幫我照顧我2個女一晚﹗真是超爆笑﹗

如是者佢地成功過一次，兩個就成日自己約出嚟玩，我地2個阿媽就只是配合佢地，佢地會自己揀去邊，去邊間餐廳...今次我地就是睇 THE NUTCRAKER 同食雪糕火鍋﹗

THE NUTCRAKER 比想像中好睇，都幾岩家長帶小朋友去睇，小朋友睇會覺得好刺激，家長睇...尤其是媽媽會有所領悟，不過唔劇透啦﹗大家自己入場睇﹗

睇完戲，去SUPER SANDWICHES 食個輕晚餐，原來 6:00 前都仲有 TEA SET﹗留返個肚一陣食雪糕火鍋。

標準SET 有 32球雪糕﹗


仲有少少生果同和果子。


大家都食得津津有味﹗

媽咪生日飯【北京樓】@20180110

2018年 1月 10日 (星期三)

今日係媽咪舊曆生日，一家人開心食飯切蛋糕，大頭妹成日話想食北京樓，所以今次就揀咗北京樓，但大頭妹之所以想食北京樓，並唔係想食北京填鴨喎，佢只是想食北京填鴨個塊白色皮﹗呵呵呵﹗小朋友的口味真係難明﹗

 燻魚

清炒豆苗

蔥爆羊肉

沙鍋雲吞雞

上海粗炒

炒鱔糊

北京填鴨

拔絲香蕉

兩個傻人就係想食呢塊白色皮...

大家 like 咗我地 facebook page 未呀？未就快啲 like啦﹗

20171126@鰂魚涌公園/ Spaghetti House/ 太古城中心

2017年 11月26日（星期日）

考完試的星期日，當然要去公園玩下啦！盡管成績未去到媽媽心目中的理想，呵呵呵，媽咪的要求好高﹗不過我都明盡咗力就足夠，大頭妹溫書都好合作，其實都唔洗我點勞氣，我估計到小丸子讀小學時，我就會知我依家係好幸福了﹗

去完公園，我地去咗 Spaghetti House食芝士火鍋，比大頭妹激死，我地之前未去過 Spaghetti House，去未去過既餐廳，佢去到門口就話唔好，試都唔肯試，我拿了餐牌慢慢講比佢聽會食咩，佢先勉強話試下﹗如果問大頭妹，佢又會帶我去 FOOD COURT 食烏東﹗

食飽飽去行下太古城的聖誕節攤位，今年整得好靚，除咗好多影相位，仲有大型滑梯比小朋友玩﹗

最近沉迷星球的大頭妹，去到公園都要繼續睇星球！

其實每次去到公園，我都會有一個感覺『一樣米養百樣人』，真是好多奇怪的家長，見到有小朋友追住自己家長踢？﹗家長唔教？﹗仲要好似求個小朋友唔好再踢？﹗其實我理解唔到成件事，可能我唔知事實的全部啦﹗不過見到有呢啲小朋友，我就一定睇實自己兩個小朋友﹗

玩到 6:00，就去 Spaghetti House食晚餐，結果都要等 45分鐘枱﹗今次專登去試芝士火鍋，想試好耐啦﹗點了 $398 的 SET﹗有生果 + COLD CUT + CHEESE的頭盤，NEW ZEALAND牛肉片，芝士火鍋配料 (大)，都算好豐富，我覺得都足夠 2大 2小食/ 3個大人食﹗

頭盤

真是好豐富﹗

之前又話唔試，試完話好好味﹗

小丸子又係由頭食到尾啦﹗

飲品有買一送一都幾抵，特飲是 $40/杯，買一送一即是 $20/杯，仲要有一球 HD 雪糕﹗

點之前已經問咗檸檬茶有冇買一送一，點知單嚟到又無囉﹗問店員，店員話買一送一只可以用一次？﹗但點解落單時又唔提顧客？﹗不過算啦﹗對香港餐廳的服務無咩期望，唔想為幾十蚊影響自己心情﹗

玩完滑梯好開心﹗

今年啲影相位真是幾靚呀﹗

20171122@School Food + 溜冰

2017年11月22日 （星期三）

最近甩Blog 甩得好嚴重，好似無咗寫blog的動力，生活上實在太忙太忙，每日放工返到屋企都好似打仗咁，希望可以勤力返，寫返多啲Blog!

講下近況，大頭妹岩岩考完試（所以先有時間寫Blog😂) ，升咗二年級 3個月，覺得比小一辛苦好多，小一時好似都仲有中場休息時間，今年真是好似未停過，每個星期不是英默就中默，再唔係就小測，而且默書範圍明顯比其他學校大，所以有時溫一次默書，都真是要溫足一星期，尤其是中文。中英默今年都有unseen dictation，所以就算努力溫完，都唔代表一定會有好成績，真是好講小朋友的功力和底子！哈！講住咁多先！

講返我餐飯，考完試就梗係要鬆一鬆，大頭妹揀去溜冰，其實唔知點解佢咁鍾意去溜冰，佢根本就唔識溜😅！溜冰前食少少，揀咗正正溜冰場旁邊的School Food！第一次食，感覺麻麻地，食完成晚都好口渴！壽司飯好乾，好似是切好放好耐個種乾！咁價錢又唔貴，一家4口埋單先 $300，但太古城中心有咁多選擇，短期都唔會再去！

滑啫啫暖鍋 $48，其實即是辣豆腐湯，有豆腐﹑蜆肉同年糕，都真是幾辣，飲完好口渴﹗

花郎卷 $68，飯有點乾，感覺好似切好一段時間，連 K-ROLL 都比唔上﹗


牛骨清潭麵 $88，比較淡味，牛的肉質一般﹗


CARBONARA 年糕 $68，只能說期望越大失望越大，又唔係唔好食，小丸子一個人都吃了半碟﹗

School Food: http://www.miradining.com/zh-hant/school-food/

太古城中心【茶茶居】@20170924

今日試用新 Apps寫 Blog，之前用開既 blogger apps，upgrade 完 iso 之後，就開唔到了，download 咗個新，希望順順利利，咁寫 Blog 可以方便啲。我依家好多時係坐車時寫blog，日日返到屋企都好似打仗咁，就算啲女訓咗，都攰到冇心機寫 Blog 了。

今次介紹間新餐廳，其實唔新架啦，不過我地自己第一次去，係太古城中心food court入面的「茶茶居」，佢係food court 入面，不過要分開等位，我地星期日晚上7:00去，都要等大約半小時！

食物質素不錯，其實都是美心集團，所以點心好好味，其他粉麵飯都不錯，點心比較貴，飯麵相對抵食，整體價錢算適中，太古城範圍就本來食咩都貴。

咩食物令到小丸子咁樣？之唔係蝦角囉！

點解唔比佢食，佢同大頭妹一人一粒，食完自己個粒問家姐係咪唔食，就攞家姐既，所以阿旺就拎走佢！
 

又真是幾好味既！

咁多樣食物中，我覺得腸粉最唔抵，呢碟要$30，但大頭妹鍾意食，無辦法！

牛肉球都唔錯，啲女唔會同我爭！

呢碟都比小丸子食晒，呢度啲蝦類點心係唔錯。

馬拉糕，我覺得味道好傳統，似我細個食既味道，好味！

呢度粉麵真是好抵，呢碗麵先$38！仲要好味，而且幾多餸！

個飯都是 $35！

叫咗個紅豆豆腐花，我一心以為紅豆沙豆腐花，不過都好好味！

港女丸食完飯要補妝！

真是頂佢唔順！

我覺得價錢係太古區來講都幾實惠！豆腐花後加，馬拉糕漏單，所以未計﹗

大家 like 咗我地 Facebook page 未呀？﹗未就快啲 like啦﹗