坐月媽媽要知道的事情

哈哈﹗又開返 "我的懷孕旅程" 出來寫，不過今次我不是懷孕，只是想講下 "坐月媽媽" 要知道，其實都應該知道，但又未必做好的事﹗

相信好多媽媽都會聽過，坐月的時候唔好冷親﹗不過我兩次都 "中招"，兩次都是因為個囡有黃胆，要帶佢地返醫院的時候出事的﹗

先講大頭妹個次，比較少事，只是 "吹親個膀頭" (醫院冷氣大)，但自始之後，每次吹冷氣，個膀頭就會痛﹗我終於明白老人家所講的 "唔好冷親膀頭/ 膝頭" 是什麼意思﹗所以坐月媽媽出街真是最好 "包實" 自己，最起碼包好條頸﹗

到小丸子個次就大件事，我完全知自己幾時出事，就是等醫生報告，餵媽媽奶的時候﹗之後燒到 102度，燒足一個星期唔退燒，最後要去檢血，都找不出是什麼原因，只可以講一句 "邊個叫你坐月冷親﹗"。

誰不知原來仲有 "後遺症"，唔知大家仲記唔記得，我新年之後不停病？﹗之後我去睇中醫，中醫話原來同我坐月時冷親有關﹗其實我都半信半疑，所以等多幾個月先出呢篇BLOG，結果證實...真有其事﹗

話 說新年之後病得好甘，之後都是反反覆覆，好似每個月都要病一次先安樂，朋友就介紹我去睇中醫。醫師同我把完脈之後，話我身體差得不得了，五臟六腑好似 "瞓晒覺"，問我坐月的時候點解唔調理好身體。之後我講起我坐月的時候病過，醫師話所以我依家成日病囉，而且每次病的時候，都是岩岩有月經的時候，醫師話 因為女人有月經的時候 (定之前)，就是體溫最低，身體最弱的時候，坐月時病個次的菌就會 "走返出嚟"﹗佢講完之後又好似係，我新年個次病的病徵，同我坐月個次是 "一模一樣" ﹗又是超高燒 (40度以上)，燒一個星期唔退燒﹗之後幾個月，次次月經就流鼻涕 (作感冒)，所以真是唔到我唔信﹗

食了 2個月中藥，無再反反覆覆病，不過到月經遲大到﹗醫師話原因是缺乏運動，同疲倦﹗上次遲了 2星期，醫生叫我做下運動，第2日朝早 20分鐘起身做運動，下午我姨媽就找上門啦﹗不過我好懶，之後又無繼續，因為醫師話一定要是 "帶氧運動"，我真是好懶跑步，依家就當同大頭妹去公園，自己追下個囡當做運動，哈哈哈，希望都有效啦﹗今個月 "準時" 啦﹗希望覆多一次診就 "畢業" 啦﹗日日食中藥，真是好肉赤呀﹗