三代同堂去旅行@DAY 6 落船 + 新加坡機場 (阿坤)

2013年12月4日 (星期三)

我地今日落船返香港啦﹗開心嘅時間真是過得特別快﹗我地 6日5夜嘅新加坡郵輪假期，貶下眼就到尾聲啦﹗行程最後一篇 BLOG，有我阿祖 (即我老婆口中嘅阿旺)做個總結﹗好多謝我老婆幫我安排這次旅行，給我機會去完成心願，其實一直以來我都想和父母去一次旅行，小時候父母帶我去旅行就多，人大了，陪父母嘅時間越來越少，希望陪他們去旅行，讓他們開心一下﹗今次還可以三代同堂一起去，所以我真是歡喜萬分，希望我的父母就和我一樣有着開心和難忘的回憶﹗

還未接觸過郵輪假期之前，我會怕在郵輪上會很悶，都是只有賭錢，但當我看過簡介和船上的設施時就開始期待上郵輪玩了，結果比我預期還要好玩，由其是有老有幼的情況下更加適合，因為大家都在船上不怕走失，還有一個很大的好處，在船上就好像在一間很大的酒店裡面，這間酒店的設施足夠你玩一整天，出去玩的時候不用為小朋友準備太多東西，加上船上已為你提供早午晚和下午茶，所以真的玩得很輕鬆很享受。

噚日上 11/F食早餐，食完行下夾板吹下海風幾舒服，今日再上 11/F 食早餐﹗

我繼續食咖哩角﹗真係好好味﹗

食完我地再四圍行下﹗最後一日，同大頭妹小丸子兩個去 GAME CENTRE 玩下﹗

WAHAHAH...其實我地無入錢架﹗唔好比佢地囓表情呃咗﹗

玩一陣又食 LUNCH啦﹗呢個真是增肥 TRIP﹗最後一餐見之前都未上過 11/F食，阿旺又話想食漢堡包﹑熱狗 (11/F 小食亭先有)，我地上 11/F食 LUNCH BUFFET啦﹗

11/F 原來仲有意大利麵檔﹗有忌廉汁同新蕃茄汁 2款﹗

又到小丸子 SHOW TIME...

嘩﹗個漢堡包又真係幾吸引嘅﹗

薯仔忌廉湯

HEHEHEHE...日日都係啫喱...

真是唔好睇小呢個為食丸子﹗

我比咗一啖薯仔忌廉湯佢飲﹗

之後成碗霸咗我﹗

最後佢自己飲晒一碗唔洗餵﹗如果係屋企都有咁乖就好啦﹗

呢個小朋友...照樣比我影到佢食啫哩...

如果你食正餐有食啫喱咁乖就好啦﹗

飲完湯，仲食晒成碗長通粉﹗

全程自己食，唔洗餵﹗真是叻叻﹗

但其實佢係屋企係唔食飯，淨飲奶同食 cheese架咋﹗

今日上 11/F食 BUFFET LUNCH，同 5/F最最最大分別，就是有漢堡包﹑熱狗食啦﹗

食完 LUNCH出夾板行下，已經見到新加坡啦﹗

影返張合照先﹗

HEHEH...大頭妹係都唔肯落車...影到得返個頭﹗

等落船，我地再去 GAME CENTRE﹗

飲埋之前買個 BOY/ GIRL PACKAGE最後一杯 COCKTAIL﹗

2個爭爭下...大頭妹倒瀉咗杯野...比我罰清潔地方，不過個侍應好快過嚟幫手﹗

今日 2:00就開始落船啦﹗落船嘅次序是根據客房嘅樓層，好有系統，唔怕一次過完部客人一齊落船大排長龍﹗

再見啦﹗歌詩達郵輪『維多利亞號』﹗
終於都帶住好唔捨得嘅心情出發去機場啦﹗ 我地今次都拎返坐 7人VAN，貴是會比較貴少少，不過可以一齊去 (唔怕好似上次去牛車水咁走失咗)，而且最重要是唔洗排隊，如果坐的士，起碼排 30 分鐘以上﹗

碼頭一轉出去就是 SANDS啦﹗

原來 12月是新加坡雨季，唔怪之得呢幾日都好似唔好天﹗

Singapore Flyer

好似遲啲香港都有﹗

我係新加坡嘅時候，真是發現佢地馬路 2邊都真係有好多樹﹗而且啲樹仲好大棵﹗

去到機埸啦﹗

新加坡機場嘅聖誕裝飾都幾靚﹗

睇到我 2個囡好開心﹗

hehehe...我就終於可以食到阿坤﹗真係好開心呢﹗

阿坤嘅 kaya多，真係好好味呀﹗﹗﹗

heheheh...唔知大家記唔記得我上次係 facebook page阿旺切個塊鮮油呢？

呢個係阿坤 VERSION﹗

hehe...唔記得唔緊要...比大家睇返﹗呢個係阿旺 VERSION﹗

如果阿坤塊鮮油係咁厚...可能一早已經關門大吉﹗

我唔識先美錄/ 好立克，記住去阿坤係飲美錄…我錯咗…

機場個 food court都幾多餐廳﹗

其實 CX個COUNTER係 TERMINAL 1，我地專登坐無人駕駛去 TERMINAL 3食阿坤架﹗

唉...我地成日話大頭妹個 2隻門牙...好似海綿寶寶...

heheh...佢自己無啦啦扮海綿寶寶...可能佢都覺得自己似...

等上機﹗

陪唔到小丸子第一次坐飛機，回程補返數﹗

不願上鏡嘅大頭妹﹗

大頭妹嘅兒童餐﹗唔知點解佢地無比 BB餐小丸子，不過算啦﹗佢都唔食架啦﹗

我食咗少少，又幾好味﹗不過小丸子食得仲多過大頭妹﹗佢食晒全部瓜﹗

我嘅蝦仁炒蛋炒飯，都幾好味﹗我成日諗點解啲人話飛機餐唔好味﹗我覺得飛機餐好好味﹗我試過因為覺得好味食 2個﹗﹗﹗

返到香港啦﹗

如果大家想認識多啲 COSTA CRUISE，可以去佢地嘅網址睇下﹗佢地農曆新年會有香港出發嘅行線架﹗

http://www.costachina.com/hk/costa_victoria.html

三代同堂去旅行@DAY 1 - 新加坡

三代同堂去旅行@DAY 2 - SANDS﹑牛車水﹑ 歌詩達郵輪『維多利亞號』

三代同堂去旅行@DAY 2 - 歌詩達郵輪『維多利亞號』- 上船 + 房間 +第一餐晚餐

三代同堂去旅行@DAY 3 - 歌詩達郵輪『維多利亞號』設施篇 

三代同堂去旅行@DAY 3 - 船長歡迎晚宴

三代同堂去旅行@DAY 4 - 布吉島

三代同堂去旅行@DAY 5 - 浮羅交怡