是日晚餐: 餃子、炒烏東、咸蛋魚蛋滾冬瓜湯 (附炒烏東食譜)

最近忽然技癢，心思思自己煮晚餐。另外因為 2個囡岩岩開學，我都想幫輕下工人姐姐﹗我家工人姐姐做野長期 "慢鏡重播"，我已經成日叫佢下午有時間就準備定晚餐的材料，到我返屋企睇住 2個囡，佢就可以開始煮，不過成日都仲係 8:00 - 8:30先有得食，我發現我放工返屋企煮，都仲快過佢﹗洗碗又係...通常我地 9:00食完，佢洗碗洗到 10:30，老實講我真是唔明屋企最多 5-6個人食飯，佢點解可以洗個半鐘碗﹗先 2日我真是忍唔住，企佢後面睇住佢洗，佢 9:30就洗完，但我無可能日日企佢後面睇佢洗碗架﹗我同佢講佢真是要快手少少，依家 2個囡都返學，大家都早咗起身，佢唔可以再日日 12:00瞓架啦﹗

講返我餐飯...一講工人姐姐的工作表現就十日十夜都講唔完﹗星期日準備餃子餡，星期一放工返屋企先包﹗另外仲有魚片炒烏東和咸蛋魚蛋滾冬瓜湯﹗2個囡食烏東食得好滋味﹗第 2日我煮忌廉蘑菇長通粉，2個囡又是食到 lam lam 脷﹗我真是要多啲下廚先得﹗

魚片炒烏東，少少紅蘿白，少少冬菇，再加魚片炒烏東，大頭妹同小丸子都好鍾意食！

自己包餃子，今次是白菜豬肉餃！自從舊工人走咗都未整過，因為以前都是佢預備餡，我負責包，即是2年幾未整過。今次第一次自己預備餡，淡咗少少，不過加辣醬食就差不多啦！

油菜，啲菜心係AEON買$15包，都幾好食喎！

話說我叫阿旺試味，佢一打開個煲蓋「嘩」一聲，然後話：老婆，你落咗幾多粒咸蛋呀？！哈哈！個啲魚旦嚟架！你唔係以為我落8隻咸蛋去滾個冬瓜湯嘛！

蛋片炒烏東
材料:
魚片 半包 (切條)
烏東 3包
甘筍 半條 (切絲)
冬菇 5隻 (浸軟，切絲)

調味料:
老抽/ 糖/ 豉油/ 麻油/ 胡椒粉

做法:
1. 平底鑊加油加熱，先炒甘筍，再加入冬菇。
2. 加入烏東和調味料混合快炒。
3. 加入魚片。

*魚片可以用火腿/ 腸仔代替，雪櫃有什麼就用什麼啦﹗我家就印尼姐姐，所以多數用魚片﹗