大頭妹小丸子的飲食習慣 (大頭妹 4歲7個月/ 小丸子 2歲8個月)

我其實成日都有個疑問，到底一個2歲半的小朋友一日要食幾多奶？唉，唔知大家有冇同感，做媽媽嘅見個囡食得少（大頭妹）固然擔心！食得多 （小丸子）一樣擔心！小丸子由6個月開始，間中夜晚要食2支奶奶 （12 oz) 先瞓得著！以前細個奶奶係主要糧食，佢肚餓要食我都盡量滿足佢，依家大個囡，仍然一日 2餐正餐﹑1餐下午茶﹑另加3餐奶，每餐8oz，夜晚個餐有時仲要 12oz (最高紀錄 16oz，一次過飲晒自己加大頭妹個支)，所以有時我都幾頭痛﹗見大頭妹養極都養唔大咁，見到妹妹食得好應該開心，但食得太多又好唔好呢？﹗

老實講...以上的問題...我絕對唔敢問健康院的護士，佢地由小丸子 4個月開始，話佢要減肥，1歲就話可以開始戒奶，或者轉飲鮮奶﹗正當我打算下次小丸子去睇醫生的時候問下醫生，忽然就收到 ILLUMA 姑娘的電話﹗即刻請教下專業人仕啦﹗

首先我講返小丸子的情況啦﹗其實佢食得好好，午/ 晚餐都是半碗飯﹑加少少肉﹑多多菜，佢好肯食菜，肉又反而麻麻地，魚就 ok，最鍾意食蛋/ 豆腐，所以我覺得佢係懶咬，同 ILLUMA姑娘傾完之後，佢都係建議我一日唔好比多過 3餐，每餐 8oz，比小丸子飲，因為有時飲得太多，怕影響小朋友食正餐，可以係午餐同晚餐之間加下午茶食水果/ 餅乾，唔好等小朋友太肚餓先食晚餐，影響胃口﹗

依家小丸子同大頭妹的進食時間表大約是: 

7:15: 早奶 (8oz 小丸子/ 4oz 大頭妹)

8:00: 早餐 (麵包/ cereal/ 蛋糕) *大頭妹 

*學校茶點 (我唔知幾點)

13:30 午餐 (半碗飯 + 肉 + 菜)

3:00: 下午奶 (8oz 小丸子/ 6oz 大頭妹) *飲完瞓晏覺

6:00: 下午茶 (水果/ 餅乾/ 蛋糕/ 烚蛋) *瞓醒晏覺食下午茶

8:00: 晚餐 (半碗飯 + 肉 + 菜)

10:00: 睡前奶

我依家好乖，每 2個星期定一個 menu 比工人姐姐，叫佢跟住煮，我覺得幾好，以前成日唔知佢煮咩比 2個囡食，試過一次無啦啦下午返屋企，見到 2個囡食油淋淋的腸仔炒飯，連少少茄汁都唔落比佢地，連最行的 3色豆都無，真是嬲到爆﹗依家盡量一星期魚/ 豬/ 牛/雞各一日，加菜/ 瓜，一日湯通粉/ 茄汁通粉/ 炒飯。我地無日日煲湯，通常 1星期 2次，另加一次糖水﹗生果就日日都有，通常是蘋果/ 香蕉/ 橙/ 車厘子/ 士多啤梨/ 提子。 

另外 ILLUMA 姑娘都有提到小朋友偏食問題，佢教我每一樣食物，都要比小朋友食多幾次，小朋友有時要食多幾次先會接受一樣新的食物，例如小丸子唔鍾意食肉，可以試下唔同的煮法，又或者同一啲小朋友鍾意的食物同煮，E.G. 肉碎蒸蛋，等小朋友慢慢習慣咬肉肉﹗

小丸子: okok，我明白，即是我依家唔洗減肥。

小丸子: 下？﹗每餐最多飲 8oz？﹗又話唔洗減肥嘅？﹗

hahhahaah...又嚟呢個眼神...自己都未飲完，就望實家姐個支﹗

有雪糕食...洗唔洗咁開心呀？﹗

如果大家都對小朋友的飲食有疑問，都可以打去 ILLUMA HOTLINE 問問，佢地的姑娘會好細心咁答你架﹗ ILLUMA HOTLINE: 2705 7705。