2014年10月31日星期五

鰂魚涌公園@20141001

2014年 10月1日 (星期三)

今日襯公眾假期帶 2個女去鰂魚涌公園玩﹗當初選擇搬來太古區,區內的配套的確是很大的考慮點﹗首先有 2個大商場,飲食購物都好方便﹗尤其是 2間大型日式超市,仲有溜冰場﹗另外就是鰂魚涌公園啦﹗近近地都可以行到去,之前爸爸勤力運動的時候,一星期都落去鰂魚涌公園的緩跑徑跑 2-3次架﹗依家就...佢嘅體重又升到上歷史新高 162磅啦﹗

雖然好近,不過我地其實都唔係成日去鰂魚涌公園,真是太懶啦﹗其實今日都是得我同大頭婆婆帶大頭妹同小丸子咋﹗

小丸子一去到公園,個百厭樣就出晒嚟﹗

佢爬呢舊野,大頭妹係唔敢玩嘅﹗所以去公園一定要睇實小丸子﹗





去到公園,大頭妹都係鍾意靜態活動,打下鼓就岩佢﹗



小丸子話前面唔夠位咩?﹗唔緊要﹗係後面爬上去,一樣打到﹗



呢個係唱歌的,不過小丸子就用嚟拉起自己﹗












小丸子: 舉高雙手,唔好郁﹗


其實點解小朋友咁鍾意玩 BUBBLE?﹗








小丸子真是唔識驚,小朋友唔識驚...即是大人要驚,一下唔留神,佢就自己爬出去腳不到地的地方﹗

我睇咗佢一陣,佢唔夠力的時候,就會 fling 返自己埋去企下﹗

終於...有一次唔夠力 fling 返自己埋去 (可以玩得耐咗),佢就露出一個好驚的表情,其實我想由得佢跌一次,一來唔係太高,二來公園有軟墊,三來我就正正企佢面前...真是有咩事...我都可以做最後反應,不過大頭婆婆忍唔住出手救咗佢﹗事後我都有同佢講返,其實咁玩有危險﹗不過...我相信...下次佢都一樣會照玩﹗

2014年10月29日星期三

飲茶@玉桃軒

我好鍾意飲茶架,可能因為平時 LUNCH 都無得飲啦﹗上上星期六去樓下飲茶﹗原本想轉下場去美心,點知勁多人,都是飲返玉桃軒啦﹗

小丸子第一次食春卷﹗不過佢似係食沙律醬多啲﹗

叉燒包

馬拉糕,玉桃軒的馬粒羔好好味架﹗

唔知係唔係平時飲下午茶多,今次飲午餐,點解樣樣點心都好似好食咗嘅?﹗

鳳爪好味﹗

碟牛柏葉又咁大碟﹗

牛肚又咁大碟﹗

灌湯餃

叫個飲比 2個囡食下,點知佢地都唔係好食﹗我細個好鍾意食鴛鴦炒飯架喎﹗

2014年10月28日星期二

工人問題 1

好少係blog講我新工人姐姐,不過其實佢唔新,同我都做第2張約,即是已經做了 2年幾﹗不過我仍然改唔到口叫佢 "新工人姐姐",因為佢的表現仍然是一個新工人﹗2年來可以無進步過﹗之前聽人講,請工人頭 3個月一定好,之後就好難講,但我個工人連頭 3個月都未好過﹗

首先,是溝通問題,我估都好普遍。明明佢話自己識英文,見佢睇電視又識笑,即是應該都明明地廣東話啦﹗但好多時一個指令,中英文講晒佢都仲係唔明我講咩﹗例如: 一次問佢 2個囡食開的貝殼粉係邊?﹗我指住平時放通粉個位用英文問佢shell﹑shell pasta,佢答我冇,但明明噚日先食完。再用中文問佢: 貝殼粉,佢都好似完全唔明,最後比我係個櫃找到一包新的,我再問佢之前食開的係邊,佢話原來佢噚日最後煮晒。我問佢點解佢唔明我講咩?﹗我已經指住平時放通粉個位,佢話以為我講螺頭 (煲湯個啲),但我已經同佢講咗我煮 lunch 比 2個囡食,又點會要螺頭呢?又話如果我講通粉佢會明﹗

另一次係 "餃子",我打電話叫佢煎定餃子,同佢講明韓國餃子白色袋,佢不停話冰箱無,但我好肯定有,之後我返到屋企一打開,係有架囉﹗我已經同佢講晒 dumpling/ 餃子/ korean dumpling/ 白色袋,而當時冰箱只是得幾樣野,只有一樣野係白色袋﹗我叫咗佢煮公仔麵,有咩可以配公仔麵呀?﹗有時真係唔知佢係唔想做扮唔明,定真唔明﹗

其次,佢做野超慢,但最後結論是佢 hea 做(我以前信佢真是慢),唔知係唔係佢前僱主要佢12:00瞓,佢每晚都做到11:00有多,但唔知點解晏晝唔做野,夜晚洗碗又要洗個半鐘(我地每日大約8:30食完飯,當佢9:00食完,但每日10:30先洗完碗,有時 11:00)!我朋友見過話覺得佢 hea洗,但見佢兩年都係咁,老實講,晚晚都咁夜瞓都攰架(雖然我知佢有瞓晏覺,睇cam見過,2個囡都講過),所以我選擇信佢慢!不過因為 2個囡一齊病咗,我請假睇住佢地,我地2點開始瞓晏覺,瞓到4點,我比工人姐姐講電話聲嘈醒咗。起身望一望間屋,前日叫佢抹風扇未抹(好一陣子之前已經叫佢抹,但一直無抹),大頭妹早上嘔完件衫仲未洗,早上開機洗的床單未涼,衫未收!我問佢 2個半小時佢做過咩呢?佢話佢執咗房(只是摺張被),執咗玩具 (如果我執唔洗 5分鐘),洗咗菜(但其實係岩岩開始洗,我見花都未搣,應該係佢聽到我起身,就倒啲菜出嚟扮洗)。我話呢 3樣野點都唔洗做 2個鐘﹗佢就話佢食咗蕃薯,同埋企係廚房!我依家先知原來企係廚房,都算是工作內容? 

最最最嘔血是佢極污租,一件衫著3日!叫佢要日日換,佢仲話著2日都OK,叫佢要日日洗髮,都是隔日洗!已經買埋風筒比佢,叫佢夏天要日日洗,我無特別檢查,但成日見佢抓頭!試過比我捉到佢1件衫著3日,仲死口唔認,話自己前一日係著另一件衫,直至我拎返佢前一日幅相比佢睇佢先收聲,我都問佢佢係搵藉口,定真是唔記得,佢就無答。連阿旺都頂唔住再問佢到低係唔記得,定係唔明我地講咩﹗老實講...2樣我都唔係太接受到﹗如果連自己都唔記得自己前一日著咩衫,我覺得真係好離譜﹗

好多人問我咁點解仲續約,因為怕請湊兩個難囉,而且佢續約前都交過下戲!當時阿旺話唔想博!我又唔想負要博的責任,所以最終都同佢續約﹗唉...如果大家有好的介紹請通知!

2014年10月27日星期一

養小朋友之平有平養﹑貴有貴養?﹗

 

有小朋友之後,同朋友 gathering,好多時話題都離唔開小朋友,未有小朋友的朋友好多時會問,養個小朋友貴唔貴?﹗未有小朋友之前,我成日都諗小朋友平有平養,貴有貴養啫﹗話養個小朋友要 $400萬,銀行廣告嚇人嘅啫﹗到自己有小朋友的時候,先知道原來自己已經跌咗落一個 "無底深潭" (哭)﹗

先講講大頭妹,佢讀無學劵幼稚園,學費 $3530/月,仲有 3個興趣班,葉氏音樂班 $900/月,Jolly Kingdom phonics class $798/月,小童群益會畫班 $350/5堂,合共 $2000 (多少少)﹗仲未計書簿雜費,一個月起碼 $1000以上,我記得上學期的雜費是 over $6000,仲有 K2開始的小蜜蜂,又交了 $1800/半年 (連制服)。即是如果小朋友讀無學劵幼稚園,加上 3樣興趣班,一個月埋單要 $7000﹗依家息口低,我層樓都是供 $8000/月﹗﹗$7000 x 12月 x 4年 = $ 336,000﹗一年要 $84,000,4 年要 $336,000﹗未計衣﹑食﹑行﹗即是養大頭妹,是貴過供層樓嘅﹗如果以私小﹑私中﹑去外國讀大學,$400萬原來好似唔夠﹗唔怪得咁多人話唔想影響自己的生活質素,所以唔想要小朋友啦﹗

又講下小丸子,佢依家 PN,未有學劵,學費 $2850/月,小丸子識慳家,佢考唔入大頭妹間幼稚園,考入有學劵的,明年 K1有學劵之後,一個月學費好似 $800。就算好似大頭妹一樣上 3個興趣班,都是 $2800,都未夠大頭妹的學費﹗咁計呢...$2800 x 12月 x 4年 = $134,400。嘩﹗條數真是差好遠﹗﹗﹗

再平有平養多少少,唔讀 pn,唔上咁多興趣班,上就上平平地嘅 ymca/ 小童群益會,當 $600/月,唔學樂器,學費 $800 + 興趣班 $600 x 12 x 3 = $50,400﹗嘩...睇完個數據...自己都鬆一口氣﹗其實真是有得平有平養嘅﹗

所以我依家成日都身邊的朋友講,如果不是真正的中產 (我地絕對唔係),小朋友都是讀有學劵的幼稚園啦﹗依家個年代,2 - 3樣興趣班走唔甩﹗而且有學劵的學校,普遍書簿雜費都會平少少﹗好似小丸子學校,老師叫我唔洗買書都 OK,話學校教的時候有 "大書",如果唔洗返屋企睇,唔買都OK,而且書費只是 $2XX﹗

可能有人會話有學劵的程度會深啲,英文教多啲 (正正是我地當年的諗法)﹗但依家個年代,個個幼稚園開始就出去學英文﹑公文數﹑普通話,當然小丸子未上 K1,我真是唔知課程差幾多,而大頭妹學校的課程比我的感覺是深的,尤其是英文,真是學得都唔錯,所以我都無考慮同大頭妹轉一間有學劵的幼稚園,讀得好就唔好轉來轉去啦,都是捱埋呢 2年啫,不過升小學就真是要考慮得好清楚﹗

hehehe...唔怪得養小朋友咁貴啦﹗原來我養梗...

BATMAN

SUPERMAN

仲有 PRINCESS ANNA﹗

HAHAHAH...又 SUPER HERO﹑又 PRINCESS,真是無返 $400萬都養唔起佢地喎﹗

大家 like 咗我地的 facebook page未呀?未就快啲 like 啦﹗



Related Posts Plugin for WordPress, Blogger...