2016年2月5日 星期五

大頭妹K3上學期總結

每次見家長都好緊張,今次是大頭妹轉校之後第1次見家長,所以更加緊張﹗其實真是好多謝大頭妹班主任的悉心教導,佢真是一個好盡責的好老師,基本上未見家長之前,我都大概知道大頭妹的表現,因為老師基本上1個月起碼都打一次電話比我,一講有時就半小時﹗真心覺得大頭妹遇上鄺老師是佢的福氣。佢唔單止會指出大頭妹的問題/ 不足 (有時都會專登打來讚賞),仲會提出建議,點樣可以幫助大頭妹,尤其是升小的適應,老師都有比意見。

今次成績普普通通,都有好幾個 3分,主要都是情緒﹑表達﹑自信方面,所以我都覺得正常,之前老師都同我講過幾次,大頭妹上堂好易喊,有時唔識做/ 搵唔到功課,就自己坐係位喊。不過老師話見佢聖誕節假期後已經改善咗,不過評估是 9-11月,下學期應該會有進步。

事實上我都明白大頭妹都要適應新環境,佢之前幼稚園是主要用英文,雖然我地自己係屋企講廣東話,但是佢對英文的指令係明白啲,尤其是班房的語言,所以老師話佢有時好似唔明佢講咩,我都明白,希望下學期會有改善。

見完班主任都有見英文老師,英文老師對大頭妹的表現讚口不絕,除了 "參與",全部都是 1分(最高分)﹗我有問升小學的適應,老師都話相信大頭妹的英文應該可以應付小一,下學期都唔會有默書,不過就會同佢地串下字,等佢地有個概念。

普通話就見唔到老師 (唔夠時間),見成績普通,2分多,只有 "讀生字" 和 "讀拚音" 2項是1分。但其他家長都有講過,要上小一,基本上一定要自己出去學普通話,因為小一已經是普教中,默書都是普通話,如果普通話唔得,連默書都默唔成。


大頭妹班的展覽攤位﹗


佢地今期教塑膠同環保,我覺得都教得幾深入,因為我成日都要做資料搜集,我覺得連我對塑膠同環保都認識深咗﹗佢地仲去科學館參觀,因為科學館今期的專題是海洋垃圾﹗

大頭妹的作品



2016年2月4日 星期四

小丸子 K1上學期總結

今次是小丸子轉校之後的第一次家長日,不過因為佢地 2個要上芭蕾舞,我同阿旺要兵分 2路啦﹗我負責見老師,阿旺負責帶囡上芭蕾舞,佢話費事我之後又問長問短喎,我自己見老師就最好,呵呵呵﹗

今日首先是見大頭妹的班主任,之後再見小丸子的班主任,另外再可以排隊見: 英文老師﹑普通話老師﹑宗教老師﹑社工,不過可能要預留更多時間啦﹗我今次只是見了班主任,加英文老師。

出乎意料之外,老師竟然話小丸子係學校都算乖?﹗哈哈哈...有什麼可能?﹗佢話小丸子比教好動,上堂有時都會周身郁,不過都可以叫得聽,都算投入,有時見佢好似唔專心,叫下佢問佢問題,佢又答得到,老師話唔擔心佢學術,話小丸子認字都幾好?﹗吓...我家文盲丸係學校認到字?﹗老帥仲有圖有真相,影咗佢認字 matching,問咗: 手﹑口﹑爸爸﹑媽媽,配對完叫佢讀,都可以讀到?﹗我開始真是懷疑...平時小丸子是咪真是整蠱我?﹗因為我之後見英文老師,老師一樣話佢認到字?﹗

老師話唯一問題是成日唔交功課,要叫佢先記得交。聖誕節假期後又成日顧住玩唔做堂課,有時要叫到第 3次先去做功課。其實最近係屋企都係咁,之前放學會自己做功課,除咗線條,仲會油埋顏色,仲會畫公仔,佢話咁樣老師會開心,但最近畫完線條就算,成日話趕住玩?﹗

老師其中一個 comment 好好笑...佢話小丸子大肌肉唔洗講,非常好,仲好大力?﹗我真是第一次聽 comment...是好大力...hahhah...我可能要比佢去學空手道﹗小肌肉都唔錯,係寫野有時心急,所以畫得唔夠直﹗

整體上只有 phonics是差少少,得 3分,其他都唔錯,仲要 1多過 2。

佢地學校的家長日,每一班都會有一個攤位展覽﹗小丸子幼兒班今期是專題學習,內容是 "豆類",所以之前都預備過豆類的食譜,仲帶了一塊布回學校做豆袋﹗


出發之前,小丸子都有同我講會有 "手推車"﹗


同學的作品,有用豆類罐頭做的,有用豆類飲品做的,小丸子好遲先同我講要豆類罐頭/ 豆類飲品,最後老師同佢整 "豆雪條",真是好有趣﹗

小丸子的作品﹗



2016年2月3日 星期三

蒸水蛋 (附食譜)

唉﹗新工人姐姐 no show,即是我地自己煮飯做家務的日子要繼續啦﹗其實我真是發覺,我地自己打理返頭家之後,2個囡又肥肥白白咗,間屋又整齊咗,夜晚餐餸都好味咗﹗

今日到我放假湊女,2餸 1湯﹗煮了薯仔紅蘿白雞翼﹑蒸水蛋﹑准山蓮子北旗黨蔘湯﹗

超好味﹗專登煎得啲雞翼香啲再炆,炆出嚟好惹味﹗

蒸水蛋,之前都講過,自從唔係用灣仔個火,就蒸唔返鏡面。最近自己煮得多,大頭妹又鍾意食蒸水蛋,終於比我蒸返個鏡面,火力的控制真是好緊要﹗

因為小丸子好鍾意食蓮子,所以放咗好多,煲湯變成深啡色﹗另外我用 20cm LC,放咗 $40肉,個湯真是甜到暈﹗

蒸水蛋
材料: 
2隻雞蛋/ 雞湯 150-200ML (用咗雞湯就咩調味都唔洗架啦﹗)

做法 :
1. 雞蛋同雞湯最好都是室溫﹗
2. 於鑊中煲水,先發打雞蛋,盡量唔好打到起晒泡。又或者分開蛋白同蛋黃,只打蛋黃,再加返埋一齊,混合就好了。
3. 加入雞湯混合。
4. 要求好高的話,可以過一次 "西" 先放入碟。放入鑊蒸之前,記得要抹乾鑊蓋的倒汗水。
5. 大火蒸 7分半鐘。



2016年2月2日 星期二

東涌聯邦皇宮@20160124

 



去完昂坪市集,返到東涌見天氣咁凍,本來想去打邊爐,點知東涌打邊爐的地方唔多,雖然只是 6:00幾,去到稻香已經爆多人,第一轉入晒,要等第 2轉,咪起碼都 8:00?﹗咁算啦﹗轉場﹗凍冰冰都是食中餐,加上我地一行 5大 6小,坐得舒服是非常重要,最後去了聯邦皇宮。

蒸魚餐,好似是 $3xx,包一條蒸魚,仲有 2個餸,都ok既﹗

 可以揀一肉一菜,肉選了牛柳粒,都幾好味,不過牛的份量比較少。

 金銀蛋時蔬,好味道﹗

貴妃雞,點了小菜套餐可以加 $85點半隻雞。

咕嚕肉

雙菇豆腐,多小朋友點多個菜,都幾好味﹗

菜乾豬肺湯,好味﹗


我已經唔記得小丸子食咗 4-5個...第一轉好似已經食咗 3個,食埋家姐個份,第 2轉又好似食咗 1個...所以應該是 4個,真是咁好味?﹗

 佢地好似第一次一齊出街食晚飯,影返幅合照紀念下﹗

地址: 東涌達東路20號東薈城名店倉2樓255號舖
電話: 2626 0181

openrice: http://www.openrice.com/zh/hongkong/restaurant/%E6%9D%B1%E6%B6%8C-%E8%81%AF%E9%82%A6%E7%9A%87%E5%AE%AE/47726





2016年2月1日 星期一

新年版【鋒味曲奇】


謝謝 she.com 送來的新年禮物呀﹗今次是新年版的鋒味曲奇﹗其實真是好佩服鋒味曲奇的心思,除了原來的 "甜﹑酸﹑苦﹑辣" 味,聖誕節又有薑餅同紅梅的特別版,今次新年又有新搞作﹗


新味包括: 芝麻﹑柑桔﹑咖啡﹑蝦條 (建議次序) ,仲附送限量版利是封 8 個,每款味各 4 包,每盒售價 HK268。

利是封好靚呀﹗會唔捨得派比人喎﹗

咖啡曲奇 - 咖啡香味濃郁,口感清爽,入口唔油膩。

芝麻曲奇- 芝麻味好香,甜度岩岩好。


蝦條曲奇 - 哈哈﹗我真是覺得食鋒味曲奇,次次都有驚喜﹗蝦條 + 曲奇真是好特別﹗採用櫻花蝦,有淡淡的香辣感。

柑桔曲奇 - 同上次聖誕節的特別版薑餅曲奇同紅梅曲奇一樣,入面是有少少乾果肉,最岩我地女士的口味﹗


哈哈﹗係太古城中心都開咗 pop up store,就係冒險樂園/ toysrus 旁邊咋﹗

銷售點: 
中環旗艦店 - 中環結志街 39-49 號地下
太古城 pop up - 香港太古城道 18 太古城中心 1 GH1
海港城 Popup shop - 尖沙咀港威商場 3 15B


Related Posts Plugin for WordPress, Blogger...