2015年1月30日 星期五

第一次組織義工探訪活動

 

最近寫 blog的進度有一點點慢﹗之前我地以 "傻夫婦" 名義組織的第一次義工探訪活動,一直都未寫,因為想寫好啲,等多啲人明白我地的活動意思,以後可以有更多人參與,所以一直拖呀拖﹗

 今次的探訪活動總共有 18個家庭參加,總共 60位大小義工,最細的只有幾個月,開始之前見到咁多個義工家庭坐埋一齊,真是好感動﹗我要再一次多謝大家的參與﹗其實大部份是 blog友,係網上就接觸得多,之前未見過真人﹗亦有部份是朋友,和朋友的朋友﹗

我幫我地今次的義工隊改咗名做 "分享愛" 義工隊,起初想叫返傻夫婦,不過諗下...無理由要咁多個義工家庭陪我地一齊叫做 "傻瓜" 架嘛﹗咁我地今次活動的目的是 "分享愛",所以就叫 "分享愛" 義工隊啦﹗

今次是我地第 2次探訪,就已經做咗義工聯絡人,其實都有少少緊張,寫 blog 咁耐,出席 event 就多,自己搞 event都是第一次﹗由於無經驗,好多野都怕做得唔好﹗例如因為無經驗,義工們集合之後,我地無先打比受訪家庭就出發,結果有 3個家庭 "摸門丁" (包括我地),要係門口等/ 改探另一個家庭﹗後來問返機構,其實因為周六日好多 NGO 都會搞興趣班/補習班,有時媽媽大頭蝦唔記得已有活動又應承,有啲就臨時後補位上興趣班,唔去下次唔再受佢哋報名,結果唯有放棄對升學無着數的探訪,當然也有absent mind家長約好又唔記得咗啦﹗um...咁講我都明嘅﹗唯有下次自己安排好啲﹗

我地今次去探訪的家庭,是唐 2樓,所以相對會 "擋" 得比較細 (2樓比較好租,唔洗行咁多層),一家 5口就住係大約 100呎地方,有 2張碌架床,一個衣櫃,一張摺枱﹗廚房其實就只有一個煮食爐﹗我四圍望一望,一件玩具都無 (比上次探訪的家庭環境仲要差)﹗小朋友就只可以屈住係床度玩。大頭妹無講我都無特別為意,佢地瞓的床,都沒有床褥﹗大頭妹回程的時候問爸爸,佢地無電視嘅?﹗咁佢地未無得睇 Disney channel 囉﹗點解佢地無玩具嘅?﹗有時真是唔好以為小朋友就唔會明白,之前有比人問過我覺得帶 4歲的小朋友去做探訪有用咩?其實佢地真是明白,而且最重要是通過 2家的小朋友一齊玩,會比較容易打開隔膜,大家比較易溝通﹗好似上一次探訪時,有一個媽媽同我講,其實佢最怕小朋友幼稚園開生日會,因為其他小朋友都會帶好多糖返學校,又有靚裙仔著,要刻意去買又會增加屋企負責,唔買又怕唔好睇。原來我地好開心好期待的幼稚園生日會,對某啲家庭來講,會是一個負擔﹗

之後其他義工家庭都有分享﹗我比較有印象的是其中一個義工家庭去探訪的竟然是自己小朋友的同級同學﹗佢話忽然令佢地覺得原來需要關心的人,就是 "這麼近"﹗剛巧受訪的家庭是環境比較差的,住9樓天台, 有時仲會有老鼠出沒﹗其實真是無諗過,香港的居住環境,原來可以咁差,我地細個住公居叫窮人,依家的窮人,連公屋都無得住,點解個社會越來越退步﹗

探訪前阿旺講下活動內容。


真是要再次多謝大家的參與﹗




以下的相是我問一個參與的義工借的,佢探訪的應該是 "光房",租的是房 (有窗的),但浴室廁所同廚房都要共用﹗

幾家人共用浴室。


我覺得今次的義工探訪活動,是我在 2014年做過最有意義的一件事
自從自己做咗人媽媽之後,我的確好比心機去愛大頭妹同小丸子,我覺得我地一家真是好幸運﹑好幸福﹗我地的探訪當然唔會話令到受訪家庭的生活有改善,每次去可能帶少少糖果﹑玩貝﹑文具比小朋友,不過最少佢地會覺得有人關心佢地,社會上是有愛的﹗2015年我地會繼續我地的分享愛探訪,希望大家都多多支持我地啦﹗


2015年1月29日 星期四

小丸子 PN 上學期評估

2014年 1月23日 (星期五)

小丸子的第一個家長日,我同阿旺都請假出席,因為都好想多啲了解小丸子係學校的表現﹗小丸子的幼稚園,平時無特別事係唔會聯絡家長的,所以家長日之前,我對小丸子係學校的情況,都唔係太清楚﹗

老師一開始笑笑口問我地,估下小丸子的表現,老師話小丸子整體都好平均,為人『活潑開心』 (Oh...我依家對呢個形容好敏感),不過佢坐唔定,成日想走出位,一知道有得出公園玩就好開心﹗開學時坐係位都會郁來郁去,依家已經好少少,可以坐耐啲。 飲食方面唔錯,唔會話有咩唔食。大小肌肉都發展得 ok,不過佢係學校,原來唔鍾意畫畫,老師話佢畫兩畫就會話攰﹗我見佢係屋企又好鍾意畫,我估佢想人陪佢畫,老師話會留意下,因為 K1會做多好多畫畫的訓練,所以大家都要留意下。

小朋友真是好得意,平時係屋企好乖的大頭妹,PN 見家長時,老師話佢搗蛋,咁平時係屋企百厭的小丸子呢?﹗老師話佢同小朋友玩時好守規矩,唔會搶玩具,願意 sharing...哈哈...即是淨係蝦家姐?﹗另外,老師仲讚小丸子好有禮貌,見到老師同同學都會主動打招呼,老師話好欣賞佢呢點。

本來我地想問下佢之前返學喊的問題,老師都主動講埋。因為一開學的時候,小丸子都好鍾意返學,最初係爸爸帶,返咗 2個月之後,開始扭計要姐姐帶,我估係因為姐姐會抱,佢行返學段路都幾遠,之後又再扭計要我帶,應該是由 11月開始,一直到依家都係我帶啦﹗唔知點解到我帶之後一個月,佢就開始入班房前喊﹗老師話小丸子應該係比較依賴媽媽,因為佢次次喊的時候,都叫媽媽﹑媽媽咁,不過最近又變返開心囡啦﹗所以應該唔洗擔心﹗佢依家好叻啦﹗每朝一出電梯就大叫 "x老師,早晨﹗" (小丸子一班有 6-7個老師,其實我都唔認得晒﹗)。

最後,就派返上學期係學校做過的勞作,就完啦﹗

heheheheh...最近我咳...佢又要戴口罩,話要同媽咪一樣﹗

終於都變返開心啦﹗

以前大頭妹有得爸爸媽媽帶返學,小丸子就無咩呢個機會啦﹗可能下年家姐 K3要轉下午班,就可以爸爸媽媽一齊帶返學啦﹗(哈哈﹗咁影影到小丸子好細粒﹗)

最後仲有 12月的朗誦﹗老實講,我覺得學校真是教得幾好﹗所以最終我地都選擇留係原校上 K1﹗


家長日之後一個星期派成績表,結果...好失望...真是老實講...我從來未見過咁差的成績表...雖然好唔想做怪獸家長,但都寫咗手冊留言想同老師傾下小丸子的成績問題,雖然好多朋友安慰我話小朋友的成績表唔代表咩,但真係好奇怪,見家長時老師讚的方面,都是得 3分...1-4分,1最高分,4最低分,而且連小丸子的強項體能都是得 3,我覺得我真是要問清楚,小丸子返學係唔係有好大問題﹗

大家 LIKE咗我地的 FACEBOOK PAGE未呀?未就快啲 LIKE啦﹗

2015年1月28日 星期三

大頭妹與小丸子

前一陣子係 facebook post 了小丸子咬大頭妹,大頭妹仍然為妹妹 "講說話" 的一件事,好多人話大頭妹好乖,的確大頭妹是好乖,不過小丸子又唔係真是好曵,佢個日只是玩得太開心,不竟佢只是 2歲,如果佢唔係因為爭玩具而打/ 咬家姐,我都好少會真是罰佢。有人會話我 "寵" 細路,但大家覺得好乖的大頭妹,我都係咁教出嚟,我覺得小朋友用 "愛" 去教導,比佢打罵去教導來得有效﹗ 

我覺得打罵得多,小朋友會有 "抗體",越來就越唔怕打罵,越大就要鬧得越多,打得越厲害先有效,相反用愛去教,慢慢小朋友會明白,慢慢佢地會自己感受到﹗雖然...我成日都控制得唔好...仍然會鬧人...不過一睇就知我鬧得唔惡啦﹗2個囡都唔驚我﹗

好似有一次,又是差唔多情況,不過爸爸唔係屋企,所以無人鬧小丸子,小丸子打咗家姐,我通常會抱實大頭妹,小丸子自己坐係一邊喊,我就安慰大頭妹,之後我問小丸子佢知唔知錯,佢竟然同我講 "你鬧我啦﹗" ,即是其實佢知佢是抵鬧嘅,我相信佢慢慢會改善﹗


大頭妹真是好乖,小丸子玩玩下太興奮咬咗佢一啖,喊到死死下。
之後我問佢:我趕妹妹出廳瞓好唔好?
大:唔好!我都無嬲佢,我喊啫!



驚比人鬧...所以詐喊先﹗


喂喂喂...啲戲誇咗少少喎...仲喊得慘過家姐...


可憐的大頭妹...



其實...本來佢地係玩得好開心﹗

唔知點解玩玩下...咬家姐...


其實大頭妹都有時會打妹妹,上次打完妹妹,自己好驚係度喊,反而阿妹無喊。咁奇怪...打人個個喊,被打的唔喊﹗之後我都有問大頭妹講,覺得打人有冇用?﹗打完有咩感覺?下次仲打唔打?HEHEHE...其實我覺得我處理佢地爭執時 EQ好高...我唯一係教功課時...就好易失控,真是要好好管理一下自己的 EQ﹗

大家 like咗我地個 facebook page 未呀?未就快啲 like 啦﹗

2015年1月27日 星期二

大頭妹K2上學期評估

2015年 1月22日 (星期四)

上星期連續 2日家長日,星期四是大頭妹,星期五是小丸子﹗

仲記得 PN 時,老師話大頭妹好搗蛋﹑係學校好開心,成日同同學傾計。到 K1,因為轉了國際班,老師話大頭妹唔太明白普通話,英文都只是中遊位置,一度令我好擔心,怕自己揀錯﹗終於到 K2 評估,第一次聽到老師的讚賞,見到大頭妹慢慢的進步真是好開心﹗

今次老師讚大頭妹各方面都表現得不錯,成績上沒有什麼特別要講,堂課都能自己完成。唯一反而是情緒上,有時大頭妹會為好小的事而喊,老師舉例話試過有一次,大頭妹以為自己唔見咗手巾仔,自己坐係位喊,老師問佢咩事又唔講,問咗好耐先知,然後發現條手巾仔其實係裙袋,老師問佢係屋企會唔會都係咁,佢想知係語言問題 (唔係太識講普通話),一或係情緒問題,其實係屋企有時都會,不過就唔經常,主要係怕我鬧。另外,老師話大頭妹食茶點慢﹑寫字慢﹑執書包都慢,放學時成日驚同學走晒,留返自己一個...UM...係架...佢一向好似食咗豬油膏...我一直以為我個人心急覺得佢慢...即是佢原來真是慢...

學校的成績表因為無 GRADING,其實我都唔知點為之好,點為之唔好﹗咁望落都OK嘅﹗



到我做返個小總結啦﹗

先講下英文,睇返今年,英文真是進步咗好多﹗上年老師建議我地每星期一日係屋企都同佢講英文,等佢習慣下講英文,其實...都有做嘅...間中,見佢開頭唔多理我,到依家佢自己玩的時候會自言自語講英文,問佢野都問得頭頭是道。同佢落公園玩,見佢同外籍小朋友玩時,都可以用幾流利的英文溝通,我覺得學英文最緊要夠膽講,夠膽講已經好好多,所以係呢方便我都好滿意架啦。有時同佢行街,見佢識的生字,都會有少少 surprise﹗我估可能是佢鍾意今年個英文老師,而且都上咗成年 phonics,已經學到 level 2啦﹗

中文就日日要寫多一頁生字,學校都是隔日有中文寫字功課,仲要隔行隔格,我覺得唔夠,而且佢寫中文字好無心裝載,呢頭寫完,個頭就唔記得,到依家有時都默寫唔到個 "日" 字,所以我叫佢寫的都是寫簡單的,主要都是練習下筆畫同速度﹗

數學方面,本來打算下學期就上公文數 (即是依家),不過聖誕節時,我買咗幾本數學習作自己教佢,又比我發現竟然教數學最唔洗勞氣﹗不過由於都是主力練寫字,有時間先做數,仲要只要佢話攰我就停,所以一星期都只是做到 2-3 次,有時一頁都分 2次做。暫時學數手指,所以只是計到 5 +5 以內的數,多過 5就唔得架啦,所以最終可能都是要去公文數。

唉...其實每日放工返到屋企都已經 7:00,7:00-8:00 就是做功課時間,8:00-9:00就食飯,之後再要做練習,唔想做練習個日,我就講故事,10:00就開始暗瞓,但通常 11:00都未瞓,都是時候要 tune下個睡眠時間,唔係到小一時就辛苦了﹗


2015年1月21日 星期三

慶祝大頭婆婆生日@海洋公園

2014年1月3日 (星期六)

都有成年幾無去過海洋公園,其實我地屋企留下有直接巴士去,99/77號,半個鐘唔洗就到,所以如果買年票,其實應該買海洋公園,會去的機會大啲﹗不過結婚週年時去迪士尼樂園,已經買咗年票 (銀卡),之後...諗兩諗...又買埋海洋公園的金卡...咁平時請假就去迪士尼,星期六﹑日就去海洋公園﹗諗嘅時候好理想...12月買完迪士尼,快一個月,都仲係一次都未去過﹗然後...依家 2個囡星期六﹑日都上興趣班...其實...邊有時間去海洋公園呢?﹗哈哈﹗算啦...都買咗...

帶小朋友去海洋公園同迪士尼真係好唔同,去海洋公園就睇真動物,其實都好唔錯﹗不過海洋公園真是太大...玩一玩...行的時間真是好長...玩完一日...我要休息 3日﹗

第一站去睇熊貓﹗

hehhe...仲有聖誕節裝飾﹗

大頭妹一見到爆谷就要食﹗結果一睇完熊貓,就坐低休息食爆谷﹗

去海洋公園影吉祥物唔洗排隊就影下啦﹗hehehe...不過當然無同 Mickey Mouse 影咁開心啦﹗

小丸子都仲係驚大公仔﹗要我抱住先肯影﹗

影完鯊魚,仲有鱷魚﹗

之後去睇燈飾﹗

都幾靚吖﹗




次次行香港老大街都好怱忙,下次預少少時間係度食下小食先得﹗唔知好唔好食呢?我見又有雞蛋仔,又有咖哩魚蛋個啲街邊小食﹗真是覺得海洋公園好有生意頭腦﹗


HAHAH...其實今次是小丸子第一次去海洋公園,都是大頭妹同小丸子第一次坐吊車﹗

小丸子就好開心,佢話自己識飛喎﹗

大頭妹...就全程捉住張櫈﹗

見佢個樣...都好似有少少緊張﹗


小丸子話要捉實我同姨姨喎﹗

去到山的另一邊﹗可以睇企鵝啦﹗大頭妹同小丸子都好鍾意企鵝,佢地成日係 YOU TUBE睇一套企鵝的卡通﹗




之後再去睇海獅﹑海豹﹑海象﹗其實...如果唔係有小朋友...我係唔會睇呢啲...不過真是...有時睇下 "真動物" 真是好唔同﹗起碼我依家真是識分,原來佢地 SIZE差好遠架﹗﹗﹗海象是好好好大隻架﹗﹗﹗


已經玩到 3:00,係時候要食 lunch啦﹗大家都好肚餓架啦﹗今次去咗海洋冰室,食物質素ok架﹗不過 service 就...麻麻地...好似係海洋公園的特色?﹗﹗同 Disneyland 好似相反﹗﹗﹗

我地 5個人去到比張 4人枱我地,其實好多吉枱,無卡位,但有大枱嘅﹗叫佢比張 bb 櫈我地,佢一拎埋嚟不停用催速的語氣問 "放邊?放邊?",當時我係 bb 車抱小丸子出嚟,小丸子又瞓咗,已經好 "論盡",好彩岩岩後面有卡位,我地就問可唔可以轉枱...直接解決咗張 BB櫈要放邊的問題。

瑞士汁牛河,又幾好味喎﹗

下午茶: 芝士火腿三文治配薯條,包一杯飲品,好似 $5X,凍飲唔記得加 $8/12,都OK啦﹗個薯條好好味﹗大頭妹都食咗好多﹗




太多人排...無玩﹗

想姨姨抱佢拉住姨姨唔放﹗

最後睇埋鯊魚,就過返去兒童皇國啦﹗




去睇埋盈盈樂樂﹗


有一個好熱心的職員不停同遊客影相,我地都影返張大合照﹗


個熱心職員仲叫我地睇下隻石海龜﹗

HEHEH...小丸子影的﹗



爸爸到啦﹗小丸子...第一件事就是投訴我﹗

因為佢不停踩到我,踩到我對鞋黑晒...話咗佢 2句...佢就投訴我啦﹗

我地入去的時候係 DORAEMON 主題﹗





玩唔到大嘅﹗玩個細嘅﹗








阿旺...唔知點解會覺得 "大雄同静宜" 好浪漫...我地當年結婚花車公仔是 "大雄同静宜"﹗


其實...我好怕佢地入嚟玩公園...山長水又遠去海洋公園玩公園....

玩咗一陣就叫佢地走...

係...小丸子喊梗...因為佢入場時 "中咗棍",打到塊面﹗

工作人員好識做,即送貼紙比佢...即刻無事﹗

最後玩埋木馬就走啦﹗夠鐘食晚餐﹗




哈哈...又買咗年票,希望真是可以多啲入場啦﹗


大家 LIKE咗我地的 FACEBOOK PAGE未呀?未就快啲 LIKE啦﹗


Related Posts Plugin for WordPress, Blogger...