2016年3月30日 星期三

復活節假期@20160328


2016年 3月28日 (星期一)

一連 4日的復活節假期,第一日就去了沙田馬場的 『同心同步同樂日』,第 2﹑3 日都是在興趣班之中渡過,雖然只是跳芭蕾舞 (還有做義工),不過總是好似沒有好好玩一餐,所以假期最後一日,我決定陪女玩﹗

一早 8:30起身,睇優獸大都會早埸﹗故事都唔錯幾好笑,好岩大頭妹睇,因為是講要 "勇於嘗試" (try everything) ,另外都有講 "標籤" 同 "歧視",呢 part 就深少少﹗不過又估唔到小丸子,佢睇到阿力細個比人蝦個時,佢睇到喊呀﹗


睇完戲時間尚早,去鰂魚涌公園玩﹗


玩到 lunch time,又諗唔到煮咩,去太古食上海野﹗

君頤上海小廚 
地址: 太古太古城寶安閣地下G510-511舖
電話: 2568 9989
營業時間: 星期一至日: 11:00-23:00 
openrice: http://www.openrice.com/zh/hongkong/restaurant/%E5%A4%AA%E5%8F%A4-%E5%90%9B%E9%A0%A4%E4%B8%8A%E6%B5%B7%E5%B0%8F%E5%BB%9A/16826?s=3

有個男人好衰囉﹗我見到碟醉雞時問,
我: 有冇雞胸呀?﹗
男: 冇呀﹗(用好可惜的語氣回答)
我: 冇胸未岩你囉﹗(平時我食胸佢唔食胸嘛﹗)
男: 係呀﹗所以我好愛我老婆﹗

醉雞,好味,好夠醉又有雞味﹗

銀絲卷叫比大頭小丸食既﹗
小丸子好好笑,佢食完之後舉手叫侍應叫多啲,侍應無理佢。
之後佢問我,
小: 頭先我食白色個啲叫咩?﹗
我: 銀絲卷
之後小丸子再舉手,同侍應講要多啲銀絲卷﹗哈哈...今次侍應真是問我地係唔係落單﹗


鍋貼,好熱好多肉汁好好味﹗

上海粗炒。

家常薄餅,有少少芝麻,好香口﹗

熱荳漿

食完再去食 yomama,大頭妹小丸子放學成日都扭要食。今日有復活節特別口味,有糯米糍復活兔同朱古力復活蛋﹗

小丸子呢個叫好味樣﹗

大頭妹好少比 good﹗

食食下唔知佢 2個做咩...

YO MAMA
地址: 太古太古城道22號明宮閣地下404號舖
電話: 2547 5333
openrice: http://www.openrice.com/zh/hongkong/restaurant/%E5%A4%AA%E5%8F%A4-yo-mama/48927?tc=sr1

 
大家 like 咗我地個 faceboook page未呀?﹗未就快啲 like啦﹗



2016年3月26日 星期六

香港賽馬會「同心同步同樂日」@20160325



2016年3月25日(星期六)

今日帶大頭小丸去香港賽馬會「同心同步同樂日」,難得有機會可以近距離見到馬,仲可以觀賞馬術示範!小朋友仲有機會嘗試策騎小馬(要預先登記)。好似話呢個活動之後會每年復活節舉行,所以下次要預先登記啦!

哈哈,其實我自己都是第一次去沙田馬場!

一見到粉紅馬,小丸子就話要影相!

Btw,新工人姐姐終於到咗!

去到剛好12:30,驚佢地一玩唔願食,所以食啲小食先!

之後已經急不及待要玩遊戲!

哈哈!玩之前大頭妹唔知有咁高的滑梯,係朋友仔的打氣下,佢最後都有滑落嚟!

明明之前快過妹妹,等到妹妹都爬到上去,佢仲掙扎梗!

最後都快過妹妹少少!

之後去做手工!復活蛋當然最多人揀啦!由於我地想去睇馬術表演,我地揀咗唔洗等既...扇!

好留心聽講!

開始整啦!

阿妹好快手!

係一條粉紅色鯨魚!

之後就去睇馬啦!

好開心呢!

睇完馬都已經3:00,仲唔捨得走,玩多一個game!



日期:2016年3月25-26日
時間:上午10:00 - 晚上7:00
地點:沙田馬場及彭福公園
活動網站:www.hkjc.com/rht 

2016年3月22日 星期二

【$69的扒餐】瑞士冰室@20160305

話說大頭妹跳芭蕾舞個商場有間瑞士冰室,我地成日 break 的時候,都會去食下午茶,有一日比我見到原來佢地有個 $69 的扒餐晚餐,就話搵日要試下啦﹗哈哈﹗真是堅抵食,可能我地自己住個區,食野偏貴啦﹗我家留下的商場...連吉野家都趕走嘛...

講返個 $69的扒餐...真是好抵喎﹗

一樣有羅宋湯,不過個湯偏辣﹗ 

仲有個炸蝦沙律,有冇咁離譜?﹗個沙律仲幾好味﹗蝦就當然唔係新鮮蝦,不過個雜果沙律都幾大份架﹗

登登﹗個扒都唔細份,你問好唔好食...咪正常茶餐龐質素囉﹗個薯角都叫有誠意啦﹗

我點了鐵板餐,$88﹗一樣有湯﹑扒﹑飲品,不過就無炸蝦沙律,變咗普通多士,同埋佢另外可以再配白飯/ 意粉,不另收費﹗


又係偏辣,我估個廚師喜歡辣﹗


大家 like 咗我地個 faceboook page未呀?﹗未就快啲 like啦﹗



2016年3月21日 星期一

大頭小丸 fashion show

最近都去到大減價的尾聲,我通常都會係呢個時間出動,買大少少買定出年的衫,大頭妹大得唔快,通常都無失手,小丸子...就...有時下年拎出嚟,已經唔岩著﹗佢地依家已經一齊著 110-120碼,著 110碼就好 fit 身好靚,120碼就大少少。

heheh...小丸子下個月生日啦﹗襯呢個時間買靚裙仔,原價 $1090,依家 $300咋﹗
老實講...$1090...一定唔會買﹗
最開心係我買的時候係自己去,我估小丸子會鍾意呢條裙,因為係粉紅色,又幾層咁﹗
到我去攞衫時,佢自己行去睇的時候,都是第一時間睇中呢條,攬住話好鍾意﹗
然後大頭妹問佢: 你諗下你自己係 "想要" 定 "需要" 先?﹗
連個店員都忍唔住笑...佢可能心諗...妹妹,你倒米咩?﹗但其實媽媽我已經買咗囉﹗

仲買咗件粉紅色花花外套﹗$150...抵到無朋友...其實我寫既呢刻...都懷疑自己有冇記錯?﹗

另外買咗幾件 causal 少少既比大頭妹,呢件 $180。

呢條都好抵 $130咋﹗是 tunic來的,不是裙。

呢件就留返出年著,但依家都有少少覺得細細地 (好彩話 3月都會凍多次)... $1550 減到 $400,真是好抵囉﹗我成日都話做家姐有著數...當年得一個...我買 Nicholas & Bear 比大頭妹架,折完都 $1600,所以...$400就算啦﹗同自己講...出年一定岩著既﹗


仲有夾綿背心,其實係我自己好鍾意呢個款,同埋呢個桃紅﹗$200...我諗唔到唔買的理由﹗

奶奶話不如買件背心羽絨比家姐,我見之前大頭妹個件都快唔岩著 (又是 Nicholas & Bear),今次呢件買 130碼﹗$280 背心羽絨真是抵啦 (90-120碼只是 $250)﹗小朋友成日跑跑跳跳,鍾意著背心多啲﹗


報告完畢﹗不過真是尾聲啦﹗我出 blog 之時,減價都可能完咗了﹗


大家 like 咗我地個 faceboook page未呀?﹗未就快啲 like啦﹗








2016年3月18日 星期五

善良的大頭妹



呀﹗有一件事要記低佢﹗話說某一個星期六,阿旺要返工,我要帶 2個囡上 4個興趣班,同參加學校運動會﹗全日由 9:30出門口,到最後一堂興趣班落堂是 6:30,返到屋企是 7:30,同我返工差唔多,仲要拖住 2個走來走去﹗中間發生咗一件事﹗

我帶大頭妹上其中一個興趣班的時候,waiting area 有少少玩具比小朋友玩,有個大過大頭妹1-2 年的男仔,先霸住玩具,之後又不停搶大頭妹手的玩具,明明有好多一樣 (飛行機之嘛),佢係要大頭妹手個隻,其實我一向都唔理等佢地自己解決,之後見大頭妹點都唔放,個男仔又點都要搶,我就行過去話: 小朋友,唔可以搶玩具喎...都未講完個小朋友一權打向我塊面,老實講...我真是未遇過呢啲情況,我嘗試搵返佢家長,問咗又無人理,我就叫 centre 的 姨姨啦﹗原來帶佢嘅係個菲律賓工人,係度玩電話,加可能唔想幫佢負責任道歉,所以無理會我,之後個男仔爆喊,呢時我發現個男仔應該是有問題,可能是過度活躍/ 智力問題?﹗我出門口之後,centre 既姨姨都有同我道歉同埋話個男仔係有問題,佢係同妹妹嚟上堂。其實我都無野,係有少少驚,做咗咁多年媽媽,我仍然唔識處理小朋友之間的衝突﹗

我估大頭妹都有嚇親,因為佢過咗好幾個鐘之後先問我: 媽咪,你有冇事呀?﹗頭先個男仔有冇打親你,痛唔痛呀?﹗我話: 我無事。之後佢再話: 好彩佢無打死到 "陳泳三" 咋﹗(原本我自己打到呢度都眼紅紅...但一打 "陳泳三",我自己都忍唔住笑出嚟...我成日諗我到底好唔好同佢講...其實...我冇陳泳三呢?﹗) 

講到呢度,大頭妹自己爆喊,但仲識係褸袋攞手巾仔抹眼淚﹗


連小丸子都比家姐搞到眼紅紅﹗

之後晚飯的時候,大頭妹再問,

大:個男仔打人,係唔係要釘十字架?﹗
我:吓?﹗咁小事就釘十字架?﹗
大:唔係真係釘,即是要佢改過啫﹗
我:咁啦﹗我地不如學寛恕人啦﹗我地幫個男仔祈禱好唔好,希望佢腦仔好返﹑學識控制自己情緒﹑大人會好好照顧佢。
大:好啦﹗我地幫佢祈禱。

後來我先知,原來因為就快復活節,所以學校有講 "釘十字架",嚇得我吖,以為佢幾時咁小氣。

大家 like 咗我地個 faceboook page未呀?﹗未就快啲 like啦﹗

Related Posts Plugin for WordPress, Blogger...