2018年11月12日 星期一

小學生帶飯餸(茄汁豬扒)



繼續星期日的小學生帶飯餸試菜,今次有茄汁豬扒,都是我的拿手小菜之一👍🏻,而且大頭妹特別鍾意食茄汁,所以呢個餸應該都是之後帶飯既大熱菜式。

點知又是小丸子食得多過大頭妹,我成日諗第時到大頭妹帶飯,小丸子應該會好羨慕🤣🤣。

煮茄汁豬扒一點都不難,秘訣是大量茄汁。只需要用少少的豉油﹑糖﹑油和水醃豬扒,煎香之後加大量的茄汁和適量的糖就可以啦﹗又方便又美味,大家都試下啦﹗ 

今晚仲煮咗螺片豆苗。

滾多個蕃茄薯仔湯,以前同旺仔二人世界,我都成日煲呢個湯。


是日早餐:腸仔腌列、蘋果、提子啫喱。


兩個乖乖食晒!


2018年11月10日 星期六

大頭小丸初試蓮香樓



某星期日早上要返學校做少少野,之後去食蓮香樓,好似話就快拆啦,帶大頭小丸去睇下見識下香港嘅舊式茶樓。其實都仲有另一個原因,就係我以前做產檢,就係喺附近,有時做完產檢,都會去食蓮香樓或者勝香園,不過星期日勝香園唔開,所以就揀咗去蓮香樓。

一去到⋯大頭妹就扁晒咀!怕污糟嘅佢,個樣好似想死,通常一見到佢呢個樣,平時好好脾氣嘅阿旺,就會好嬲。我哋個代小朋友,有得出街食就好開心,點會嫌三嫌四吖!


小丸子有得食,就唔係好計較地方嘅,最緊要啲嘢好味。


今日星期日,人客好多,好明顯廚房都做唔切野,野食出得好慢,每次有點心車出嚟,個個都沖曬出去,一陣就咩都冇晒啦!

鵪春蛋燒賣,次次都會食!


好味!


小丸子一個人食咗三粒。


阿旺最鍾意食呢啲傳統點心,而家新式嘅酒樓都唔會有啦!


啲碟麻麻哋!


鳳爪好味。


見到最愛嘅馬拉糕終於有返笑容!


搶啊搶啊搶啊!


以前就係呢度做產檢啦!大頭妹好得意,問我佢係咪嚟過,上次經過贊育,佢又係咁問!🤔🤔


兩個追白鴿!


蓮香樓
地址:中環威靈頓街160號 
電話:25444566
OpenRice: https://s.openrice.com/QrKS0J0S000

2018年11月5日 星期一

小學生帶飯餸 (金菇牛肉卷)

 

繼續我的星期日大頭妹帶飯餸測試,金菇牛肉卷其實係我的拿手小菜👍🏼👍🏼,今次我不惜工本,係Apita 買咗日本和牛嚟做呢個金菇牛肉卷,基本上好難唔好食🤣!無辦法,我要大頭一食就覺得好好味,所以材料是非常重要!今次大頭妹一食就同我講我煮得好味過出而餐廳,哈哈,梗係啦!出面餐廳無可能用和牛啦!

我煮金菇牛肉卷,會先煮熟金菇再卷,呢個步驟非常重要,我講到幾好味都無用,都是賣花讚花香,大家自己試試就知!我意思自己試下煮!



金菇牛肉卷
材料:
肥牛 8片
金菇 2包 (上圖用一包,所以好細卷)

調味1:
水、豉油、糖、(鏗魚湯粉) 各適量

調味2:
水、豉油、糖、(酒、味醂) 各適量
*( )內為optional,屋企有就放,無都唔洗專登買,放咗當然風味更佳!

做法:
1. 肥牛先灑上少少鹽和胡椒粉備用,
2. 先煮滾調味料1,加入金菇煮至軟身,
3. 肥牛灑上少少生粉,卷起金菇,
4. 平底鍋加油,先煎肥牛開口的一邊,再反而煎另一邊,
5. 加入調味料2,煮至醬汁狀,中間可能要先盛起牛肉卷以免牛肉煮得過熟,將汁淋上面。! 

*因為肥牛已加生粉,所以煮調味2時未必要加生粉,如喜歡個汁杰身啲,就加返少少生粉水!
Related Posts Plugin for WordPress, Blogger...