2018年6月27日 星期三

考試後的二人世界【Chelsea Garden & Restaurant】



呵呵呵﹗考試後阿旺又話帶我去食好野,浪漫一下﹗畢竟就算有小朋友,其實兩夫婦都要有自己的生活,我成日都會提住自己,小朋友大咗會有自己的世界,太過以小朋友為中心,老咗會好寂寞,所以唔可以忽略另一半呢﹗當小朋友上小學之後,要過二人世界,好似總是要等考試之後。大頭妹大考過後,終於可以輕鬆返 2個月個,9月開學再努力過,今年9月仲有小丸子加入戰團,相信到時會更加忙﹗

今次揀咗阿旺公司附近 UQ PLACE 的 【Chelsea Garden & Restaurant】,佢地有2款晚市套餐,我同阿旺分別點了$278和$368的套餐比較下,$278套餐有沙律/頭盤/ 餐湯 (3揀1) 和主菜, $368套餐有頭盤、餐湯、主菜、甜品/ 餐酒。每款都有3款主菜揀,我地2個牛魔王都揀咗牛,另外 2款是魚﹑豬,一定有一款岩心水﹗唔揀套餐,其實都仲有好幾款海鮮拼盤,主餐牌都有西班牙炒飯﹑羊鞍可以選擇﹗



難得 2人世界,我點咗杯 mocktail Chelsea Punch,味道有少少似 fruit punch。


阿旺點了Fuzzy Navel,阿旺話佢鍾意呢杯橙味比較重,無咁甜﹗


我點了 $278 的套餐,有沙律/ 頭盤/ 湯,同主菜﹗頭盤我揀咗脆柏爾瑪火腿配羅馬甜瓜,火腿是炸過的,少少脆身十分香口﹗


燒熊本霜降西冷配濃牛肉汁﹗牛扒煎得剛剛好,配菜亦十分豐富,有薯仔﹑西蘭芯﹑椰菜花﹑青瓜﹑茄子﹗


阿旺點了 $368的套餐,頭盤有蟹肉青蘋果啫喱,味道好清新﹗


是日餐湯是南瓜湯﹗


燒美國牛柳配芥末籽牛油蛋黃醬,牛扒的分量反而比 $278 的餐為細,美國牛的肉味比較濃,以燒的方式來煮,肉味特別濃郁﹗


阿旺點的餐可以揀甜品/ 餐酒,我地揀咗甜品是藍莓芝士蛋糕,呵呵呵,食西餐果然是要食埋個甜品先圓滿﹗


都有好多唔同的海鮮拼盤,下次可以試下﹗


店子少少,不過空間充足,枱與枱的距離不會太近,大家都可以靜靜咁傾下計!


有一個小露台,出來飲杯都幾寫意﹗


用匯豐銀行信用卡,主餐牌有 88折﹗


餐牌






CHELSEA
地址: 佐敦柯士甸道7號UQ Place 4樓
電話: 39740822
Openrice: https://www.openrice.com/zh/hongkong/r-chelsea-garden-restaurant-%E4%BD%90%E6%95%A6-%E5%9C%B0%E4%B8%AD%E6%B5%B7%E8%8F%9C-r526306

2018年6月16日 星期六

復活節 3日 2夜廣州長隆之旅【長隆熊貓酒店】



復活節前同國皇之家即興約去【長隆野生動物世界】,其實之前都講過幾次,不過之前我地無回鄉證,今次終於成事啦﹗

之前係長隆 FACEBOOK PAGE 睇到有啲 PROMOTION,所以我地今次都係直接係官網訂。返大陸短線嚟講,其實去【長隆旅遊渡假區】都算幾貴,我地住【長隆熊貓酒店】,第一晚是星期六,房價比平時貴,大約是HK$1300,第二晚買了雙遊園套票,我地揀咗動物園同馬戲表演,大約是 HK$2800 (三人),套票只包 2大 1小,另加 1 SET 小童就要大約 $850。加上直通火車票,大人 $210,小童 $105,一家四口來回就是$1260。總數 $6210。

我地一早坐 9:20的火車上廣州,去到大約是 11:30,先去MANDY一早BOOK定的【炳勝】,1:00去到,好多出名的菜式已經售罄...果然厲害﹗午餐之後我地就分道揚鑣,MANDY一家約了廣州的朋友,我地就出發去【長隆熊貓酒店】,我地都是第一次自己係廣州坐地鐵,120CM 以下係免費,入閘行李包包都要過 X-RAY,而且有好多售票機是用支付寶/ WECHAT PAY,我地真是好似『大鄉里出城』咁﹗



坐到去長隆站,E出口一出就是穿梭巴士站啦﹗提提大家可以係地鐵站內的 7-11買定零食同飲品,比園區內選擇多,而且平一半有多﹗我地咁『精明』,當然是入到酒店先買啦﹗


小朋友一見到間酒店的外觀已經好興奮﹗




酒店大堂都好大﹗


仲有孔雀睇﹗


入到酒店房就更加興奮啦﹗我本身 BOOK了『帥帥房』 (6/F 以下),CHECK IN時職員見我地 2個都是女仔,就轉了『萌萌房』比我地,比小丸子恨到啦﹗


裝修係好有特色既﹗








房間沒有浴缸,不過我見如果帶BB,都可以問佢地借BB浴盆。


女孩子的樓層,連走廊都是粉紅色﹗


每層都有自動售賣機,不過又是要用支付寶/ WECHAT PAY﹗即是有得睇,無得食﹗


酒店地下都有間便利店,不過選擇就唔太多,而且比出面貴得多,但有總好過無﹗






便利店對面就有一間 CAFE,有少少兒童遊樂設施,我影晒架啦,就是一眼見咁多,不過買支水買個包,都可以入嚟玩既。


岩晒啲無時無刻都要打機的爸爸﹗


另一邊就有一間 SHOP,勁多玩具呀﹗






老實說...比起澳門的酒店,酒店內的玩樂設施真是唔多,連游泳池都無,真是玩的地方就是一間 KARAOKE 房,仲有少少夾公仔的機﹗


唔好比佢個樣呃到,其實我無入錢 (又是要 WECHAT PAY),無音樂既,佢自己清唱容祖兒﹗


總括而言,我個人覺得比起澳門的 5星酒店,內部裝修﹑設置﹑配套都無得比,不過小朋友就一定開心,而且酒店的 MARKETING 做得好好,佢地有成套『帥酷萌』熊貓三胞胎的卡通,小朋友睇得開心,住的時候都特別投入﹗最好笑是走的時間大頭妹問我點訂酒,佢話佢想想嚟住,不過我同佢講過,去旅行好多地方只會去一次,下次就未必會再去,所以佢就打算自己訂啦﹗

港鐵直通車: https://www.it3.mtr.com.hk/b2c/frmFareGuangdong.asp?strLang=Big5
長隆渡假區 (FACEBOOK): https://www.facebook.com/chimelong/
長隆渡假區(官網): http://int.chimelong.com/zh_HK/

2018年6月9日 星期六

迪士尼主題派對同樂日



每個父母都希望為自己小朋友準備一個既開心又難忘既生日會!當然每個家庭,小朋友都唔同,有啲人鍾意簡簡單單係屋企同屋企人食餐飯,有啲人就鍾意大排筵席宴請朋友!如果可以喺香港迪士尼樂園酒店宴會廳舉行生日派對,我相信一定是一個奇妙難忘嘅生日會!
今日帶大頭妹,小丸子參加【迪士尼主題派對同樂日】,感受一下係迪士尼酒店宴會廳舉行生日會既氣氛!唔單止可以同迪士尼朋友和公主會面,仲有迪士尼特色buffet,同迪士尼主題生日蛋糕!餘興節目有精彩搞笑既魔術表演、氣球師會用氣球扭出趣緻迪士尼人物,仲有迪士尼造型彈床比小朋友盡情放電!

Cinderella Ballroom華麗的佈置,加上大型螢光幕!


Snow White Ballroom入面是女孩子最愛的Frozen主題,變身做 Elsa Anna Ballroom!


一去到宴會廳外,就有綿花糖同爆谷等小朋友!


Buffet的食物亦有好多選擇!

頭盤有沙律﹑什果沙律﹑米奇做形三文治﹑壽司﹑波蘿腸仔﹗全部都是小朋友的最愛﹗


熱食的選擇都好豐富,米奇頭 PIZZA...真是唔捨得食呀﹗


甜品就更加唔洗講﹗選擇又多又靚﹗真是唔知點揀好﹗


仲有小朋友最鍾意既朱古力噴泉﹗


大頭妹同小丸子都食得好開心﹗




食 BUFFET 的時間,氣球師就出場啦﹗三兩下手勢就扭出靚靚公主氣球﹗


另一邊仲有彩繪師幫小朋友畫靚靚﹗


個花係小丸子自己揀...有時...我自己是阿媽都覺得有少少頂佢唔順﹗


大頭妹唔想畫面,畫咗 CHIP 係手﹗


魔術表演好精彩,全場小朋友竟然可以坐定定睇﹗阿媽就把握時間食野啦﹗


小朋友最最最興奮的時刻當然就是同 ELSA ANNA 見面啦﹗


男孩子的家長都唔洗擔心,仲有巴斯光年同胡迪﹗


個 TOY STORY 蛋糕真是好靚,唔好話小朋友,我都好想我生日時有個咁靚既生日蛋糕﹗



食飽飽又影晒相,可以放佢地出去玩跳彈床啦﹗


打卡位...我地又點會錯過﹗




Related Posts Plugin for WordPress, Blogger...