2012年6月29日 星期五

牛扒綠茶冷麵



上星期四就夏至啦﹗即是夏天已經到啦﹗其實我覺得到咗好耐,依家湊兩個寶貝,日日全天后開冷氣,大頭妹好怕熱,唔開冷氣會成頭汗,成個乞兒囡咁﹗小丸子呢....就唔開冷氣唔瞓﹗巴閉﹗唉...未收到今個月的電費單...相信都會非常 "甘" ﹗

一到夏天我好鍾意煮冷麵,因為又簡單﹑又快﹑又好味﹗

綠茶冷麵,煮4分鐘,之後浸冰水﹗
3

阿旺煎的牛扒...真係好生﹗吉之島做梗DISCOUNT,$108/2 PACKS,呢度係1 PACK,即是2塊西冷﹗
 
完成啦﹗好味過好多餐廳架﹗

自制冷麵汁

HEHEHE...落勁多紫菜同木魚絲﹗

2012年6月27日 星期三

NATTO & KORI


上星期四約了由美國返嚟的小娜執媽一家食飯,上年都只是6個人,今年就已經是8個人啦﹗HEHEHE...我地都好有 "效率" ﹗今次晚飯的地點是 "那霸",一直都好想試,標榜食沖繩菜,不過好似同一般日本料理差不多﹗

上一次NATTO同大頭妹太細未識玩,今次就唔同啦﹗全餐飯 NATTO做咩,大頭妹又跟住做,又一齊玩NATTO的車車﹗我地大人就冇啖好食。其實都有少少唔知自己食緊咩﹗KORI妹妹就好乖,全程望住媽媽食飯﹗小丸子呢...就加餸囉...中途開大﹗爸爸要幫佢換片﹗

我同阿旺都是第一次,2個大拖2個細出街食晚飯﹗真是好大挑戰﹗


KORI妹妹好可愛呢﹗


點了4人餐,不過份量比較細﹗

三色刺身好新鮮

加州卷好味﹗

沙律點了 "海葡萄",唔係唔似食沖繩菜嘛﹗

仲有呢個...沖繩苦瓜炒豚肉﹗

天婦羅好味﹗

照燒牛...普通...

野菜煱...普通

甜品芒果芝士蛋糕

2012年6月26日 星期二

今晚食乜餸



人姐姐走咗之後,我又出山煮晚飯啦!
好耐都冇出blog的靚老婆入得廚房,終於重見天日!哈哈!
依家一星期都會煮三晚,間中一餐買外賣,主要是阿旺唔想洗碗。

其實我幾享受冇工人的日子,
起碼我知大頭妹每日食過咩,食咗幾多。
我老公啲底底好舊,是時候買新的比佢。
仲有就是間屋比之前乾淨咗!
XO醬炒翠玉瓜...好彩都有當年的水準,阿旺話好好味﹗

焗南乳雞翼好好味﹗噚晚食煎的VERSION仲好味﹗

炒菜心...原來看似最簡單,我幾乎唔記得點炒菜﹗

烚菜...

黑椒牛柳好好味﹗餸飯一流﹗

魚片炒烏東,本身是打算用火腿的...結果阿旺買完魚片,唔記得買火腿...HEHEHEH...


食譜後補...
仲有菜飯的食譜...
上次有BLOG友問,我會補返的﹗
總之有拖冇欠啦﹗HEHEHEH﹗

2012年6月25日 星期一

小丸子2個月健康院檢查﹗



小丸子2個月啦﹗有小朋友的時間真是過得特別快,好似岩岩先睇住大頭妹大,依家就到小丸子啦﹗

上星期四帶小丸子去健康院打針,首先磅重,佢依家5.46KG (75%),身長57CM (50%),頭圍39CM (50%),已經由10%線追到去75%線,未係家長的可能唔明,即是由 "加細碼B" 變成"中大碼B"﹗HEHEHE...真是好有滿足感﹗

之 後見護士,同小丸子做簡單的測試,睇下佢會唔會眼仔追移動的物件同聽聲,結果唔知係唔係小丸子岩岩食完奶奶迷迷糊糊,兩樣都唔做。護士問我平時有冇同小丸 子玩...又真是冇囉...日頭平時餵完奶,佢通常就瞓,夜晚佢就會清醒啲,咁我又冇理由三更半夜同佢玩架?﹗不過真是要同小丸子玩多啲﹗岩岩先講完 "第2胎當豬養" ﹗

之後見醫生,醫生都有問下小丸子食奶的情況,其實依家主要都是媽媽奶,再加一餐奶粉 (大約4 OZ),醫生話BB一般一個月重0.5 - 1KG,小丸子就重咗 1.5KG﹗

今次小丸子2個月先同佢玩 "抬起我的大頭來" ﹗

仲未識啦﹗仲發惡添呀﹗

HEHEHE...好似一條蟲仔咁﹗


大頭妹都是2個月的時候就識架啦﹗因為我係佢一個月半月的時候,就開始返轉同佢玩嘛﹗

2012年6月21日 星期四

姨姨生日的星期日



上上星期日是二妹生日,加上小丸子出世之後,都未返過媽咪屋企,所以就決定返去,順便拜公公同太嫲。
不過其實主要都是想帶大頭妹去媽咪屋企留下個泳池游水。
上年到季尾先記得媽咪屋企留下有泳池,仲要係係正媽咪個座的留下。
咁游完就可以返屋企沖熱水涼啦
今次大頭妹玩得好開心,佢返上嚟見到我,即刻同我講 "玩水水好開心﹗" 。

仲有就是要食 "炸芋頭" ,我媽咪煮的炸芋頭,是世界上最好食的﹗﹗﹗
仲有仲有...就是菜飯﹗﹗﹗
我屋企個電飯煲太細,所以就算媽咪個個星期六日都嚟,都煮唔到菜飯。

一朝早...阿旺就遇到一個 "小祈福黨"


將佢啲錢丟落垃圾桶﹗﹗﹗


大頭妹: 我地全家都好幸福喎﹗

去到媽咪屋企,預備去游水啦﹗

掃風...

姨姨的生日蛋糕﹗

晚餐有冬菇海參花膠﹗

仲有菜飯﹗﹗﹗真是好好好好好味﹗

2012年6月20日 星期三

老爺奶奶結婚38週年暨父親節晚飯



上星期五是老爺同奶奶結婚 38週年,我地出去食飯慶祝。
老爺奶奶好恩愛,而且家庭觀念好重,
所以我阿旺咁乖仔,都是多得老爺奶奶呢對好榜樣﹗

HEHE...星期日我都無同阿旺慶祝父親節,
我順便...當同阿旺慶祝父親節架啦﹗﹗﹗


酒樓的食物...都係個啲啦﹗唔多講啦﹗










38年

阿旺負責切蛋糕

大頭妹好乖...佢竟然自動自覺幫手攞碟﹗


佢好小心架﹗用2隻手拎碟﹗

交隻碟比爸爸。

八八封封咁樣﹗

派晒啦﹗
Related Posts Plugin for WordPress, Blogger...