2013年8月30日 星期五

一星期返工 LOOK﹗

最近買咗少少新衫,因為 summer sale就快完,呢啲時間買衫,如果睇得岩,又有 size,真係平到笑﹗﹗﹗以前...可能又後生啲又瘦啲,同一件衫有 2個款,我一定係著白靚啲﹗依家要向現實低頭...買黑色
TOP: TOUP A COUP
DRESS: TOUP A COUP

覺得層黑紗紗好靚,好似 $200咋﹗

件 TOP個袖的 DETAILS位好靚,最仲要係由 $7XX減到 $2XX﹗

係 APITA入面買,買 2件就全單 50% OFF﹗真係好抵,條裙 AROUND $320﹗


HEHEHEH...係 FACEBOOK PAGE 冇 POST出嚟,其實想影比大家睇我對手臂,阿旺話我越來越似 "荀芸慧" ...對手臂...HEHEHEH...佢就想呀...似荀芸慧﹗


呢條影唔到啲暗花,真身都幾靚下 (我講條裙),我個日著,老闆都有讚我著得靚﹗


佢後面有斗篷架﹗又是 $2XX,係唔係唔買對唔住自己呢﹗

2013年8月29日 星期四

小丸子 16個月成長誌

今個月的成長誌又遲咗,我成日都覺得我花唔夠時間係小丸子身上﹗不過其實諗深一層,我的確無可能可以花同大頭妹同期的時間係小丸子身上,以前得一個,依家有兩個,除非我唔理大頭妹啫﹗
今個月無上磅,之前係婆婆屋企磅過一次,已經有 30磅,上次去 WE嘩﹗充氣嘉年華的時間度過高,有 80CM啦﹗其實佢坐係大頭妹旁邊,真是好似仲大舊過大頭妹﹗企係度的時間就明顯矮啲囉﹗


16個月的小丸子講多好多野,我地同佢講完佢會跟我地講一次,尤其是要食的時候,不過發音當然唔準確啦﹗
CAKE/ TEA/ MILK/ 糕糕/ CHEESE都識講,另外仲有抱抱/ 地地/ 街街,每日返屋企就叫我抱抱,又會拖我去門口叫我去街街﹗

認知能力都唔錯,基本上已經明白我地大人講咩,叫佢掉垃圾/ 比返個奶樽工人姐姐(基本上會自動自覺做)/ 出街自己去攞鞋...

食野方面,HEHEHEH...第2個真係無第一個咁緊張,除咗汽水/ 花生,平時我食咩,佢問我要,我都幾乎會比佢食﹗有時晚餐唔肯食粥,就埋枱同我地一齊食飯囉﹗

睇佢個狼胎樣﹗




識自己 "MEET" 包包食﹗


下個月開始,小丸子會一星期上 2日 playgroup啦﹗星期六﹑日都要上 playgroup﹗希望佢唔會覺得辛苦啦 (又希望我唔會覺得辛苦啦)﹗因為一早已經幫小丸子報了一間區內的幼稚園 playgroup,好平 $650一個月/ 4堂 (不過有假期/ 打風就無得補堂),一堂是 2小時,有茶點食,我覺得幾好,但我又唔捨得 KIDS SQUARE嘅 MS. HO,所以就兩邊都一齊上囉﹗下星期就上第一堂,都真是要睇睇環境,一堂是星期六 9:30,一堂是星期日 10:00,但是係灣仔,真是星期六日想瞓晏少少都唔得﹗﹗﹗

2013年8月28日 星期三

冬瓜枝竹炆火腩 (附有圖食譜)



上星期日又親自下廚,今次煮的是冬瓜枝竹炆火腩﹗其實我好鍾意食冬瓜炆火腩,冬瓜吸收晒燒肉的味,真是好好味架﹗之不過燒肉太貴啦,我唔會專登買燒肉返嚟煮呢個餸囉﹗﹗﹗多得有個 "眼闊肚窄" 的大嘥鬼 (即是阿旺),佢放學返屋企食公仔麵都要去百佳買 2  包燒味 (其實1 包都夠啦﹗仲要買齊燒肉同油雞,所以佢讀書之後又肥返),我有機會煮呢個餸啦﹗﹗﹗

冬瓜炆火腩

材料: 冬瓜 1圈/ 燒肉 (老公食剩幾多就幾多啦﹗今次仲有油雞)/ 枝竹 半包
/ 蒜頭 2-3辮

調味: 豉油 少少 (今次我用新出的李錦記金豉油,promoter話少咸)/ 糖 少少

做法:

1. 燒熱油,加入蒜頭,開始有蒜味就可以加入燒肉。

2. 加入冬瓜 。

3. 加入調味料。

4. 加入枝竹略炒,加入適量的水 (大約一半,唔洗完全蓋過材料,因為冬瓜會出水,而且枝竹同冬瓜都唔洗炆太耐)。

5. 完成可以轉去LE CREUSET
,方面食之前再加熱,上枱又美觀,又保溫﹗


完成﹗最後比我地清晒﹗咁就無做大
嘥鬼啦﹗

2013年8月27日 星期二

大頭妹第一次睇音樂劇@《百老匯星 SING聲》



上個星期四,帶大頭妹去欣賞 「樂之優兒」的暑期音樂劇《百老匯星SING聲》,可能大家未必認識
樂之優兒,不過相信大家一定會認識 HARRY哥哥。是呀﹗就是我地 7-80後兒童節目主持的 HARRY哥哥啦﹗他就是今次音樂劇的總監﹗

不出我所料,大頭妹真的十分喜歡音樂劇,全程都睇得好投入,去到中段年紀較細的小朋友入後台休息的時候,佢仲喊起上嚟,佢以為小朋友唔見咗,真是好可愛﹗
其實唔止大頭妹,我都覺得好精彩,60位小朋友,訓練了 6星期,其中好多都只是大頭妹的年紀,真是十分佩服﹗哈哈哈...有時我要 "控制" 我兩個囡都唔易,單單要大頭妹企定定/ 坐定定 (即是聽指令啦),都有一定的難度 (要控制小丸子更加是無可能),仲要是一大班 3-5歲的小朋友 (主要成員當然是大個少少的小朋友啦),要訓練佢地一邊唱歌﹑一邊跳舞,我相信導師同小朋友都下了不少苦功﹗
HHEHEHEH...大頭妹第一次睇音樂劇好興奮呢﹗


地點是柴灣青年廣場的 Y-THEATRE,全場爆滿呀﹗



睇下大頭妹笑得幾開心﹗﹗


小朋友出場啦﹗


我仲未有睇自己小朋友上台的經驗,不過我估如果見到自己小朋友上堂表演,一定會好感動﹗



我覺得呢場好得意﹗


睇下大頭妹睇得幾投入﹗

中間仲加插芭蕾舞表演﹗



5歲的CELINE 唱 "POWER OF LOVE" 真是充滿 POWER的聲線﹗


最後全場換上金色的舞衣﹗

當然唔少得有 HARRY哥哥出場啦﹗


唔知係唔係長期身處係小朋友的世界,我覺得 HARRY哥哥保養得好好呀﹗﹗


過了一個好精彩又開心的晚上﹗


想認識多啲樂之優兒,可以去佢地的網頁睇睇﹗
FACEBOOK PAGE: www.facebook.com/LZYEHK
網址:
www.LZYE.com

2013年8月26日 星期一

生日飯@生記海鮮飯店

哈哈哈...8月尾仲寫生日飯,無辦法,我的同學們真是太忙啦﹗7﹑8月生日之星一齊慶祝,約來約去...最後都仲有一個 8月之星無法出席﹗今次我地去灣仔的生記﹗點了鹽焗雞﹑菠蘿咕嚕肉﹑豬潤莧菜﹑蓮藕餅﹑泥鯭粥﹑菜心炒牛肉﹑紅燒豆腐﹑椒鹽鮮魷。推介鹽焗雞﹑菠羅咕嚕肉﹑蓮藕餅﹗真是好好味﹗小丸子自己一個食了一整塊蓮藕餅呢個小朋友點解喊得咁可憐?因為唔比妹妹坐 bb車囉﹗其實我已經事先 5:00幾的時候打返屋企同佢講,一陣帶佢同妹妹一齊出去食飯,要比妹妹坐 bb車,佢要自己行,媽媽先可以帶晒 2個出街。可惜出門口的時候,一樣喊住話要坐車,話唔帶妹妹去﹗上到地鐡都仲唔順氣﹗唔順氣都無辦法,我唔會因為咁而掉低阿妹嘅,呢個是媽媽的公平原則﹗﹗﹗


我覺得好好味﹗可能好耐無食過,以前好似一定要訂位的時候訂定先有得食﹗下次要同阿旺去食先得﹗

以前食又唔覺得好好味,今次食覺得好好味呢﹗我成日覺得生完大頭妹同小丸子之後,口味同以前唔同咗?﹗大家有冇呢個感覺?﹗唔只陀的時候,生完都會唔同咗﹗真是好奇怪﹗

豬潤莧菜菠羅咕嚕肉,其實好好味,不過因為唔係用新鮮波菠蘿,要扣分﹗

菜心炒牛肉

紅燒豆腐,豆腐好滑,好好味,小丸子都食咗好多﹗

椒鹽鮮魷...上枱的時候...大家都呆一呆,好細碟﹗

未開飯之前,小丸子自己扮食﹗


睇佢食得幾滋味﹗其實...佢隻匙
羹咩都無﹗﹗﹗得佢自己的口水﹗﹗﹗


帶晒筷子/ 口水肩比呢個小朋友...佢咩都無食過﹗


生記海鮮飯店
灣仔軒尼詩道 107-115號 2-3樓
電話: 25752239/ 25752236
http://www.openrice.com/restaurant/sr2.htm?shopid=3024






2013年8月23日 星期五

大頭妹 39個月成長誌

 


大頭妹 39個月啦﹗今個月 K1開學,暫時見佢都幾鍾意返學,又鍾意做功課﹗不過都仲係唔係幾講到學校發生的事比我知﹗見佢有時係屋企會扮老師,叫阿妹讀 ABC,又叫阿妹讀大聲啲,阿妹邊度識吖,之後自己又好激氣,向我投訴阿妹﹗

最近增肥好似有少少成績啦﹗都有 29-30磅,大約 95CM高。唔鍾意人地話佢瘦,成日自己話自己肥,妹妹瘦﹗又話自己 LONGER (應該係 TALLER)﹗

今個月最叻嘅係學識自己刷牙,唔洗人幫的情況下自己完成整個刷牙的程序,哈哈哈,講到好似好複雜咁﹗不過對小朋友來講真是有少少難度,我都TRAIN咗大頭妹一個星期,佢先自己記得同掌握到﹗

不過最最最令人擔心的是仲未戒食手指,放暑假的時候,可能太無聊,仲食多咗

HEHEHE...行行下街有 "奶咀" 糖派 (其實是 "戒指糖" )。

無咩運動細胞﹗

K1想安排多一樣課外活動比佢,不過仲未諗到,要 4歲先可以學樂器,或者襯4歲前上下畫畫班都好喎﹗

Related Posts Plugin for WordPress, Blogger...