2017年11月30日 星期四

20171126@鰂魚涌公園/ Spaghetti House/ 太古城中心



2017年 11月26日(星期日)

考完試的星期日,當然要去公園玩下啦!盡管成績未去到媽媽心目中的理想,呵呵呵,媽咪的要求好高﹗不過我都明盡咗力就足夠,大頭妹溫書都好合作,其實都唔洗我點勞氣,我估計到小丸子讀小學時,我就會知我依家係好幸福了﹗

去完公園,我地去咗 Spaghetti House食芝士火鍋,比大頭妹激死,我地之前未去過 Spaghetti House,去未去過既餐廳,佢去到門口就話唔好,試都唔肯試,我拿了餐牌慢慢講比佢聽會食咩,佢先勉強話試下﹗如果問大頭妹,佢又會帶我去 FOOD COURT 食烏東﹗

食飽飽去行下太古城的聖誕節攤位,今年整得好靚,除咗好多影相位,仲有大型滑梯比小朋友玩﹗

最近沉迷星球的大頭妹,去到公園都要繼續睇星球!


其實每次去到公園,我都會有一個感覺『一樣米養百樣人』,真是好多奇怪的家長,見到有小朋友追住自己家長踢?﹗家長唔教?﹗仲要好似求個小朋友唔好再踢?﹗其實我理解唔到成件事,可能我唔知事實的全部啦﹗不過見到有呢啲小朋友,我就一定睇實自己兩個小朋友﹗


玩到 6:00,就去 Spaghetti House食晚餐,結果都要等 45分鐘枱﹗今次專登去試芝士火鍋,想試好耐啦﹗點了 $398 的 SET﹗有生果 + COLD CUT + CHEESE的頭盤,NEW ZEALAND牛肉片,芝士火鍋配料 (大),都算好豐富,我覺得都足夠 2大 2小食/ 3個大人食﹗

頭盤




真是好豐富﹗


之前又話唔試,試完話好好味﹗


小丸子又係由頭食到尾啦﹗


飲品有買一送一都幾抵,特飲是 $40/杯,買一送一即是 $20/杯,仲要有一球 HD 雪糕﹗




點之前已經問咗檸檬茶有冇買一送一,點知單嚟到又無囉﹗問店員,店員話買一送一只可以用一次?﹗但點解落單時又唔提顧客?﹗不過算啦﹗對香港餐廳的服務無咩期望,唔想為幾十蚊影響自己心情﹗





玩完滑梯好開心﹗




今年啲影相位真是幾靚呀﹗


2017年11月29日 星期三

20171125@與婆婆午餐「南小館」



2017年11月25日 (星期六)

今日婆婆過來太古探我地,一齊落樓下的南小館吃午餐!南小館都開了一個月有多,不過因為限時90分鐘,所以我地之前都沒有去試,好怕食到趕頭趕命!尤其帶住小朋友,又限時,我地大人即是唔洗食!

今日星期六中午沒有太多人,相信價錢略貴是因素之一,每人茶錢就已經$9/位,又不是飲茶的地方,前菜就$15,即是我地 2大2小坐低就已經 $51?!仲未計加一!食物本身就唔太貴,我地點了上海粗炒、小籠包、手抓餅、銀絲卷,埋單$200幾。

我地點了菜未到,小丸子望住隔離枱籠銀絲卷流口水🤤🤤🤤!問我地有冇叫銀絲卷?!


前菜 $15。

上海粗炒 $68,比較深色,應該放了很多老抽去炒。


手抓餅 $32,兩個女都話有少少油!


小籠包 $48,味道還可以,但皮有點厚。


銀絲卷 $22,細得可憐,味道唔知,比大頭小丸殲滅咗!










影埋菜單比大家睇下!講真食物唔貴,只是茶錢貴,有點唔抵!


2017年11月28日 星期二

靚媽週記【Addiction聖誕節彩妝套裝】



我一向對聖誕節套裝既抵抗能力都好弱🤣!明明屋企有大把,但每年都會忍唔住買😌,今年就買了 Addiction的聖誕套裝,想試 Addiction 好耐啦!

今次的聖誕節彩妝套裝💄,有一盒 4色眼影加highlight,唇彩,甲油($500)。眼影/ Highlight 顏色無得轉,不過可以自己另外買胭脂,職員會幫手轉。我無買胭脂,但就另外再買再支胭脂水($195)。


其實上網睇時,我以為是胭脂,咁好方便我細細盒帶去旅行/ 帶出街補妝,但原來是粉紅色閃閃highlight。


因為唇彩是無色既,我on top 再用了紅色,iope (no.18)。


眼影我用「左上」粉紅色打底,再用「右下」深啡搽雙眼皮位置,之後用「右上」金色blend返開,最後就用「左下」閃閃搽下眼線位。


完成啦!


哈哈!小丸子都試咗!

指甲油都即刻試咗,我好鍾意隻色,係深紫紅!


2017年11月23日 星期四

20171123@太空館「與星同源」



2017年11月24日 (星期四)
今日大頭妹考完試,放假一天,我都請咗假陪佢,其實學校的安排幾好,考一日放一日,所以考試週就是4日,佢考試前話頸痛,唔知係咪太緊張,本來今日帶佢去睇醫生,考完就話唔痛,哈哈,所以就可以盡情去玩啦!
雖然考完試,但一朝早仍然要補習,補完就出去同爸爸食lunch!去食爸爸平時lunch time常去的「德美」,尤於爸爸成日講到好正,我期望太高,今次食覺得都唔錯,又唔係超正,不過價錢都好合理,大部分的set都是約$100內!

食飽飽去太空館睇「與星同源」,成 20幾 30年未去過太空館,對上一次去係自己小學,唔記得幾年級﹗大頭妹最近迷上八大行星,成日叫我上網睇下邊個行星有 moon,邊個大邊個細,帶佢去太空館自己睇啦﹗阿旺問係咪我地細個睇個啲,依家係3D架!我覺得都幾值得睇!我依家先知中學讀 chemistry 個 periodic table 點嚟﹗呵呵呵﹗所以活動教學都真是好重要﹗

同爸爸食 lunch﹗











FREE的前菜﹗

每個餐都有蒸蛋!


我點了壽司烏東和大頭妹share!
 

6件壽司
 

阿旺的Set,主菜仲有得揀!
 

Set 仲有麵豉湯!
 

每人都有甜品一份!
 

食飽飽去太空館睇「與星同源」,阿旺問係咪我地細個睇個啲,應該唔同呱,依家3D架!我覺得都幾值得睇!
 

仲買咗八大行星返屋企!
 

2017年11月22日 星期三

20171122@School Food + 溜冰




2017年11月22日 (星期三)

最近甩Blog 甩得好嚴重,好似無咗寫blog的動力,生活上實在太忙太忙,每日放工返到屋企都好似打仗咁,希望可以勤力返,寫返多啲Blog!

講下近況,大頭妹岩岩考完試(所以先有時間寫Blog😂) ,升咗二年級 3個月,覺得比小一辛苦好多,小一時好似都仲有中場休息時間,今年真是好似未停過,每個星期不是英默就中默,再唔係就小測,而且默書範圍明顯比其他學校大,所以有時溫一次默書,都真是要溫足一星期,尤其是中文。中英默今年都有unseen dictation,所以就算努力溫完,都唔代表一定會有好成績,真是好講小朋友的功力和底子!哈!講住咁多先!

講返我餐飯,考完試就梗係要鬆一鬆,大頭妹揀去溜冰,其實唔知點解佢咁鍾意去溜冰,佢根本就唔識溜😅!溜冰前食少少,揀咗正正溜冰場旁邊的School Food!第一次食,感覺麻麻地,食完成晚都好口渴!壽司飯好乾,好似是切好放好耐個種乾!咁價錢又唔貴,一家4口埋單先 $300,但太古城中心有咁多選擇,短期都唔會再去!

滑啫啫暖鍋 $48,其實即是辣豆腐湯,有豆腐﹑蜆肉同年糕,都真是幾辣,飲完好口渴﹗


花郎卷 $68,飯有點乾,感覺好似切好一段時間,連 K-ROLL 都比唔上﹗


牛骨清潭麵 $88,比較淡味,牛的肉質一般﹗


CARBONARA 年糕 $68,只能說期望越大失望越大,又唔係唔好食,小丸子一個人都吃了半碟﹗

Related Posts Plugin for WordPress, Blogger...