2016年10月31日 星期一

靚媽好物推介: 3M無痕魔術貼

 

為博老婆一笑,我阿旺今次要出手啦!

其實搬咗2年多,一直都想係屋企整返幅 picture wall,放返啲家庭相,同小朋友相出嚟 (哈哈...其實是比老婆鵝足 2年)﹗不過買買埋埋好多相架又無從入手,有啲細相架原來無掛鈎,我又唔識鑽牆﹗又無電鑽﹗又無理由叫師傅返嚟鑽幾粒螺絲?﹗

直至比我發現 3M無痕魔術貼,唔需要鑽牆,只是簡單一貼,每 1對小型魔術貼,就已經可以掛一幅 1磅重的畫架,而且可以重複開合,鍾意隨時換相都好方便!岩晒我呢啲懶人﹗


哈哈哈...比佢地幫手撕開貼紙啦﹗

兩個又話幫手,轉個頭又自己玩啦﹗


貼呢個步驟重要啲,都是我貼返啦﹗出咗界就唔靚仔架啦﹗

牆身同相架每邊一對,要度返好位置﹗貼之前要用少少火酒清潔牆身,就會貼得實啲架啦﹗

我老婆話識做家事的男人最 man喎﹗哈哈﹗我想話其實好簡單之嘛﹗

登登﹗唔洗幾下手勢就完成啦﹗

如果想換位置時,只需要慢慢拉長膠貼就可以,唔會留膠跡!記得是要向下拉,一直到最後,唔可以向自己個方向拉呀﹗

有圖有真相﹗真是無留膠印架!

佢有好幾個 size的,每種的負重都有少少分別。


更多產品資訊:
http://solutions.3m.com.hk/wps/portal/3M/zh_HK/APACCommand/Home/Smart-Ideas/Picture-Hanging/



長洲吃喝玩樂親子一天遊@20160916


2016年 9月16日 (星期五)

難得一日的中秋假期,大頭小丸都唔洗上興趣班,即刻約埋國皇之家和80後媽媽,三家人一齊去長州玩返一日啦﹗由中環出發,大約是 35-55分鐘的船程 (視乎普遍船/ 快船),約了 11:00,不到 12:00 已經到長州啦﹗

第一站去食長州有名的大魚蛋【甘永泰魚蛋】啦﹗好似都是去長州必食之一,但其實依家都有好多檔賣大魚蛋,我都唔知邊檔是最正宗,反正上次食過覺得好好味,今次都食返呢檔啦﹗ 


一睇就知大頭妹有潔癖﹗小丸子就太豪邁了吧﹗

一人一串﹗


第2站飲 『冰滴咖啡』,食完大魚蛋,一轉入旁邊的行仔,就見到【長洲冰滴咖啡】啦﹗我唔好咖啡的,阿旺話 $29 咁平就試一次啦﹗小朋友見到冰滴咖啡都覺得好好奇,最後我地一人都買咗一杯﹗


食咗少少野呢,我地就去公園玩啦﹗其實我唔明點解去到長州都要玩公園,不過小朋友開心就得啦,同佢地出嚟玩都是想佢地開心,我地大人有得飲飲食食,就是 bonus,哈哈,要感恩﹗

去公園時見到原個『冰凍西瓜盅』$30/個,我地又一家一個買嚟試下,真是好正好消暑,我地買時已經是最後 3個,之後好多人問我地係邊度買,已經賣晒啦﹗檔主話本身話打風,所以唔敢入太多貨,點知 3日長假的第一日中午前已經賣晒﹗


睇下小丸子個樣,除咗食...佢個腦仔...都是得食...

玩完公園又是時候醫肚啦﹗第三站去食國皇之家介紹的老字號【長州張記】,店員推介: 魚蛋﹑蛋片頭﹑墨魚丸﹗


嘩哈哈...食完又食...真是食唔停﹗ 食完魚蛋粉,一出門口,又遇到上一次去長州時太多人排唔到的『芝士焗蠔』,今次唔洗排就梗係要試下啦﹗阿旺食芝士焗蠔,我就食芝士焗帶子﹗上面有滿滿的薯蓉好好味,但如果一心食蠔/ 帶子的,可能就會失望啦,即是阿旺,因為...好細件架咋﹗對於我鍾意食芝士,又鍾意食薯蓉,我覺得好好味架,但如果要排 30分鐘,就唔值得排。

芝士焗蠔/$25@

我地一路行一路行,其實想去『張保仔洞』,點知要排成 1小時先入去到﹗最後我地以投票的方式決定排唔排,我棄權咗...最後 5比 4決定唔排,得 4個男仔話要排,我其實無所謂,多我一票就打和,半天吊所以都是唔舉手﹗同埋係我 2個女叫晒 "救命",點解佢地咁唔捱得苦架﹗唉﹗主要係行去張保仔洞條路都好遠,大家都行得好辛苦,走的時候發現原來有艇仔坐,下次識得坐艇仔,舒舒服服去到,就唔怕排隊啦﹗

回程時我地就坐咗啦﹗大人 $10,小朋友 $5﹗


返到去碼頭個邊的最後一擊食甜品﹗入得嚟長州點可以唔食芒果糯米糍,雖然依家好多地方都有﹗

哈哈...一放低...見到好多對小朋友的手﹗

我叫的芒果沙冰又比小丸子搶咗﹗

大頭妹的芒果布丁﹗

小丸子的豆腐花﹗

最後,朗媽要買紅豆糕比朗爸,我地都是第一次食,其實好似好多好多豆的砵仔糕﹗

甘永泰魚蛋
http://www.openrice.com/zh/hongkong/r-%E7%94%98%E6%B0%B8%E6%B3%B0%E9%AD%9A%E8%9B%8B-%E9%95%B7%E6%B4%B2-%E6%B8%AF%E5%BC%8F-r23205

長洲冰滴咖啡
http://www.openrice.com/zh/hongkong/r-%E9%95%B7%E6%B4%B2%E5%86%B0%E6%BB%B4%E5%92%96%E5%95%A1-%E9%95%B7%E6%B4%B2-r189789

長州張記
http://www.openrice.com/zh/hongkong/r-%E9%95%B7%E6%B4%B2%E5%BC%B5%E8%A8%98-%E9%95%B7%E6%B4%B2-%E6%B8%AF%E5%BC%8F-%E7%B2%89%E9%BA%B5-%E7%B1%B3%E7%B7%9A-r7215

大家 like 咗我地個 facebook page未呀?﹗未就快啲 like啦﹗

2016年10月28日 星期五

小丸子K2 觀課日@20161026



2016年10月26日 (星期四)

今日是小丸子幼稚園一年一度的觀課日,我當然就請了半日假去參加啦﹗除咗可以了解一下小丸子上堂的情況,亦都可以更加了解學校的課程。

今日先知原來佢地每日返學都好忙,一早集會,唱下歌,做少少體操,仲會祈禱,之後就入課室。入課室之後第一件事是教當日要做的功課,佢地 K2暫時是一日 2本功課,中文 + 數學/英文 (每樣的份量很少)。今日觀課遇上佢地做實驗,所以見唔到佢地真是上堂的情況,不過就可以同小丸子一齊做實驗啦,佢地用試紙測試一下不同飲品的糖份,估唔到原來學校係咁活動教學。

之後就是英文/ 普通話/ 宗教科的課堂,今日是宗教科。

最後就是『自選時間』,佢地每日會有大約半小時自選時間,去不同的學習角分組學習,例如: 語文區有普通話/ 英文老師教 ORAL,美藝區畫下畫,教具區玩下玩貝,仲有電腦區...成 10個區...我都唔記得咁多﹗呢個時間亦都要做埋堂課架,起返字頭,返屋企再做功課。我見啲小朋友不停係唔同的學習區出出入入,真是好忙架﹗(上年班主任就是話小丸子次次都要等到最後先做功課囉...玩到 LAST MINUTES...叫佢幾次名...先會過去做功課)

完咗自選時間,就會係分享時間,每 2個小朋友一組講下自己玩咗咩,之後老師再會揀小朋友行出嚟分享自己玩咗咩,訓練佢地表達能力。

最最最後當然唔少得茶點時間啦﹗每日的流程大約就是咁﹗佢地食茶點,學校都安排家長聽下今年 K2的課程﹗今日觀課之後,我發現原來小丸子上堂都幾乖﹗雖然佢就好動少少,人地行佢就跳,但我見佢好知流程,亦都會乖乖排隊,明顯比上年都進步了﹗
 
完咗就接返小朋友,我地同同學去食 TEA,食完 TEA 再接家姐﹗


今日先發現原來坐校巴好快﹗我接完大頭妹放學是 5:45,之後等的士 (都等咗一陣),返到屋企都 6:15,平時佢都是大約 6:25 - 6:30 落校車﹗2個話想食壽司,我以為去 AEON 食話好,佢地帶咗我去元氣囉﹗﹗﹗


食完壽司再去 AEON玩一陣先返屋企,今日家姐默完英文,下星期先默中文,可以去玩一陣,不過其實我未知佢多唔多功課。

本來想拍片,不過驚放咗出嚟,第時 MOLLY FANTASY...BLACKLIST我地...HAHAHAH...小丸子真是超暴力﹗


大家 like咗我地的 Facebook page未呀?﹗未就快啲 like啦﹗

2016年10月26日 星期三

小學同學聚會

2016年10月7日 (星期五)

多得 Facebook,幾年前同小學同學相認返,其實中學有一段長時間都無聯絡,我一直都好宅,好多時有聚會,我都唔出席,依家可能人大咗,又可能真是寫 BLOG 之後社交好咗,通常我都是逢約必出的﹗

上次聚會都好似已經一年前,不過我記得我有事出席唔到,今次只是大人食飯,就容易好多,地點是上環的『公館』,是一間私房菜,10個人有間房,大家可以坐得舒服啲,傾得開心啲﹗食物方面都好有質素,而且份量好足,可能因為我地女仔多﹗阿旺睇返啲相都問點解10個得 2個男仔,我話可能是因為我小學讀『精英班』嘛,小學時都是女仔叻啲。

講返今餐都真是好豐富,頭盤有公館特色六小碟,湯是花菇濃湯,主菜就有薏米帶子﹑紅梅元肉﹑毛豆素卷﹑糟香一品雞﹑白玉娃娃﹑金花魚片,另外仲有公館炒飯,同埋唔少得的甜品﹗

公館特色六小碟,第一碟就已經忘記了是什麼...

矮瓜,上面是肉鬆,味道十分不錯,我食咗好多呢﹗

青瓜

薯仔絲,好味到停唔到口﹗

鴨胸

海蜤頭配木瓜絲

 湯: 花菇濃湯,個湯真是好正呀﹗我依家都回味中﹗

薏米帶子,入面有鮮百合﹑馬蹄,加埋帶子都幾特別,而且帶子大大粒好彈牙﹗

紅梅元肉,聽講好多人客指定要食,我自己就...麻麻地...太肥,我估阿旺會好鍾意﹗


毛豆素卷,食完豬蹄食返個素菜平衡一下,唔錯﹗

白玉娃娃,睇個汁就知道正啦﹗

糟香一品雞,雞肉好滑,點埋個汁食就仲正﹗

金花魚片,魚肉真是好滑,而且完全唔腥,平時我麻麻地魚,不過呢碟都真是正﹗

公館炒飯,連炒飯都好好味﹗

最得我歡心的永遠是甜品,呢杯是士多啤梨果蓉,上面好似是蛋卷碎,平時係屋企簡簡單單用來招呼朋友都唔錯,又好味又健康﹗

公館
網址: http://s.openrice.com/QrbS0J4q000
地址: 上環德輔道中279號豐和大厦12樓
電話: 2577 9789



Related Posts Plugin for WordPress, Blogger...