2006年12月26日 星期二

Boxing Day

因為今日都要噃工,所以噚日計畫晚餐的時候,已經計算在內。
飲剩的湯,加預多的甜品,已經完成咗今晚2/3的晚餐。
噚晚就已經醃好咗啲雞翼,今日放工只需要將雞翼放入焗爐,
30分鐘就有得食




今年收到的聖誕禮物...
有3份,每一份我都咁鍾意。


聖誕大餐

今日聖誕節,同大家講聲: 聖誕快樂﹗
自己一向都鍾意煮嘢食...都希望可以影響身邊的人,
可惜我的影響力實在太細啦﹗最少連我妹妹都影響唔到
今晚的晚餐,特別加入大量蔬菜...
因為噚日BBQ,實在食咗太多肉啦﹗
 今餐的全部材料都在百佳買的,十分方便,
加埋都唔洗百五蚊,又唔洗食味精,你話自己煮係唔係好好呢
Menu:湯: 猴頭菇響磥湯
主菜:煎西冷 (百佳大減價,只售$22兩件)
配菜: 甜粟米&新西蘭蕃茄 (估唔到百隹的粟米竟然咁甜,加咗少少牛油,好好味﹗)
甜品: 牛奶布丁w/ 芒果粒粒

後記:好開心﹗
因為原本男朋友話唔食個牛奶布丁的,
所以我預備咗個細的比佢,
點知佢食咗一啖,就話'都幾好'。
食第二啖的時候,就話'好味過Sogo買明治嗰啲'。
食完的時候,就望住我話'有啲後悔要咗杯細的...可唔可以食多杯'。

2006年12月21日 星期四

為聖誕節做預備 (附牛油曲奇食譜)

仲有幾日就到聖誕節,通常都會喺屋企自己煮聖誕大餐。
開始計畫個Menu,但三心兩意,唔知煮咩好...
但應該都會係西餐,應吓節嘛。
今日就預習咗個餐前小食先
其實之前都post過,不過就冇post做法...因為我打字太慢啦

材料 (原味):
無鹽牛油 60g (室溫)
糖 40g
蛋黃 1個 (室溫)
雲喱拿香油 2滴
低筋麵粉 100g
做法:
1. 先攪拌牛油,再加糖mix (應該要MIX到奶白狀)
2. 加蛋黃mix
3. 加雲喱拿香油(最好在落麵粉前加)
4. 分数次加入麵粉 (MIX的時候要盡量將麵粉包住牛油MIXTURE,但不用完全拌勻)
5. 將粉團做成圓柱形,雪1-2小時
6. 切成6mm厚,以170-180度,焗16-18分鐘
*可以將粉團分成2/3份,然後在粉團加入朱古力粒粒/提子乾,咁做一次就可以有3種味。
**可按個人口味,加入朱古力粉/綠茶粉。

2006年12月18日 星期一

蕃茄意大利粉&焗蕃茄

因為買咗個新碟,所以要煮意粉。
其實一向都好鍾意買碗碗碟碟,但係已經比男朋友發出最後通碟...
我諗短期內都真係唔可以再買啦﹗
今次一共買咗四隻碟加兩隻甜品碗,全部都係喺Franc Franc 買的...好靚嫁

2006年12月15日 星期五

韓式炒粉絲&柚子胡椒雞翼


韓式炒粉絲係跟一個韓國朋友學的,
不過其實佢係唔識煮的,只係紙上談兵 (佢媽咪一路講,佢一路抄)。
不過煮完出嚟都有8成似(如果我男朋友冇呃我)。


我自已本身唔係太喜歡食雞翼,但係實在太方便啦...
而且男朋友超級鍾意食,所以佢都係我餐桌上的常客。
今次煮的係柚子胡椒味,柚子胡椒係日本的調味料,係用青椒做的,好有曰本風味。

2006年12月13日 星期三

日式咖哩飯

又一懶惰之作...日式咖哩飯
今次的咖哩係買現成的,成包放落水煲5分鐘就Ok ﹗
真係方便到無得再方便啲嫁啦
今次買的係S&B,平時自己煮的時候都係用佢...好好味嫁﹗

2006年12月11日 星期一

洋蔥豬扒&蒜蓉炒白菜仔

又好耐都冇係屋企煮飯啦...
雖然已經搬咗出嚟住一年,但仍然唔習慣日日都要諗吓煮咩,而家先知媽咪有幾辛苦。
今次煮噃中式家常菜,洋蔥豬扒加蒜蓉炒白菜仔。
點知...屋企無老抽。天啊﹗男朋友用完竟然唔出聲。無所謂啦...冇色啫。



2006年12月5日 星期二

士多啤梨骨&涼拌茄子

一向好怕炸嘢,一來油煙大,二來覺得要用好多油。
成本高呀嗎...係嫁,我係好孤寒嫁。有時諗吓都覺得傻,出街食不知貴幾多,係屋企食的時候又扮晒慳。今次為咗士多啤梨骨,就冇辦法啦﹗唔炸點會好味嫁。
自己在屋企煮的好處係無味精,而個士多啤梨醬汁都係用新鮮士多啤梨做嫁...你話啦...係街又點會食到。又係到自己讚自己啦。

2006年11月25日 星期六

Bobbi Brown豆豆專用遮瑕膏

最近買咗Bobbi Brown Blemish Cover Stick,覺得非常好用,所以一定要推介一吓。其實近年都好懶化妝,更加唔會用遮瑕膏。但係因為要去表姐的婚禮,所以買咗批新的化妝品。
第一次用的時候是在Bobbi Brown的化妝班,當時已經覺得好正,不過知道自己一定唔會有時間用...通常早上我只用二十分鐘就要出門口。有時間都寧願睡多一會,係有時約咗人先至執吓,廢是嚇親人。
它的第一個好處是方便易用,唇膏裝,拎少少出嚟,篤落要遮的地方,用手指輕輕印開就可以。第二個好處是有消炎的功效,所以話係豆豆專用,唔怕越遮越惡化。第三個好處是多色,唔怕越遮越覺眼。
而家就算無化妝,只要有豆豆,我都會用,咁就神不知鬼不覺啦...哈哈哈。

2006年11月24日 星期五

新羅寶韓國料理(二)

上次已經介紹過新羅寶,今次POST埋啲前菜上嚟。我就係鍾意一碟碟放晒喺枱,最重要係之後唔洗自己洗...哈哈哈。



2006年11月23日 星期四

Te

好少出街食,亦唔係好喜歡試新嘢。不過最近走咗去中環學香薰按摩,所以多咗機會去中環食飯...Te 是一間來自日本專賣意粉的餐廳,味道十分不錯,最重要係價錢合理,大約$50-$70,在中環來講真係算係咁。


2006年11月22日 星期三

露斯瑪莉鷄翼

剛剛買新焗爐的時候就急不及待煮咗露斯瑪莉鷄翼,可惜當時未掌握得到個焗爐,加上好耐都冇煮過,所以真係失手...
今次再努力過...真係超好味。
其實每次去 Amaronis 或者 Fat Angelo's 食 Rosemary Chicken 的時候,我都會迫我男朋友話係我煮的好食啲  無辦法啦...係女人都鍾意比人氹嫁啦。
但係我男朋友天生骨頭硬,每次都會講真話。

2006年11月21日 星期二

新羅寶韓國料理

大長今熱潮早已退卻,但因為之前參加咗新羅寶的會員計畫,每年生日都會收到三百元的禮券,所以噚日就一家人去咗。重有呢...就係自己本身很喜歡韓國料 理,一碟一碟放在枱,好開心。其實新羅寶都算幾貴,不過根據我一個韓國的朋友講,新羅寶算係香港比較做得地道的,所以佢地都覺得藉得。今次叫咗個三人套 餐,包括: 六款前菜,兩個頭盤,兩款韓燒的肉,生菜& 牛肉麵,仲有生果同甜品。


2006年11月19日 星期日

日式牛肉絲燴飯

好耐都冇喺屋企玩煮飯仔,今日煮咗計畫已久的牛肉絲燴飯。
 
唔好以為好難煮‧‧‧其實真係因為我懶,所以先一直冇煮。
 
煮法非常簡單,只是炒炒洋蔥,炒炒牛肉,放水煮沸,加入蕃茄磚就ok(好似咖哩磚,在日式超市有售)。


牛肉絲燴飯 (奶油飯)

蕃茄沙拉

2006年11月8日 星期三

荔芋炆雞@煤氣烹飪中心

星期二請咗一日假,去咗煤氣中心學煮中菜。之前都學過幾次,都覺得唔錯,而且價錢亦好合理,最大的好處是可以實習,唔怕返到屋企煮唔返‧‧‧

 

今次學的係秋冬課程,見到有我最愛的芋頭‧‧‧當然第一時間報名啦﹗快D睇吓我的製成品啦‧‧‧



荔芋炆鷄

荷蘭豆炒魚鬆

2006年11月7日 星期二

綠茶曲奇

我自己一向喜歡綠茶的味道,不過唔係人人接受,好似我男朋友就唔係太欣賞。好耐都沒有自己做曲奇,所以今次不計成本,全部材料都用最好的﹗用咗京都的綠茶粉,同靜岡的綠茶葉,好有綠茶味。好味﹗


出爐啦﹗

三角型嘅﹗

2006年11月6日 星期一

袖珍玩具

由細到大都十分喜歡迷你的東西,相信大部份女孩子都一樣。只有我妹妹是例外,每次帶她去買禮物的時候,她都是選大大份的。

上次去土耳其的時候,經過德國。在機場見到超可愛的迷你野餐餐具套裝,心想︰如果唔過三百港幣的話就買啦﹗一看,廿九歐羅...咪可以買囉﹗好嘢﹗


2006年10月30日 星期一

日本冷烏東&柚子胡椒雞扒


日本冷烏東&柚子胡椒雞扒

Category: 靚老婆入得廚房- 甜品&其他, Tag: 烹飪,飲食
10/30/2006 11:42 pm
今日食冷麵,其實日本人通常都是夏天才吃冷麵,試過同一個日本人聊天,她說她剛剛來香港的時候,覺得香港人很奇怪,夏天會打邊爐,冬天又會吃冷麵。

我仍然未捉摸到個新焗爐,原來真是有好多功能。



Related Posts Plugin for WordPress, Blogger...