2012年11月30日 星期五

大頭妹週記

噚日講完恐怖的,今日講返啲輕鬆的﹗

每日我放工返屋企都會同大頭妹傾一陣計,問下佢個日做過咩之類?﹗有一日我問佢:

我: 你今日返學做過咩?
大頭妹: 唱歌
我: 成日唔係唱歌,就是玩玩具?﹗今日唱咩歌?﹗
大頭妹: 太陽伯伯﹑大陽伯伯
我: 又係太陽伯伯,唱咗好耐啦喎﹗仲有冇其他?﹗
大頭妹: 我食魚﹑我食魚...
我: 咩歌嚟架?﹗啲歌詞咁奇怪?﹗有冇上日文堂?
大頭妹: 有
我: 咁你日文老師叫咩名?
大頭妹: 兩水
我: 兩歲?﹗我問佢叫咩名喎?﹗
大頭妹 (好認真): 兩水 (讀音...我到依家都唔知佢日文老師叫咩名架﹗)
阿旺 (插咀): 樣衰?﹗
我: 唔好教佢講呢啲啦﹗一陣佢真係咁叫老師...
阿旺: 木村?﹗
大頭妹: 唔係
阿旺: 櫻井?
大頭妹:唔係

我: 呀﹗你平時咩佢 "咩" sensei (老師)架?﹗

大頭妹 (諗咗一陣,好認真好大聲咁答): OHAYO SENSEI﹗(老師早晨)
我: OKOK...唔該晒你﹗

大家LIKE咗我地個PAGE未呀?

仲有微博呀﹗

2012年11月29日 星期四

公廁驚雲﹗



溫馨提示: 今日個blog有驚嚇內容﹗

逢星期二阿旺返學,我都會同大頭妹出去行下食晚飯,今個星期二都一樣,不過發出咗一件好恐怖的事,我越諗越驚,雖然是自己嚇自己多
....而且都無從證實﹗

話 說我同大頭妹食完飯,我例行問下佢要唔要去洗手間,佢話好喎﹗咁我就帶佢入洗手間啦﹗點知一入去...差唔多全部廁格都是吉的,門全部打開,但大頭妹忽然 講咗一句...."咁多人嘅?﹗",我當時都無野,仲同佢講..."都無人,你唔好嚇媽咪喎﹗",之後大頭妹唔肯去廁所,我地就走啦﹗

行到去另一個洗手間的時候,佢又話要去廁所,咁我見佢頭先無去,又同佢去啦﹗佢一入到去話 "今次無人啦喎﹗",而當時洗手間得一個清潔阿姐,其他廁格的門是關上的,所以都真係見唔到有人。

咁...究竟...佢第一次去第一個洗手間的時候...係唔係真係見到有"人"呢?﹗我阿妹叫我再問下佢...我真係唔敢啦﹗而且細佬仔...真係唔知佢幾時講真,幾時講假...唯一可以肯定的係...我短期內都唔會再去個個洗手間﹗

大家LIKE咗我地個PAGE未呀?

仲有微博呀﹗

2012年11月28日 星期三

生唔生?﹗

哈哈哈...大家唔好誤會,我唔係有咗第3個,不過成日比人問我湊小朋友辛唔辛苦 (未生的朋友問),2個會唔會仲辛苦 (已經有1個諗梗生唔生多個的朋友問)?﹗所以又想講下呢個TOPIC

其實我同阿旺都係好鍾意小朋友的人,未結婚已經諗定生2個架啦
﹗我成日諗我地呢啲鍾意小朋友的,拍下拖再儲錢結婚,最後都要 30歲先生第一個,即是如果遲結婚的,加上麻麻地鍾意小朋友的,其實真係冇咩動力生小朋友架喎﹗唔怪得出生率咁低啦﹗

之 前有個廣告話養個小朋友要 $400萬,我成日覺得係吹水的,自己有小朋友之後...覺得一啲都唔出奇,因為養一個小朋友,除咗基本開支,其實都好多 "隱藏成本"﹗好簡單...奶粉尿片就當然是直接的洗費啦﹗咁工人姐姐的人工,換大少少間屋而比多的錢,又應唔應該計入去養BB的支出呢?﹗

我 地淨係計大數吖﹗奶粉: $250罐 X 4 = $1000,尿片: 當1日用5條,1條 $2 = $300,工人姐姐: $4000,租金/ 供樓: $4000 (當租1房要 $10000,2房要 $14000計),連埋其他濕濕碎碎的,$10000冇得走﹗到1歲又要讀PLAYGROUP (當然可以唔讀),2歲讀PN班 (都仲可以唔讀),3歲一定要讀幼稚園啦呱﹗有學卷的大約 $1000,冇學卷的 $3000-4000,加埋校車﹑雜費又 $1000﹗大家睇到呢度有冇少少心寒?﹗我寫到呢度...其實自己都有少少心寒...仲諗緊點解自己會生2個
﹗ $400萬...如果大個要去外國讀書...似乎唔夠﹗忽然間...覺得父母都好偉大﹗哈哈哈﹗

 不過...望住自己的小朋友又好開心嘅﹗大家未諗定生唔生的...望下我個個先啦﹗睇片﹗


大家LIKE咗我地個PAGE未呀?
 

仲有微博呀﹗

2012年11月27日 星期二

小丸子7個月﹗

好似岩岩先放完產假,小丸子原來已經 7個月,哈哈...最大的轉變當然是小丸子的體重啦﹗由出世時的細碼B,到依家的加大碼B﹗現在的體重足足是出世時的4倍﹗

自 6個月開始已經有食半固體食物,不過第2個真是沒有第1個的緊張,以前大頭妹都有自己的 "獨立食材",依家小丸子好多時都是屋企有什麼就吃什麼啦﹗好多時都是大頭妹吃什麼,她就吃什麼囉﹗其實都令大頭妹食多咗粥,以前我都會煮下通粉/ 炒飯比大頭妹食,依家日日同小丸子一齊食粥,有時都幾悶﹗HEHEHEH...唔知幾時小丸子可以同大頭妹一齊 "有粥食粥,有飯食飯" 呢?﹗起碼都要一歲啦﹗有時真係好唔捨得小朋友大得咁快﹗

岩岩上星期病咗一鑊甘的﹗真是堅甘﹗﹗﹗星期三去覆診都好地地,星期四突然發燒 燒到40度,仲要食完高燒藥,都唔退晒燒,只是回落到 37.8度左右,食咗 3次高燒藥都唔退到燒,最終等咗一晚,第2朝有兒科醫生就再同佢去睇醫生﹗醫生話可能是之前都未病好,又再染到新的病毒,所以發高燒...今次我估係我 啦...因為全家都好得7788,係得我一個未好返...我已經盡量唔抱佢...下次有病...真係係屋企都要帶口罩﹗之後足足發燒發咗2日﹗晚晚 2-3:00am就喊醒,之後我就陪佢做廳長,由3:00抱到 6:00抱住瞓﹗6:00再由工人姐姐接力﹗今次都好多謝工人姐姐,見佢真係好惜小丸子,抱住小丸子長嗟短嘆,叫佢要快啲好返﹗

之後星期六,阿媽同阿妹都話小丸子病到瘦咗...我阿妹個人一向風趣,仲話終於見到小丸子條頸 ,不過比佢講完又真係喎﹗之前因為太肥,所以見唔到條頸,病一病真係可以望到頸底...


口水王又流口水


成日好似戇居居咁﹗不過已經識叫 mama, papa, mum mum (milk), bao bao (抱), 唔好 (食藥的時候講過好幾次...唔知係唔係幻覺)

叫一叫佢勁開心﹗


仲開心到反轉埋﹗



偷睇電視﹗


吃過的食物:
肉: 魚﹑豬﹑雞胸﹑雞腿﹑牛﹑三文魚
蔬菜: 波菜﹑西蘭花﹑菜心﹑節瓜﹑蕃薯﹑薯仔﹑蕃茄
生果: 蘋果﹑梨﹑提子﹑藍梅﹑士多啤梨

小丸子: 媽媽,你漏咗﹗仲有漢堡扒﹗﹗﹗



大家LIKE咗我地個PAGE未呀?

仲有微博呀﹗

2012年11月26日 星期一

$3的快樂

最近我都要向現實低頭,帶大頭妹去 "GAME CENTRE",其實我本身好反對小朋友去 GAME CENTRE,我覺得佢地應該去下公園,行下走下跳下,曬下太陽。可惜好多時放工返到屋企食完飯,公園已經熜晒燈,有時落雨又去唔到,落完雨又一樣玩唔 到,結果都是要去 GAME CENTRE﹗

不過我最近發現,原來依家的GAME CENTRE仲有我地細個的 "扑鱷魚"﹗仲要只是 $3﹗所以間中都會同大頭妹去扑傻瓜﹗同佢一齊扑傻瓜...忽然發現自己都會好開心,好似將心入面的所有不快都發洩晒出嚟﹗HEHEHE...不過每次都只可以玩一鋪﹗


就係呢部機...我細個都成日有玩架﹗



之後佢會自己四圍 "玩" 下﹗不過無入錢的﹗




HEHEHEH...成行鼻涕﹗
有時爸爸會同佢玩下其他機,佢識得同我講...仲會叫我入錢玩﹗

2012年11月23日 星期五

士多啤梨骨 (附食譜) + 大頭妹變魔術

唉...都不知道是不是要多謝新工人姐姐 (其實都不算新啦...都來了差不多3個多月),因為她的工作速度其慢,有時炒菜蒸魚都要一個半小時,平時的家務又堆積如山,所以星期六日,好多時都是我/ 媽咪親自下廚,heheheh...比返多一點下廚機會我﹗

上次同學生日飯吃了士多啤梨骨,即時有少少技養﹗星期日自己煮一次,不過四圍都沒有平價的士多啤梨 (士多啤梨本身就不是平價的生果啦﹗),最後都要在JUSCO買,$26.9得數粒細細粒又酸的士多啤梨。

由於士多啤梨不夠紅,出來的效果也不夠紅,不過味道都好好味﹗



上一次買到靚的士多啤梨,賣相吸引得多﹗


媽媽的菜心炒牛肉﹗


白酒煮大蜆


唓﹗成日話我慳,阿旺自己去買,都是買了一斤大蜆,一人分得2-3隻...之後一個星期,我買了 "沙白" ,$33有斤半,唔洗食得 "就住就住"﹗

*大家記得呀﹗浸蜆要用多一個筲箕 "涼" 起,否則吐出來的沙,一樣 "痴" 住個殼﹗



又細又唔紅的士多啤梨﹗

炸好的排骨,媽咪問點解炸一大舊...答案好明顯...阿旺鍾意囉﹗


我的專用試食員﹗



大頭妹 "無厘正經" 的性格,一定是 "遺傳" 自阿旺的﹗

有時想好好地替她影一下靚相,最後都只有 "嘔血" 收場﹗



士多啤梨骨
材料: 排骨 1斤/ 士多啤梨 1盒/ 洋蔥 1個 (細)
醃料: 豉油 1湯匙/ 油 1湯匙/ 生粉 少於1湯匙
汁料: 茄汁 2湯匙/ 喼汁 少少/ 糖 適量
做法:
1. 排骨以醃料醃最少 30分鐘,之後炸起備用。
2. 士多啤梨一半的份量切開 1/2,加入 1湯匙糖,放30分鐘,之後用微波爐加熱1分鐘,做成士多啤梨醬。
3. 先炒洋蔥 (加少少鹽),炒至個人喜歡的軟硬度,盛起備用。

4. 士多啤梨醬中加入茄汁﹑喼汁﹑糖加熱,之後加入洋蔥同炸好的排骨同炒。

5. 最後加入其餘的士多啤梨粒略少就可以上碟啦﹗

2012年11月21日 星期三

STRIDE RITE - RITE MOM 2013



之前係FACEBOOK見到 STRIDE RITE有一個叫 RITE MOM的活動,邀請小朋友0-5歲的媽媽參加,我因為從來都無入媽媽會,其實都好想有多啲同媽媽交流的機會,所以就參加咗,最後仲被選中成為 8位媽咪的其中一位﹗所以呢個唔係廣告/ BLOGGER活動嚟架﹗

RITE MOM 2013的第一個活動就是到 STRIDE RITE九龍灣的新店玩玩遊戲同睇魔術表演﹗

嚟到當然睇下鞋先啦﹗
嘩...好少會覺得男仔鞋靚,不過呢對STAR WARS真係好得,鞋身的 "劍" 會著燈不在講...仲係日頭閃藍色,夜晚閃紅色的﹗夠晒特別﹗






STAR WARS系列﹗

公主鞋都有閃燈架﹗

之後開始做勞作﹗自己設計相架﹗


有好多好靚的珠珠同小配件呢﹗

返咗學之後的大頭妹,對做勞作好有興趣﹗
 用膠水將小配件貼上﹗

整完比嫲嫲睇﹗


HEHEHE...佢好滿意自己的作品﹗


之後睇魔術表現,不過佢怕醜,唔敢出去玩﹗


睇得幾緊張﹗返屋企仲表演魔術比我地睇﹗(下次拍video比大家睇)


之後去PIZZA HUT食晚餐﹗


好耐都未試過食PIZZA HUT的堂食﹗


個雞搥幾好味﹗

海鮮PIZZA


海鮮焗飯

烤雞


hehehe...期待下一次的活動﹗


仲有仲有,今次STRIDE RITE有75折的優惠比返我的朋友,大家只要DOWNLOAD下面張COUPON,到STRIDE RITE銅鑼灣/ 九龍灣的門市購買正價貨品有75折﹗優惠期: 16-30 NOV 2012﹗

*折扣以正價計算。不適用於公價貨品或禮券
*不可與其他優惠同時使用
*不可與會員現金回贈同時使用,星卡積分將以折實價計算。



DOWNLOAD唔到留返個EMAIL比我SEND張COUPON比你都可以架﹗
*♡♡小肥豬♡♡* at 11/22/2012 11:01 am comment
我之前都有參加...不過抽唔中呀~
Carmen at 11/22/2012 10:47 am comment
唔好意思, PRINT 出嚟濛查查, 麻煩你 EMAIL 到 carmencarmenchoi@yahoo.com.hk 謝謝
Athena and Joe at 11/22/2012 10:56 am reply
SENT!
Carmen at 11/21/2012 07:33 pm comment
HELLO, 係咪就咁 PRINT 張 COUPON 出嚟就得 ?
Athena and Joe at 11/21/2012 10:23 pm reply
係呀﹗如果PRINT唔到,你都可以PM你的EMAIL比我,我直接SEND咗COUPON去你的EMAIL.
樂卡san at 11/21/2012 03:54 pm comment
真係好少男仔鞋靚呢~~~ 對star wars唔錯wor![img]8[/img]
胡李媽媽 at 11/21/2012 11:33 am comment
你嘅意思係…會拍大頭妹表演魔術…佢識呀? … wow....好期待呀!
Athena and Joe at 11/21/2012 10:22 pm reply
HEHEHE...係笑爆肚的魔術﹗
欣欣媽媽 at 11/19/2012 08:19 am comment
隻3鞋好靚,嘢食好正呀!
Related Posts Plugin for WordPress, Blogger...