2010年2月28日 星期日

第28週﹗吉之島BB用品展

2010年2月27日 星期六
星期五收到朋友仔的MSN知道吉之島有BB用品展,星期六就急不及待要去看看﹗總是覺得未預備好寶寶出世要用的物品,不知道是不是我太心急...我仲發夢自己在家生了寶寶,阿旺先收拾 "走佬袋",再打999叫救護車﹗在我一輪 "疲勞轟炸" 之後,阿旺星期五晚終於收拾我的 "走佬袋"﹗看看有什麼要買的星期六去BB用品展就買啦﹗
因為晚上會回媽媽家食晚飯,我地選擇去荃灣的吉之島,出發之前去檀島食午餐。
我的沙爹牛肉通,阿旺的沙爹牛肉麵。
腸仔煎蛋。
我的凍朱古力。
我想今年的出生率都幾高,在街上不時都見到孕婦,BB用品展又人頭湧湧﹗
我聽到有店員話今日即時申請J CARD會有額外95折再95折,我地當然不會" 執輸" 啦﹗
不是買了太多,都是奶瓶同 "和尚袍",因為我之前買的BB衫全部都係COVERALLS,朋友話在屋企著 "和尚袍" 就可以,方便換片片﹗不過我地全都買了50-60碼,好似買得太多了﹗
HEHEHEHEHE...買了HELLO KITTY BABY 床上用品SET﹗$760 有9折,J CARD有額外95折,連即日申請的額外95折,最後$617.4。其實有DISNEY SET做大特價都是$399/ $439咋﹗不過顏色同款式都好似及不上HELLO KITTY BABY SET。我問阿妹買哪一SET比較好,她想也不用想就答 "平的一SET,BB自己都不知道啦﹗你地大人買給自己看吧﹗"。唓...我就要買貴的﹗
今日阿旺好醒好醒﹗付款的時候竟然記得問人有沒有送貨服務﹗之後仲比佢發現收錢員忘了給我們額外的95折﹗退回 $60多元﹗夠我食十串魚蛋啦﹗
之後就回家吃晚飯啦﹗又是我最鍾意的上海炒年糕,差不多次次回家我都叫媽媽煮上海炒年糕﹗因為我媽媽煮的是最最最好味的﹗很多有名的上海菜館都比不上﹗應該是...我暫時未食過比我媽媽煮得更好的 (不計以前嫲嫲煮的,不過我媽真的盡得我嫲嫲的真傳)﹗
上海炒年糕,100分滿分,有200分好味﹗
炒菜心,仲有花膠海參海,太飽了...忘了影相﹗次次回家都吃到 "爆肚" 才罷休﹗
BB衫會比媽咪洗好才比BB穿﹗所以沒有送貨﹗
粉紅色和尚袍 $39.9/2件 (仲有9折,再95折再95折)
白色和尚袍 $39.9/2件 (仲有9折,再95折再95折)
粉紅色印花和尚袍 $59.9/2件 (仲有8折,再95折再95折)
黃色印花和尚袍 $59.9/2件 (仲有8折,再95折再95折)
粉紅色印花長身和尚袍 $99.9/2件 (仲有8折,再95折再95折)

各位準爸爸媽媽有興趣都去睇下啦﹗個展覽做到3月10日,不過樂富的JUSCO就2月28日結束啦﹗
以下是JUSCO的PROMOTION LEAFLET: http://www.juscocityhk.com/forjuscoupdate/promotion/poster/baby10.pdf

2010年2月27日 星期六

第28週﹗足7個月@檢血糖﹗

2010年2月25日
星期四請足一日假去做檢查,早上9:00要到贊育醫院抽血飲糖水,隔2小時回去再抽第2次血﹗我真的好怕抽血,仲要抽2次﹗不過我想信比起 "生產過程"...抽血只是小兒科﹗下午3:30又要回去見醫生﹗中間都不知道可以怎打發時間﹗
抽完第一次血啦﹗第一次抽得好順利,可以開始飲糖水啦﹗之前聽講杯糖水好難飲,令我好緊張,限10分鐘內飲完,飲之前看錶計時間﹗
唓﹗小兒科﹗大約是一杯放了8-10包糖的檸檬水,不用5分鐘就飲完﹗
老公好衰...笑我對手好似抽筋痙攣咁﹗我要夾實舊棉花嘛﹗
到第2次抽血的時候就出事啦﹗我已經問了護士抽另一隻手,護士又話抽同一隻手都可以...
抽完第2次血...我就變成這個樣子啦﹗阿旺笑完我,仲要影我﹗佢話我好似人地做戲咁﹗我真是好痛架﹗抽完第2次血就可以走啦﹗終於可以吃東西﹗前一晚12:00後就不可以進食 (只可以飲清水)﹗我差不多12小時沒有吃過任何東西啦﹗
老公又想去蓮香樓﹗
灌湯餃內有很多瑤柱絲,好好味﹗都只是$18﹗
燒賣都好味道,不過沒有特別。
棉花雞有很多 "棉花",好好味﹗
豉汁蒸鱔...鱔是無鱗魚所以我沒有吃﹗老公說很好吃﹗
蒸蝦腸粉好味道,皮很滑﹗
麻蓉包
真是有粒粒芝麻﹗
午餐之後行中環,去了H&M...又忍不住買了衫衫比寶寶﹗買了3套...總共6件﹗怕忍不住會再買,於是走為上著﹗之後行荷花 "運吉"﹗有花不完的時間,都是去STARBUCKS坐一下。
阿旺點了"DARK CHERRY MOCHA" ,好似有少少藥水味。
抽完血一直不敢看﹗真的瘀了﹗
我天生血管幼,抽左手有一定的困難,抽完一次要再抽第二次就難上加難﹗都不能責怪護士...我應該堅持抽另一隻手﹗我之前都試過數次抽完左手抽右手﹗其中一次個護士仲叫我做多一點運動,我初中時期是游泳隊架﹗一星期游3次,每次一小時,怎會不夠運動﹗

2010年2月12日 星期五

26週﹗恭祝大家虎年行好運﹑事事如意﹑大吉大利﹗

今個星期26週啦﹗而今個星期亦正式踏人虎年啦﹗而家感覺寶寶係肚入面大咗好多﹗睇INTERNET話今個星期學呼吸﹗唔知係唔係因為咁,所以好似郁得仲多咗﹗阿旺問...寶寶係羊水入面點呼吸...我又真係唔知喎 (有冇人知呀?)﹗
由於之前比護士話我肥得太快﹗之後我就開始早少少起身做運動﹗都係郁下手郁下腳,同一啲產前的運動﹗因為都係一啲拉筋的運動,我做的時候,叫阿旺一 齊陪我做,做到其中一個動作,好似 "忍小便" 咁的動作,我同佢講唔洗做啦﹗佢問我點解,問我做嚟做咩﹗我話好似係幫助生產的﹗佢 "唓" 我喎﹗我都叫咗佢唔洗做架﹗今個星期維持係 116-117 lbs之間,減咗 1-2 lbs,其實唔繼續升都ok架啦﹗大家放心...我冇食少到...只係做下運動...我係郁2下都會瘦的人﹗大家唔洗羨慕我﹗等我生完都仲真係郁2下就 "回覆完狀" 先羨慕我啦﹗
仲有一樣野,就係我發現我一做產前運動,寶寶就會郁得好勁﹗唔知係唔係產前運動的其中一種好處呢?等寶寶都一齊做下運動﹗
先兩日,我見阿旺坐係梳化,我又坐上佢大腿度,佢話 "嘩﹗老婆,你好輕身喎﹗" 。好明顯...佢睇咗我個BLOG﹗之後佢同我講 "老婆,我要抱住你,抱你一世,到死先放,而家同你行一個圈先。" 我話 "你唔好跌我喎﹗''。點知...阿旺一起身就問我 "老婆,你感唔感覺到我對手係度震﹗"  。行唔夠兩步,就已經要行返轉頭放晒我係梳化﹗又想話我肥﹗哼﹗
由於聽日開始放農曆新年假啦,我個BLOG都會不定休,中間有野寫,我都會繼續寫﹗不過以防我懶﹗我都係度同大家講返幾句恭賀說話,我地一家,阿旺﹑傻老婆同老虎B女祝大家新一年 "心想事成﹑萬事勝意﹑身體健康﹑橫財就手﹑六合常中﹑財色兼收..." (以上都係阿旺諗的﹗財色兼收﹗﹗﹗佢真係作反啦﹗)。
Related Posts Plugin for WordPress, Blogger...