2009年11月30日 星期一

16週啦﹗我地摸到寶寶呀﹗

我地摸到寶寶郁呀﹗無錯﹗是我地﹗我地兩個都摸到呀﹗上星期六我瞓晏覺﹗瞓醒第一件事就叫阿JOE鍚啖我﹗點知佢咬我塊面話 食"BUFFET"喎﹗咁我就叫佢鍚下我個肚啦﹗一鍚落去,我就感覺到寶寶郁啦﹗佢咁岩浮咗上肚皮面﹗是肚臍的左下方﹗HEHEHE...今次無得話我心 理作用啦呱﹗我地摸到一個AROUND 2寸的硬硬地的"小人仔"﹗好開心呀﹗唔知佢係唔係想爸爸錫佢呢?爸爸一鍚就浮出嚟﹗爸爸就好啦﹗咁快錫到寶寶﹗
我幫我個肚肚影咗相﹗我叫阿JOE同我一齊影,咁睇下我個肚幾時先會大過佢﹗我話一個月影一次,咁就知我老公有咗幾多個月﹗我估起碼 5個月﹗佢今次好醒﹗驚我會 post﹗就咁著條"底褲"同我一齊影﹗﹗﹗呢招好絕﹗咁我就一定 post 唔到啦 ﹗﹗﹗幅相好得意架﹗不過佢唔想POST就算啦﹗佢話叫係我生之前修身喎﹗又聽住先啦﹗聽咗好多次啦﹗
HEHHE...我影的時候好自然就"拮"起咗個肚﹗未有咁大嘅﹗最搞笑係我之前買咗條中碼條褲﹗我著親果條褲啲人就話 "哦﹗見肚啦﹗",其實大家見的只是...褲頭﹗HEHEHE...不過唔緊要啦﹗我繼續去呃下人﹗
我覺得我個肚大得比我想像中快﹗不過我又覺得知道的人就會看得分別 (因為知道嘛)﹗不知道的人就一定看不出﹗起碼我上到地鐡都未有人會讓坐﹗我而家最鍾意放對手在肚上,eheheh...原來有個地方 "涼" 手,都幾舒服﹗

2009年11月26日 星期四

第14週﹗第2次贊育CHECK UP加做OSCAR

2009年11月10日
今日去贊育見醫生﹗不過都係比醫生問兩句同聽一聽BB的心跳,然後再BOOK時間去健康院同醫院做CHECK UP!
不過今次等咗勁耐﹗2:50去到,5:10先走得﹗搞咗成2個幾鐘﹗見醫生的時間其實得 15分鐘﹗等預約都等咗 45分鐘﹗因為唔知點解見完醫生啲FILE 唔PASS返出嚟﹗要一LOG一LOG咁搞﹗而家 BOOK咗 12月22去健康院,1月6日去瑪麗醫院做18-22 WEEK 的結構性檢查﹗到時就會知寶寶是男仔/ 女仔 (如果中間無去私家再 CHECK的話)﹗
等的時候要做一份問卷調查,老公又發揮佢阿旺本色,係咁話幫我做份問卷﹗佢睇睇下突然大笑,笑到面都紅晒﹗附近的人都望過嚟﹗我問佢做咩,佢話份問 卷好好笑喎﹗之後仲要攞部手機影底佢﹗唉﹗我都係自己做返份問卷啦﹗不過佢仲係一邊嘮嘮叨叨,又係度笑,啲大肚婆可能以為自己去錯咗"青山"而唔係贊育﹗
咁究竟佢笑咩呢?大家又可以睇下啦﹗
佢話點解孕婦同BB爸爸的關係有咁多可以揀,仲有 "沒有關係" 同 "不知道" 揀...其實都有可能嘅﹗有咩好笑啫﹗
去CHECK UP之前一日,阿JOE整親隻腳,要包到成隻裹蒸糭咁﹗HEHEHE..我地坐巴士的時候,我叫佢坐,佢坐咗落去又叫我坐,我坐完見佢企唔穩,又叫佢坐...最後...我地隔離位的乘客走咗﹗唔知係唔係怕咗我地﹗﹗﹗
                       
2009年11月11日
今日終於約咗做 OSCAR啦﹗要去另一個醫生度 CHECK,因為要用先進啲的儀器﹗今日又要抽血﹗其實 OSCAR 係 CHECK 唐氏綜合症的﹗個醫生好好好詳細咁講一次咩係唐氏綜合症,成因是咩LALALA...我而家30歲,每900個BB就會有1個有唐氏﹗
我老公之後話,唔知個醫生係唔係好鍾意講野同畫畫﹗我地同佢講咗我地聽講座的時候聽咗...佢仲係咁講係咁畫﹗不過佢收我成大拿拿 $1800! 佢係應該要講多啲野的﹗
度咗頸皮是 0.22-0.25mm ,即是正常﹗真是鬆一口氣﹗而 家先知道做人父母的原來咁多野要擔心的﹗因為寶寶個位置一直都唔岩﹗搞咗成20分鐘有多﹗HEHEH...寶寶有好多動作﹗佢而家唔只伸手伸腳﹗佢仲會摸 下自已個頭﹗摸鼻﹗睇睇下...佢仲食手指﹗醫生話佢唔係因為肚餓而食手指﹗全部都係無意識的動作﹗HHEHEH...好得意咁﹗成日都覺得佢似爸爸好為 食﹗
之後就抽血啦﹗好彩個護士好好手勢,真是少少少少痛﹗老公話點解政府唔一次過驗埋呢﹗咁就唔洗抽多一次血嘛﹗不過政府無收過我地錢喎...次次都係拍下屁股走人﹗驗血報告第2日就有啦﹗都係正常﹗YEAH!

2009年11月23日 星期一

第3次照聲波@DR. LUK

20091107   第3次照聲波
其實...本身我係BOOK咗做OSCAR的(CHECK唐氏)﹗但是原來DR. LUK的診所都無OSCAR做﹗我都唔知點解我BOOK的時候,個護士又無同我講架喎﹗
我: 我想BOOK "度頸皮" 架﹗
護士: 是
我: 我想問係唔係要11-14週做架?
護士: 是
我: 咁我想book今個星期六
護士: 是
我: 我想問幾錢架?
護士: 等等
另一個護士: $1900﹗
老公聽完之後都話唔明點解會有個咁嘅誤會﹗heheh...佢仲好衰咁話是唔是個護士以為你自己想度頸皮...唔係BB度頸皮﹗真係比我老公激死﹗
算啦﹗上次醫生問我想唔想知男定女...我都未知﹗當去CHECK男定女都好...點知今次老公問醫生的時候...醫生竟然話咁快應該CHECK 唔到喎﹗咁...咁...咁...佢上次問我做咩呢﹗?
HEHHE...都是睇返寶寶算啦﹗而家12週5日啦﹗長65MM﹗又長咗啦﹗而家個頭仲是好大﹗個肚又是好大...對腳就唔係好識睇﹗點解好似腳趾指向頭嘅﹗?
醫生開咗REFERAL LETTER比我去另一個醫生度做OSCAR...而家搞到我啲時間好TIGHT,睇下BOOK唔BOOK到下星期二啦﹗星期二都已經請咗假去贊育,一次過 check 晒就最好啦﹗

2009年11月20日 星期五

"宮心計" 之補身篇 (附桑寄生蓮子蛋茶食譜)

最近好多人都會同我講大肚應該食咩﹗唔應該食咩﹗其實我都只是無食海鮮﹗其他都有照食﹗但講起補品,其實我毫無頭緒﹗我話我有煲雞湯飲﹗但是姑媽又 話多激素﹗燕窩又話唔好﹗最後的結論是飲牛奶﹗不過其實我有濕疹,根本唔應該飲牛奶﹗而家一日飲一盒﹗我家姐叫我早﹑午﹑晚都飲...OH...生BB之 前唔通要做返BB﹗
不過好彩有 "宮心計"﹗先幾集講到 "麗妃" 有喜,太后成日話賞賜呢樣個樣比佢食﹗嘩﹗皇妃都是食呢啲﹗我照跟都一定無問題啦﹗無線個編劇唔會跣我呱﹗?其中一個好正...仲岩我岩岩整親腳的老公飲﹗另外仲有一個是湯...唔知咩煲鵪鶉﹗要睇返個集先得﹗
就是呢個﹗桑寄生蓮子蛋茶﹗
都幾易煲喎﹗味道就唔係好味的一類...不過都唔難飲﹗
老公係屋企的髮型...氹咗佢好耐先比我影﹗
今晚的晚餐...有SOGO的美國牛牛,價值 $120! 再9折...老公話超好味﹗不過佢話覺得關個 LE CREUSET 事﹗睇嚟...佢先係真正的 LE CREUSET FANS!
打格仔﹗兒童不宜?
桑寄生蓮子蛋茶
材料: 桑寄生 1兩/ 蓮子 2湯匙/ 蛋 2隻/ 片糖 少於一片 (自行調味)
做法:
1. 1公升水冷水加入蛋 (記得之前洗淨),煲滾後加入桑寄生及蓮子
2. 水滾10分鐘後取出蛋,出殼放回一起煲
3. 以中小火煲45分鐘加片糖調味
桑寄生是中藥常用的藥材,有強壯筋骨、補肝壯腎、養血祛風及安胎催乳的作用,適合長者及孕婦。常用作治療腰膝神經痛、足痠背痛、四肢麻木、血虛風濕等病症,對治療高血壓及動脈硬化功效顯著。(來源: http://the-sun.on.cc/channels/news/20051225/20051225021547_0000_1.html)

2009年11月18日 星期三

第1次CHECK UP@贊育醫院

2009年10月31日   第一次CHECK UP
今日去贊育醫院做第一次CHECK UP,奶奶都專登過嚟同我一齊去做檢查。今次其實只是做一些基本的驗血同證記資料,之後瑪麗醫院就會有我的記錄﹗之前有經驗的朋友都同我講話會搞好耐,我覺得又OK喎,約咗9:30,我地 9:15去到,11:00就走得啦﹗
去到首先證記,之後填表同度高,等齊人就開始睇VIDEO...睇完 VIDEO就做我最驚嘅事...抽血﹗因為我的血管奇幼...仲要生得入﹗10次有8次都要抽2次先抽到﹗今次個護士好好,佢好細心,同我睇完之後決定同 我抽右手,叫我做咗一陣手部運動先抽,一次就OK! 要抽 4支架﹗抽我一個另一邊已經抽咗2個﹗抽完血就預約下一次見醫生的時間﹗約咗 11月10日﹗要請定假先啦﹗
一出醫院就有一班來自不同公司的 PROMOTORS (奶粉﹑尿片﹑迪迪尼﹑媽媽奶粉) 叫我地填入會表,填咗一張就出事啦﹗全部人擁過嚟﹗算啦...都有好多贈品嘅﹗
出入贊育的路都幾多石級,好似唔係幾岩大肚婆行...我老公呀﹗去同走的時候都只是拖住我奶奶咋﹗我奶奶係咁叫佢拖實個老婆啦﹗佢都唔理我呀﹗我成 日話佢唔細心...就係咁解囉﹗我星期二﹑三﹑五上堂...佢約人星期一食飯,係唔係要打pat pat 啦﹗(芒媽...呢啲先要打 pat pat...你個啲小意思﹗) 投訴完啦﹗舒服晒﹗
之後我地一齊去 "蓮香樓" 飲茶﹗好耐都無去過啦﹗因為老公未去過,見時間尚早就去啦﹗去到超多人﹗
豉椒排骨 - 好好味,因為係新鮮豉椒做嘅,唔同平時酒樓食開多多味精的﹗
棉花雞 - 好味...不過我淨係食咗棉花冇食雞﹗
蒸鱔 - 老公話好好味﹗
燸米雞 - 我鍾意食﹗
燒賣
蒸腸粉 - 好味
"庵春"蛋燒賣 - 一定要試啦﹗冇咩地方有得食啦﹗
全程我老公都勁搞笑﹗可能太耐都冇去過要自己攞點心的酒樓...佢全程都好似饑餓的蜥蝪咁﹗個頭係咁兩邊擰,眼仔就四圍碌﹗拎完一轉都未食...又想出去拎﹗hehehe...笑死我啦﹗邊有人咁為食架﹗

第一次用 LE CREUSET 煲飯﹗(附上海菜飯食譜)

忽然好想食菜飯,但是家中的電飯煲是迷你版,只可煮 3杯米 (6碗飯),煮不了有餸飯。想了又想...用 LE CREUSET 煲飯是唯一的辦法﹗之前都講過,我不敢試用 LE CREUSET 煮煲仔飯,怕失敗了會無飯開﹗今次都是膽粗粗一試﹗
哈哈哈...成功啦﹗飯濕了一點點,其實已經少下了水,因為知道白菜會出水,又或者可能因為我用太細火煮飯?﹗不過都已經好好味﹗老公話少了乾瑤柱的味 (因為媽咪一向有放乾瑤柱)﹗唉...我老公把口...
好開心...以後可以自己煮菜飯﹗不用次次返娘家都叫媽咪煮炒年糕,或者菜飯﹗我今日食咗3碗飯﹗真是食到 "反肚"...之後比阿旺鬧我不懂節制﹗HEHEHEH...好味道嘛﹗
材料:
米 1.5杯/ 水 比1.5杯略少/大白菜 半斤/ 瘦肉 $10/ 冬菇 4隻/ 乾瑤柱 1-2粒
做法:
1. 大白菜洗淨切粒,瘦肉﹑已浸透冬菇切片 (用豉油﹑糖﹑胡椒﹑生粉﹑油醃30分鐘),乾瑤柱浸透撕成絲
2. 先炒大白菜 (加少少鹽),再炒肉片和冬菇
3. 米洗好後,加入炒白菜時出的水﹑浸乾瑤柱水同清水 (加埋共略少於 1.5杯水),以中火煮 3分鐘至出煙。加入其餘材料。
4. 以細火煮大約20分鐘。

2009年11月17日 星期二

第2次照超聲波@DR. LUK

2009年10月28日   第二次照超聲波
今日好驚呀﹗去手洗間的時候竟然有少少血﹗第一次是啡啡地色的,第二次直頭是鮮紅色,心大心細...最後都是決定即刻去見醫生,免得返到屋企仲有問題的時候,都唔知點算好﹗
因為咁...我就自己去咗做第二次的照超聲波啦﹗醫生睇過寶寶無問題,心跳正常,手腳都有郁,我覺得好似郁得多過上次,手腳形狀都清晰啲。醫生話不知道出血的原因,不過已經 11週有這個情況就一定是不正常﹗叫我自己留意多啲休息多啲﹗
在照超聲波的途中,醫生突然問我想不想知寶寶的性別﹗我想架﹗不過想等埋老公先﹗我就直接答佢 "等埋老公先一齊知啦﹗",之後有少少後悔...我都幾想知架﹗因為我個人求知欲一向好旺盛﹗
返到屋企同老公匯報同比張超聱波相佢睇﹗佢好叻﹗第一時間識睇寶寶有幾大,而家是 11週2日,長 46.6 MM﹗上次驗查是 28.4MM,短短2個星期,已經比上次大咗18.2MM。
唉...我一向對自己的健康好有信心﹗今次之後我會小心啲啦﹗雖然醫生話唔洗介口﹗不過我都會小心啲啦﹗又是考我 EQ 時間啦﹗
P.S. 噚日(2009年11月16日)我終於同我老闆講咗有BB啦﹗可以放下心頭大石,老闆沒有太大的反應﹗我之前真是好擔心架﹗話晒公司得我一個員工...我 放產假,真是無人幫佢手嘛﹗HEHEH...我的性格是所有事先想負面的一邊...有好有唔好啦...凡事作最壞打算﹗個結果就多數比預期好啦﹗
P.P.S 原來今日 (2009年11月17日)係我地的拍拖週年﹗今年第8年啦﹗HEHEHEHE...我自己都唔記得咗...是阿JOE問我今日据唔据扒,我問佢點解去据 扒先知﹗今年是最後一年2人世界啦﹗真是要諗下點慶祝先﹗不過...而家先諗會唔會有啲遲呢?大家有冇好提議?

2009年11月13日 星期五

第1次照超聲波@DR. LUK

2009年10月16日   第一次照超聲波
檢查的前一晚我都有少少緊張...一來唔知會唔會自己搞錯...二來又驚聽日檢查唔知會點喎﹗BB 會唔會健康呢﹗第二日我地一早就去到醫務所﹗我就去磅重。嘩﹗成 103磅﹗咁...未重咗起碼 5磅﹗(我本身大約 96 - 98磅)
等咗個幾鐘...終於都可以見醫生啦﹗因為我一直都無記低自己的 經期,入到去醫生問我最後經期是幾時/ 平時經期準唔準...我都唔知點答佢﹗我只是好大約咁記得是 8月頭,就答8月5日...醫生就即刻計到我個預產期﹗之後就入去照超聲波啦﹗我好緊張呀﹗因為是我自己驗的﹗又唔知市面的驗孕棒是唔是真是準...我成 日都好驚...會唔會入到去醫生同我講 "無喎﹗點解你會覺得自己有咗呢?"
護士係我個肚度塗咗啲好凍的 GEL,叫埋我老公入嚟,醫生就開始啦﹗真係見到寶寶啦﹗照超聲波計寶寶的大小,大約是 9星期3日 (同醫生用我記得的最後經期計 10星期3日差 1星期),BB 頭同身的比例暫時是一比一﹗照照下的時候寶寶仲舉手﹗老公即刻問醫生是咩嚟...HEHEH...佢同我地 "SAY HI"﹗之後仲比我都聽寶寶的心跳...是好快好快架﹗
睇下﹗寶寶而家得28.4mm,得1寸多少少咋﹗
                             
以下係阿旺的:
當我第一眼睇到張超聲波相嘅時候, 其實唔知BB嘅正確位置架, 之後由醫生講解完就睇得好清楚啦, 當其時我真係開心到由心到笑出黎, 既開心又感動, 眼前呢個就係我地嘅BB, 再過多八個月我就做爸爸啦. 突然之間, BB隻手伸直, 好似出左個直拳咁, 我諗佢係想話比我地聽佢幾有活力掛哈哈哈.
每當我諗到我就快做爸爸嘅時間都會回心微笑, 但係一諗到生嘅時候嘅痛楚又替老婆擔心, 呢種心情真係好難形容.

                              HEEHE...由而家開始...我會記低晒每次檢查的過程,希望大家唔好覺得我太長氣,因為我實在想詳細啲咁記低懷孕的整個過程﹗有經驗的 BLOG 友不防比多啲意見我﹗多謝晒各位﹗
Related Posts Plugin for WordPress, Blogger...