2013年9月30日 星期一

傻夫婦拍拖食金雀


我認我是一個緊張媽咪,但我又唔係怪獸家長喎﹗我只是好想做好一個好媽媽,想將自己的時間 (可用時間) 比晒兩個囡,希望佢地感受到我的愛,所以做我老公都幾慘﹗相對地我同阿旺的拍拖時候真是少之有少﹗好多時講好去拍拖,我又會忽然之後改變主意,話要帶埋大一頭妹一齊去 (咁仲叫拍拖咩?),有時仲要帶埋小丸子 (呵呵呵)﹗﹗﹗我對佢的要求又鬼死咁高﹗大頭妹每朝刷牙洗面﹑帶返學,都係阿旺負責的﹗平時如果工人姐姐唔得閒,小丸子換片/ 洗 PAT PAT都係佢做嘅﹗但仲要成日比佢老婆話佢唔理啲囡 (無錯﹗即係我...講到唔關我事咁﹗哈哈哈﹗)﹗

上星期五終於都有得拍拖啦﹗我 book咗做 facial,差不多成 2個月無做 facial,今次一次過做埋 body massage﹗真是好舒服呀﹗﹗﹗ 之後約埋阿旺去 "金雀" 据扒﹗原本阿旺提議食韓燒放題﹗夜晚 10點仲食放題?﹗我...無 QUOTA喎﹗都唔見得佢有吖﹗﹗


最後我揀咗好耐無去的金雀﹗

以前係多士,轉咗餐包都好好味﹗


我地又係一紅一白﹗我愛紅湯,阿旺愛白湯﹗

我的黑椒牛柳 (10年如一日)

阿旺的金雀牛柳...原來係多咗一片火腿同蛋﹗

嘆完個星期五晚上,星期六﹑日又要開工湊囡﹗自從小丸子星期六早上要上 playgroup之後,佢本身另一堂星期六下午的 playgroup就轉咗去星期日上午,即係我地星期六﹑日都無得瞓晏啲,真係都幾攞命﹗

小丸子有用唔盡的力量﹗﹗﹗上完 playgroup,仲可以去公園完﹗﹗﹗返到屋企都唔瞓,同家姐再玩﹗

好怕小朋友食雪糕...不過我次次食的時候...大頭妹同小丸子都唔會放過我﹗

hehehe...大頭妹話佢 "揸牛奶",咁...隻牛應該係 "嘔奶"﹗﹗﹗

最後...今日原來大頭妹放假...我地傻更更...帶咗佢返學,佢返到屋企又後打比我同我講,佢今日唔洗返學...今日學校無 MS. BOBBI,無小朋友...HEHEHEH...等我今朝仲急急忙忙做埋佢份 "剪報" 功課 (WEEKEND的時候忘記咗﹗)﹗



2013年9月27日 星期五

我的美麗日記。。。男士專用面膜



哈哈哈﹗我家的阿旺得到「我的美麗日記」的邀請,試用新出的男士專用黑面膜﹗處女座的阿旺十分貪靚,今次仲晉身成為 「男beauty blogger」,名正言順比佢扮靚靚﹗不過都是由我代筆,如果要佢自己寫,可能 2046都出唔到 blog﹗

「我的美麗日記」今次新出的有 2款,藍色盒的是能量緊膚黑面膜,綠色盒的是淨化平衡黑面膜﹗兩款都用上碳黑微粒 (所以面膜也是黑黑的),有助淨化肌膚,岩晒好動多汗多油的男士啦﹗面膜亦特別加厚,男士們就不再怕有「一不小心」就撕破了面膜的情況 (大家都知「我的美麗日記」面膜是出名又薄又貼面啦﹗)﹗

heheheh...敷 mask前影一幅﹗我都講過好多次,阿旺的皮膚真是好好﹗明明大家一齊食薯片,點解出暗瘡的,就只有我﹗佢話因為佢有做運動喎﹗其實好耐都無見過佢跑步啦﹗

今次的男士專用黑面膜,比平時的加大了 5%。可以完完全全敷晒阿旺的大額頭啦﹗阿旺仲話覺得黑面膜型啲,敷完似 "蝙蝠俠",man啲咁話﹗

同平時用的「我的美麗日記」比,額頭位會有較明顯的分別﹗



使用方法:於潔面及使用化妝水後,將面膜輕敷於全臉,約20~30分鐘後即可取下面膜,若臉上仍留有精華液,可以指腹輕輕按摩幫助肌膚吸收,無需用水清洗,敷完面膜後請重複乳液/霜等日常保養程序,將滋潤成分鎖在皮膚內。

上次去 「我的美麗日記」beauty blogger event,柳燕老師教的﹗敷完 20-30分鐘之後,可以搓熱雙手,再按按面,加強吸收﹗


敷完的確更加水潤﹗

阿旺話去到第2朝都仲好保濕,唔洗再噴花水咁話喎﹗

再詳細介紹一下兩款黑面膜啦﹗(資料來源: https://www.facebook.com/MyBeautyDiaryHK)



藍色盒的能量緊膚黑面膜,著重保濕緊緻﹗ (阿旺用的就是這一款﹗)
能量保濕
採用深海墨角藻及平原黑麥籽的雙黑能量精萃,賦予肌膚滿滿的營養及水分,搭配碳黑微粒協同黑色布膜的貼膚載入機制,讓山金車花、菊苣葉及黃龍膽根等植物精華,瞬間潤澤乾燥角質,搶救乾渴的肌膚,呈現水.潤.透.亮的魅力型男。

緊緻拉提
一次給肌膚兩種緊膚複方,「水解彈性蛋白」及「水解蛋清」,其水解分子喚回肌膚底層的膠原蛋白因子,全面賦活緊實肌膚,再加入天然銀杏葉萃取,延緩老化維持年輕的彈力提拉。



綠色盒的是淨化平衡黑面膜,著重控油舒緩﹗
控油平衡
運用黑曜石礦物淨化油脂及髒汙的特性,搭配碳黑微粒協同黑色布膜的貼膚載入機制,注入金縷梅、蘑菇及淡化痘印的錦葵等精華,充份改善油脂分泌過盛、提升肌膚保濕度,達到完美的油水平衡狀態,並擺脫黯沉膚色不均,喚回帥氣零油光的淨顏肌。

清爽舒緩
協同天然純淨的「甘草萃取」及「蘆薈精萃」,能清爽、舒緩、修護受損角質,紓解日曬後肌膚的不適感受,快速提 升對環境傷害的防護力,回復健康的中性肌。



我的美麗日記facebook: https://www.facebook.com/MyBeautyDiaryHK
我的美麗日記網頁: http://www.beautydiary.com.hk/



2013年9月26日 星期四

大頭妹 X 大頭貓貓 TEE

今日出個 hea blog,話說上次BOSSINI X OCEAN PARK的活動,其實大頭妹同小丸子都收到一件TEE,不過因為小丸子病病豬,無份去海洋公園,另一件TEE的真身就無出現過﹗我好鍾意呢件貓貓TEE,佢眼仔個位係有夜光,而且好明顯,晚夜係屋行去暗的位,就已經有夜光啦﹗噚日落 BOSSINI睇,鋪面仲係未有,唔通得ONLINE SHOP/ OCEAN PARK先有?﹗

哈哈﹗今年學校 HALLOWEEN PARTY可以著啦﹗

點解用大機影都朦朦地?﹗



岩岩電視播海洋公園 HALLOWEEN的廣告,大頭妹見到好開心,話自己噚日去過...

對大頭妹嚟講,所以發生係今日之前的事,都叫 "噚日"﹗﹗﹗所以佢 "噚日" 都做咗好多野﹗






2013年9月25日 星期三

花膠螺頭北芪黨參紅蘿蔔粟米湯

天兔比報紙講到咁勁,搞到平時唔會特別因為打風買多啲餸嘅我,都叫工人姐姐買多啲豬肉看門口﹗工人姐姐真係好 "聽話",足足買咗 $120豬肉﹗﹗﹗哈哈哈...忽然有咁多豬肉,咁煲湯囉﹗雪櫃又已經有準備好的花膠同響螺﹗一於就煲 "花膠螺頭北芪黨參紅蘿蔔粟米湯" 啦﹗個名係唔係好長好有氣勢呢?﹗



花膠螺頭北芪黨參紅蘿蔔粟米湯

主要材料: 花膠 1隻/ 瑤柱 2粒/ 豬肉 $35/ 紅蘿蔔 2條/ 粟米 2條/ 淮山 3-4片/ 杞子 2湯匙 (後下)/ 薑 1片

可加可減材料: 響螺 2-3隻/ 圓肉 2湯匙/ 北芪 4-5片/ 黨參 3條/ 沙參 20條 (隨量啦...唔洗真係數架﹗)

主要材料是中醫介紹的,佢話男女老幼都可以飲,強身健體﹗可加可減材料是我自己的喜好﹗不過其實響螺﹑北芪﹑黨參﹑沙參都唔咩大補的藥材,小朋友飲 "應該" 都無問題,小丸子都有飲咗 2杯 (飲埋大頭妹個杯),大頭妹就後來比我 "迫" 佢飲咗 1杯仔﹗

做法:
1. 花膠浸 1晚,用薑蔥煲3-5分鐘,洗淨切件備用。
2. 螺頭洗乾淨,用薑蔥煲3-5分鐘,洗淨切件備用。
3. 豬展飛水備用,藥材洗淨 (淮山分開用水浸30分鐘)。
4. 將所有材料放入高速煲,大火煲至紅點升起之後,用小火煲 30-45分鐘。減壓之後再用大火煲 15分鐘。 (如用其他煲 (真空煲除外),煲滾4公升水,將所有材料放入,大火煲滾之後用小火煲2小時)
4. 下鹽調味。

花膠是先一晚浸,浸軟之後就可以用薑蔥煲 3-5分鐘 (其實浸的時間是事乎花膠本身,最好買的時候就問清楚老闆,我見我老闆買的花膠前前後後要浸4日,一包成 $3萬﹗我的是$900/包,不過我諗我的先係 正常...HEHEH)﹗煲好之後可以放入密實袋放入冰箱﹗咁可以一次過預備定幾次的份量,一解凍就可以用啦﹗


其實好多時煲湯都係為咗大頭妹,想佢飲多啲靚湯,就長多啲肉,而且返學成日有機會接觸細菌,飲多啲湯水,抵制力都好啲嘛﹗

不過呢個排骨妹唔好湯,佢淨係鍾意飲佛手瓜紅蘿蔔粟米無花果南北杏湯,次次煲都可以唔洗迫的情況下飲 2杯﹗我都唔明點解﹗我估佢應該係鍾意佛手瓜/ 南北杏的味道﹗

呢個肥妹就大部份的湯都飲,上次的花膠湯,佢個碗無鹽的,都飲到佢 lam lam脷﹗飲完仲要飲埋家姐個碗﹗




2013年9月24日 星期二

小丸子幼稚園大作戰

開始幫小丸子報幼稚園 N班啦﹗由於 N班間間都無學劵,我一早已經預咗小丸子報讀大頭妹的一間就可以了,唔需要特別去考學校。不過大頭妹的幼稚園只是話優先,咁其實係唔係等於 "必收" 呢?﹗ 而且我地應該要小丸子考有學劵的 K1幼稚園,如果兩個一齊讀無學劵的,阿旺賣身都唔掂﹗其實我直頭有考慮今年要大頭妹去考有學劵的 K2﹗哈哈哈﹗

當 WARM UP,都要比佢考多幾間 (其實連playgroup的老師都叫我報多幾間,話龍b的競爭好大﹗),$30當買一個實戰經驗,都抵吖﹗臨近考試,我先發現其實我對小丸子唔多了解。想當年同大頭妹去考試,老實講,老師一問問題,基本上我已經知大頭妹識唔識答/ 做﹗小丸子呢...我真係唔太清楚佢識啲咩?﹗當年阿旺都有陪大頭妹去 INTERVIEW,我估小丸子應該唔會跟佢,即係一定係我入去 INTERVIEW。

哈哈哈﹗提外話...我終於明白點解有啲學校明明有網頁,都要 "擇日" 派表,其實都唔係 "虛張聲勢”,係比爸爸出一分力﹗事源阿旺 "從來" (女人最鍾意用從來)都無理小丸子考學校的事,就算當年大頭妹,佢都應該唔知我幫大頭妹報咗咩學校,不過今年阿旺自己一個去蘇浙幫小丸子攞報名表,起碼都叫有 "參與" 過﹗唔係可能比我講到兩個囡上小學都仲要話佢唔理啲囡報幼稚園的事﹗﹗﹗


係咁意介紹下我睇過的幼稚園啦﹗唔會報晒﹗因為有啲學費太貴,真係考到都唔會讀,雖然可以照比 $30考﹗
 
太古: 

康怡維多利亞幼稚園 *未開始,預計 11月開始,我地唔會報...學費太貴啦﹗
http://www.victoria.edu.hk/eng/Admission/Nursery_And_Kindergarten/Application.php

康怡中英文幼稚園 *呢間係近年升得好快的幼稚園,學費都一樣升得好快,所以都唔會報)
 http://www.kornhill-edu.com/int/news_popup.aspx?id=6b5c159c-cc7c-4b71-9240-d181e2c86017
Nursery (9:00am - 12:00noon noon or 1:00pm - 4:00pm )  $5000.
K1 , K2 & K3 (9:00am -12:00noon) 12:00noon to 2:00pm optional extended time (includes lunch time). Both choices have the same school fee of $5250.

St. Anna Anglo-Chinese Kindergarten and Play School *好似都係派一日form,上網唔見有資料,但有form可以download)
http://www.stanna.edu.hk/dl/Microsoft_Word_Viewer.pdf

寶寶幼兒學校 *已報
http://www.bobonursery.com.hk/fee_apply.html


北角:

蘇浙幼兒園 *已截止 (明年開始 K1取消學劵,即是龍B無學劵啦﹗唔知會唔會易入咗呢?)
http://www.kcs.edu.hk/nursery/info/2013/7/ns201307info_1.html


北角衛理堂幼兒園 *會報 ,11月尾截止報 PN,10月尾截止報 K1。 (但除住蘇浙取消學劵,要考入衛理堂的難度應該會增加﹗)

http://www.npmc.edu.hk/family.htm

明慧幼稚園/ 明慧國際幼稚園 *已報

http://www.mingwai.edu.hk/MingWaiDir/CADM/CHN/ADM_NorthPoint/MWKGADM_NP_Chn.htm
本地: PN半日: $2340/ K1-3半日: $2646
國際; PN半日: $3440/ K1-3半日: $3530/ PN全日: $6680/ K1-K3全日: $6710


杏花村:

啟思幼稚園(杏花邨) *已報

http://www.creative.edu.hk/12-school/heng-fa-chuen/index.html
半日班:  2012至2013年度全年港幣34,570元,分十期繳交。
全日班:  2012至2013年度全年港幣48,260元,分十期繳交。


西灣河:

明我幼稚園 Dominic Savio Kindergarten *未開始,預計 11月開始
http://www.dominicsaviokg.org


以下可以睇下幼稚園排名 (其實都係攞個REFERENCE,唔洗太認真):
http://www.bookofschool.com/school/controller/schoolSearch

以下可以睇到全部幼稚園的名單 (不過我覺得學費已經唔 UPDATE):
http://www.schooland.hk/kg/eastern


2013年9月23日 星期一

中秋節


今年中秋節正日,不用返老爺奶奶/ 娘家做節,簡簡單單去 APITA FOOD COURT食個 QUICK DINNER,再帶 2個囡去鰂魚涌公園玩花燈同賞月﹗原本仲想整湯圓,不過唔夠時間,而且已經食得好飽﹗去完公園去 UNIQLO買咗兩件 TEE比工人姐姐,依家啲夏天 TEE,男女童裝都是 $39,真是勁勁勁抵呀﹗﹗不過大頭妹已經有好多,所以我都無再買﹗

追月個日整湯圓,不過整得好恐怖﹗其實係我唔好,我整得個芝麻太水,我估可能要雪下佢﹗哈哈哈﹗難為阿旺...係大頭妹的監察下...要食晒佢﹗

出發﹗霸埋阿妹個燈籠﹗

HEHEHE...阿旺返學的日子,我一星期都會食一次﹗味道OK,一個SET都係 $50﹗

大頭婆婆的海鮮燴意粉,即叫即煮要等 15分鐘,$55﹗

食完就去鰂魚涌公園玩下,我地都係第一次晚上嚟玩﹗好大的月亮﹗

今日個公園好熱鬧﹗

大頭妹玩得好開心﹗

第2日追月,留係屋 "整湯圓" ﹗﹗﹗

有邊個小朋友唔鍾意 "搞搞震",玩 "粉" 一定開心﹗

HEHEH...今次試整少少﹗

完成品...好恐怖﹗﹗﹗

睇下阿旺個樣...幾無耐...真係 "唧" 都笑唔出﹗喂﹗你兩個囡,同靚靚老婆整架﹗難食都要食晒佢﹗﹗﹗

HEHEHEH...我只能話...我對你 "深表同情"...WAHAHAHAHAH...

2013年9月19日 星期四

祝大家中秋節快樂

我地一家祝大家中秋節快樂!

今晚決定去food court做節 (wahahah...唔洗煮),之後再帶兩個寶貝囡去鰂魚涌公園玩燈籠!仲想親子整湯圓!希望夠時間啦!

 

今日大頭妹幼稚園中秋節party!帶燈籠返學校玩,我地仲預備咗沙田柚比佢帶返學校食!

之前同大頭妹一齊做的環保燈籠 (學校功課)!

哈哈,係肉酸少少,不過除咗要用界刀的部份,大部份都是大頭妹自己做的!

最後,多謝美素佳兒送比大頭妹同小丸子的中秋節禮物!

小丸子鍾意個紙箱多啲!(見唔見到大頭妹係個紙箱入面?!,)

Related Posts Plugin for WordPress, Blogger...