2016年9月30日 星期五

最近



最近...又失蹤了一個星期,大頭妹升上小一之後,我真是好忙好忙,今年目標是『善用時間』,希望可以做到 『Work Hard Play Hard』!再加上我自己夜晚煲韓劇月,之前一口氣追晒 Doctors﹑任意依戀﹑W 兩個世界 (我都覺得自己好厲害﹗),依家好少少得返一套步步驚心:麗 (但搞到我一套要睇 3-4次先等到下一星期)...哈哈...可以想像我有幾忙...哈哈哈﹗

平時的日程是這樣的:
6:30 落校車
6:30-6:45 食茶點,輕鬆傾下計
6:45-7:00 沖涼
7:00-7:30 做功課 (9月份的功課量,暫時都可以 30分鐘之內完成)
7:30-8:15 晚餐
8:15-8:30 休息
8:30-10:00 做功課/ 溫習/ 練琴
10:00-10:30 陪玩時間: 睇故事書/ 玩 board game/ card game
10:30 訓覺

其實盡量想10:00前訓,但發現佢地2個好少10:00就訓得著,所以就由得佢地,反正返下午班,早上可以訓到自然醒,不過佢地通常8:00都起身,都有 9個多小時睡眠。

大頭妹學校暫時未開始默書,仍然十分 happy,不過岩岩開完家長會,知道10月份就應該嚟料,會開始中英文默書﹑小測﹑評估﹑仲有大量網上功課 (可做可唔做),我相信以大頭妹的中文程度,中默...應該都...幾有挑戰性,我自己到目前好滿意自己的表現,教功課時都算心平氣和,大概是大頭妹其實都進步了很多,不用我太勞氣。

反而是小丸子,有時真是覺得對佢唔住,成日唔記得叫佢做功課,通常都是搞掂晒大頭妹先記得佢,搞到佢有時好夜先做功課,好彩小丸子同大頭妹完全相反,佢做功課非常快,字體就...肉酸啲,好彩暫時都是寫好簡易的字,學校都算是循序漸進。


大家 like 咗我地個 facebook page未呀?﹗未就快啲 like啦﹗




2016年9月17日 星期六

平常的星期日

2016年 9月4 日 (星期日)

最近都好少返娘家,通常都是大頭婆婆過嚟搵我地,今日襯大頭妹小丸子岩岩開學,未係太忙,學完芭蕾舞就返娘家吃晚飯。我自細就好鍾意食上海年糕,嫲嫲是上海人,常常煮上海年糕和菜飯,媽媽亦盡得嫲嫲的真傳,但我就仲未學識,所以每次返娘家,媽媽都是煮年糕/菜飯,呵呵呵,今日我又有得食啦﹗

上海炒年糕,我可以食 3碗﹗

蒸雞

花膠海參炆冬菇

炒芥蘭

當日一早帶埋大頭小丸去投票,盡一下公民責任﹗

2016年9月16日 星期五

大頭小丸芭蕾舞匯演【胡桃夾子】



2016年 8月 30日 (星期二)

大頭妹同小丸子今年是第2年參加芭蕾舞學校的暑期匯演,上年是『愛麗斯夢遊仙景』,今年是『胡桃夾子』。其實佢地不經不覺都跳差不多 2年,呢 2年嚟參加過唔同的商場表演﹑比賽,所以今次去睇表達的心情無上年咁緊張,大確都知佢地的表現。

佢地今次做『玩具士兵』,唔知點解我覺得佢地套衫,次次都是最唔靚既?﹗有啲做小老鼠﹑花仙子,啲表演衫都好靚架﹗


今次最 surprise 是大頭妹得到『傑出學員獎』,學校無事先通知我地。大頭妹上年參加咗 2個比賽,同 2個表演,所以比個獎佢,鼓勵一下佢的付出,佢自己之後好開心,話會努力練習喎﹗聽大頭妹講,比賽班比平時嚴架﹗


大頭妹真是好瘦,其實依家小丸子都唔再肥妹了,只是家姐太瘦,相比就肥少少。

今次嫲嫲同婆婆都有一齊睇﹗

大頭姨姨是專登路過睇下佢地 2個既。


唔知下一年會唔會再參加啦﹗因為都會睇下大頭妹小一的情況,再調整一下佢地的興趣班,不過學校有好多表演機會比學員,實在是好難得﹗

大家 like 咗我地個 Facebook page 未呀?﹗未就快啲 like 啦﹗

2016年9月15日 星期四

阿旺生日飯【南亭】@20160831



2016年8月31日(星期三)

想試南亭好耐,終於襯老公生日的日子試一次,價錢有點貴,不過阿旺話貴得合理,食物水準係有分別呢!

Hehe 今日又二人世界,因為估計2個開學之後應該冇咩時間可以二人世界,暑假要用盡啲 quota!

又飲啤酒!

燒牛舌 $78 超級好味!真是非一般的好味,必食推介。

燒白鱔 $98 真是好彈牙,連平時唔好魚既我都覺得好好味,皮燒得好脆,肉質彈牙,十分有水準!

這個是海鮮set,沒有記錯是 $288,有4款海鮮,以下是一人份。

其實應該是一隻鮑魚,不過今日沒有鮑魚,換成 2隻蝦 (散叫 $88)。

帶子 (散叫$128)好好味!阿旺連汁都飲埋,話好鮮甜。

魷魚算是set之中既飽肚之選。

螺無咩特別,但阿旺又是連汁飲埋,啲汁好甜,佢話好似平時飲響螺湯。

其實是冬菇雞肉丸,我影唔到啲雞肉,呢個都好味道,好似仲有少少雞軟骨係入面!

燒牛肉 $80,點了普通的燒牛都好好味,另外有安格斯牛柳好似$138。

燒芝士雞翼 $68,食唔到有芝士,反而有啲青紅椒係入面。


燒銀雪魚 $98,放心不是燒焦了,應該是我影相問題,我比較喜歡銀雪魚,好滑好juicy!


返到屋企當然要同2個女切蛋糕啦!

最後食得太飽,沒有叫飯團,其實都好想試,如果唔食海鮮類,其實都唔貴既,下次會再去!






2016年9月14日 星期三

千両@20160827

2016年8月27日 (星期六)

今日的行程好緊密,暑假尾要玩盡啲﹗上完 Sky 100,預備再去睇 Hi-5 show,中間打算食個 tea,係 Elements食間間都唔會平,所以都是揀食壽司,起碼 2個女一定鍾意。哈哈﹗我竟然因為咁,第一次食千両﹗

其實我又真是食唔出千両同元氣既分別喎!我諗食物種類會多少少,好似多啲熱食﹗




無蟹柳卷,比大頭妹試下蟹柳手卷,好彩都食晒。

睇下小丸子的惡行,挑晒啲三文魚子出嚟,比咗舊飯我囉!

蜆麵豉湯,已經算不錯,但是我煲既好飲啲,出面飲既都無蜆味。

上次去日本食過炸魚餅,今次再點比2個女食,都ok喎,事關大頭妹好多野唔食,佢話魚餅好味。

我今日算唔算呃 blog 呀?﹗

大家 like 咗我地個 facebook page未呀?﹗未就快啲 like啦﹗


2016年9月13日 星期二

傻夫婦九州親子之旅 DAY 5 【海之中道海濱公園】


2016年 7月14日 (星期四)

去到福岡又點可以唔食一蘭呢?﹗一早打算唔洗趕火車的早上去食當早餐,但原來唔係間間都開24小時,多得酒店附近的一蘭 10:00 先開門,所以我地可以訓晏啲,食拉麵當 brunch,再出發去海之中道海濱公園﹗


依家都好多餐廳用買票機,不過好多都有圖,所以自己落單都無難度。
 

尋日食個拉麵覺得好好味,今日食一蘭又覺得唔同風味,不過都一樣好好味﹗

好似無論去邊都是由博多出發方便啲,其實我地酒店樓下就有巴士去海之中道海濱公園,不過因為不是假期,車程要 1小時,我驚我暈車浪,所以最後都是坐地鐵,再轉西鐵,再轉 JR﹗不過其實站同站之間好近,所以都唔係太唔方便。今次呢個 TRIP,我發現日本人的英文真是進步咗好多,我地沿途問路,次次都問到,大家都明大家講咩﹗

 

海之中道海濱公園】真是超級大﹗﹗﹗我地租了單車,最後玩了 5小時,都未玩完個公園,最最最搞笑是...我返香港見到海之中道海濱公園 FACEBOOK 的宣傳 VIDEO,先發現...我地未去過 公。園。正。門。呀﹗因為我地一入公園,租完單車就轉右踩,之後踩返出公園中間的 FOOD COURT 加 小朋友公園以為係正門,原來是『西口』﹗玩咗 5個鐘,連正門都未去過,CLASSIC﹗

呢度租單車好平 (大人 400YEN 4小時/ 小朋友 250YEN 4小時),不過就無好似豪斯登堡個款家庭單車 (佢有 2人車,可以載小朋友),所以我上次去 『沙田海悅酒店』就同大頭妹小丸子預習一次,大頭妹基本上無問題,有輔助轆的可以自己踩,小丸子就踩得慢啲囉,不過都踩足全程,要比個叻叻佢地兩個﹗


仲有頭盔借﹗

有好多唔同款式的單車可以揀﹗

由於我地行錯路,所以第一站就去咗動物園,睇小動物﹗

餵羊都玩咗好耐,有隻山羊好為食,有隻黑羊又好醒,所以綿羊仔基本上無得食﹗



之後去抱『兔仔』,不過後來...大頭小丸都有問,點解兔耳咁短?﹗其實係咪兔仔?﹗UM...其實我都唔知...有冇人知道?﹗


黑豬 VS 黑豬仔...其實平時我係屋企叫小丸子係黑豬/ 黑熊﹗

袋鼠 (點解小丸子擺 POST 咁得戚?﹗)


呢隻水豚好得意﹗

佢地摸得隻水豚好舒服,摸摸下訓咗﹗

大頭妹問點解呢隻草泥馬是微笑既?佢唔講我都唔為意,所以咁多人鍾意佢?!
 

玩到超晒時,原本預計3:00pm走,依家3:00pm先食tea,又要 cut我啲 shopping time。

呢度個food court都有幾多選擇,咖哩飯﹑拉麵﹑烏東都有齊,仲有八爪魚丸之類的小食。

 阿旺竟然揀咁熱氣的薯條﹗

我真是熱到食唔落,同小丸子去買雪糕,最後...我地一人一粒...但小丸子食 3粒﹗呢款雪糕都幾好味﹗


大把飲品比你揀﹗

日本的公園真是好好玩,有沙有水玩。

今過今日堅曬!

阿旺同小丸子玩咗,完全是燒pat pat!

完全放電...見佢地玩呢個我已經好驚,因為小丸子真是會玩到無晒電先停,大頭妹個人就好節制,一陣玩晒啲電,佢一離開公園就會叫抱。






200YEN 玩一分鐘到...唔抵玩﹗

有咁多免費野玩,坐一次車就夠了﹗

專登帶多一套衫嚟玩水,不過2個囡已經無電﹗其實我地未係日本暑假嚟,如果唔係有個 SUNSHINE POOL,係非常大型的玩水設施,我地去的時便差2日先開...嗚嗚嗚﹗如果夏天帶小朋友嚟,真是要預足一日先會玩得晒﹗

日本的天真是特別藍﹗今次算好好彩,其實我地嚟 6日,差不多日日落雨,今日全戶外玩公園就好好天﹗

日本公園的設施真是好完善,我成日都唔明,鰂魚涌公園咁大,點解可以一個洗手間都無﹗


之後本身想坐船去【Marizon】,即是福岡塔旁的 outlet,諗住晚上可以順便去埋福岡塔,但是我之前一直搵唔到【詳細交通】,原來網站係有架囉﹗﹗﹗我估唔到公園收 5:00,尾班船竟然是 4:40﹗我依家搵到啦﹗http://www.uminaka.go.jp/img_institution/Access.pdf,click 入去有齊全部來回海之中道海濱公園的交通時刻表,包括 JR﹑西鐵﹑巴士﹑船﹗囉﹗囉﹗囉﹗條氣仲係唔順﹗點解當時見唔到﹗

呢個係平日的時刻表,原來星期六日會有多啲船,去 Marizon 只是 20分鐘船程咋。


我地 miss 咗尾班船,基本上就去唔到,因為坐 JR出返博多都 1小時,由博多再去 Marizon 又要30分鐘,因為佢地的地理上是一個 c字,Marizon 同海之中道海濱公園是對面岸,博多是 c字的中間位。

*碼頭位置是公園的西口,海洋劇場旁邊,我地今日去海洋劇場無開,如果開咗就可能坐到尾班船啦﹗

JR的時刻表。

坐唔到船,又行咗好多路,之前玩公園大頭妹小丸子又放晒電,唔想自己發脾氣,一人買一杯雪糕,點知我買食的咖啡味又賣晒,我係唔係真是咁黑呀﹗﹗﹗

佢表情根本就是問...又影...比我食啦﹗

之後我地坐返 JR,再轉西鐵走,係月台見到班車好似岩又未買飛,個站長好好比咗張咁既野我,再示意我地可以上車,太好啦﹗唔洗等多班車,我驚郊外地方班次唔太密﹗


終於又成 6點幾先返到天神,阿旺唔想我失望話可以照去MARIZON,不過其實酒店樓下已經有 7-8個大商場都唔止,所以我話佢地返酒店休息一陣,我落樓下SHOPPING就可以,最多夜少少食飯,最後小丸子訓到9:00先起身,我地就去食福岡的最後晚餐啦﹗

海之中道海濱公園: http://www.uminaka.go.jp/

傻夫婦九州親子之旅行程一覽:
傻夫婦九州親子之旅 DAY 1 【HK EXPRESS 初體驗/ SOLARIA NISHITETSU HOTEL/ ひょうたんの回転寿司 】
傻夫婦九州親子之旅 DAY 2 【JR KYUSHU RAIL PASS/ 新幹線初體驗/ 熊本/ KUMAMON SQUARE 】
傻夫婦九州親子之旅 DAY 2 【 熊本/ 熊本城/ 櫻之小路 】
傻夫婦九州親子之旅 DAY 2 【晚餐: 華味鳥 】
傻夫婦九州親子之旅 DAY 3 【豪斯登堡/ WATERMARK HOTEL/ 花之家】
傻夫婦九州親子之旅 DAY 3 【豪斯登堡 WATERMARK HOTEL/ 花之家(午 + 晚餐)】
傻夫婦九州親子之旅 DAY 4 【豪斯登堡/博多車站拉麵街/天神】
傻夫婦九州親子之旅 DAY 4 【晚餐: 大東園】
傻夫婦九州親子之旅 DAY 5 【海之中道海濱公園】
傻夫婦九州親子之旅 DAY 5 【晚餐: 博多名產牛雜鍋笑樂/ 宵夜: 屋台初體驗】
傻夫婦九州親子之旅 DAY 6 【星乃咖啡店/ 福岡機場】
  大家 LIKE 咗我地個 FACEBOOK PAGE未呀?﹗未就快啲 LIKE 啦﹗
 


Related Posts Plugin for WordPress, Blogger...