2012年4月30日 星期一

幸運遇著妳

Athena渡過左十個年頭,由拍拖、買樓、結婚、大頭妹出世、換樓、小丸子出世...當中都有預到一些困難/問題,幸運地所有嘅問題係未去到最壞情況時侯已被解決,但最令我感到幸運的其實係比我預上Athena

到今時今日我都唔肯定點解當年佢會鍾意我﹖﹗有睇開我地
BLOG嘅可能都記得,我地嘅開始係因為我幫佢解決博懵男嘅問題,不過呢個唔係今次嘅重點,我係想講下幸運遇著妳

回想起十年前我係一個做事求其、成日走精面走捷徑,仲要比較幼稚嘅人,好似好不知所謂咁,但其實我都有少少優點的,例如: 頗有責任感、上算勤力、有小聰明、雖然係天真但係都算靚仔。而Athena係一個做事好認真、有理性同好成熟嘅人。正正因為我地嘅性格咁極端,所以 十年以黎佢改變左我好多,我可以話多得佢先有今時今日嘅我。佢不時提點我處事嘅態度,當我作上遇到問題我都會搵佢幫手一齊解決。我英文好差,佢又會幫我補習同剪英文報紙比我讀。不久之後我終於完成左我向佢求婚時嘅一個承諾讀好英文,好開心幾年前我終於英文會考考到合格。
家庭方面佢好多野都打理得井井有調,除了清潔、打掃這些家務由我負責以外,差不多其他事情都係由佢一手包辦,煮飯煲湯不在話下,又幫我買衫(因為我唔識襯衫),又為我學香燻按摩真係好難得。置於大頭妹嘅教育/報學校又係佢搞,我只係略知一二。佢就好似一個萬能太太咁,乜都搞得掂。佢口口聲聲話唔比我打機,但其實部GAME CUBE X-BOX 都係佢送比我的,仲好多時陪我一齊玩添,不過大頭妹出世之後我都成一年多無打機
我用幸運黎形容遇著Athena真係唔過份。

2012年4月27日 星期五

我的5日4夜生小丸子記 (1)

我的5日4夜生產旅程 (1)
2012年4月27日上午8:00公開累積瀏覽 15068
 



襯記憶仲深刻,快快手寫我今次生小丸子的經歷﹗

2012年4月18日
我夜晚11:00幾開始 "陣痛",痛了大約1小時多,不過就不是有規律的痛,有上次的經驗,今次打算真的痛到不能再痛先入院,因為一入 "代產室" (瑪麗醫院的K9南) 就要自己一個,留係屋企都仲有阿旺陪我嘛 (上次足足痛了10小時才入產房)﹗我叫阿旺執一執個走佬袋,因為本身打算放產假的時候才執嘛,所以仲有一些濕濕碎的物品未執好﹗點知痛了1小時之後,突然無動靜,完全唔痛,我以為只是 "誤嗚" 就去瞓啦﹗

2012年4月19日
第2朝起身又無痛喎﹗我地都如常返工啦﹗點知一返到公司就 "出事" 啦﹗﹗﹗大約10:00又開始無規律的 "陣痛"﹗我就開始一邊做野一邊記底陣痛的時間,越記就越唔對路...仍然是無規律 (上次生大頭妹的時候,明明真是好有規律的,真是5分鐘一次呀﹗),但就越來越密,已經去到3-5分鐘一次﹗﹗﹗我開始覺得有少少唔對路,仲想 "大便" ,之後我入咗洗手間,用咗2下力之後,竟然有少少紅色野流出嚟﹗我知道我唔可以再留係洗手間,我唔想小丸子係洗手間出世﹗我即時打比阿旺叫佢返屋企攞走佬袋 (我仲要連本 "粉紅色書仔" 都放咗係走佬袋﹗大家記得36週後就要跟身...唔好好似我咁﹗),我就自己坐的士上醫院﹗

我慢慢由洗手間行返OFFICE,用最快的速度做好 "緊急" 的事﹗其中竟然包括打去屈臣氏訂水之後就鎖門離開OFFICE啦﹗當時是下午12:00﹗

我係的士的時候已經要開始深呼吸,有幾下仲痛到叫咗出嚟 (HEHEHE...唔知當時個的士司機驚唔驚呢?﹗)﹗我WHATAPPS我阿妹同佢講我入院,我只是通知了阿妹,我 "當時" 仲以為我上到醫院仲有大把時間﹗﹗﹗點知...

我大約12:15落車﹗當時已經痛到行唔郁,不過行唔郁都一樣要行﹗唔通真是係的士生BB咩?﹗做戲先會係的士生BB嘛﹗仲唔知點解有人見到一個痛到面客扭曲的大肚婆都仲要我讓路,等電梯的時候又有2個女仔係我旁邊手舞足蹈,我想自己行開少少又行唔郁﹗

出電梯之後仲要行入K9南...只是短短10幾步...忽然變成世界最遙遠的距離﹗我入到去收症的位置,個護士問我幾耐痛一次同有冇便意,我答佢 "3-5分鐘,有",之後佢再問我第幾胎,我答完佢第二胎之後,佢就好緊張,問我攞本粉紅色書仔,但當時阿旺未到,咁佢就叫我即刻去另一邊上床﹗當時個護士同我講 "你一唔痛就好換衫啦﹗" ,我一換完佢就同我講 "你一唔痛就好瞓底比我檢查啦﹗",一檢查完佢問我上一胎係幾耐之前,我答佢2年前...佢已經話我入得產房啦 (我自己都驚一跳,上次足足係代產室痛了8小時才入產房,今次都唔知有冇8分鐘)﹗﹗﹗

一入到產房都是一樣,佢地同我講一唔痛就好由輪椅上床啦﹗一上床我就問護士打止痛針,佢同我講無呢樣野架﹗比笑氣你先啦﹗我開始大叫啦﹗比個有經驗的護士制止,話我會嚇親BB﹗我嗅咗大約3啖笑氣,我已經聲到佢地叫 "拆床" 啦﹗然後叫我拉手柄,仲同一時間穿羊水﹗我真是左手一拉手柄就用力...護士已經話見到頭﹗﹗﹗

當時我聽到佢地話阿旺到咗,不過我都知佢地係呢個時間唔會比阿旺入嚟架啦﹗今次唯有靠我自己啦﹗個護士再提我另一隻手都要拉手柄,我一拉落去再用力,佢地已經叫我可以停啦﹗我估應該已經出晒個頭﹗之後反而係我問個護士我可以再用力未﹗佢叫我 "咳" 幾下﹑再用力﹑又 "咳" 幾下﹑再用力...小丸子已經出世啦﹗之後隔一陣我就聽到阿旺把聲啦﹗

今次一切本來都好似好順利,點知...(待續)

2012年4月24日 星期二

小丸子出咗世啦﹗

哈哈哈﹗無見我幾日﹗我估大家都估到架啦﹗小丸子出咗世啦﹗今次的生產經歷實在太驚險啦﹗原來電視劇話啲人差啲係 "的士" 生BB是真的有可能的﹗﹗﹗我就是差啲係的士就生了小丸子的一個﹗﹗﹗但生產的BLOG要花點時間寫,下篇再講﹗

今次睇下相先啦﹗

第一張全家福﹗(唉吔...仲未係...仲差大頭妹﹗)


小丸子 "我同家姐姐似唔似呀?﹗"

2012年4月19日 星期四

大頭妹23個月啦﹗

 


又拖了2個星期才寫大頭妹的成長日誌﹗今個月因為有幾日復活節假,自己多了時間湊囡,好多之前想開始要訓練大頭妹的事,都逐一試過啦﹗例如要佢自己用匙舀食物/ 用杯飲水/ TOILET TRAINING啦﹗

其實大頭妹一早已經識用叉食生果/ 蛋糕,不過就好少自己用匙舀食物﹗叫工人姐姐比佢自己食,佢通常都當我耳邊風﹗我都明...平時餵都可能要食 20分鐘 (如果唔合作),比佢自己食的話可能半個鐘都食唔完﹗不過都快2歲,無可能試都唔比佢試,不過我發現原來佢都識架﹗依家有時我地食晚飯,我都會比佢埋枱 "搞搞震"﹗自己舀湯都可以飲到半碗﹗ 

最初就是由 "乳酪" 開始,一來大頭妹鍾意食,二來佢半固體,比較容易成功﹗


睇佢個樣幾滋味﹗

 
比媽媽讚仲好得戚﹗
 

囡呀...其實你要識好耐架啦﹗
 

至於TOILET TRAINING,其實佢都識叫 "POO POO" 架啦﹗不過就唔係次次都叫囉﹗有時無聊,見我唔理佢,佢就叫下囉﹗因為佢次次一叫 "POO POO" 我就會有反應嘛﹗不過ANYWAY,我的目標是放產假的時候教識佢 (好大口氣)﹗﹗﹗

其實最近好少影VIDEO,因為阿旺好忙,成日都好晏先返 (其實都是 7點幾8點),不過食完飯﹑沖涼,已經要入房暗大頭妹瞓啦﹗好少同大頭妹玩﹗最近2個傻人鍾意玩 "坐單車" (其實我都有份...)﹗識飛的單車﹗

2012年4月18日 星期三

MY BB親子同樂日



上 星期日,帶大頭妹出席了MYBB.COM.HK的BLOGGER的活動﹗再一次多謝PR SHERYL的邀請,我地都是第一次以嘉賓的身份出席商場活動,感覺都幾得意﹗MYBB.COM.HK是一個新的肓兒資訊平台,有齊產前﹑教育﹑以至消費 資訊,一次過滿足我地媽媽的多個要求﹗﹗﹗

同大頭妹影相,掛住食唔理我﹗


同我影就唔理我,同爸爸影就笑得咁開心﹗


仲搶我相機﹗

未開始之前,大頭妹自己食零食打發時間﹗
總共食咗3塊長餅同3粒芝士魚﹗﹗﹗

視帝黎耀祥是MYBB.COM.HK的代言人呢﹗


MYBB.COM.HK除了自己的網站,仲有APPS架﹗
大家上APPS STORE打 "MYBB" 就會找到﹗

到阿旺上台啦﹗個主持介紹佢係 "星級爸爸BLOGGER JOE"﹗
咁唔該呢位星級爸爸BLOGGER打少啲機,幫手寫下BLOG啦﹗


阿旺個樣幾正經?﹗


大頭妹見到爸爸上台就想衝出去 (比我用腳夾住)﹗
搞到我影唔到爸爸答問題﹗


之後忽然去同笨C玩﹗

笨B爸爸教大頭妹玩 "小明" 。

佢仲同笨B爸爸傾計﹗


之後兩個小朋友一齊跳舞。

爸爸返嚟啦﹗

大頭妹竟然鍾意飲寶礦力,但唔飲可樂﹗﹗﹗

活動3:00就完啦﹗之後我地第一次去食牛陣﹗下個BLOG再講﹗HEHEHE...又呃多一個BLOG﹗

LUNCH@牛陣




之前成日聽朋友去食牛陣,有任食 SHABU SHABU/ SUKIYAKI,我同阿旺一直都好想去試,不過又一直都無去 (其實我地都好少出街食)﹗岩岩新都城間牛陣就是在我地參加活動的場地附近,行過去望下個價錢牌,覺得都OK,$48已經有一個LUNCH SET,所以就入去試下啦﹗不過最後阿旺話想食 "放題" (任食),要 $78@﹗佢話食完夜晚可以唔食DINNER喎﹗我本身想食 SUKIYAKI要 $58,見差 $20...就下佢啦﹗

大頭妹去到要自己飲茶﹗

 

唔知做咩...飲到好HIGH﹗



飲到全身濕晒﹗﹗﹗







SHABU SHABU湯底...只有少少柴魚味﹗


豬肉片,如果叫LUNCH SET就無架啦﹗不過我一片都無食﹗


牛肉,如果叫LUCNH SET就得一碟,任食...就是任食囉﹗不過我地2個加埋都只是食了 3碟﹗其實分別不大﹗

野菜,任食/ LUNCH SET都是任食的﹗


所以其實如果是細食的,LUNCH SET應該已經好夠,放題另一樣唔同的是有雪糕食囉﹗不過我地食得晏,雪糕都差不多清晒,剩返的就溶晒﹗我好大膽...我都食咗一杯﹗﹗﹗其實溶咗的雪糕,真是唔應該食﹗﹗﹗

之後出去同大頭妹玩多一個圈﹗佢全程都勁HIGH囉﹗



係咁打啲BALLOON﹗


係咁衝﹗我都捉佢唔住﹗要阿旺先搞得佢掂﹗

有人排隊影相架﹗佢係咁爬上去,被阿旺捉走﹗


玩得好開心﹗頭髮都亂晒﹗



之後無人排隊啦﹗叫佢坐底影相,又唔肯喎﹗


係都要爬...TROUBLE TWO果然名不虛傳﹗﹗﹗下個月就2歲啦﹗


寫明唔比爬架﹗唔好要我地難做啦﹗



最後都是比爸爸捉走咗﹗
Related Posts Plugin for WordPress, Blogger...