2013年10月30日 星期三

萬聖節快樂﹗

萬聖節快樂﹗
今日係萬聖節,唔知幾時開始,
萬聖節變成香港嘅大節之一,
除咗去兩大主題公園同蘭桂坊之外,
依家仲可以玩下相機 apps應下節﹗

 One2Free Playgroup 手機app 嘅 「多Fun相機」,
推出咗一系列萬聖節嘅sticker,好得意架﹗

小丸子: 記得要比糖我食架﹗唔係我會咬你架﹗
(其實佢係唔係都會咬人架啦﹗)

大頭妹: trick or treat﹗

去等位飲茶...2隻小鬼好似想拆咗人地個商場咁﹗

小丸子好鍾意影相,次次見到有手機對住佢就會自己擺 post,
不過其實我只係自己玩手機之嘛﹗
heheheh...睇佢口形...佢自己講 cheers...要人影佢﹗

推出咗好多萬聖節 "金句" ﹗

仲有萬聖節 sticker﹗(咦?﹗又多咗幾款喎﹗)

  呢個apps最好就係可以直接 upload上微博/ instagram/ facebook/ wechat﹗


2013年10月29日 星期二

一風堂

哈哈﹗我又再次好 outdated﹗
因為 "一蘭" 效應, 先幾日先第一次食 "一風堂",
lunch time都要排 around 20 mins,都ok啦﹗
之後我阿妹去 "一蘭" 八掛下,下午 3:00幾都仲要排,
不過應該好快就可以去試下架啦﹗

 今次試完 "一風堂",感覺上 "豚王" 好味啲﹗
哈哈...我係以 "山頭火" 做個比較,
上次食完 "豚王" 覺得好食過 "山頭火" 好多,
今次食完 "一風堂",感覺上好似只是好少少,
不過 "一風堂" 塊豬腩肉就最好味﹗ 


我點了赤丸﹗

大頭姨姨點了白丸﹗

另外再點了醬油半熟蛋﹗食拉麵的時間,我一定要點半熟蛋﹗

都有好幾款 "配料"。

我的赤丸 (依家見到都想食...)

阿妹的白丸,其實都唔係即係辣同唔辣呢?

半熟蛋﹗

一風堂 (中環): http://www.openrice.com/restaurant/sr2.htm?shopid=96369


大家 like咗我地嘅 facebook page未呀﹗請多多支持﹗

2013年10月28日 星期一

Home Sweet Home Project (地磚/ 牆磚)

上星期六約了師傅去睇磚,師傅話下下星期先要磚,都仲有時間﹗
不過我地最後都係決定係灣仔買﹗
雖然好多人都話旺角嘅平啲,但阿旺睇完又話差唔多,
我最近公司又好忙,請唔到假,唯有信阿旺的匯報啦﹗

地磚反而容易揀,我地一早就有共識想要 "木紋磚"﹗
當然木紋磚都有好多款,不過我地又想要意大利磚,
計埋 budget,範圍就縮得好細﹗
 
有啲好靚嘅意大利木紋磚,我地屋企咁細,
都要 $30k以上 (仲未計地腳線),真是太太太太太貴啦﹗
最後我地揀咗一款 "條狀" 嘅,大約係 7.5寸 * 3呎,
400呎地方大約 $18k (連地腳線),都算係 within 我地 budget啦﹗
其實佢同款有 600mm * 600mm嘅 (大大塊方形個款),
不過阿旺話如果要木紋,就梗係要條狀先似﹗
咁又多幾千蚊呢?﹗

我發覺原來裝修嘅時候,男人係闊綽過女人好多﹗
咩都話用 10年以上架喎﹗買靚少少啦﹗
上次去煤氣公司嘅時候又係咁﹗

我地揀嘅地磚就係呢款啦﹗
就咁睇好似好淺色,店員話大面積的時候就會深色啲﹗

$73@,有啲去到 $200@都有架﹗

即係由下數上第3款﹗有 2個小朋友,唔敢揀太淺色﹗
其實我比較鍾意由上數上第 1款架 (再深色少少同大塊少少)﹗
不過又貴幾千 (要過 $20k)﹗

之後係浴室牆身磚,我想要 "令面",好似酒店 feel﹗
但唔知點解幾間鋪都話依家唔興?﹗
師傅話自己間屋自己鍾意就得,唔洗理興唔興架﹗

我就係鍾意呢款囉﹗大陸磚都要 $30@,都幾貴﹗

佢地其中兩幅 display,exactly就係我想要的浴室牆同地磚,都幾 match吖﹗

不過地磚最後揀咗差唔多色,有紋嘅,阿旺話覺得無咁跣。
浴室廚房地磚 $38@ (馬來西亞)。

呢款係廚房磚,有少少 "橫紋",米米地色﹗
個店員話廚房見光的地方少,佢自己都覺得唔洗買貴嘅﹗
馬來西亞製 $18@,店員推介﹗

同師傅出去睇材料都掛住打機,我問佢係唔係想我做 "15巴港女" (再打多一巴)﹗
即刻尷尷尬尬比我影底佢嘅 "罪證"﹗

今日襯師傅係度仲睇咗浴室/ 廚房/ 大門,初步都有個概念﹗
我地以前住 2間屋都未試過裝修,
依家先知...裝修真係好似 "燒銀紙" 咁﹗

興發磁磚行: 駱克道241號

大家 like咗我地嘅 facebook page未呀﹗請多多支持﹗


2013年10月26日 星期六

Look of the week - 15 Oct 2013

 今次呢條裙係我最近最常著嘅﹗
因為 open piece方便易襯,
質地又好舒服,有少少質咁,又唔會太厚,
最重要係唔 "吉" 身﹗

我最近一口氣連續買咗 3條 one piece,
先兩日又係 topshop 睇中一條粉紅色 one piece,
個粉紅色真係好靚架﹗
不過今季已經買得太多 one piece,
超級掙扎中﹗﹗﹗


今日是 "幾何圖案" look (裙同手袋都係)﹗
 

似唔似中國的 "如意結"?

One piece: Zara
Scarf: Zara

大家 like咗我地嘅 facebook page未呀﹗請多多支持﹗

2013年10月25日 星期五

Home Sweet Home Project (10 - 25 Oct 2013)

新屋開始裝修啦 ﹗

睇完通勝,叫師傅10月10日開工,不過其實只是起咗地腳線,
無辦法因為之後 11/ 12日都忌動土,13日星期日唔開得工,
14/15日就沖羊同猴﹗
哈哈哈﹗我係唔係好神婆?﹗
其實我都唔識架,不過公司有本通勝就 "參考" 下囉﹗

哈哈,唔寫 blog都唔知,原來都開咗工兩星期,
 唔怪之得...兩個食咗豬油膏的夫婦,不停比裝修師傅催﹗
通常只有個客催師傅...我估個師傅都好無奈﹗

我地仲未揀好地磚/ 廚廁磚,
上星期日係灣仔睇咗一次,初部有少少 idea,
 不過人人都話旺角平啲,
無理由唔去旺角行個轉就係灣仔買架﹗
不過今個 weekend 應該會決定架啦 (唔係師傅可能會殺咗我地)﹗
又未睇冷氣 ,最初以為家電唔洗咁早睇,
但因為我地由窗口機改分體式,
所以要早少少決定,師傅先知點 "作喉",

又未決定煤氣爐,我就話買煤氣公司的 "3寶套餐",
阿旺又嫌人地唔夠 "靚仔"﹗靚仔...要錢吖嘛﹗
我依家先知,原來煤氣爐好貴架﹗
 阿旺想要薄身嘅,要成萬蚊﹗


客廳

飯廳

睡房 1

睡房 2

廚房

浴室

師傅都比我地睇返,一卸走個假天花,浴室個天花好 "恐怖" ﹗

之前睡房個入牆衣櫃,拆開入面原來發晒霉﹗
因為之前浴室漏過水,之前仲話想唔換地板?﹗

大家 like咗我地嘅 facebook page未呀﹗請多多支持﹗

2013年10月23日 星期三

早上的親子時間- 大頭妹第一次成功吹波波

未有小朋友之前,我同阿旺真是好 "宅",
有小朋友之後,其實都不是好好多﹗
之前夏天,我都經常放工之後 9秒9返屋企,
襯仲有少少陽光的時候,同大頭妹同小丸子去公園玩下。

不過自從入秋之後,放工返到屋企,太陽伯伯都收工,真是少去咗公園﹗
我覺得小朋友成日 "屈" 係屋企唔係幾好,
諗來諗去,終於比我諗到啦﹗
我今朝 6:30就起身梳洗,再叫醒埋 2個囡,一齊去公園玩﹗﹗﹗
 原來好開心架﹗空氣好似真是比平時清新添呀﹗


 我叫大頭妹去刷牙,小丸子又跟埋入去,之後我自己換衫,
出嚟剛剛比我見到大頭妹幫小丸子擠完牙膏,
比返支牙刷妹妹的情景,真是感動到喊呀﹗

好多人見完佢兩姐妹都話,阿妹好惜家姐,咩都學家姐,
教好家姐就可以教好個妹﹗希望我真是做得到啦﹗

3歲半的大頭妹仲未識吹波波﹗不過佢今日終於學識咗啦﹗

佢最初都唔肯吹,要玩長個支,點知玩玩下甩咗﹗
我就順勢話整唔返,叫佢玩吹個支﹗

小丸子就自己 "琴高琴低"﹗

你都唔知危險架﹗媽咪真係怕咗你呀﹗﹗﹗
今日一個早上都跌咗 3次﹗

嘩嘩嘩﹗終於吹到啦﹗請大家鼓掌﹗

雖然我知好多小朋友 2歲多就吹到,不過大頭妹一直都好 "抗拒”,
佢對自己做唔到的事會特別抗拒,同無自信,
之後無論你點叫佢,佢都唔會做,仲係試都唔試個種﹗
我今日終於氹到佢試,同教到佢做,我真是好開心呀﹗

我最近跟專家學咗幾招同小朋友溝通的技巧,
好似真係應用到,真是好開心﹗

不過因為今次是第一次一朝早返學前去公園,
大頭妹唔肯走,扭咗一陣計﹗
不過我呢個囡真係好搞笑,佢一邊話唔返屋企,一邊又跟我行返屋企﹗
 我只是不停安慰佢,同佢講聽日再嚟過﹗
hehhehe...不過希望我聽日都起到身啦﹗
我都唔想對個囡開 "空頭支票" 嘛﹗

 
專登拍 video比返爸爸睇架﹗大頭妹第一次成功吹波波﹗



大家 like咗我地嘅 facebook page未呀﹗請多多支持﹗

2013年10月22日 星期二

小丸子 第16堂playgroup@Kidsquare

唔經唔覺,小丸子已經係 Kidsquare 上咗 16堂 playgroup啦﹗
因為之前一早幫小丸子報咗一間幼稚園的 playgroup,
9月星期六早上開始上,
Kidsquare 呢邊就轉咗星期日早上,
搞到星期六﹑日都無得瞓晏少少,
所以都瞓梗繼唔繼續上 Kidsquare 呢邊。

我又好唔捨得 Ms. Ho喎﹗
佢真係好用心教小朋友架,
仲會教埋我地家長好多同小朋友溝通/ 教小朋友嘅技巧,
就算我唔係新手媽咪都覺得好有用﹗
而且我又好鍾意上完堂去食 "華星"﹗

出發去上堂﹗

呢位小朋友坐唔定的指數係...坐地鐡都唔會坐﹗

佢鍾意企係車箱中間表演﹗

大頭妹就坐定定同公仔玩下﹗
我都係自己做媽咪之後先知,原來兩姐妹的性格可以咁唔同﹗

warm up time﹗

今日的主題是 tree 同 leaf,岩岩就係前一日interview問過...

學吹樹葉﹗

哈哈哈﹗比媽咪整蠱﹗

上完堂去食華星﹗次次食華星,兩姐妹都會自己食,真係好開心﹗
其實如果唔戒意小丸子食到天一半地一半,佢依家都算識自己食﹗


大家 like咗我地嘅 facebook page未呀﹗請多多支持﹗
Related Posts Plugin for WordPress, Blogger...