2019年5月31日 星期五

氣餒



今年小丸子讀小一,轉眼嚟到下學期,講真做阿媽既真是有啲氣餒!我唔知是我放少咗時間比佢,定真是資質問題,成績又唔係話好差,但有好大進步空間囉,而且中英數都補齊!當年大頭妹小一都唔洗點理,雖然一樣補齊中英數,但我好記得我第一個學期睇錯時間表,考試溫錯科目,出嚟成績都無大問題!即是補完我唔洗理,原來唔係必然!

今年小丸子,相比大頭妹當年就一定無比咁多時間佢,依家要睇2個,時間得返一半,所以某程度我要負好大責任,當我睇多啲阿妹,家姐就比老師寫手冊話較經常做漏功課,睇多啲家姐個排,又到阿妹比老師寫手冊。 完全是「如果太多牛奶味,朱古力味無定企;等到朱古力味返返嚟,牛奶味又唔爭氣!」🤦🏻‍♀️🤦🏻‍♀️🤦🏻‍♀️

我成日同自己講,做阿媽既有咩重要過小朋友健健康康,其實呢方面小丸子做得好好,食得、訓得,痾得!長期係成長線75%以上(可能90%以上🤭),又唔揀飲擇食!


對人熱情,直率,天真,經常笑咪咪!


愛自己,有自信(唔知那來的自信!)。


阿旺話佢開心就好了!但我唔開心呢!其實係咪應該係我要做到求學不是求分數。

沒有留言:

張貼留言

Related Posts Plugin for WordPress, Blogger...