其實之前都寫過一次食譜，當時是第一次成功之後寫。之後試過好多次，終於掌握到秘訣！原來花雕最好先煮一煮，這樣就算多放幾天，都不會帶苦澀味，因為煮揮發了酒精，特別適合我這種少少酒都醉的人！
醉鮑魚好適合宴客，因為可以早1-2日前準備，母親節第一次買南非鮑魚整醉鮑魚，今次比較大隻6隻大約$180多少少，之後阿旺試過買一次8隻$200，我平時買中國細隻的鮑魚就$50/6隻，以上都是我樓下超市價，出面街市應該平少少。
真是好大隻，其實計返條數同中國鮑魚差不多價錢，一隻差不多等於2-3隻。
有我手掌的大小！
第一步當然是洗刷鮑魚啦！
尤其是頭/咀的位置，新鮮的時候，一刷這個位置就會收縮⋯縮起來就刷不乾淨，所以最好先刷這個位置。
薑蔥鮑魚凍水一齊落，大火水滾之後，轉中細火煮6-10分鐘，視乎大小，我今次的南非鮑都是煮了10分鐘。
用匙羹在薄的一邊插入，煮得夠熟的話，應該是不需要用力，鮑魚就會自己甩出嚟，如果要用力剷的話，就可能未夠熟，要煮多一陣啦！
我洗的時嘅沒有去內臟，新鮮時會比較難，煮熟之後就容易好多，不過記住因為這個步驟之後就是浸酒，不會再煮，所以清洗時最好用熟水啦！
這就是咀的位置（其實我不知道是不是咀，不會是pat pat吧！），要去掉，煮熟之後細細力就可以扯出來。
要用食水再洗一洗這個位置，否則食的時候可能會有沙。
煮鮑魚的時候可以同步煮酒，我喜歡用冰糖，所以可以在這個時候一齊加入煮溶。
洗到白雪雪！
大約煮走了50ml，總之煮到沒有酒精味，得返酒香就可以。
薑醋的罌，現在我用來浸醉鮑魚。
這個size，我浸了6隻鮑魚加4隻蛋。
材料：
南非鮑魚6隻
花雕 250ml
糟鹵 250ml
冰糖 1湯匙
杞子 1湯匙
圓肉 1湯匙
做法：
1. 先洗刷鮑魚，但唔洗去內臟，新鮮的時候容易𠝹手。
2. 凍水落薑、蔥、鮑魚，水滾後轉中細火煲7-10分鐘，視乎鮑魚大小，起肉去腸和嘴，再輕輕用食水清洗多一次。
3. 將花雕酒、冰糖加熱至冰糖溶解，再倒入糟鹵、加入杞子及圓肉放涼。
4. 將鮑魚放入玻璃樽/盒內，倒入已放涼的汁料，放入雪櫃浸泡1晚至入味。
可以留返個殼上碟。
上面加點海膽、三文魚子，日式Fusion 風味！
