2014年10月28日 星期二

工人問題 1

好少係blog講我新工人姐姐,不過其實佢唔新,同我都做第2張約,即是已經做了 2年幾﹗不過我仍然改唔到口叫佢 "新工人姐姐",因為佢的表現仍然是一個新工人﹗2年來可以無進步過﹗之前聽人講,請工人頭 3個月一定好,之後就好難講,但我個工人連頭 3個月都未好過﹗

首先,是溝通問題,我估都好普遍。明明佢話自己識英文,見佢睇電視又識笑,即是應該都明明地廣東話啦﹗但好多時一個指令,中英文講晒佢都仲係唔明我講咩﹗例如: 一次問佢 2個囡食開的貝殼粉係邊?﹗我指住平時放通粉個位用英文問佢shell﹑shell pasta,佢答我冇,但明明噚日先食完。再用中文問佢: 貝殼粉,佢都好似完全唔明,最後比我係個櫃找到一包新的,我再問佢之前食開的係邊,佢話原來佢噚日最後煮晒。我問佢點解佢唔明我講咩?﹗我已經指住平時放通粉個位,佢話以為我講螺頭 (煲湯個啲),但我已經同佢講咗我煮 lunch 比 2個囡食,又點會要螺頭呢?又話如果我講通粉佢會明﹗

另一次係 "餃子",我打電話叫佢煎定餃子,同佢講明韓國餃子白色袋,佢不停話冰箱無,但我好肯定有,之後我返到屋企一打開,係有架囉﹗我已經同佢講晒 dumpling/ 餃子/ korean dumpling/ 白色袋,而當時冰箱只是得幾樣野,只有一樣野係白色袋﹗我叫咗佢煮公仔麵,有咩可以配公仔麵呀?﹗有時真係唔知佢係唔想做扮唔明,定真唔明﹗

其次,佢做野超慢,但最後結論是佢 hea 做(我以前信佢真是慢),唔知係唔係佢前僱主要佢12:00瞓,佢每晚都做到11:00有多,但唔知點解晏晝唔做野,夜晚洗碗又要洗個半鐘(我地每日大約8:30食完飯,當佢9:00食完,但每日10:30先洗完碗,有時 11:00)!我朋友見過話覺得佢 hea洗,但見佢兩年都係咁,老實講,晚晚都咁夜瞓都攰架(雖然我知佢有瞓晏覺,睇cam見過,2個囡都講過),所以我選擇信佢慢!不過因為 2個囡一齊病咗,我請假睇住佢地,我地2點開始瞓晏覺,瞓到4點,我比工人姐姐講電話聲嘈醒咗。起身望一望間屋,前日叫佢抹風扇未抹(好一陣子之前已經叫佢抹,但一直無抹),大頭妹早上嘔完件衫仲未洗,早上開機洗的床單未涼,衫未收!我問佢 2個半小時佢做過咩呢?佢話佢執咗房(只是摺張被),執咗玩具 (如果我執唔洗 5分鐘),洗咗菜(但其實係岩岩開始洗,我見花都未搣,應該係佢聽到我起身,就倒啲菜出嚟扮洗)。我話呢 3樣野點都唔洗做 2個鐘﹗佢就話佢食咗蕃薯,同埋企係廚房!我依家先知原來企係廚房,都算是工作內容? 

最最最嘔血是佢極污租,一件衫著3日!叫佢要日日換,佢仲話著2日都OK,叫佢要日日洗髮,都是隔日洗!已經買埋風筒比佢,叫佢夏天要日日洗,我無特別檢查,但成日見佢抓頭!試過比我捉到佢1件衫著3日,仲死口唔認,話自己前一日係著另一件衫,直至我拎返佢前一日幅相比佢睇佢先收聲,我都問佢佢係搵藉口,定真是唔記得,佢就無答。連阿旺都頂唔住再問佢到低係唔記得,定係唔明我地講咩﹗老實講...2樣我都唔係太接受到﹗如果連自己都唔記得自己前一日著咩衫,我覺得真係好離譜﹗

好多人問我咁點解仲續約,因為怕請湊兩個難囉,而且佢續約前都交過下戲!當時阿旺話唔想博!我又唔想負要博的責任,所以最終都同佢續約﹗唉...如果大家有好的介紹請通知!

10 則留言:

  1. 用工人有時真係幾嘔血, 最慘炒佢都好傷, 下一個又唔知會唔會仲衰, 加上有人質係佢手, 揸頸就命

    回覆刪除
  2. 唉~揾到肯湊兩個小朋友既工人, 算偷笑. 我唔敢博. 其實隔日洗頭係OK既, 我自已都係隔日洗頭, 哈...

    回覆刪除
    回覆
    1. 佢同我講隔日洗...但其實我都唔知係唔係,問題係佢成日r頭,r完頭又抱我個女...抱住我個囡又r頭...唉...

      刪除
  3. 回覆
    1. 係呀﹗如果佢續約前唔交戲...我就直接轉過一個啦﹗不過...屋企人都話小丸子好難搞...叫我體量下佢﹗但如果我係屋企,小丸子掂都唔比佢掂...我真係 feel唔到佢惜佢囉﹗

      刪除
  4. 唉!忍下啦!你講果啲問題,都是少問題,如果不是偷竊、借錢追數上門就算,個個差不多!所以話,而家請工人,真是貼錢又受氣,同情!

    回覆刪除
  5. 最慘係佢又唔係衰大獲野 我家工人都係咁 但無計 唉

    回覆刪除
  6. 係...你話如果係虐兒﹑偷野﹑借錢...就唔洗諗啦﹗即炒﹗咁佢對我家 2個小朋友都ok嘅...煮食都還可以,只是個人長期 slow motion啫...

    回覆刪除
  7. 我工人都係咁, 問佢咩都話唔知,咩都話冇!!
    煮野食又唔得, 
    攪D女又唔得
    宜家第3張約了。。。 重月黎月差,真係後悔同佢簽左!!

    回覆刪除

Related Posts Plugin for WordPress, Blogger...