小丸子第5次interview@明我幼兒園

上星期日去最後一場 interview啦﹗因為星期五情人節當日收到之前 interview 幼稚園 offer letter，所以今次 interview嘅心情就當對輕鬆啦﹗唔知係唔係小丸子自己都知道已經有學校收佢，今日...佢好唔合作﹗阿旺話小丸子只是想証明佢係清白，唔係我帶佢去 interview，佢就一定乖乖地嘅﹗hehehe...佢仲對我係 blog (同次次見親朋友講考幼稚園時) 話佢帶小丸子去 interview，小丸子咩都唔做而耿耿於懷﹗

都講下 interview流程啦﹗我覺得相當好，全程都唔洗點等，一入門口拎籌就上 1/F課室等，只准一個家長帶 interview，但有另一間房比另一個家長坐住等。等候期間有佢地畢業典禮嘅 video睇，唔錯唔錯，可以多啲了解學校。

之後就開始 interview，interview 分 3 part，第 1 part 係玩玩具，老師睇小朋友玩玩具，無問問題﹗

第 2 part係 sit down interview (小丸子弱項)，一開始老師同小丸子打招呼，小丸子有同老師打招呼，老師同小丸子握手，佢就唔係太願意。之後老師問小丸子我係邊個，小丸子好細聲咁叫咗一聲媽咪，不過老師應該聽唔到 (因為個班房同時有 around 8組 interview，都幾嘈下)，之後拎咗個 ball 同杯出嚟，問小丸子係咩，叫小丸子講出物件名稱先比個 ball ball佢，老師都好有耐心，小丸子隔咗好耐之後先好細聲講 ball。之後老師問佢個杯用嚟做咩，小丸子又無反應。最後老師同小丸子媽媽眼﹑鼻﹑口係邊，佢都無反應，老師都比咗幾多時間佢，佢都無反應，我都無辦法﹗ 

最後一 part應該都係 interview一部份，見校長﹗等見校長期間佢見到學校嘅 decoration又話 "好靚呀﹗"，之後唔知係唔係見到小朋友生日表嘅月份又係度自己數 one - ten，等我諗住佢都會有啲反應比校長呱，結果都係無反應﹗校長叫小丸子自己揀一架玩具車，小丸子無反應，校長比佢都唔收，之後我自己揀一架比佢，佢先要。但之後校長再比糖佢，佢就 9秒9拎咗，好彩叫佢講 thank you，佢都有講﹗

食糖食得你咁開心﹗

見老師校長時又無反應﹗

其實帶住 2個囡去見過幾間幼稚園都明白，學校 interview嘅模式就係佢地上堂嘅模式，有時小朋友 interview表現好，有時差，可能都同佢地適合什麼教學模式有關，希望大家都幫自己嘅小朋友揀到合適嘅幼稚園啦﹗


大家 like 咗我地 facebook page未呀？﹗未 like就快啲 like啦﹗

新斗記@20140211

 

上星期二跟阿旺的中學同學到新斗記晚飯團拜，食物環境都不錯，只是訂位分 2個時段，6:00/ 8:30，對有小朋友的我們來說，8:30吃完差不多 11:00 太夜了...但 6:00又未放工﹗價錢如果不點海鮮其實都不太貴﹗

花生木瓜湯 $98，好好味，不知道有沒有放味精呢？﹗

乳豬好似是必吃的，我們 8個人點了半隻 $338﹗

阿旺點的豉油王中蝦，這碟差不多 $5xx，即是 $70@﹗好味是好味，有點兒太貴了﹗

海味雜菜煲 $98

燒鵝，8:30入坐，點菜的時候已經得返 1/4隻﹗

因為得 1/4，沒有 "胸"，感覺無肉食，不過味道是不錯的﹗

薑蔥蠔煲 $168，我沒有吃...我不吃蠔的﹗

豉油王鵝腸...又是阿旺點的...$118...得少少鵝腸...

當我問他懂不懂點菜 (點埋啲又貴又唔飽肚嘅﹗)...他說他識揀老婆就得啦...(我即時無話可說...)

粟米斑塊，魚同汁是分開上，可能是想保持魚脆身，但是我都是鍾意連汁一起煮的多一點﹗

咕嚕肉 $88，好味又抵食﹗

蒸豆腐

炒花甲

大家 like 咗我地 facebook page未呀？﹗未 like就快啲 like啦﹗

小丸子第4個interview@北角衛理堂

上星期六又去 interview啦﹗心情都有少少緊張，因為之前 2間都無交留位費，之後家姐間學校唔收，完全打亂晒陣腳，小丸子仲未有 offer﹗上次一月份考嘅一間，要 3月先知結果，反而今次呢間，一星期就有結果 (應該情人節就有結果啦)﹗另外仲有最後一間就今個星期日去考﹗最後考嘅 3間都係區內名校，其實話唔擔心就假，小丸子好大機會會無書讀﹗因為就算 interview表現幾好都好，永遠都唔會知收生準則，而且龍B競爭大，你以為自己表演好，可能其他小朋友表現更加好﹗

講返今次 interview，學校限一個大人帶小朋友 interview，今次當然係我帶小丸子啦﹗8:45 interview，一開始要係學校嘅禮堂等，我覺得都幾 challenging，要小朋友乖乖地坐定定，真是有啲難度，呢part我唔知係唔係 interview嘅一部份，不過就算唔係 interview一部份，我都見有小朋友等得耐開始扭計，唔知會唔會影響小朋友之後嘅表現﹗

之後就排隊入課室，3-4個小朋友一張枱玩玩具，之後老師會逐個小朋友問問題。首先老師同小丸子講早晨，小丸子有回應老師 "早晨"，仲點埋頭。之後老師送貼紙比小丸子，小丸子即刻伸手拎，我叫佢要講 thank you，佢都有講。之後老師拎一盤玩具食物同小丸子玩，小丸子接完老師嘅食物就比我，老師叫佢食，佢拎咗香蕉扮搣皮然後食，但老師叫佢比香蕉老師，第一次佢就唔做，佢放返香蕉入藍，我叫佢比雞肶老師，佢就比咗﹗

之後老師同小丸子玩老師未行埋嚟時，小丸子玩緊嘅飛機，老師推架飛機，叫小丸子推返比老師，又叫小丸子推比媽咪，我推返比小丸子叫佢比返老師，佢再推比老師。之後老師拎走個機司，叫小丸子放返入去，小丸子想放入客人坐位，我提佢頭先老師係邊度拎架，佢都即時識得放返原位，老師叫佢要令返好個方向，佢就無做啦﹗第一部份 interview就完啦﹗

第 2部份是做運動，小朋友圍圈坐前排，家長坐後排。起初小丸子唔係好肯坐底，之後老師拎咗隻跳跳虎出嚟成功吸引咗小丸子嘅注意力，同跳跳虎打完招呼佢就坐低啦﹗之後老師就叫佢地起身做運動，要轉轉膀頭﹑扭扭腰﹑轉轉頭﹑拍手﹑踎低﹑起身再跳高，第一 round小丸子全部做齊，第 2 round就無踎低，其餘全部做整，之後老師叫佢地行返埋位，小丸子都第一時間返埋位坐低。其實我覺得小丸子做得非常好，唯一係...佢唔係企係自己個位前面做，佢行出去老師前面做。

學校入面唔比影相，出咗去就影返張相啦﹗希望有機會返呢間幼稚園啦﹗

之後爸爸話要食早餐﹗

心情唔錯﹗

老實講我好滿意小丸子嘅表現，不過我都唔敢太大期望，如果最後學校唔收，我都覺得小丸子已經盡咗力﹗

大頭妹3歲9個月成長誌 - K1 上學期評估

仲未收到大頭妹嘅成績表，但我怕太耐之後我會唔記得老師講過咩，所以都係快快手打返個blog﹗

其實 K1幫大頭妹轉咗國際班，要用英普上堂，心情都真係好矛盾，因為我同阿旺係屋企都係同佢講廣東話，明顯地因為佢唔識普通話，我同阿旺係屋企亦都唔識教，所以見佢返學好似辛苦啲，因為其他同學可能都識同老師溝通，而佢又唔識同老師溝通，我覺得唔多唔少影響咗佢嘅自信心。上咗半年，老師話佢地頭半年主要係學 "聽"，下學期就會多啲學 "講"，所以老師話下半年應該就會好啲架啦﹗

英文方面，老師話佢都中規中矩，唔係最叻個啲，都唔係最差個啲，不過仲係成日一行埋去老師度就講廣東話先﹗老師建議我地一個星期一日全日都同佢係屋企講英文，我覺得佢嘅建議好好，不過仲未實行 (懶)，依家通常係如果佢有 SPECIAL REQUEST，例如想食糖/ 飲橙汁，我就一定要佢同我用英文 REQUEST，我先比佢，希望佢多啲動力去講。

老師話整體上佢都好乖，有少少完美主義，上堂做完堂課會問老師做得岩唔岩，老師話岩佢先交比老師，唔岩就會再做過。佢鍾意做勞作，上年 PN 嘅班主任都有講過，所以我成日都想比佢去學畫畫，但爸爸話只可以上 2樣課外活動。另外，老師話佢同一個男同學好好朋友，去邊都一齊，老師仲話個男同學會保護佢，哈哈哈...真係盡得我 "遺傳"﹗

不過係小朋友面前講野要好小心﹗試過有一次佢同小丸子打交，我同爸爸解釋返因為小丸子想我同佢瞓，要面向佢，唔比我同大頭妹瞓，唔係故意打家姐，之後大頭妹就一直記住，次次妹妹霸位瞓覺嘅時間佢就好緊張，問妹妹係唔係唔比媽咪佢﹗

最近成日會叫我幫佢影相 SEND比爸爸睇﹗

HEHEH...同佢去食壽司好平，佢食得一碟蟹柳卷 $13。

新年我放咗幾日大假同佢去公園玩，佢又叫我幫佢影相比爸爸睇﹗

去完公園玩即刻叫肚餓﹗

食完仲瞓埋...我真係 "捉蟲"，早知叫工人姐姐帶佢返屋企先啦﹗

又叫我幫佢影相比爸爸睇...

小丸子22個月成長日誌

 
 
好似有好幾個月都無寫小丸子嘅成長日誌 (岩岩睇返，上一篇成長日誌是 18個月...)，原來成 4個月無寫，唔怪得我覺得佢進步咗好多，覺得有野寫，要記底佢啦﹗

呢幾個月醒咗好多，開始講句子啦﹗通常都係因為要食 "我要 XX"，XX會係 TEA﹑JUICE﹑CHEESE﹑奶奶﹗仲識同我投訴家姐 "家姐打人"﹑"我話比咪咪知"，但其實係佢打家姐先。最近仲識唱好多歌，可以唱晒成首 ABCs song，其他好似 5 little monkeys, finger family，雖然唱唔晒成首，不過起碼一聽就會知佢唱咩，成日想錄低同大家玩下估歌仔，不過通常我一錄佢就唔唱，就會搶手機。另外，成日都問 "咩聲呀？"，連自己放屁都問我咩聲，真是比佢吹脹﹗
 


之前話佢坐唔定，最近忽然好咗，可以坐低聽 2-3個故事，以前怕佢唔鍾意聽故事，依家晚晚都要我講 3個故事先肯瞓，但佢好得意，每晚都自己揀 3個故事， 2本中文: 小紅帽﹑狼來了，1本英文: Max & Millie 系列其中一本，最近佢鍾意聽 start school 個本，唔知係唔係因為我成日同佢講，佢 interview時要乖啲，唔係出年無書讀呢？所以各位媽媽都要努力，坐定定同睇書都係可以慢慢陪養，只要媽媽有恆心就得﹗



今個月最叻叻是已經戒片，當然都有失手嘅時候啦﹗一日都會失 1-2 次手，但比起之前 10次得 2-3之唔失手，依家1日都只係失 1-2次手，我覺得好叻叻架啦﹗仲有出街都識得同我講要 wee wee，我覺得已經係成功嘅一大步﹗

最近我買返個磅啦﹗佢依家 27-8磅， 85cm高，都好多個月無重過，所以人人見到佢都話佢瘦咗，唔知仲有冇超重呢？﹗  仍然無咩頭髮，以前大頭妹細細粒，以為佢唔夠營養，所以少頭髮啦﹗小丸子咁大粒，都係無頭髮，真係好羨慕人地啲小朋友有好多頭髮﹗

性格有少少固執，喜歡指揮，佢每晚都會安排我瞓咩位置，面一定要向住佢，唔可以向家姐﹗有時為咗霸住我，佢會坐住我，唔比我走開...(最近好痴身，如果我係屋企，連工人姐姐都唔跟，連去廁所抹pat pat都指定要我做...)﹗不過佢有一樣野好乖，就是 sharing，佢有咩好野都會第一時間問我攞，然後再分比姐姐，第一次食 "熱浪" 薯片，我睇住佢對眼好似 "叮" 一聲咁，即刻問我攞多片，我以為佢貪心，問佢點解要多一片，佢話 "姐姐呢？"，我比佢之後，佢真係一支箭跑入廚房請姐姐食﹗之後...無論係士多啤梨﹑車厘子﹑維多C心心糖﹑金莎，佢一食完都要問我攞多粒比工人姐姐，難怪工人姐姐咁惜佢﹗